Yehova, e Dios di Bèrdat

“Bo ta salba mi, SEÑOR, Dios di bèrdat.”—SALMO 31:5, Beibel na papiamentu koriente.

1. Ki kondishon tabatin den shelu i riba tera tempu ku no tabatin mentira?

TABATIN un tempu ku no tabatin mentira. Den shelu invisibel tabatin kriaturanan spiritual perfekto ta sirbi nan Kreadó, “e Dios di bèrdat.” (Salmo 31:5, BPK) No tabatin niun falsedat, niun engaño. Yehova a komuniká loke ta bèrdat na su yunan spiritual. El a hasi esei pasobra el a stima nan i pasobra e tabata profundamente interesá den nan bienestar. E situashon riba tera tabata meskos. Yehova a krea e promé hòmber i muhé, i mediante su bosero, semper el a papia bèrdat ku nan den un manera kla i stret. Esei lo mester tabata algu maravioso!

2. Ken a introdusí mentira, i pakiko?

² Sin embargo, ku tempu un yu spiritual di Dios tabatin e tribilidat di kuminsá oponé Yehova dor di establesé su mes komo un dios rival. E kriatura spiritual aki, ku a bira konosí komo Satanas e Diabel, tabata kier pa otronan ador’é. Pa logra su meta, el a introdusí mentira komo e medio pa trese otronan bou di su kontròl. Dor di hasi esei el a bira “un gañadó i e tata di mentira.”—Juan 8:44.

3. Kon Adam ku Eva a reakshoná riba e mentiranan di Satanas, i ku ki resultado?

³ Via un kolebra, Satanas a bisa e promé muhé, Eva, ku si e ignorá e mandamentu di Dios i kome e fruta prohibí, lo e no muri. Esei tabata un mentira. Ademas Satanas a bis’é ku dor di kome e fruta lo e bira manera Dios, konosiendo bon i malu. Esei tambe tabata un mentira. Ounke nunka promé Eva a tende un mentira, e mester a ripará ku loke el a tende for di e kolebra no tabata kuadra ku loke Dios a bisa su kasá Adam. Pero tòg, Eva a skohe pa kere Satanas i no Yehova. Siendo totalmente gañá, el a kohe e fruta i a kom’é. Despues, Adam tambe a kome e fruta. (Génesis 3:1-6) Meskos ku Eva, Adam tampoko nunka a tende un mentira, i tòg e no a wòrdu gañá. (1 Timoteo 2:14) Pero ku su akshon el a demostrá ku el a rechasá Esun ku a trah’é. E konsekuensianan pa humanidat tabata desastroso. Debí na Adam su desobedensia, piká i morto—huntu ku korupshon i hopi miseria—a plama na tur su desendensia.—Romanonan 5:12.

4. (a) Kiko tabata e mentiranan ku Satanas a papia den Edén? (b) Kiko nos tin ku hasi pa Satanas no gaña nos?

⁴ Huntu ku eseinan, mentira tambe a plama. Nos tin ku atmití ku e mentiranan ei ku Satanas a papia den e hòfi di Edén tabata pa daña Yehova su reputashon komo un Dios ku ta papia bèrdat. Satanas a deklará ku konvikshon ku Dios na un manera engañoso a priva e promé pareha di algu bon. Klaru ku esei no tabata bèrdat. Adam ku Eva no a benefisiá di nan desobedensia. Nan a muri, manera Yehova a bisa ku lo a pasa ku nan. No opstante, Satanas a sigui kalumniá Yehova te na e grado ku siglonan despues apòstel Juan a wòrdu inspirá pa skirbi ku Satanas “ta gaña henter mundu.” (Revelashon 12:9) Pa evitá ku Satanas e Diabel ta gaña nos, nos mester tin pleno konfiansa ku loke Yehova i su Palabra ta bisa ta bèrdat. Kon bo por desaroyá bo konfiansa den Yehova i hasié mas firme? I kon bo por fortalesé bo mes kontra e engaño i mentiranan ku Yehova su Atversario ta fomentá?

Yehova Sa e Bèrdat

5, 6. (a) Ki konosementu Yehova ta poseé? (b) Kon hende su konosementu ta kompará ku esun di Yehova?

⁵ Beibel konsistentemente ta identifiká Yehova komo esun ku “a krea tur kos.” (Efesionan 3:9) Ta e “a traha shelu i tera i laman i tur loke tin den nan.” (Echonan 4:24) Siendo ku ta Yehova ta e Kreadó, e sa e bèrdat di tur kos. Pa ilustrá esaki, pensa riba un hòmber ku a diseñá su mes kas i despues a trah’é, pegando kada tabla i klabando delaster un klabu. Lo e konosé tur nachi di e kas i lo ta komprondé mihó ku kualkier opservadó kon e kas ta hinká den otro. Hende sa tur detaye di e kosnan ku nan diseñá i traha. Asina tambe e Kreadó sa tur loke tin di sa tokante loke el a krea.

⁶ Ku bunita palabra profeta Isaias a ekspresá e magnitut di Yehova su konosementu. Nos ta lesa: “Ta ken a midi e awanan den e hòl di su man, a marka e shelunan ku e hanchura di su man, a kalkulá e stòf di tera ku un midí i a pisa e serunan den un balansa, i e seritunan ku peso? Ta ken a dirigí e spiritu di SEÑOR, òf a instruyé komo su konsehero? Ta ken el a konsultá i ta ken a dun’é komprondementu? Ta ken a siñ’é den e kaminda di hustisia i a siñ’é konosementu, i a instruyé e kaminda di komprondementu?” (Isaias 40:12-14) Realmente Yehova ta “un Dios di konosementu” i ta “perfekto den konosementu.” (1 Samuel 2:3; Jòb 36:4, NW; 37:16) Esta tiki nos sa na komparashon kuné! Apesar di e konosementu impreshonante ku humanidat a akumulá, nos komprondementu di e kreashon material no ta ni sikiera “un punta di loke Dios a hasi.” E ta djis “un vrunvrun” kompará ku un “zonidu poderoso.”—Jòb 26:14, BPK.

7. Kiko David a rekonosé tokante e konosementu di Yehova, i p’esei kiko nos tin ku rekonosé?

⁷ Siendo ku ta Yehova a krea nos, ta lógiko pa konkluí ku e konosé nos bon. Rei David a rekonosé esaki. El a skirbi: “O SEÑOR, bo a saminá mi i bo konosé mi. Bo sa ki ora mi ta sinta i ki ora mi ta lanta; bo ta komprondé mi pensamentunan djaleu. Bo ta skudriñá mi kanamentu i mi drumimentu, i tur mi kamindanan ta konosí pa bo. Promé ku tin un palabra riba mi lenga, ya bo konosé esaki kaba, o SEÑOR.” (Salmo 139:1-4) Klaru ku David tabata sa ku hende tin boluntat liber; Dios a duna nos e kapasidat di obedesé òf desobedesé Dios. (Deuteronomio 30:19, 20; Josué 24:15) No opstante, Yehova konosé nos mihó ku nos konosé nos mes. E kier loke ta mihó pa nos, i e por dirigí nos kaminda. (Jeremias 10:23) Sí, no tin niun maestro ni eksperto ni konsehero mihó ekipá kuné pa siña nos e bèrdat i hasi nos sabí i felis.

Yehova Ta Papia Bèrdat

8. Kon bini nos sa ku Yehova semper ta papia bèrdat?

⁸ Sa e bèrdat ta un kos, pero semper ser onesto i papia e bèrdat ta henteramente un otro kos. Por ehèmpel, Diabel a skohe pa no “para den e bèrdat.” (Juan 8:44) Na kontraste, Yehova ta “abundá den . . . bèrdat.” (Eksodo 34:6) E Skritura konsistentemente ta duna testimonio di e echo ku Yehova ta papia bèrdat. Apòstel Pablo a deklará ku “ta imposibel pa Dios gaña,” i ku Dios “no por gaña.” (Hebreonan 6:18; Tito 1:2) Papia bèrdat ta un parti importante di Dios su personalidat. Nos por stèns riba Yehova i konfi’é pasobra semper e ta papia bèrdat; nunka e ta gaña su sirbidónan leal.

9. Kon Yehova su nòmber ta konektá ku bèrdat?

⁹ Asta Yehova su nòmber ta duna testimonio ku semper e ta papia bèrdat. E nòmber divino ta nifiká “E Ta Kousa pa Bira.” Esaki ta identifiká Yehova komo esun ku progresivamente ta bira Kumplidó di tur loke e primintí. Niun otro persona tin e kapasidat ei. Debí ku Yehova ta Esun Supremo, no tin nada ku por stroba su propósitonan di wòrdu realisá. Yehova no solamente ta papia bèrdat, sino tambe ta e so tin e poder i sabiduria pa realisá tur loke e bisa.

10. (a) Kon Josué tabata testigu di ku Yehova ta papia bèrdat? (b) Kua promesanan di Yehova abo a mira kumpli?

¹⁰ Josué tabata un di e hopi personanan ku a mira susesonan remarkabel ku a duna testimonio ku Yehova ta papia bèrdat. Josué tabata na Egipto ora ku Yehova a trese dies plaga riba e nashon ei. I kada un di e plaganan ei Yehova a profetisá di antemano. Entre e kosnan profetisá ku Josué a eksperensiá nan kumplimentu ta Yehova su promesa di libra e israelitanan for di Egipto i hiba nan na e Tera Primintí, dominando e poderoso ehérsitonan kananeo ku a bringa kontra nan. Na fin di su bida, Josué a bisa e ansianonan di e nashon di Israel: “Boso sa di henter boso kurason i di henter boso alma ku ni un palabra di tur e bon palabranan ku SEÑOR boso Dios a papia tokante di boso no a faya; tur a keda kumplí pa boso, ni un di nan no a faya.” (Josué 23:14) Ounke abo no a mira e milagernan ku Josué a mira, bo a eksperensiá durante bo bida ku e promesanan di Dios ta kumpli?

Yehova Ta Revelá e Bèrdat

11. Kiko ta mustra ku Yehova kier komuniká e bèrdat na humanidat?

¹¹ Imaginá bo un mayor ku tin hopi konosementu pero ku masha poko biaha ta papia ku su yunan. Abo no ta kontentu ku Yehova no ta asina? Yehova amorosamente ta komuniká ku humanidat, i e ta hasié na abundansia. E Skritura ta yam’é e “Magnífiko Instruktor.” (Isaias 30:20, NW) Den su bondat amoroso, e ta komuniká asta ku esnan ku no ta inkliná na skuch’é. Por ehèmpel, Ezekiel a ser asigná pa prediká na hende ku Yehova tabata sa ku nan lo no ta dispuesto pa risibié. Yehova a bisa: “Yu di hende, bai serka e kas di Israel i papia ku nan ku mi palabranan.” Anto Yehova a spièrt’é: “[Nan] lo no ta dispuesto pa skucha na bo, pasobra nan no ta dispuesto pa skucha na mi. Pasobra henter e kas di Israel ta kabesura i sobèrbè.” Esei tabata un asignashon difísil, pero Ezekiel a kumpli kuné fielmente, i dor di hasi esei, el a reflehá Yehova su kompashon. Si abo tin un teritorio difísil pa prediká i bo ta dependé riba Dios, bo por tin sigur ku lo e fortalesé bo meskos ku el a fortalesé profeta Ezekiel.—Ezekiel 3:4, 7-9.

12, 13. Den ki maneranan Dios a komuniká ku hende?

¹² Yehova ta deseá pa “tur hende wòrdu salbá i yega na konosementu di e bèrdat.” (1 Timoteo 2:4) El a papia pa medio di profeta, pa medio di angel i asta pa medio di su Yu stimá, Hesukristu. (Hebreonan 1:1, 2; 2:2) Hesus a bisa Pilato: “Pa esaki mi a nase i pa esaki mi a bin den mundu, pa duna testimonio di e bèrdat. Tur esnan ku ta [na banda] di e bèrdat ta tende mi bos.” Pilato tabatin e oportunidat presiosísimo pa siña direktamente for di e Yu di Dios e bèrdat tokante Yehova su areglo pa haña salbashon. Sin embargo, Pilato no tabata na banda di e bèrdat, i e no kier a siña for di Hesus. En bes di esei, Pilato a puntra ku un tono di duda i menospresio: “Kiko ta bèrdat?” (Juan 18:37, 38) Loke el a hasi ta hopi lamentabel! Sin embargo, hopi hende sí a tende e bèrdat ku Hesus a proklamá. El a bisa su disipelnan: “Bendishoná ta boso wowonan, pasobra nan ta mira; i boso oreanan, pasobra nan ta tende.”—Mateo 13:16.

¹³ Yehova a konserbá e bèrdat mediante e Beibel i a hasié disponibel pa hende rònt mundu. Beibel ta revelá kosnan manera nan ta. E ta deskribí Dios su kualidatnan, propósitonan i mandamentunan, i tambe e berdadero kondishon di e situashon di humanidat. Hesus a bisa Yehova den orashon: “Bo palabra ta bèrdat.” (Juan 17:17) Esaki ta hasi Beibel un buki úniko. Ta e so a wòrdu skirbí bou di inspirashon di e Dios ku sa tur kos. (2 Timoteo 3:16) Beibel ta un regalo presioso ku Dios a duna humanidat, un regalo ku su sirbidónan ta atesorá. Ta sabí pa les’é tur dia.

Tene Duru na e Bèrdat

14. Kiko ta algun kos ku Yehova ta bisa ku lo e hasi, i pakiko nos lo mester ker’é?

¹⁴ Nos mester tuma na serio loke Yehova ta bisa nos den su Palabra. E ta loke e ta bisa ku e ta, i lo e hasi loke e bisa ku e ta bai hasi. Nos tin tur motibu pa konfia den Dios. Nos por kere Yehova ora e ta bisa ku lo e “duna pago meresí na esnan ku no konosé Dios i na esnan ku no ta obedesé e evangelio di nos Señor Hesus.” (2 Tesalonisensenan 1:8) Tambe nos por kere Yehova ora e ta bisa ku e ta stima esnan ku ta sigui hustisia, ora e ta bisa ku lo e duna bida eterno na esnan ku ehersé fe, i ora e ta bisa ku lo e eliminá doló, yoramentu i asta morto. Yehova a enfatisá ku e último promesa ei ta konfiabel dor di duna e siguiente instrukshon na apòstel Juan: “Skirbi, pasobra e palabranan aki ta fiel i berdadero.”—Revelashon 21:4, 5; Proverbionan 15:9; Juan 3:36, NW.

15. Menshoná algun mentira ku Satanas ta fomentá.

¹⁵ Satanas ta eksaktamente lo kontrario di Yehova. En bes di iluminá hende, e ta gaña nan. Pa logra su meta di desviá hende for di adorashon puru, Satanas ta fomentá un kantidat di mentira. Por ehèmpel, Satanas kier pa nos kere ku Dios no ta sinti ku ta nesesario pa nos tin un relashon íntimo kuné i ku e no tin kunes ku e sufrimentu ku ta tumando lugá riba tera. Sin embargo, Beibel ta mustra ku Yehova ta profundamente interesá den su kriaturanan i ku e ta lamentá e maldat i sufrimentu ku ta tuma lugá. (Echonan 17:24-30) Tambe Satanas kier pa hende kere ku aktividatnan spiritual ta pèrdèmentu di tempu. Pero na otro banda e Skritura ta sigurá nos ku “Dios no ta inhustu pa lubidá boso trabou i e amor ku boso a mustra pa su nòmber.” Ademas, Beibel ta mustra bon kla ku Dios “ta rekompensá esnan ku ta busk’é.”—Hebreonan 6:10; 11:6.

16. Dikon kristiannan mester keda alerta i tene duru na e bèrdat?

¹⁶ Apòstel Pablo a skirbi relashoná ku Satanas: “E dios di e mundu aki a siega mente di esnan ku no ta kere, pa nan no mira e lus di e evangelio di e gloria di Kristu, kende ta e imágen di Dios.” (2 Korintionan 4:4) Tin hende ku, meskos ku Eva, ta mal gañá dor di Satanas e Diabel. Otronan ta sigui e rumbo di Adam, kende no a wòrdu gañá pero ku deliberadamente a skohe e kaminda di desobedensia. (Hudas 5, 11) Pues, ta masha importante pa kristiannan keda alerta i tene duru na e bèrdat.

Yehova Ta Rekerí “Fe Sinsero,” sin Hipokresia

17. Kiko nos tin ku hasi pa haña Yehova su aprobashon?

¹⁷ Komo ku Yehova ta reflehá bèrdat den tur loke e hasi, e ta ferwagt di esnan ku ta ador’é pa nan tambe ta asina. E salmista a skirbi: “O SEÑOR, ken por biba den bo tabernakel? Ken por biba riba bo seru santu? Esun ku ta kana den rektitut i ta hasi hustisia, i ta papia bèrdat den su kurason.” (Salmo 15:1, 2) Pa e hudiunan ku a kanta e palabranan ei, e menshon di Yehova su seru santu sin duda a pone nan kòrda riba Seru Sion, kaminda David a trese e arka di pakto den e tabernakel (òf tènt) ku el a lanta einan. (2 Samuel 6:12, 17) E seru i e tabernakel a rekordá nan di e lugá kaminda Yehova a biba simbólikamente. Einan hende por a aserká Dios pa suplik’é pa nan haña su aprobashon.

18. (a) Kiko ta e rekisitonan pa nos por tin amistat ku Dios? (b) Kiko nos lo trata den e siguiente artíkulo?

¹⁸ Ken ku kier tin amistat ku Yehova mester papia bèrdat “den su kurason,” no ku boka so. Berdadero amigunan di Dios mester tin un kurason onesto i mester duna prueba di tin “fe sinsero,” es desir, sin hipokresia, pasobra obranan ku ta kuadra ku bèrdat ta sali for di kurason. (1 Timoteo 1:5; Mateo 12:34, 35) Un amigu di Dios no ta tramposo ni engañoso, pasobra Yehova ‘ta aboresé e hòmber gañadó.’ (Salmo 5:6) Testigunan di Yehova rònt mundu ta traha duru pa papia bèrdat i asina imitá nan Dios. E siguiente artíkulo lo analisá esaki.

Kon Lo Bo Kontestá?

• Dikon Yehova sa e bèrdat di tur kos?

• Kiko ta demostrá ku Yehova ta papia bèrdat?

• Kon Yehova a revelá e bèrdat?

• Kiko ta ser rekerí di nos relashoná ku bèrdat?

[Plachinan na página 10]

E Dios di bèrdat sa tur kos di loke el a krea

[Plachinan na página 13]

E promesanan di Yehova lo wòrdu realisá