Con pa Resolve Problema Pacificamente

VIOLENCIA humano ta casi mes bieu cu humanidad. Bijbel ta mustra cu violencia a originá cu Cain, ruman di Abel i yu mayó dje promé pareha humano. Ora Dios a faborecé e ofrenda di Abel riba esun di Cain, Cain “a yena cu hopi rabia.” Con el a trata cu e situacion? “Cain a procedé na atacá Abel su ruman i mat’é.” Despues di esei, el a hañ’é den un problema masha serio cu Dios. (Génesis 4:5, 8-12) Violencia no a resolvé e problema di Cain su mal posicion dilanti su Creador.

Con nos por evitá Cain su curso di recurí na forsa físico pa resolvé problema?

Di Violencia pa Tolerancia

Tuma por ehempel un homber cu a aprobá e asesinato di Esteban, e promé mártir cristian. (Echonan 7:58; 8:1) E homber, Saulo di Tarso, no tabata di acuerdo cu Esteban su posicion religioso i a apoyá e asesinato violento como un manera hustificá pa stop Esteban su actividadnan. Ta cierto cu Saulo kisas no tabata violento den tur aspecto di su bida. Tog e tabata dispuesto pa aceptá violencia como un manera pa resolvé problema. Direct despues dje morto di Esteban, Saulo “a cuminsá trata escandalosamente cu e congregacion [cristian]. Invadiendo un cas tras di otro i, sacando lastrá tantu homber como muher, e tabata entregá nan na prizon.”—Echonan 8:3.

Segun erudito di Bijbel, Albert Barnes, e palabra griego aki traducí como “trata escandalosamente cu” ta denotá e destruccion cu bestia salbahe, manera leon i wolf, por causa. Barnes ta splica: “Saulo a habracá e iglesia mescos cu un bestia salbahe—un expresion fuerte cu ta denotá e celo i furia cu cua el a persiguié.” Ora Saulo a sali pa Damasco pa gara mas siguidó di Cristo, ainda e tabata “respirando . . . menasa i asesinato contra e disipelnan di Señor [Cristo].” Riba caminda, Jesus resucitá a papia cuné, i e resultado di esaki tabata cu Saulo a combertí na cristianismo.—Echonan 9:1-19.

Despues di a combertí, Saulo su manera di trata cu otro hende a cambia. Un incidente cu a tuma lugá un 16 aña despues a demostrá e cambio ei. Un grupo di hende a bini su congregacion na Antiokia i a urgi e cristiannan ei pa cumpli cu e Ley di Moises. Esei a resultá den “no un poco pleitamentu.” Saulo, ya p’e tempu ei mihó conocí como Pablo, a tuma un posicion fuerte den e disputa. Aparentemente, e discusion a chispa candela. Pero Pablo no a recurí na violencia. Mas bien, el a consentí cu e decision dje congregacion pa hiba e asuntu n’e apostel i ancianonan dje congregacion di Jerusalem.—Echonan 15:1, 2.

Na Jerusalem, atrobe tabatin “hopi discusion” n’e reunion di anciano. Pablo a warda te ora “henter e multitud a keda ketu” i e ora ei a conta dje obra magnífico dje spiritu di Dios entre e creyentenan incircuncidá. Despues di un consideracion basá riba e Scritura, e apostel i ancianonan di Jerusalem a yega “na un acuerdo unánime” pa no pone un carga innecesario riba creyentenan incircuncidá, sino pa spierta nan “pa sigui abstené [nan] di cosnan sacrificá na ídolonan i di sanger i di cosnan strangulá i di fornicacion.” (Echonan 15:3-29) Sí, Pablo a cambia. El a siña resolvé cuestionnan sin violencia.

Luchando Contra Inclinacionnan Violento

“Un esclabo di Señor no tin nodi bringa,” Pablo a spierta despues, “sino mester ta amabel pa cu tur, capacitá pa siña, manteniendo su mes frená bou di maldad, instruyendo cu suavedad esnan cu no ta faborablemente dispuesto.” (2 Timoteo 2:24, 25) Pablo a urgi Timoteo, un superintendente mas yong, pa trata situacionnan difícil cu calmu. Pablo tabata realista. E tabata sa cu emocionnan por subi asta entre cristiannan. (Echonan 15:37-41) Cu bon motibu, el a consehá: “Rabia, i tog no peca; no laga solo baha cu boso den un estado provocá.” (Efesionan 4:26) E manera corecto pa trata cu emocionnan asina ta di controlá rabia sin explotá den un furia descontrolá. Pero con nos por logra esaki?

Awe, no ta fácil pa tene rabia bou di control. “Ta ‘in’ pa tin mal moda,” segun Dr. Deborah Prothrow-Stith, asistente decano na Scol di Salú Público di Harvard. “De facto, e abilidadnan pa bai bon cu otro hende—negociacion, compromiso, empatia, pordon—ta esnan cu generalmente ta ser atribuí na hende cobarde.” Pero, eseinan ta cualidadnan di homber, i nan ta esencial pa controlá inclinacionnan violento cu lo por lanta den nos.

Ora Pablo a bira un cristian, el a siña un mihó manera pa trata cu diferencia di opinion. Esei tabata basá riba e siñansanan di Bijbel. Como un erudito educá di hudaismo, Pablo tabata conocé e Scritura Hebreo hopi bon. E mester tabata sa di textonan manera: “No bira envidioso dje homber di violencia, ni scoge ningun di su camindanan.” “Esun cu ta tarda pa rabia ta mihó cu un homber poderoso, i esun cu ta controlá su spiritu ta mihó cu esun cu ta capturá un stad.” “Manera un stad invadí, cu no tin muraya, asina ta e hende cu no tin freno pa su spiritu.” (Proverbionan 3:31; 16:32; 25:28) Tog, e conocimentu ei no a prevení Pablo di recurí na violencia contra e cristiannan promé cu el a combertí. (Galationan 1:13, 14) Pero kico a yuda Pablo, como un cristian, pa resolvé cuestionnan cargá cu emocion usando sentido comun i persuasion en bes di violencia?

Pablo a duna nos un indicacion ora el a bisa: “Bira imitadónan di mi, mescos cu ami ta di Cristo.” (1 Corintionan 11:1) El a apreciá mashá loke Jesucristo a haci p’e. (1 Timoteo 1:13, 14) Cristo a bira e modelo p’e sigui. E tabata sa con Jesus a sufri na fabor di humanidad pecaminoso. (Hebreonan 2:18; 5:8-10) Pablo por a verificá cu e profecia di Isaías tocante e Mesías a cumpli den Jesus: “E tabata den pertá severo, i el a laga nan afligié; no obstante, e no a habri su boca. Nan a hib’é manera un carné pa matadero; i manera un carné hembra cu dilanti su feitadónan a bira muda, e no a habri su boca tampoco.” (Isaías 53:7) Apostel Pedro a skirbi: “Ora nan a zundra [Jesus], e no a zundra bek. Ora e tabata sufri, e no a menasá, sino a sigui encomendá su mes na esun cu ta husga cu husticia.”—1 Pedro 2:23, 24.

Pablo su aprecio p’e manera cu Jesucristo a trata cu situacionnan tenso a impuls’é pa cambia. E por a spierta su compañeronan creyente: “Sigui soportá otro i pordoná otro libremente si un hende tin un motibu pa keha contra un otro. Mescos cu Jehova a pordoná boso libremente, asina boso tambe haci mescos.” (Colosensenan 3:13) No ta suficiente pa reconocé so cu no tin nodi ser violento. Aprecio pa loke Jehova i Jesucristo a haci pa nos ta yuda percurá e motivacion necesario pa vence inclinacionnan violento.

Ta Posibel?

Un homber na Hapon tabatin mester di un motivacion fuerte asina. Su tata, kende tabata un soldá cu tabata rabia lihé, a dominá su famia cu violencia. Siendo un víctima di violencia i mirando su mama sufri di manera similar, e homber a desaroyá un disposicion violento. E tabata carga dos spada di samurai di diferente largura cu e tabata usa pa resolvé problema i tambe pa menasá hende.

Ora su esposa a cuminsá studia Bijbel, el a sinta den e studio sin tum’é na serio. Sin embargo, ora el a lesa un foyeto titulá E Bon Nobo aki dje Reino,a el a cambia. Pakico? “Ora mi a lesa e material bou dje subtemanan, ‘Cristo Jesus’ i ‘E Rescate,’ mi a sinti bergwensa,” e ta splica. “Aunke mi a hiba un mal bida, tog mi kier tabata bondadoso cu esnan cu mi tabata sali bon cuné. Mi tabatin placer den haci mi amigunan contentu, pero solamente te n’e grado cu esei lo no a afectá mi mes bida. Wel, Jesus, Yu di Dios, tabata dispuesto pa ofrecé su bida pa humanidad, incluso pa hende manera ami. Mi a keda babucá, sin por a bisa niun pia di palabra.”

El a stop di asociá cu su amigunan di ántes i pronto a cuminsá participá den e Scol di Ministerio Teocrático den un congregacion di Testigonan di Jehova. E scol aki ta yuda e participantenan adkerí e arte di siña Bijbel na otro hende. E curso a trece un beneficio adicional p’e homber aki. E ta corda: “Tempu mi tabata yong, mi tabata recurí na menasa i violencia pasobra mi no por a comunicá mi sintimentunan na otro hende. Ora mi a siña comunicá mi pensamentunan na otro hende, mi a cuminsá razoná cu nan en bes di recurí na violencia.”

El a imitá Cristo su manera di biba, mescos cu Pablo a haci? Su fe a ser poní na prueba ora un amigu di ántes, cu ken el a cera un aliansa di fraternidad, a purba stop e di bira un cristian. Su “amigu” a golpi’é i a blasfemá su Dios, Jehova. E homber aki, cu un tempu tabata violento, a controlá su mes i a pidi despensa cu e no por a tene su mes n’e huramentu. Desapuntá, su “ruman” a lagu’é na pas.

Dor di vence su inclinacionnan violento, e homber aki, cu un tempu tabata rabioso, a gana hopi ruman spiritual cu ta uní dor di amor pa Dios i pa próhimo. (Colosensenan 3:14) De facto, awe, mas cu 20 aña despues cu el a bira un cristian dedicá, e ta sirbi como un superintendente biahero di Testigonan di Jehova. E ta haña un gran goso ora e por mustra for di Bijbel cu hende cu tin disposicion manera di bestia por siña resolvé desacuerdo sin violencia mescos cu é a siña esei! I p’e ta un privilegio grandi cu e por señalá n’e cumplimentu magnífico dje palabranan profético: “Nan lo no haci ningun daño ni causa ningun ruina den tur mi ceru santu; pasobra e tera siguramente lo ta yená cu e conocimentu di Jehova mescos cu e awanan ta cubri laman mes”!—Isaías 11:9.

Mescos cu apostel Pablo i e homber aki, cu un tempu tabata violento, abo tambe por siña manehá situacionnan di provocacion, resolviendo problema pacíficamente. Testigonan di Jehova den bo localidad lo ta contentu pa yudá bo.

[Nota]

[Komentario na página 5]

Pablo tabata realista. E tabata sa cu emocionnan por subi asta entre cristiannan

[Plachi na página 7]

Aprecio pa loke Dios a haci pa nos ta contribuí na relacionnan pacífico