Keda Kontentu Ku Yehova Ta Moldia Nos

 1. Dikon Yehova ta e mihó Persona ku por moldia nos?

NA UN findishi na Lònden, Inglatera, na novèmber 2010, nan a ofresé 70 mion dòler pa un vas chines di serámika di siglo 18. Esaki ta demostrá anto ku un hende ku ta traha ku klei por usa un material asina komun i barata manera klei pa forma un obra di arte asina bunita i kostoso. Pero, ningun hende ku ta traha ku klei por para banda di Yehova. Kasi na final di e di seis dia di kreashon, Dios a krea un hòmber perfekto for “di e stòf [òf, klei] di tera” i a dun’é e kapasidat pa reflehá e kualidatnan di su Kreador. (Gén. 2:7) Pues ku bon motibu anto, e hòmber perfekto ei, Adam, ku Dios a forma di tera a ser yamá “yu di Dios.”—Luk. 3:38.

2, 3. Kon nos por imitá e aktitut di e israelitanan ku a arepentí?

² Ma Adam a pèrdè e privilegio di ta yu di Dios ora el a rebeldiá kontra su Kreador. Sinembargo, atraves di historia, ‘un nubia grandi’ di desendiente di Adam a skohe pa apoyá e soberania di Dios. (Heb. 12:1) Ora nan a someté nan mes humildemente na nan Kreador, nan a demostrá ku nan ke pa é ta nan Tata i Esun ku ta moldia nan, i no Satanas. (Huan 8:44) Nan lealtat na Dios ta pone nos kòrda riba e palabranan di Isaías relashoná ku e israelitanan ku a arepentí: “T’Abo ta nos Tata, SEÑOR. Nos ta e klei, Abo Esun ku ta traha kuné; nos tur ta obra di bo man.”—Isa. 64:8, BPK.

³ Awe, tur hende ku ta adorá Yehova den spiritu i bèrdat ta hasi esfuerso pa nan tin e mesun aktitut humilde i sumiso ei. Pa nan, ta un onor pa yama Yehova nan Tata i someté nan mes na dje komo Esun ku ta moldia nan. Bo ta mira bo mes manera klei suave den man di Dios, dispuesto pa ser formá pa bira un pòchi masha balioso den su bista? I kiko di bo rumannan? Bo ta komprondé ku ainda Dios ta formando nan? Pa yuda nos den esei, ban konsiderá tres aspekto di Yehova su trabou komo Esun ku ta moldia nos manera klei: Kon e ta skohe hende ku e ta moldia, dikon e ta moldia nan i kon e ta hasi esei.

 4. Kon Yehova ta skohe hende ku e ta hala serka dje? Duna algun ehèmpel.

⁴ Ora Yehova ta opservá nos, e no ta wak nos aparensia. Mas bien, e ta saminá nos kurason, esta, e persona ku nos ta di paden. (Lesa 1 Samuel 16:7b.) Esaki tabata bisto ora Dios a forma e kongregashon kristian. El a hala serka dje i su Yu hopi hende ku for di un punto di bista humano tabata parse di tin karakterístikanan indeseabel. (Huan 6:44) Un persona asina tabata un fariseo ku tabata yama Saulo, kende tabata “un blasfemadó, un persiguidó i un hòmber arogante i ònbeskòp.” (1 Tim. 1:13) Ma Yehova, esun ku “ta sondia kurason,” no a mira Saulo komo klei ku no ta sirbi pa nada. (Pro. 17:3) Mas bien, Dios a mira ku e por a form’é den un “pòchi” balioso. De echo, Dios a skoh’é pa duna testimonio “na e nashonnan, i tambe na reinan i e yunan di Israel.” (Echo. 9:15) Otro hende ku Dios a konsiderá komo “pòchi pa uso onorabel” ta hende ku un tempu tabata buraché, inmoral i ladron. (Rom. 9:21; 1 Kor. 6:9-11) Segun ku nan tabata haña konosementu eksakto di e Palabra di Dios i tabata fortalesé nan fe, nan a laga Yehova moldia nan.

5, 6. Si nos ta komprondé ku Yehova ta Esun ku ta moldia nos, ki aktitut nos mester tin pa ku (a) hende den nos teritorio? (b) nos rumannan?

⁵ Kon loke nos a kaba di siña por yuda nos? Nos fe den Yehova su kapasidat di lesa kurason i di hala hende ku é ta skohe serka dje mester yuda nos pa no husga hende ku nos ta topa den sirbishi ni e rumannan di kongregashon. Wak e ehèmpel di un hòmber ku yama Michael. El a bisa: “Ora Testigunan di Yehova tabata yama na mi kas, mi tabata kana bai laga nan i ignorá nan, komo si fuera nan no tabata eksistí mes. Mi tabatin masha mal moda. Mas despues, m’a konosé un famia ku mi tabata atmirá mashá pa nan bon kondukta. Ma un dia m’a keda boka habrí ora m’a haña sa ku ta Testigu di Yehova nan ta. Nan kondukta a pone mi bai wak ta dikon mi no ta gusta Testigunan di Yehova. M’a bin realisá ku mi manera di pensa tabata basá riba ignoransia i loke hende tabata bisa, no basá riba echo.” Michael a disidí di aseptá un estudio di Beibel pa e por a haña sa mas. Despues, el a bira un Testigu i a drenta e trabou di tempu kompleto.

⁶ Ora nos ta aseptá Yehova komo Esun ku ta moldia nos, loke nos ta pensa di nos rumannan tambe lo kambia. Bo ta mira bo rumannan manera Dios ta mira nan, esta, ku ainda e ta moldiando nan? E por mira e persona ku nos ta di paden i tambe e tipo di hende ku nos por bira ora e moldia nos. Yehova ta mira e bon den hende i no ta enfoká riba nan imperfekshonnan temporal. (Sal. 130:3) Nos por imit’é ora nos ta mira e bon den su sirbidónan. De echo, nos por kolaborá ku Yehova i apoyá nos rumannan segun ku nan ta hasi esfuerso pa progresá spiritualmente. (1 Tes. 5:14, 15) Ansianonan, kendenan ta “regalo den forma di hende,” mester pone un bon ehèmpel den esei.—Efe. 4:8, 11-13.

 7. Dikon bo ta balorá e disiplina di Yehova?

⁷ Kasi sigur lo bo a yega di tende hende bisa algu manera: “Nunka mi a ègt balorá e disiplina di mi mayornan sino te dia ku mi mes tabatin yu.” Ora nos haña mas eksperensia den bida, nos lo por mira disiplina na un otro manera i kuminsá mir’é manera Yehova ta mir’é, komo un muestra di su amor. (Lesa Hebreonan 12:5, 6, 11.) Sí, ku pasenshi Yehova ta moldia su yunan pasobra e ta stima nan. E ke pa nos ta sabí i felis, i e ke pa nos stim’é bèk. (Pro. 23:15) E no ta gusta mira nos sufri ni e no ke pa nos muri komo yu ku ta ‘meresé su rabia,’ pa motibu di e herensia ku Adam a laga pa nos.—Efe. 2:2, 3.

8, 9. Kon Yehova ta siñando nos awe, i kon lo e sigui hasi esei den futuro?

⁸ Komo yu “ku a meresé e rabia di Dios,” un tempu nos tabata manifestá hopi karakterístika ku tabata desagradá Dios; kisas algun di nan tabata asta manera di bestia. Pero komo ku Yehova a moldia nos, nos por a kambia i manifestá karakterístikanan manera di karné. (Isa. 11:6-8; Kol. 3:9, 10) Awor nos ta biba den un paradeis spiritual. Esaki ta un ambiente spesial ku Yehova ta kreando awe pa e por moldia nos. Ei nos ta sinti nos mes safe i sigur apesar ku nos ta biba den un mundu malbado. Ademas, esnan ku a lanta den un famia sin amor i yen di problema, por fin por eksperensiá kiko ta amor berdadero. (Huan 13:35) Nos a siña mustra amor na otro hende, i riba tur kos, nos a siña konosé Yehova i ta eksperensiá su amor komo tata.—Sant. 4:8.

⁹ Den e mundu nobo nos lo disfrutá plenamente di e bendishonnan ku e paradeis spiritual lo trese kuné. Anto e ora ei nos paradeis spiritual lo tin su komplemento perfekto, esta, un paradeis literal bou di e gobernashon di e Reino di Dios. Durante e tempu ku henter tera lo ser restorá, Yehova lo sigui moldia nos i lo siña nos na un grado ku nos no por ni imaginá awe. (Isa. 11:9) Riba esei, Dios lo hasi nos mente i kurpa perfekto pa asina nos por apsorbá su siñansa i hasi su boluntat perfektamente. Pues laga nos ta determiná pa sigui someté nos mes na Yehova i mustr’é ku nos ta mira e manera ku e ta moldia nos komo un muestra di su amor pa nos.—Pro. 3:11, 12.

10. Kon Hesus a reflehá e pasenshi di Yehova i Su abilidat di moldia hende?

¹⁰ Meskos ku un hende ábil ku ta traha ku klei, Yehova konosé e tipo i kalidat di “e klei” ku e tin ku forma i ta tene kuenta ku esei. (Lesa Salmo 103:10-14.) Sí, e ta tene kuenta ku e debilidat-, limitashonnan i progreso spiritual di kada un di nos. Nos por haña sa kiko Yehova ta pensa di su sirbidónan imperfekto ora nos konsiderá kon su Yu a trata ku imperfekshon di su apòstelnan, spesialmente nan tendensia di diskutí tokante ken tabata esun di mas grandi entre nan. Si bo a presensiá e diskushonnan pisá akí, lo bo a pensa ku e apòstelnan ei tabata hòmbernan mansu i fásil pa moldia? Tòg Hesus no a pensa malu di su fiel apòstelnan; e tabata sa ku e mester a tene pasenshi ku nan. E tabata sa tambe ku su ehèmpel di humildat i e konsehonan bondadoso ku el a duna nan lo por a moldia nan. (Mar. 9:33-37; 10:37, 41-45; Luk. 22:24-27) Despues ku Hesus a ser resusitá, Dios a drama spiritu santu riba e apòstelnan, i nan no tabata enfoká mas riba posishon òf prominensia ma riba e trabou ku Hesus a duna nan pa hasi.—Echo. 5:42.

11. Kon David a demostrá di ta manera klei suave, i kon nos por imit’é?

¹¹ Awe, Yehova ta usa prinsipalmente su Palabra, su spiritu i e kongregashon kristian pa moldia su sirbidónan. E Palabra di Dios por moldia nos segun ku nos ta les’é, meditá riba dje i pidi Yehova yuda nos apliká loke nos a siña. David a skirbi: “Ora mi kòrda riba bo riba mi kama, mi ta meditá riba bo den e vigilianan di anochi.” (Sal. 63:6) Tambe el a skirbi: “Lo mi alabá Yehova, kende a duna mi konseho. Asta durante anochi, mi pensamentunan di mas profundo ta korigí mi.” (Sal. 16:7, NW ) Sí, David a laga e konsehonan di Dios penetrá te den fondo di su kurason, pa nan por a moldia su pensamentu- i sintimentunan, asta ora e konseho òf disiplina tabata fuerte. (2 Sam. 12:1-13) Ki un bon ehèmpel di humildat i sumishon! Abo tambe ta meditá riba e Palabra di Dios i ta lag’é penetrá te den fondo di bo kurason? Bo por mehorá den e aspekto ei?—Sal. 1:2,3.

12, 13. Kon Yehova ta usa spiritu santu i e kongregashon kristian pa moldia nos?

¹² Spiritu santu por moldia nos den vários manera. Por ehèmpel, e por yuda nos imitá e personalidat di Kristu, ku ta inkluí diferente aspekto di e fruta di spiritu. (Gal. 5:22, 23) Un di e aspektonan di e fruta ei ta amor. Nos ta stima Dios, nos ke obedes’é i nos ke pa e moldia nos. Asina nos ta rekonosé ku su mandamentunan no ta pisá. Ademas, spiritu santu por duna nos e forsa tambe pa no laga e mal influensia di mundu i su spiritu moldia nos. (Efe. 2:2) Tempu apòstel Pablo tabata yòn, e tabata bou di influensia di e aktitut orguyoso di e lidernan religioso hudiu. Pero despues e por a bisa: “Pa tur kos mi tin forsa pa medio di esun ku ta duna mi poder.” (Flp. 4:13) Pues, meskos ku Pablo, laga nos sigui pidi Yehova pa su spiritu santu pasobra lo e skucha e petishonnan sinsero di hende mansu.—Sal. 10:17.

¹³ Yehova ta usa e kongregashon kristian i e ansianonan pa moldia kada un di nos. Por ehèmpel, si e ansianonan ripará ku nos tin un debilidat, nan ta purba di yuda nos, pero no a base di nan mes ideanan. (Gal. 6:1) Mas bien, ku humildat nan ta pidi Dios duna nan komprondementu i sabiduria. Anto, na armonia ku loke nan a pidi den orashon, nan ta buska informashon ku por yuda nos den e Palabra di Dios i den nos publikashonnan kristian. Esaki ta permití nan duna nos nèt e yudansa ku nos tin mester. Si nan aserká bo pa duna bo konseho ku amor i kariño, por ehèmpel tokante bo bistimentu, lo bo mira esaki komo muestra di Dios su amor pa bo? Ora bo hasi esei, bo ta demostrá di ta manera klei suave den man di Yehova, ku e por moldia pa bo mes bon.

14. Maske Yehova tin outoridat riba e klei, kon e ta mustra rèspèt pa nos boluntat liber?

¹⁴ Si nos komprondé kon Dios ta moldia nos, esei por yuda nos den nos relashon ku e rumannan i mantené un aktitut positivo pa ku e hendenan den teritorio, inkluso nos studiantenan di Beibel. Den tempu bíbliko, hende ku tabata traha ku klei no tabata kue kualke klei i kuminsá form’é mesora. Promé ku esei, nan tabata prepará e klei i saka tur piedra i impuresa for di dje. Den sentido spiritual, Dios ta prepará hende ku ta dispuesto pa lag’é moldia nan. E no ta fòrsa nan pa kambia, ma e ta revelá su normanan hustu pa asina di buena gana nan por drecha nan bida òf hasi kambionan nesesario.

15, 16. Kon studiantenan di Beibel ta demostrá ku nan ke pa Yehova moldia nan? Duna un ehèmpel.

¹⁵ Wak e ehèmpel di Tessie, un ruman na Australia. E ruman ku a studia ku Tessie a bisa di dje: “E no tabatin problema pa siña tokante e bèrdatnan di Beibel. Ma e no a hasi masha progreso spiritual. E no tabata ni bai reunion. Pues, despues di a hasi hopi orashon tokante e asuntu akí, mi a disidí di stòp e estudio. Pero algu asombroso a sosodé. Riba e dia ku mi a pensa ku nos lo tabatin e último estudio di Beibel, Tessie a habri ku mi. El a bisa mi ku e tabata sintié manera un hipókrita pasobra e tabata gusta gèmbel. Pero el a disidí di stòp ku e bisio ei.”

¹⁶ Poko tempu despues, Tessie a kuminsá asistí na reunion i desplegá kualidat kristian, maske su eks amiganan tabata hasi chèrchi di dje. E ruman ku a studia ku Tessie a sigui bisa: “Ku tempu, Tessie a batisá, i despues el a sirbi komo pionero regular, aunke su yunan tabata chikitu ainda.” Sí, ora studiantenan di Beibel kuminsá kambia nan bida pa agradá Dios, lo e hala serka nan i moldia nan pa nan bira pòchi balioso.

17. (a) Dikon bo ta kontentu ku Yehova ta Esun ku ta moldia bo? (b) Kiko nos lo konsiderá den e siguiente artíkulo?

¹⁷ Te dia djawe, ainda algun hende ta traha pòchi di klei na man. Di igual manera, ku pasenshi Yehova ta moldia nos mediante su konsehonan i ta wak kon nos ta reakshoná. (Lesa Salmo 32:8.) Bo ta mira kuantu interes Yehova tin den bo? Bo ta mira ku kuantu kariño Yehova ta moldia bo? Si ta asina, ki otro kualidat por yuda bo keda manera klei suave ku Yehova por moldia? Ki karakterístikanan bo mester evitá pa bo no bira klei duru ku ta difísil pa traha kuné? I kon mayornan por kooperá ku Yehova ora di moldia nan yunan? E siguiente artíkulo lo kontestá e preguntanan akí.