Saulo Su Predikashon Ta Lanta Hostilidat

E HUDIUNAN na Damasko no por a komprondé kon un defensor ferviente di kreensianan tradishonal por a bira un apóstata. Ata Saulo, e hòmber ku a persiguí i tormentá hende ku a invoká e nòmber di Hesus na Yerusalèm. El a bin Damasko pa persiguí e disipelnan einan. Pero awor e mes tabata prediká ku e mesun kriminal despresiá ku nan a kologá na staka pa motibu di blasfemia, ta e Mesias! Ta loko Saulo a bira?—Echonan 9:1, 2, 20-22.

Kisas tabatin un splikashon. Muy probablemente ta e otro hendenan ku a biaha den e mesun karavana ku Saulo a konta loke a pasa na kaminda. Ora nan tabata yegando Damasko, diripiente un lus skèrpi a lusa riba nan i nan tur a kai na suela. Tabatin zonidu di un stèm tambe. Niun hende no a sufri daño, ku eksepshon di Saulo. E tabata drumi riba e kaminda. Ora ku finalmente el a lanta, e otro biaheronan mester a gui’é pa e por a yega Damasko pasobra e no por a mira nada.—Echonan 9:3-8; 26:13, 14.

Un Enemigu di Hesus Ta Bira Su Promotor

Kiko a sosodé ku Saulo riba kaminda pa Damasko? Ta su biahe largu òf podisé e solo kayente di mèrdia a hasié malu? Determiná pa haña splikashonnan natural, sképtikonan moderno ta sugerí vários posibilidat manera, delirio, halusinashon, un krísis sikológiko severo kousá dor di Saulo su remordimentu di konsenshi, un atake di nervio, i asta epilepsia ku supuestamente Saulo tabata sufri di dje.

Loke realmente a sosodé ta ku Kristu Hesus a aparesé na Saulo den un lus ku a hasié siegu, i a konvensé ku E ta e Mesias. Algun obra artístiko ku ta deskribí e episodio aki ta mustra kon Saulo ta kai for di un kabai. Ounke esei por ta un posibilidat, Beibel ta bisa simplemente ku el a “a kai abou na suela.” (Echonan 22:6- 11) Sea kual sea e manera ku el a kai, loke el a sufri físikamente no tabata nada na komparashon ku e kaida bergonsoso ku el a sufri for di e posishon ku e tabatin anteriormente. Awor e mester a rekonosé ku loke e siguidónan di Hesus tabata prediká tabata bèrdat. E úniko salida ku a keda Saulo ta di djòin nan. Saulo a kambia di un enemigu kruel di e mensahe di Hesus pa bira un di su promotornan di mas fiel. Despues ku Saulo a haña su bista bèk i a batisá, el “a sigui haña mas i mas poder, i tabata konfundí e hudiunan ku tabata biba na Damasko dor di proba ku e Hesus aki ta e Kristu.”—Echonan 9:22.

Kòmplòt pa Asesinato Ta Frakasá

Unda Saulo, ku despues a ser yamá Pablo, a bai despues ku el a kombertí? Den su karta n’e galationan el a bisa: “Mi a bai Arabia, i a bolbe atrobe na Damasko.” (Galationan 1:17) E palabra “Arabia” por referí na un biahe pa kualke parti di e península di Arabia. Algun eksperto di Beibel ta sugerí ku kisas Pablo a bai den e Desierto di Siria òf otro kaminda den e reino nabeteo di Aretas IV. Tin hopi chèns ku Saulo a bai un lugá ketu p’e meditá despues di su boutismo, meskos ku Hesus a bai den desierto despues ku a el batisá.—Lukas 4:1.

Ora Saulo a bolbe Damasko, “e hudiunan a traha kòmplòt pa mat’é.” (Echonan 9:23) E gobernadó ku a sirbi komo representante di Rei Aretas na Damasko, a laga vigilá e stat ku e intenshon pa kapturá Saulo. (2 Korintionan 11:32) Pero na mesun tempu ku e enemigunan a traha kòmplòt pa mata Saulo, Hesus su disipelnan a plania un manera pa skap’é.

Entre e personanan ku a yuda Saulo skapa tabatin Ananias i e disipelnan ku tabata huntu ku Saulo djis despues ku el a kombertí.a (Echonan 9:17-19) Podisé tabatin algun hende ku a bira kreyente debí na Pablo su predikashon na Damasko ku tambe a yuda, pasobra Echonan 9:25 ta bisa: “Su disipelnan a koh’é den anochi i a bah’é den un makutu dor di un habrí den muraya.” E ekspreshon “su disipelnan” kisas ta referí na e personanan ku Saulo a siña. En todo kaso, e éksito ku e tabatin den su ministerio probablemente a intensifiká e odio ku e hendenan tabatin kontra dje.

Un Lès pa Nos

Ora nos analisá algun di e susesonan rondó di e kombertimentu i boutismo di Saulo, nos ta mira bon kla ku e no tabata preokupá demasiado ku loke otro hende tabata pensa di dje; ni e no a stòp di prediká pa motibu di oposishon severo. Loke tabata mas importante pa Saulo tabata e asignashon di prediká ku el a risibí.—Echonan 22:14, 15.

Ta resientemente bo a kuminsá mira e importansia di prediká e bon nobo? Si ta asina, bo sa ku tur kristian berdadero mester ta un predikadó di Reino. Bo no mester keda sorprendí si de bes en kuando hende ta reakshoná na un manera hostil òf agresivo pa motibu di bo ministerio. (Mateo 24:9; Lukas 21:12; 1 Pedro 2:20) E manera ku Saulo a reakshoná ora el a hañ’é ku oposishon ta un ehèmpel pa nos. Kristiannan ku ta wanta bou di prueba sin entregá lo tin Dios su aprobashon. Hesus a bisa su disipelnan: “Tur hende lo odia boso pa kousa di mi nòmber.” Pero, el a duna nan e siguransa: “Dor di boso perseveransia boso lo gana boso alma.”—Lukas 21:17-19.

[Nota]

[Plachi na página 28]

Saulo “a kai abou na suela” ora Hesus a aparesé na dje

[Plachi na página 29]

Saulo a skapa di un kòmplòt pa asesin’é na Damasko