Barnabas “Yu di Consuelo”

KI DIA tabata último biaha cu bo a ricibí consuelo for di un amigu? Bo ta corda e último biaha cu abo a consolá un otro hende? De bes en cuando, nos tur tin mester di animacion, i cuantu nos ta apreciá esnan cu ta ofrec’é amorosamente! Consolá un hende ta implicá tuma tempu pa scucha, comprendé i yuda. Bo ta cla pa haci esei?

Un persona cu a desplegá un disponibilidad asina den un manera ehemplar tabata Barnabas, kende “tabata un bon homber i yen di spiritu santu i fe.” (Echonan 11:24) Pakico por a bisa esei di Barnabas? Kico el a haci pa merecé e descripcion aki?

Un Yudante Generoso

Su nomber mes tabata Josef, pero e apostelnan a dun’é un bijnaam descriptivo cu a cuadra bon cu su caracter—Barnabas, cu ta nificá “Yu di Consuelo.”a (Echonan 4:36) E congregacion cristian a caba di ser formá. Algun hende ta suponé cu Barnabas anteriormente tabata un di Jesus su disipelnan. (Lucas 10:1, 2) Sea esei tabata e caso of no, e homber aki a gana un bon reputacion.

Djis despues di Pentecoste 33 E.C., Barnabas, kende tabata un levita procedente di Chipre, boluntariamente a bende algun tereno i a duna e placa n’e apostelnan. Pakico el a haci esei? E relato den Echonan ta bisa nos cu entre e cristiannan den Jerusalem n’e tempu ei, “tabata distribuí na cada un, segun cu e tabatin necesidad.” Evidentemente Barnabas a mira cu tabatin un necesidad, i di curason el a haci algu tocante dje. (Echonan 4:34-37) Tal bes e tabata un homber bon pará, pero e no a vacilá pa ofrecé tantu su posesionnan material como su mes p’e adelanto di interesnan di Reino.b “Unda cu Barnabas a topa hende of situacionnan cu a rekerí animacion, el a duna tur e animacion cu e tabata por,” e erudito F. F. Bruce ta comentá. Esaki ta bisto for dje segundo episodio den cua e ta aparecé.

Rond di 36 E.C., Saulo di Tarso (e futuro apostel Pablo), pa awor un cristian, tabata purba haña contacto cu e congregacion di Jerusalem, “pero nan tur tabatin miedu di dje, pasobra nan no a kere cu e tabata un disipel.” Con lo e por a convencé e congregacion cu su combertimentu tabata genuino i no djis un triki pa sigui ruin’é? “Barnabas a bin yud’é i a hib’é cerca e apostelnan.”—Echonan 9:26, 27; Galationan 1:13, 18, 19.

Bijbel no ta bisa pakico Barnabas a confia Saulo. Di tur manera, e “Yu di Consuelo” a cumpli cu su bijnaam dor di scucha Saulo i yud’é sali for di un aparente pertá grandi. Aunke despues Saulo a regresá na su stad nativo, Tarso, a forma un amistad entre e dos hombernan. Den e siguiente añanan, esei lo tabatin consecuencianan importante.—Echonan 9:30.

Na Antiokia

Rond di 45 E.C., noticia di desaroyonan extraordinario na Antiokia di Siria a yega Jerusalem—bastante residente di abla griego dje stad ei tabata birando creyente. E congregacion a despachá Barnabas pa investigá i pa organisá e trabou aya. Nan a tuma un decision masha sabí. Lucas ta declará: “Ora el a yega i a mira e bondad inmerecí di Dios, el a alegrá i a cuminsá animá nan tur pa sigui den Señor cu propósito di curason; pasobra e tabata un bon homber i yen di spiritu santu i fe. I un multitud basta grandi a ser agregá na Señor.”—Echonan 11:22-24.

Esei no tabata tur loke el a haci. Segun erudito Giuseppe Ricciotti, “Barnabas tabata un homber práctico, i mesora el a comprendé e necesidad pa pone man na obra pa haci sigur di saca un cosecha abundante for di un florecementu prometedor asina. P’esei, e necesidad primario tabata pa cosechadónan.” Como un homber di Chipre, probablemente Barnabas tabatin custumber di trata cu hende gentil. Kisas e tabata sinti su mes specialmente cualificá pa predicá na hende pagano. Pero e tabata cla pa enbolbé otronan den e actividad excitante i animante aki.

Barnabas a pensa riba Saulo. Muy probablemente, Barnabas tabata na haltura dje revelacion profético na Ananías n’e tempu cu Saulo a combertí, i cu e ex-persiguidó tabata ‘un baso scogí pa hiba Jesus su nomber n’e nacionnan.’ (Echonan 9:15) P’esei Barnabas a sali pa Tarso—un biahe ida di mas cu 200 kilometer—pa busca Saulo. E dosnan aki a traha huntu como partner pa un aña completo, i “tabata p’e promé bes na Antiokia” den e periodo aki “cu dor di providencia divino e disipelnan a ser yamá cristian.”—Echonan 11:25, 26.

Durante e reinado di Claudio, un hamber severo a bini riba vários parti dje Imperio Romano. Segun historiadó hudiu Josefo, den Jerusalem “hopi hende a muri pa falta di loke tabata necesario pa haña cuminda.” Di manera cu e disipelnan na Antiokia “a determiná, cada un di nan segun nan recurso, pa manda un provision di auxilio p’e rumannan cu tabata biba na Hudea; i nan a haci esaki, despachando esei p’e ancianonan mediante e man di Barnabas i Saulo.” Despues di a cumpli completamente cu e comision ei, e dosnan aki a regresá huntu cu Juan Marco pa Antiokia, caminda nan a ser contá entre e profeta i maestronan dje congregacion.—Echonan 11:29, 30; 12:25; 13:1.

Un Asignacion Special di Misionero

Anto un suceso extraordinario a tuma lugá. “Miéntras cu nan tabata sirbiendo Jehova públicamente i yunando, e spiritu santu a bisa: ‘Di tur persona apartá Barnabas i Saulo pa mi, p’e trabou pa cua mi a yama nan.’” Djis pensa esei! E spiritu di Jehova a manda pa duna e dosnan ei un asignacion special. “Pues anto, e hombernan aki cu e spiritu santu a manda, a baha pa Seleucia, i djei nan a barca pa Chipre.” Barnabas tambe por a ser yamá corectamente un apostel, of unu mandá.—Echonan 13:2, 4; 14:14.

Despues cu nan a biaha dor di Chipre i a combertí Sergio Paulo, e gobernadó romano dje provincia dje isla, nan a sigui pa Perga, n’e costa sur di Asia Menor, caminda Juan Marco a retirá i a bolbe pa Jerusalem. (Echonan 13:13) Ta parce cu te n’e tempu ei Barnabas tabatin e papel di lider, tal bes como e partner cu mas experencia. For dje punto aki padilanti, ta Saulo (yamá Pablo awor) ta esun cu ta hiba delantera. (Compará cu Echonan 13:7, 13, 16; 15:2.) Barnabas a sinti su mes ofendí pa e desaroyo aki? No, e tabata un cristian maduro cu a reconocé humildemente cu Jehova tabata usando su partner tambe den un manera poderoso. Pa medio di nan, Jehova tabata kier pa mas teritorio ainda tende e bon nobo.

De facto, promé cu nan dos a ser sacá for di Antiokia na Pisidia, henter e área a tende e palabra di Dios for di Pablo i Barnabas, i un cantidad a aceptá e mensahe. (Echonan 13:43, 48-52) Na Iconio, “un multitud grandi di tantu hudiu como griego a bira creyente.” Esaki a impulsá Pablo i Barnabas pa pasa bastante tempu ei, ‘papiando cu frankesa pa medio dje autoridad di Jehova, kende a concedé pa señalnan i indicacionnan profético sosodé mediante nan man.’ Ora nan a tende cu un complot a ser tramá pa piedra nan, sabiamente nan dos a hui i a sigui nan trabou na Licaonia, Listra i Derbe. Apesar dje experencianan na Listra cu a menasá nan bida, tantu Barnabas como Pablo a sigui “fortaleciendo alma dje disipelnan, animando nan pa permanecé den e fe i bisando: ‘Nos tin cu drenta den e reino di Dios atrabes di hopi tribulacion.’”—Echonan 14:1-7, 19-22.

E dos predicadónan dinámico aki no tabata bai laga hende intimidá nan. Al contrario, nan a bolbe bek pa edificá e cristiannan nobo na lugánan caminda nan a topa caba cu oposicion intenso, probablemente yudando hombernan cualificá hiba delantera den e congregacionnan nobo.

E Asuntu di Circuncision

Rond di 16 aña despues di Pentecoste 33 E.C., Barnabas tabata enbolbí den un episodio histórico relacioná cu e asuntu di circuncision. “Cierto hombernan a bini [na Antiokia di Siria] for di Hudea i a cuminsá siña e rumannan: ‘A ménos cu boso sea circuncidá segun e custumber di Moises, boso no por ta salbá.’” Barnabas i Pablo tabata sa di experencia cu esaki no tabata e caso, i nan a refutá e punto ei. En bes di imponé nan autoridad, nan a reconocé cu e esaki tabata un asuntu cu tabatin cu ser resolvé p’e beneficio di henter e asociacion di rumannan. P’esei nan a presentá e asuntu n’e cuerpo gobernante na Jerusalem, caminda nan informenan a yuda resolvé e asuntu. Despues di esei, Pablo i Barnabas, describí como “stimánan . . . cu a entregá nan alma p’e nomber di nos Señor Jesucristo,” tabata entre esnan asigná pa comunicá e decision n’e rumannan na Antiokia. Ora nan a lesa e carta for dje cuerpo gobernante i a duna discursonan, e congregacion a “alegrá riba e animacion” i a ser “fortalecé.”—Echonan 15:1, 2, 4, 25-32.

“Un Explosion Intenso di Rabia”

Despues di asina tantu relato positivo tocante Barnabas, nos por pensa cu nos hamas lo por sigui su ehempel. Tog, e “Yu di Consuelo” tabata mes imperfecto cu nos tur sobrá ta. Miéntras e i Pablo tabata planeando un di dos biahe di misionero pa bishitá e congregacionnan, a surgi un desacuerdo. Barnabas tabata dicididu pa hiba cuné su primu Juan Marco, pero Pablo no a haña esei apropiado, ya cu Juan Marco a bandoná nan durante e promé biahe di misionero. A sosodé “un explosion intenso di rabia, di manera cu nan a separá for di otro; i Barnabas a hiba Marco cuné i a barca pa Chipre,” miéntras “Pablo a scoge Sílas i a bai” den un otro direccion.—Echonan 15:36-40.

Ki lamentabel! Asina mes, e incidente ta bisa nos algu mas tocante e personalidad di Barnabas. “Pa semper Barnabas lo haña e crédito di tabata prepará pa tuma un riesgo i confia Marco un di dos bes,” segun un erudito. Manera e escritor ei ta sugerí, por ta masha bon cu “e confiansa cu Barnabas a pone den dje a yuda Marco restorá su mes confiansa i a sirbi como un estímulo pa pega atrobe na su compromiso.” Manera cosnan a resultá, e confiansa ei tabata completamente hustificá, pasobra e dia a yega ora asta Pablo a reconocé con útil Marco tabata p’e sirbishi cristian.—2 Timoteo 4:11; compará cu Colosensenan 4:10.

Barnabas su ehempel por stimulá nos pa tuma tempu pa scucha, comprendé i animá esnan desanimá i duna yudansa práctico ki ora cu nos mira e necesidad. E registro di su disponibilidad pa sirbi su rumannan cu suavedad i curashi, i tambe e resultadonan excelente cu esaki a producí, ta un animacion riba su mes. Ta ki un bendicion di tin hende manera Barnabas den nos congregacionnan awe!

[Nota]

[Plachi na página 23]

Barnabas “tabata un bon homber i yen di spiritu santu i fe”