Yehova “No Ta Hasi Distinshon di Persona”

Bo a yega di bira víktima di diskriminashon? Nan a yega di nenga bo un servisio òf tratamentu, keda sin duna bo un trabou òf trata bo ku menospresio debí na bo koló, rasa òf posishon sosial? Si ta asina, tin bon notisia pa bo: Maske hende tin kustumber di trata otro hende di e forma ei, Dios sí no ta hasi esei. Ku hopi konvikshon, apòstel Pedro, kende tabata un kristian, a bisa: “Dios no ta hasi distinshon di persona.”—Lesa Echonan 10:34, 35.

Pedro a ekspresá e palabranan ei ora e tabata na kas di Kornelio, un hòmber ku no tabata hudiu. Pedro, kende a nase hudiu, a biba den tempu ku e hudiunan tabata konsiderá hende ku no ta hudiu komo impuru i no tabata atendé ku nan. Kon bini Pedro tabata na kas di Kornelio anto? E kontesta ta simpel, ta Yehova Dios a mand’é einan. Pedro a haña un vishon den kua Dios a bis’é: “Stòp di yama kontaminá loke Dios a hasi limpi.” Sin ku Pedro tabata sa, un dia promé, Kornelio tambe a haña un vishon, den kua un angel a bis’é pa manda yama Pedro. (Echonan 10:1-15) Ora Pedro a komprondé ku Yehova su man tabata den e asuntu akí, e no por a keda ketu.

P’esei, Pedro a bisa: “Awor mi ta komprondé di bèrdat ku Dios no ta hasi distinshon di persona.” (Echonan 10:34) Relashoná ku e palabra griego ku a ser usá pa e ekspreshon “hasi distinshon di persona,” un komentarista di Beibel a bisa: “E ta referí na un hues ku ta wak kara di un akusado i ta dikta sentensia. E no ta dikta e sentensia a base di evidensia sino a base di e aparensia di e akusado.” Dios sí no ta asina, e no ta faboresé un hende riba un otro debí na su rasa, nashonalidat, posishon sosial òf kualke otro faktor eksterno.

Mas bien, Yehova ta wak nos kurason. (1 Samuel 16:7; Proverbionan 21:2) Pedro a sigui bisa ku Dios “ta aseptá tur hende di tur nashon ku ta tem’é i ku ta hasi loke ta korekto.” (Echonan 10:35) Teme Dios ta nifiká ku nos ta respet’é, onr’é i konfi’é, i ku nos no ta hasi nada ku no tin su aprobashon. Hasi loke ta korekto ta enserá hasi di buena gana loke ta bon den bista di Dios. Yehova ta keda kontentu ku un hende ku ta hasi loke ta korekto motivá pa e rèspèt profundo ku e tin p’e.—Deuteronomio 10:12, 13.

Si bo a yega di bira víktima di diskriminashon òf prehuisio, loke Pedro a bisa tokante Dios por ta un animashon pa bo. Yehova ta halando hende di tur nashon serka dje pa nan sirbié. (Huan 6:44; Echonan 17:26, 27) E ta skucha i kontestá orashon di su adoradónan sin importá nan rasa, nashonalidat òf posishon sosial. (1 Reinan 8:41-43) Nos por tin sigur ku ora Yehova ta wak for di shelu, ta un rasa so e ta mira—e rasa humano. Bo no ta sinti bo motivá pa siña konosé e Dios imparsial akí mas mihó?