“E Palabra di Jehova A Sigui Crece”
“E ta manda su dicho na tera; cu velocidad su palabra ta core.”—SALMO 147:15.
1, 2. Ki asignacion Jesus a duna su disipelnan, i kico el a enbolbé?
UN DI e profecianan di mas impresionante di Bijbel ta esun na Echonan 1:8. Poco promé cu el a subi na shelu, Jesus a bisa su siguidónan fiel: “Boso lo ricibí poder ora e spiritu santu yega riba boso, i boso lo ta testigonan di mi . . . te na e parti mas lehano dje tera.” Esta un obra inmenso esei a resultá di ta!
2 E man yen di disipel cu a ricibí e asignacion di proclamá e palabra di Dios rond mundu lo mester a mir’é como un reto masha grandi. Considerá kico el a enbolbé. Nan mester a yuda hende comprendé e bon nobo dje Reino di Dios. (Mateo 24:14) Ademas, duna testimonio di Jesus a rekerí pa nan compartí su siñansanan poderoso cu otro hende, i splica nan e papel cu e ta hunga den e propósito di Jehova. Tambe e trabou a encerá haci hende disipel anto bautisá nan. Anto ta rond mundu nan mester a haci esaki!—Mateo 28:19, 20.
3. Kico Jesus a sigurá su disipelnan, i con nan a reaccioná na e trabou cu el a duna nan?
3 Sin embargo, Jesus a sigurá su siguidónan cu e spiritu santu lo ta cu nan segun cu nan ta efectuá e trabou cu el a duna nan. Asina, apesar di con grandi nan asignacion tabata, i con violento i sin misericordia opositornan a purba silenciá nan, e promé disipelnan di Jesus tabatin éxito den haci loke el a manda. Esei ta un echo histórico cu no por ser nengá.
4. Con e comision di predicá i siña hende a manifestá e amor di Dios?
4 E campaña mundial di predicá i siña hende tabata un expresion dje amor di Dios pa hende cu no tabata conoc’é. El a duna nan e oportunidad di forma un relacion cu Jehova i ricibí pordon di picá. (Echonan 26:18) E comision di predicá i siña hende a manifestá e amor di Dios pa esnan cu a hiba e mensahe tambe, pasobra el a permití nan expresá nan debocion na Jehova i mustra nan amor na otro ser humano. (Mateo 22:37-39) Apostel Pablo tabatin asina tantu aprecio p’e ministerio cu el a referí na dje como un “tesoro.”—2 Corintionan 4:7.
5. (a) Unda nos ta haña e relato mas confiabel tocante e promé cristiannan, i ki crecementu e ta describí? (b) Pakico e buki di Echonan ta significativo pa sirbidónan di Dios awe?
5 E relato mas confiabel di e actividad di predicá dje promé cristiannan ta den e buki inspirá di Echonan, cu e disipel Lucas a skirbi. E ta un registro di un crecementu rápido i asombroso. E crecementu aki den conocimentu dje Palabra di Dios ta corda nos di loke Salmo 147:15 ta bisa: “[Jehova] ta manda su dicho na tera; cu velocidad su palabra ta core.” E relato dje promé cristiannan, cu a haña poder di spiritu santu, ta excitante i sumamente significativo pa nos awe. Testigonan di Jehova ta den e mésun trabou di predicá i haci disipel, solamente na un escala hopi mas grandi. Ademas nos ta enfrentá problemanan similar na esnan cu e cristiannan den promé siglo a enfrentá. Segun cu nos considerá con Jehova a bendicioná e promé cristiannan i duna nan poder, nos fe den su respaldo ta bira mas fuerte.
Aumento di Cantidad di Disipel
6. Ki expresion tocante crecementu ta aparecé tres bes den e buki di Echonan, i na kico e ta referí?
6 Un manera pa nos examiná e cumplimentu di Echonan 1:8 ta dor di considerá e expresion “e palabra di Jehova a sigui crece,” cu ta aparecé tres bes so den Bijbel cu algun variacion chikitu, i tur tres bes den e buki di Echonan. (Echonan 6:7; 12:24; 19:20) Den e pasashinan aki, “e palabra di Jehova,” of “e palabra di Dios,” ta referí na e bon nobo, e mensahe emocionante di berdad divino, un mensahe bibu i poderoso cu a cambia bida di esnan cu a acept’é.—Hebreonan 4:12.
7. Cu kico e crecementu dje Palabra di Dios tin di haber na Echonan 6:7, i kico a pasa riba e dia di Pentecoste di aña 33 E.C.?
7 E promé referencia n’e crecementu dje palabra di Dios ta aparecé na Echonan 6:7. Ei nos ta lesa: “Consecuentemente e palabra di Dios a sigui crece, i e cantidad di disipel a sigui aumentá den Jerusalem masha hopi; i un multitud di sacerdote a cuminsá obedecé e fe.” Aki, e crecementu tin di haber cu un aumento dje cantidad di disipel. Promé cu esei, riba dia di Pentecoste di aña 33 E.C., Dios a drama su spiritu santu riba mas o ménos 120 disipel reuní den un sala djariba. E ora ei apostel Pedro a duna un discurso conmovedor, i 3.000 di esnan cu tabata scucha a bira creyente riba e mésun dia ei. Lo mester tabatin basta conmocion ora cu miles di hende a cana bai n’e tanki of tankinan (baki grandi di piedra den suela, pa warda awa) na Jerusalem i su becindario, pa nan bautisá den nomber di Jesus, e homber cu nan a claba na staca como criminal un 50 dia promé!—Echonan 2:41.
8. Con e cantidad di disipel a aumentá durante e añanan despues di Pentecoste di aña 33 E.C.?
8 Pero claro cu esei tabata djis e cuminsamentu. E esfuerso continuo di lidernan religioso hudiu pa aplastá e actividad di predicá tabata en bano. Pa frustracion dje lidernan ei, “Jehova a sigui uni na [e disipelnan] diariamente esnan cu tabata ser salbá.” (Echonan 2:47) Den poco tempu “e cantidad dje hendenan a bira rond di cincu mil.” Despues di esei, “creyentenan den Señor a sigui ser agregá, multitudnan tantu di homber como di muher.” (Echonan 4:4; 5:14) Tocante un periodo mas lat nos ta lesa: “Berdaderamente, e congregacion den henter Hudea i Galilea i Samaria a drenta den un tempu di pas, siendo edificá; i como cu el a cana den temor di Jehova i den consuelo di spiritu santu el a sigui aumentá.” (Echonan 9:31) Un par di aña despues, posiblemente rond di aña 58 E.C., a haci referencia na “miles di creyente.” (Echonan 21:20) E tempu ei ya tabatin hopi creyente gentil tambe.
9. Con lo bo describí e promé cristiannan?
9 E aumento na cantidad aki a sosodé principalmente dor cu hende nobo a combertí. E religion tabata nobo, pero dinámico. E disipelnan no tabata miembronan pasivo di iglesia. No, nan tabata completamente dedicá na Jehova i su Palabra. Algun di nan a siña e berdad for di cristiannan cu a ser persiguí cruelmente. (Echonan 16:23, 26-33) Esnan cu a aceptá cristianismo a hacié a base di un decision conciente i bon pensá. (Romanonan 12:1) Nan a ser educá den Dios su caminda; e berdad tabata den nan mente i curason. (Hebreonan 8:10, 11) Nan tabata dispuesto di muri pa loke nan a kere aden.—Echonan 7:51-60.
10. Ki responsabilidad e promé cristiannan a aceptá, i con tin algu similar ta sosodé awe?
10 Esnan cu a aceptá e siñansa cristian a reconocé nan responsabilidad di compartí e berdad cu otro hende. Esaki a yuda directamente pa e cantidad di disipel crece mas ainda. Un erudito di Bijbel a bisa: “Nan no a considerá cu ta esnan hopi celoso of esnan nombrá oficialmente como evangelisadó so tabatin derecho di comunicá e fe. Evangelisacion tabata é privilegio i deber di tur miembro di iglesia. . . . For di comienso, e iniciativa spontáneo di henter e comunidad cristian pa alcansá mas hende a duna cristianismo un empuhe tremendo.” El a sigui: “Evangelisacion tabata e forsa vital dje promé cristiannan.” Mescos ta e caso cu cristiannan berdadero awe.
Crecementu Geográfico
11. Ki tipo di crecementu Echonan 12:24 ta describí, i con el a tuma lugá?
11 Un di dos referencia n’e crecementu dje palabra di Dios ta na Echonan 12:24: “E palabra di Jehova a sigui crece i plama.” Aki e expresion tin di haber cu crecementu den e área geográfico cu e bon nobo a alcansá. Apesar di oposicion di gobiernu, e trabou a sigui prosperá. Promé e spiritu santu a ser dramá na Jerusalem, i for di ei e palabra a plama lihé. Persecucion na Jerusalem a plama e disipelnan tur rond den Hudea i Samaria. Cu ki resultado? “Esnan cu a ser plamá a pasa dor dje tera declarando e bon nobo dje palabra.” (Echonan 8:1, 4) Felipe a ser dirigí pa duna testimonio na un homber, cu a hiba e mensahe Etiopia despues cu el a bautisá. (Echonan 8:26-28, 38, 39) E berdad a coge rais lihé na Lida, n’e yanura di Saron i na Jope. (Echonan 9:35, 42) Despues apostel Pablo a biaha miles di kilometer via tera i laman, estableciendo congregacionnan den hopi pais di Mediteráneo. Apostel Pedro a bai Babilonia. (1 Pedro 5:13) Den un lapso di trinta aña desde cu spiritu santu a ser dramá na Pentecoste, Pablo a skirbi cu e bon nobo a ser “predicá den tur creacion cu ta bou di shelu,” refiriendo posiblemente na e parti di mundu cu tabata conocí e tempu ei.—Colosensenan 1:23.
12. Con e opositornan di cristiandad a reconocé e crecementu geográfico dje palabra di Dios?
12 Asta opositornan di cristiandad a reconocé cu e palabra di Dios a coge rais tur caminda den e Imperio Romano. Por ehempel, Echonan 17:6 ta relatá cu na Tesalónica, den nort di Grecia, tabatin opositornan cu a grita: “E hombernan aki cu a trastorná e tera habitá ta presente aki tambe.” Ademas, na cuminsamentu di siglo 2, Plinio e Menor a skirbi emperador romano Trajano for di Bitinia tocante cristianismo. El a keha bisando: “No ta den e ciudadnan so: el a plama su infeccion na e pueblonan den cercania i den cunucu.”
13. Di ki manera e crecementu geográfico a mustra e amor di Dios pa humanidad?
13 E crecementu geográfico aki tabata un expresion di Jehova su amor profundo pa humanidad rescatabel. Ora Pedro a mira e spiritu santu manifestá su mes den Cornelio e homber gentil, el a bisa: “Siguramente mi ta percibí cu Dios no ta parcial, sino cu den tur nacion e hende cu ta tem’é i ta obra husticia ta aceptabel p’e.” (Echonan 10:34, 35) Sí, e bon nobo tabata i ta un mensahe pa tur pueblo, i e crecementu geográfico dje palabra di Dios a duna hende tur caminda oportunidad pa reaccioná riba e amor di Dios. Awor den siglo 21, e palabra di Dios a plama literalmente te na tur parti di mundu.
Crecementu Cu A Prevalecé
14. Ki sorto di crecementu Echonan 19:20 ta describí, i riba kico e palabra di Dios a prevalecé?
14 E di tres referencia na e crecementu dje palabra di Dios ta na Echonan 19:20: “Di un manera poderoso e palabra di Jehova a sigui crece i prevalecé.” E palabra griego original traducí como “prevalecé” ta transmití e idea di “ehercé forsa.” E versículonan promé ta relatá cu hopi hende na Efeso a bira creyente, i hopi hende cu a practicá magia a kima nan bukinan dilanti tur hende. Asina e palabra di Dios a prevalecé riba creencianan religioso falsu. Ademas e bon nobo a prevalecé riba otro obstáculonan, manera persecucion. Nada por a stop e. Den e aspecto aki, atrobe nos ta mira un semehansa notabel cu cristianismo berdadero den nos tempu.
15. (a) Kico un historiadó di Bijbel a skirbi tocante e promé cristiannan? (b) Ken e disipelnan a duna crédito pa nan éxito?
15 E apostelnan i otro cristiannan di promé a proclamá e palabra di Dios cu celo. Un historiadó bíblico a remarcá tocante nan: “Ora hende tin deseo di papia tocante nan Señor, nan ta haña hopi manera pa hacié. Sí, ta e motivacion dje homber i muhernan aki ta loke ta impresioná nos asta mas cu e métodonan cu nan a usa.” Tog e promé cristiannan ei a reconocé cu e éxito di nan ministerio no a dependé di nan esfuerso so. Nan tabatin un comision divino pa efectuá nan trabou, i nan tabatin apoyo divino pa cumpli cuné. Crecementu spiritual ta bini di Dios. Apostel Pablo a reconocé esaki den su carta p’e congregacion na Corinto. El a skirbi: “Ami a planta, Apólos a muha, pero Dios a sigui hacié crece. Pasobra nos ta colaboradó di Dios.”—1 Corintionan 3:6, 9.
Spiritu Santu na Obra
16. Kico ta mustra cu spiritu santu a fortalecé e disipelnan pa papia cu curashi?
16 Corda con Jesus a sigurá su disipelnan cu spiritu santu lo hunga un papel den e crecementu dje palabra di Dios, i cu spiritu santu lo duna e disipelnan poder den nan actividad di predicá. (Echonan 1:8) Con esaki a tuma lugá? No muchu tempu despues cu e spiritu santu a ser dramá riba e disipelnan na Pentecoste, e Sanedrin hudiu, e corte mas haltu den e pais, a manda yama Pedro cu Juan pa papia cu nan. E huesnan dje corte ei tabata esnan responsabel pa ehecucion di Jesucristo. E apostelnan lo a tembla di miedu dilanti un grupo di homber asina impresionante i hostil? Di ningun manera! Spiritu santu a duna Pedro i Juan poder pa papia cu asina un curashi, cu nan opositornan a keda impresioná, i “nan a cuminsá reconocé tocante nan cu nan tabata sa cana cu Jesus.” (Echonan 4:8, 13) Spiritu santu a pone Steban duna testimonio cu curashi tambe na e Sanedrin. (Echonan 6:12; 7:55, 56) Promé cu esei, spiritu santu a motivá e disipelnan pa predicá cu curashi. Lucas ta relatá: “Ora nan a haci súplica, e lugá den cua nan tabata reuní a ser sagudí; i nan tur sin excepcion a ser yená cu spiritu santu i tabata papia e palabra di Dios cu curashi.”—Echonan 4:31.
17. Den ki otro maneranan spiritu santu a yuda e disipelnan den nan ministerio?
17 Pa medio di su poderoso spiritu santu, Jehova, huntu cu Jesus resucitá, a dirigí e actividad di predicá. (Juan 14:28; 15:26) Ora cu spiritu santu a ser dramá riba Cornelio, su famia i su amigunan íntimo, apostel Pedro a reconocé cu gentilnan no circuncidá por a cualificá pa bautisá den nomber di Jesucristo. (Echonan 10:24, 44-48) Despues e spiritu a hunga un papel importante den asigná Barnabas i Saulo (apostel Pablo) pa actividad di misionero, i den dirigí nan unda nan mester bai, i unda no. (Echonan 13:2, 4; 16:6, 7) El a dirigí e proceso di tuma decision cu e apostelnan i ancianonan na Jerusalem a sigui. (Echonan 15:23, 28, 29) Tambe spiritu santu a dirigí nombramentu di superintendentenan den e congregacion cristian.—Echonan 20:28.
18. Con e promé cristiannan a expresá amor?
18 Ademas, spiritu santu a manifestá su mes den cristiannan mes, produciendo cualidadnan divino den nan, manera amor. (Galationan 5:22, 23) Amor a motivá e disipelnan pa nan compartí cu otro. Por ehempel, despues di Pentecoste di aña 33 E.C., nan a pone cen huntu pa atendé e necesidadnan físico dje disipelnan na Jerusalem. E relato di Bijbel ta bisa: “Niun hende den nan no tabatin necesidad; pasobra tur esnan cu tabata doño di cunucu of cas a bende nan i a trece e balor dje cosnan cu nan a bende i nan tabata pone nan na pia dje apostelnan. Anto nan tabata distribuí na cada un segun su necesidad.” (Echonan 4:34, 35) E amor aki no a abarcá compañeronan di creencia so, sino otro hende tambe, tantu dor di compartí e bon nobo cu nan, como dor di otro actonan di bondad. (Echonan 28:8, 9) Jesus a bisa cu amor di sacrificio propio lo identificá su siguidónan. (Juan 13:34, 35) Sin duda, e cualidad vital aki, amor, a atraé hende na Dios i a contribuí na e crecementu den promé siglo, mescos cu ta e caso awe.—Mateo 5:14, 16.
19. (a) Di ki tres manera e palabra di Jehova a crece den promé siglo? (b) Kico nos lo examiná den e siguiente artículo?
19 Na total, e expresion “spiritu santu” ta aparecé 41 bes den e buki di Echonan. Claramente, e crecementu di cristianismo berdadero den promé siglo tabata estrechamente ligá cu e poder i e guia di spiritu santu. E cantidad di disipel a aumentá, e palabra di Dios a plama riba un área mas grandi, i el a prevalecé riba religionnan i filosofianan dje era ei. E crecementu aki den promé siglo ta cuadra cu e obra cu Testigonan di Jehova ta efectuando awe. Den e siguiente artículo nos lo examiná e crecementu igualmente dramático dje palabra di Dios den tempu moderno.
Bo Ta Corda?
• Con e promé disipelnan a crece na cantidad?
• Di ki manera e palabra di Dios a plama geográficamente?
• Con e palabra di Dios a prevalecé den promé siglo?
• Ki papel spiritu santu a hunga den crecementu dje palabra di Dios?
[Plachi na página 12]
Felipe a predicá na un homber di Etiopia, loke a plama e bon nobo geográficamente
[Plachi na página 13]
Spiritu santu a dirigí e apostelnan i ancianonan na Jerusalem
[Rekonosementu pa Potrèt na página 10]
Skina na man drechi ariba: Makèt dje stad di Jerusalem, tempu dje Segundo Tempel-situá riba tereno di Holyland Hotel, na Jerusalem