E Ta Yena Nos “Kurason”

Dios stima nos òf e no tin kunes ku loke nos ta pasa aden? E kontesta ku nos ta haña den Beibel ta duna nos gran konsuelo. Echo ta ku Dios stima humanidat i e ke pa nos disfrutá di bida. Tur dia di nobo e ta permití hende—asta esnan mas malagradesí—benefisiá di e bon kosnan ku el a duna nos na abundansia. Laga nos wak un ehèmpel di esei den e palabranan di apòstel Pablo.—Lesa Echonan 14:16, 17.

Na un okashon ku Pablo tabata papia ku e habitantenan di e stat di Listra, kendenan no tabata adorá Dios, el a bisa: “Den pasado [Dios] a permití tur nashon hasi manera nan tabata ke, aunke e no a laga di duna prueba ta ken e ta, ya ku el a hasi bon, dunando boso áwaseru for di shelu i tempu di bon kosecha, i asina a laga boso haña kuminda na abundansia i a yena boso kurason ku alegria.” Kiko Pablo tabata ke pa nan komprondé for di e palabranan ei?

E habitantenan di Listra no tabatin nodi di bai muchu leu pa mira ku Pablo su palabranan tabata bèrdat. Listra tabata un region fértil i yen di awa, i e hendenan tabata biba di agrikultura. Sinembargo, manera Pablo a kòrda nan, ta Dios ta e Fuente di áwaseru i temporada di kosecha. Pues, ki ora ku nan tabatin un bon kosecha òf ki ora ku nan a kome un kuminda sukulento, nan tabata benefisiando di e bon kosnan ku Dios a duna hende.

Loke Pablo a bisa e pueblo di Listra ta siña nos vários lès importante tokante Yehova Dios.

Yehova ke pa nos siña konos’é. Pablo a splika ku Dios no “a laga di duna prueba ta ken e ta.” E buki di referensia menshoná anteriormente ta bisa ku por tradusí e frase akí komo “e ta laga hende mira bon kla ki tipo di Dios e ta.” Tur loke Dios a krea ta duna prueba di “su kualidatnan invisibel,” inkluso su bondat, su sabiduria, su poder i amor. (Romanonan 1:20) I den Beibel Yehova a revelá mas kos tokante su mes. (2 Timoteo 3:16, 17) No ta bisto ku e ke pa nos siña konos’é?

Yehova ke pa nos ta felis. Pablo a bisa ku Yehova ta laga nos “haña kuminda na abundansia” i ta yena nos “kurason ku alegria.” Asta un pekadó ku no ta rekonosé Yehova por kome su barika yen i haña un grado di felisidat den bida. Ma Dios ke pa nos biba pa semper den berdadero felisidat. Esei ta posibel únikamente si nos siña e bèrdat tokante dje i obedes’é.—Salmo 144:15; Mateo 5:3.

Diariamente nos tur ta benefisiá di Yehova su bondat. Lo bo no tin gana di haña sa kon bo por mustra bo apresio pa e Dios ku ta laga bo “haña kuminda na abundansia” i yena bo “kurason ku alegria”?