Sílas—Un Fuente di Animacion

FOR di principio dje historia di cristianismo, e actividad di superintendentenan biahero fiel tabata vital pa loke ta animacion dje congregacion di Dios su pueblo i tambe e plamamentu dje bon nobo te n’e partinan mas leu dje tera. Un dje promé superintendentenan biahero nombrá tabata Sílas, un profeta i un miembro prominente dje congregacion na Jerusalem. El a hunga un papel clave den desaroyonan importante dje trabou di predicá, i e tabata un dje promé misioneronan cu a predicá den teritorio europeo. Con bin Sílas tabata asina bon capacitá pa haci tur esaki? I cua característicanan di su personalidad ta bon pa nos imitá?

E Cuestion di Circuncision

Ora e cuestion tocante circuncision, cu lo por a causa division, a lanta rond di aña 49 E.C., e cuerpo gobernante na Jerusalem mester a laga instruccion claro bai rond den e cristiannan, pa resolvé e cuestion. Den e circunstancianan aki, Sílas, cu nan tabata yama Silvano tambe, ta aparecé den e registro bíblico. Kisas e tabata un di esnan cu a tuma decision, i cu despues a ser elegí como e mensahero di “e apostelnan i e ancianonan,” pa comunicá nan decision n’e “rumannan di Antiokia i Siria i Cilicia.” Na Antiokia, Sílas i Hudas (Barsabas), huntu cu Barnabas i Pablo, a duna e mensahe cu nan tabatin. Nan a haci esaki casi sigur dor di relatá oralmente loke a sosodé n’e reunion na Jerusalem, e decisionnan cu nan a tuma, i contenido dje carta. Tambe nan “a animá e rumannan cu hopi discurso i a fortalecé nan.” E resultado felis tabata cu e cristiannan na Antiokia “a alegrá.”—Echonan 15:1-32.

Pues Sílas a hunga un papel significativo den solucioná e cuestion fundamental aki. Pero su asignacion no tabata fácil. No tabatin ningun manera pa sa di antemano con e congregacion di Antiokia lo a reaccioná riba e decision. P’esei, segun un comentarista: “Tabatin mester di un persona cu hopi sabiduria i tacto pa splica loke e apostelnan a skirbi den nan carta.” E echo cu nan a scoge Sílas pa e asignacion delicado aki, ta bisa nos ki tipo di persona e mester tabata. E cuerpo gobernante por a confia cu lo e sigui nan instruccionnan fielmente. Tambe, e mester tabata un superintendente sabí cu por a ehercé un influencia pacífico ora controversia a lanta den e congregacion.

E Ta Biaha Huntu cu Pablo

No ta masha cla si Sílas a bolbe Jerusalem despues dje mision ei. En todo caso, despues di un diferencia di opinion entre Barnabas i Pablo tocante Juan Marco, Pablo a scoge Sílas, kende tabata na Antiokia e tempu ei, pa un biahe nobo cu Pablo tabatin intencion di haci pa rebishitá e stadnan unda el a predicá durante su promé biahe misional.—Echonan 15:36-41.

Kisas e echo cu el a scoge Sílas, tabata debí na su actitud positivo pa cu e mision relacioná cu e gentilnan, i dor di e autoridad cu Sílas, como un profeta i bocero dje cuerpo gobernante por a proporcioná ora di entregá nan decisionnan n’e creyentenan na Siria i Cilicia. E resultadonan tabata excelente. E buki di Echonan ta relatá: “Awor, segun cu nan tabata biahando dor dje stadnan, nan tabata entregá e decretonan cu e apostelnan i e ancianonan cu tabata na Jerusalem a dicidí ariba na esnan ei pa nan warda. P’esei, en berdad, e congregacionnan a sigui ser hací firme den fe i aumentá na cantidad dia tras dia.”—Echonan 16:4, 5.

Segun cu e misioneronan a biaha, spiritu santu a desviá nan dos bes for dje ruta cu nan a planea pa sigui. (Echonan 16:6, 7) Na Listra, despues cu tabatin “pronósticonan” no specificá relacioná cu Timoteo, e tambe a uni cu nan. (1 Timoteo 1:18; 4:14) Pablo, kende tambe tabatin e don di profetisá, a haña un vision, mediante cua e compañeronan di biahe tabata mandá pa barca bai Macedonia, Europa.—Echonan 16:9, 10.

Sutá i Cerá den Prizon

Na Filípos, “e stad principal dje distrito,” Sílas a pasa dor di un experencia teribel cu lo e no a lubidá. Despues cu Pablo a saca un spiritu di divinacion for di un mucha muher catibu, su doñonan, mirando cu nan a perde nan fuente di entrada, a lastra Sílas i Pablo hiba dilanti e magistradonan dje stad. E resultado tabata cu nan dos a experenciá e bergwensa di a ser presentá públicamente como hacidó di maldad, i cu a ranca nan pañanan exterior kita, i a bati nan cu bara den plasa.—Echonan 16:12, 16-22.

E sota aki no solamente tabata teribel i casi insoportabel, sino tambe ilegal den e caso di Pablo cu Sílas. Di con? Segun leynan romano, no tabatin mag di bati ningun ciudadano romano. Pablo tabatin ciudadania romano, i casi sigur Sílas tambe. Despues cu a caba di bati nan cu “hopi golpi,” a tira Pablo i Sílas den prizon unda a mara nan pianan na cepa. Esaki tabata “un instrumento horibel,” Gustav Stählin ta splica, “den cua por a span e pianan dje prizonero mes tantu cu tabata deseá, pa asina strob’é di drumi.” No tin duda cu nan lomba tabata yen di herida doloroso, pero tog meianochi, “Pablo i Sílas tabata haci oracion i alabá Dios cu cantica.”—Echonan 16:23-25.

Esaki ta bisa nos algu mas dje personalidad di Sílas. E tabatin goso pa motibu cu el a sufri pa causa dje nomber di Cristo. (Mateo 5:11, 12; 24:9) Evidentemente, tabata e mésun spiritu aki cu, durante e promé biahe misional pa Antiokia, a pone cu Sílas i su compañeronan por a animá i fortalecé e congregacion, causando alegria cerca nan compañeronan cristian. E goso di Pablo i Sílas mester a aumentá ora cu un temblor a libra nan milagrosamente for di prizon, i cu nan por a yuda e wardadó di prezu cu kier a cometé suicidio i tambe su famia ehercé fe den Dios.—Echonan 16:26-34.

Ni Pablo ni Sílas no a laga sota i encarcelacion intimidá nan. Ora e mandato a sali pa laga nan liber, nan a nenga di bai ketu-ketu yen di bergwensa for di Filípos manera e magistradonan a verwagt. Nan a para riba nan derechonan i awor ta nan a hinca e oficialnan arogante i arbitrario aki den pertá. Pablo a puntra: “Nan a suta nos públicamente sin cu nos tabata condená, nos cu ta romano, i a tira nos den prizon; i awor nan ta saca nos afó den secreto? Absolutamente cu no! Pero laga nan mes bini i hiba nos pafó.” Debí cu nan tabatin miedu dje consecuencianan, e magistradonan a haña nan obligá di roga e dos hombernan pa bandoná e stad.—Echonan 16:35-39.

Despues di a imprimí asina nan derechonan como romano den mente dje autoridadnan, Pablo i Sílas a cumpli cu e peticion dje magistradonan, pero no promé cu nan a tuma despedida di nan amigunan. Na armonia cu loke awor tabata típico di henter e gira di predicacion, un biaha mas Sílas cu su partner “a animá” e rumannan i despues nan a bai.—Echonan 16:40.

For di Macedonia te na Babilonia

Pablo cu Sílas i nan compañeronan no a laga e sucesonan aki, cu riba nan mes tabata negativo, demoralisá nan. Nan a sigui pa teritorionan misional nobo. Na Tesalónica nan a bolbe haña nan cu problema. Debí cu Pablo tabatin éxito den su ministerio durante tres sabat siguí, oponentenan yalurs a instigá un multitud, cu a pone cu e misioneronan a tuma e paso sabí di bandoná e stad durante anochi. Nan a sigui rumbo pa Berea. Ora cu e opositornan a haña sa dje logronan di Pablo i su compañeronan den e stad ei, nan a biaha bini for di Tesalónica. Pablo a sigui bai su so, miéntras Sílas cu Timoteo a keda Berea pa cuida esnan recien interesá. (Echonan 17:1-15) Sílas cu Timoteo a bolbe djoin Pablo na Corinto, i a trece bon noticia p’e i kisas tambe un regalo for di amigunan fiel di Macedonia. Esaki lo a pone cu e apostel den necesidad por a bandoná su trabou seglar cu entre tantu el a tuma i, bolbe cuminsá traha cu vigor den e trabou di predicá di tempu completo. (Echonan 18:1-5; 2 Corintionan 11:9) Na Corinto, nan ta yama Sílas cu Timoteo tambe evangelisadó i compañero di Pablo. Pues, ta bisto cu nan actividadnan no a mengua den e stad ei tampoco.—2 Corintionan 1:19.

Hende a asumí cu e uso dje pronomber “nos” atrabes dje cartanan dirigí n’e tesalonicensenan, tur dos skirbí na Corinto durante e periodo aki, ta nificá cu Sílas i Timoteo a contribuí n’e skirbimentu. Sin embargo, e idea di cu Sílas a participá den trabou di skirbimentu, ta basá principalmente riba loke Pedro ta bisa tocante un di su mes cartanan. Pedro ta bisa cu el a skirbi su promé carta for di Babilonia “mediante Silvano, un fiel ruman.” (1 Pedro 5:12, 13) Aunke esaki por a nificá simplemente cu Silvano tabata esun cu a entregá e carta, e diferencia den estilo entre e dos cartanan di Pedro lo por ta un indicacion cu el a usa Sílas pa skirbi su promé carta, pero no pa esun di dos. Pues, un dje vários talento i privilegionan teocrático di Sílas kisas tabata esun di traha como secretario.

Un Ehempel pa Imitá

Ora nos para ketu i refleccioná riba e cosnan cu nos sa cu Sílas a haci, nos tin cu concluí cu su registro ta impresionante. E ta un excelente ehempel pa misionero i superintendentenan biahero djawe. Inegoistamente el a biaha distancianan largu cu a nificá hopi sacrificio p’e, no pa logra bentaha material of prestigio, sino pa yuda otro hende. Su meta tabata pa animá nan cu conseho sabí i cu tacto, cu discursonan caluroso i bon prepará, i tambe cu su celo den sirbishi di veld. Sea cual sea bo papel den Jehova su pueblo organisá, si bo tambe haci esfuerso pa ta positivo, asta ora bo topa cu adversidad, bo tambe lo ta un fuente di animacion pa bo compañeronan creyente.

[Mapa na página 29]

(Pa e teksto den su formato kompleto, wak e publikashon)

Pablo Su Segundo Biahe Misional

Laman Grandi

Antiokia

Derbe

Listra

Iconio

Tróas

Filípos

Amfípolis

Tesalónica

Berea

Aténas

Corinto

Efeso

Jerusalem

Cesarea

[Rekonosementu]

Mountain High Maps® Copyright © 1997 Digital Wisdom, Inc.