BO TABATA SA?
Ki bentaha siudadania romano a duna apòstel Pablo?
Pablo a deklará: “Mi ta apelá na Sésar!”
Hende ku tabatin siudadania romano tabatin sierto derecho- i privilegionan tur kaminda den e Imperio Romano. Nan tabata kai bou di e lei romano i no e lei di e provinsianan. Ora un siudadano romano tabata bou di akusashon, e por a aseptá pa ser husgá segun e leinan lokal, pero e tabatin derecho di aparesé dilanti di un tribunal romano tambe. Si el a haña sentensia di morto, e tabatin e derecho di apelá su kaso serka e emperador.
A base di e derechonan akí, e estadista romano di siglo ún promé ku Kristu, Siseron, a bisa: “Ta un krímen pa mara un siudadano romano, ta un akto di maldat pa menas’é, i pa yega asina leu di mat’é, ta kasi manera asesiná un mayor òf un famia yegá.”
Apòstel Pablo a prediká den henter e Imperio Romano. I Beibel ta menshoná tres okashon ku el a hasi uso di su derecho komo siudadano romano: (1) El a informá e wardadónan di òrdu públiko di Filipo ku nan a violá su derechonan ora ku nan a sut’é. (2) Na Herúsalèm el a revelá ku e ta romano pa evitá di haña un halá di sota. (3) El a apelá su kaso na Sésar, emperador romano, pa Sésar mes por a trata su kaso.—Echonan 16:37-39; 22:25-28; 25:10-12.
Kon doño di bestia tabata paga hende pa kuida nan bestianan den tempu bíbliko?
Un kontrakt grabá riba klei pa kompra di karné i kabritu, rònt di aña 2050 promé ku Kristu
E patriarka Yakòb a kuida e bestianan di su tio Laban pa 20 aña. El a traha 14 aña pa e por a kasa ku Laban su dos yu muhénan. Despues el a traha seis aña mas i a haña un kantidat di bestia komo pago. (Génesis 30:25-33) E revista Biblical Archaeology Review ta bisa ku un kombenio entre un doño i un kuidadó di bestia, manera esun entre Laban i Yakòb, “tabata mashá konosí pa e eskritor- i lesadónan di e teksto bíbliko den antigwedat.”
Un ehèmpel di esei ta e kontraktnan ku a ser deskubrí na Nuzi, Larsa i otro sitionan kaminda awe ta Irak. Kada kombenio tabata konta pa un aña, kuminsando for di e temporada di pela karné te na e mesun temporada ei den e siguiente aña. Kada kuidadó di bestia tabata haña un kantidat spesífiko di bestia pa kuida. Tabata registrá e bestianan segun nan edat i sekso. Un aña despues, e kuidadó di bestia mester a duna e doño e kantidat di wòl, produkto di lechi i karné yòng ku nan a palabrá, i sobrá tabata pa e mes.
E kantidat di bestia por a oumentá dependiendo di kuantu karné hembra un kuidadó di bestia a haña pa kuida. Shen karné hembra por a wèrp 80 lamchi salú. Kualke pèrdida di animal tabata ser pon’é riba su kuenta. Pues, e tabatin bon motibu pa kuida e bestianan bon.