Tin Speransa pa e Mortonan?

LOKE BEIBEL TA BISA: “Lo yega e ora ku tur esnan ku ta den graf lo tende [Hesus] su stèm i lo sali afó.”—Huan 5:28, 29.

Pues, Hesus a profetisá ku bou di e gobernashon di su Reino tur graf lo bira bashí. Fernando, ku nos a menshoná den e artíkulo anterior, a bisa: “Mi a keda masha impreshoná ora mi a lesa Huan 5:28 i 29 pa promé biaha. Esaki a duna mi berdadero speransa, i mi a kuminsá wak futuro na un manera mas positivo.”

Yòb, un hòmber fiel di antigwedat, tabata sa ku si e muri, Dios lo resusit’é. El a puntra: “Si un hende muri, lo e bolbe biba?” I ku konfiansa Yòb a kontestá: “Tur e dianan di mi lucha lo mi spera [den Graf], te ora mi liberashon bini. Abo lo yama, i ami lo kontestá bo.”—Yòb 14:14, 15.

Marta, e ruman di Lázaro, tambe tabata sa ku si un hende muri, e por resusitá. Kon nos sa esei? Pasobra despues ku Lázaro a muri, Hesus a bis’é: “Bo ruman lo lanta for di morto.” Marta a kontest’é: “Mi sa ku lo e lanta den e resurekshon riba e último dia.” Hesus a respond’é: “Ami ta e resurekshon i e bida. Esun ku pone fe den mi, maske e muri, lo bolbe biba.” (Huan 11:23-25) Djis despues di bisa esei, el a resusitá Lázaro. E relato impreshonante ei ta djis un ñapa di loke ta bai tuma lugá den futuro. Imaginá bo kon emoshonante lo ta ora ku miónes di hende rònt mundu resusitá.

LOKE BEIBEL TA BISA: E Palabra di Dios ta mustra ku tin un diferensia entre e resurekshon di Hesus i e otro ocho resurekshonnan. E ocho personanan ku a haña resurekshon no a bai niun kaminda; nan a keda akí riba tera. Pero tokante e resurekshon di Hesus, Beibel ta bisa: “Hesukristu . . . a bai shelu i awor e ta na man drechi di Dios.” (1 Pedro 3:21, 22) Pero ta Hesus ta e úniko persona ku lo a haña resurekshon pa biba den shelu? Na dado momento, Hesus a bisa su apòstelnan: “Ora mi bai i prepará un lugá pa boso, lo mi bini bèk i risibí boso serka mi, pa kaminda mi ta, boso tambe por ta.”—Huan 14:3.

Ora Kristu a bai shelu, el a prepará un lugá pa su disipelnan. Revelashon 14:1 i 3 ta bisa ku ta 144.000 hende lo bai shelu. Pero kiko nan lo bai hasi einan?

Nan lo tin hopi trabou. Beibel ta bisa nos: “Felis i santu ta esnan ku tin parti den e promé resurekshon; e di dos morto no tin outoridat riba nan, ma nan lo ta saserdote di Dios i di Kristu, i nan lo reina komo rei huntu kuné pa e 1.000 añanan.” (Revelashon 20:6) Esnan ku haña resurekshon pa biba den shelu lo ta rei i saserdote huntu ku Kristu, i nan lo goberná e tera.

LOKE BEIBEL TA BISA: Nos por lesa e siguiente palabranan inspirá di apòstel Pablo: “Mi tin e speransa akí den Dios, e mesun speransa ku e hendenan akí tambe tin, esta, ku lo bai tin un resurekshon di tantu hende hustu komo inhustu.”—Echonan 24:15.

Ken ta e hendenan “hustu” ku Pablo a papia di dje? Laga nos wak e ehèmpel di e hòmber fiel Daniel. Na fin di su bida, un angel a bis’é: “Lo bo bai sosegá i lo lanta pa risibí e parti ku ta toka bo na e fin di dianan.” (Daniel 12:13) Pero na unda Daniel lo lanta for di morto? “E hustunan lo heredá e tera, i lo biba den dje pa semper.” (Salmo 37:29) I Hesus a profetisá: “Felis ta esnan ku tin un genio suave, ya ku nan lo haña e tera.” (Mateo 5:5) Pues, Daniel i otro sirbidónan fiel lo haña resurekshon pa biba pa semper riba tera.

Awor, ken ta e hendenan “inhustu” ku Pablo a papia di dje? E grupo akí ta e míles di miónes di hende ku a muri ku no a haña oportunidat pa komprondé i apliká loke Beibel ta siña. Despues ku nan resusitá, nan lo haña un chèns pa siña konosé i stima Yehovaa i Hesus. (Huan 17:3) Meskos ku Yehova ta biba pa semper, asina tambe tur esnan ku skohe pa sirbi Dios lo tin e speransa pa biba pa semper.

LOKE BEIBEL TA BISA: Dios “lo . . . seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas.” (Revelashon 21:4) “Nan lo traha kas i biba den nan; tambe nan lo planta kunukunan di wendrùif i kome nan fruta.”—Isaías 65:21.

Djis imaginá bo kon dushi lo ta pa biba ku bo sernan kerí ku a resusitá. Pero kon nos por ta sigur ku e resurekshon lo tuma lugá?