“Morto Tin cu Ser Reducí na Nada”
“Como e último enemigu, morto tin cu ser reducí na nada.” —1 CORINTIONAN 15:26.
1, 2. (a) Ki speransa apostel Pablo a ofrecé p’e mortonan? (b) Ki pregunta tocante resureccion Pablo a trata?
“MI TA kere den . . . resureccion dje curpa i bida eterno.” Asina e Credo dje Apostelnan ta bisa. Católiconan i tambe protestantnan ta recit’é obedientemente, sin realisá cu nan creencianan ta mas similar na filosofia griego cu cualkier cos cu e apostelnan a yega di kere. Sin embargo, apostel Pablo a rechasá filosofia griego i no a kere den un alma inmortal. Tog, el a kere firmemente den un futuro bida i a skirbi bou di inspiracion: “Como e último enemigu, morto tin cu ser reducí na nada.” (1 Corintionan 15:26) Kico exactamente esei ta nificá pa humanidad muribundo?
2 Pa contestá esei, laga nos bai bek na Pablo su consideracion di resureccion registrá na 1 Corintionan capítulo 15. Lo bo corda cu den e versículonan di introduccion, Pablo a establecé e siñansa di resureccion como un parti vital di doctrina cristian. Awor e ta bai trata un pregunta specífico: “No obstante, un hende lo bisa: ‘Con e mortonan lo ser lantá? Sí, cu ki sorto di curpa nan ta bin?’”—1 Corintionan 15:35.
Ki Sorto di Curpa?
3. Pakico algun hende a rechasá e siñansa di resureccion?
3 Ora Pablo a plantia e pregunta aki, muy probablemente su intencion tabata pa contrarestá e influencia di Plato su filosofia. Plato a siña cu hende tin un alma inmortal cu ta sigui biba despues cu e curpa muri. Pa esnan cu a lanta cu un idea asina, e siñansa cristian di resureccion sin duda a parce innecesario. Si e alma ta sigui biba despues di morto, pakico mester tin un resureccion? Ademas, resureccion probablemente a parce ilógico. Una bes e curpa a ser disolvé na stof, con por tin un resureccion? E comentarista di Bijbel Heinrich Meyer ta bisa cu e antagonismo di algun corintio posiblemente tabata basá “riba e comprendimentu filosófico cu restoracion di materia dje curpa tabata imposibel.”
4, 5. (a) Pakico e obhecionnan di hende sin fe tabata irazonabel? (b) Splica Pablo su ilustracion dje “grano sunú.” (c) Ki sorto di curpa Dios ta duna e ungínan resucitá?
4 Pablo ta exponé e bobedad di nan razonamentu: “Hende irazonabel! Loke bo ta sembra no ta ser hací bibu a ménos cu e muri promé; i en cuanto loke bo ta sembra, bo ta sembra, no e curpa cu lo desaroyá, sino un grano sunú, e por ta di trigu of di cualkier dje otronan; pero Dios ta dun’é un curpa segun su agrado, i na cada un di e simianan su mes curpa.” (1 Corintionan 15:36-38) Dios no tabatin intencion di lanta e curpa cu un hende tabatin tempu cu e tabata riba tera. Mas bien, lo bai tin un transformacion.
5 Pablo ta compará resureccion cu e spruitmentu di un simia. Un simia di trigu chikititu no ta parce na nada e mata cu lo e crece bira despues. The World Book Encyclopedia ta bisa: “Ora un simia cuminsá spruit, e ta absorbá gran cantidad di awa. E awa ta causa hopi cambio kímico den e simia. Tambe e ta pone e simia su tehido interno hincha i kibra pasa dor di casca dje simia.” En efecto, e simia ta muri como simia i ta bira un mata yong. “Dios ta dun’é un curpa” den e sentido cu el a establecé leynan científico cu ta dirigí su desaroyo, i cada simia ta ricibí un curpa segun su sorto. (Génesis 1:11) Di igual manera, cristiannan ungí ta muri promé como hende. Anto, na Dios su debido tempu, e ta trece nan bek na bida den un curpa henteramente nobo. Manera Pablo a bisa e filipensenan: “Jesucristo . . . lo cambia nos curpa humiyá p’e bira igual cu su curpa glorioso.” (Filipensenan 3:20, 21; 2 Corintionan 5:1, 2) Nan ta ser resucitá cu curpa spiritual i ta biba den e region spiritual.—1 Juan 3:2.
6. Pakico ta razonabel pa kere cu Dios por duna esnan resucitá un curpa spiritual apropiado?
6 Esaki ta muchu difícil pa kere? No. Pablo ta razoná cu animal tin hopi diferente tipo di curpa. Ademas, e ta haci un contraste entre angel celestial i hende di carni i sanger, bisando: “Tin curpa celestial, i curpa terenal.” Tambe tin un gran variedad den e creacion inanimá. “Strea ta diferenciá for di strea den gloria,” Pablo a bisa, i esaki hopi promé cu ciencia a descubrí cuerponan celestial manera strea blou, strea gigante corá i strea enano blancu. En bista di esaki, no ta razonabel cu Dios por percurá curpa spiritual apropiado pa ungínan resucitá?—1 Corintionan 15:39-41.
7. Kico ta e nificacion di incorupcion? di inmortalidad?
7 Anto Pablo ta bisa: “Asina tambe ta resureccion dje mortonan. E ta ser sembrá den corupcion, e ta ser lantá den incorupcion.” (1 Corintionan 15:42) Un curpa humano ta coruptibel, asta ora e ta perfecto. Por mat’é. Por ehempel, Pablo a bisa cu Jesus resucitá tabata “destiná pa nunca mas bolbe na corupcion.” (Echonan 13:34) Hamas lo e bolbe na bida den un curpa humano coruptibel, aunke perfecto. Curpa cu Dios ta duna e ungínan resucitá ta incoruptibel. Nan no por muri ni degenerá mas. Pablo ta continuá: “E ta ser sembrá den desonor, e ta ser lantá den gloria. E ta ser sembrá den debilidad, e ta ser lantá den poder. E ta ser sembrá un curpa físico, e ta ser lantá un curpa spiritual.” (1 Corintionan 15:43, 44) Mas aleu, Pablo ta bisa: “Esaki cu ta mortal mester bisti inmortalidad.” Inmortalidad ta nificá un bida sin fin i indestructibel. (1 Corintionan 15:53; Hebreonan 7:16) Den e manera aki, esnan resucitá ta carga “e imágen di esun celestial,” Jesus, kende a haci nan resureccion posibel.—1 Corintionan 15:45-49.
8. (a) Con nos por sa cu esnan resucitá ta e mésun individuonan cu nan tabata tempu cu nan tabata riba tera? (b) Ki profecianan ta cumpli ora e resureccion tuma lugá?
8 Apesar dje transformacion aki, esnan resucitá ainda ta e mésun individuonan cu nan tabata promé cu nan a muri. Nan lo ser lantá cu e mésun memoria i e mésun cualidadnan cristian sobresaliente. (Malakías 3:3; Revelacion 21:10, 18) Den e aspecto aki, nan ta manera Jesucristo. El a cambia for di spiritu pa bira hende. Anto el a muri i a ser resucitá como spiritu. Tog, “Jesucristo ta mescos ayera i awe, i pa semper.” (Hebreonan 13:8) Ki un privilegio glorioso e ungínan tin! Pablo ta bisa: “Pero ora esaki cu ta coruptibel bisti incorupcion i esaki cu ta mortal bisti inmortalidad, anto e palabra lo ser efectuá cu ta pará skirbí: ‘Morto ta ser tragá pa semper.’ ‘Morto, unda bo victoria ta? Morto, unda bo puinan ta?’”—1 Corintionan 15:54, 55; Isaías 25:8; Oséas 13:14.
Un Resureccion Terenal?
9, 10. (a) Den e contexto di 1 Corintionan 15:24, kico ta “e fin,” i ki sucesonan ta tuma lugá en coneccion cu esei? (b) Ki mester tuma lugá pa morto ser reducí na nada?
9 Tin un futuro p’e miyones di hendenan cu no tin e speransa di bida spiritual inmortal den shelu? Sí, tin! Despues di a splica cu e resureccion celestial ta tuma lugá durante e presencia di Cristo, Pablo ta splica e sucesonan cu ta sigui despues, bisando: “Siguientemente, e fin, ora e entregá e reino na su Dios i Tata, ora cu el a reducí na nada tur gobiernu i tur autoridad i poder.”—1 Corintionan 15:23, 24.
10 “E fin” ta e fin dje Reinado di Mil Aña di Cristo, ora cu Jesus na un manera humilde i leal ta entregá e Reino na su Dios i Tata. (Revelacion 20:4) E propósito di Dios “pa recogé tur cos huntu atrobe den Cristo,” lo a ser cumplí. (Efesionan 1:9, 10) Sin embargo, promé cu esei, Cristo lo a destruí “tur gobiernu i tur autoridad i poder” cu ta oponé e boluntad Soberano di Dios. Esaki ta enbolbé mas cu e destruccion causá na Armagedon. (Revelacion 16:16; 19:11-21) Pablo ta bisa: “[Cristo] tin cu reina como rey te ora Dios a pone tur enemigu bou di su pia. Como e último enemigu, morto tin cu ser reducí na nada.” (1 Corintionan 15:25, 26) Sí, tur rastro dje picá i morto adámico lo a ser eliminá. Di mes, anto, Dios lo a haci e “grafnan conmemorativo” bashí dor di trece e mortonan bek na bida.—Juan 5:28.
11. (a) Con nos sa cu Dios por re-creá almanan morto? (b) Ki clase di curpa esnan resucitá pa biba riba tera lo ricibí?
11 Esaki ta nificá re-creacion di alma humano. Imposibel? No, pasobra Salmo 104:29, 30 ta sigurá nos cu Dios por haci esei: “Si bo kita nan spiritu, nan ta saca nan último rosea, i nan ta bai bek na nan stof. Si bo manda bo spiritu, nan ta ser creá.” Aunke esnan resucitá lo ta e mésun individuonan cu nan tabata promé cu nan morto, nan lo no tin nodi di haña e mésun curpa. Mescos cu esnan resucitá pa shelu, Dios lo duna nan un curpa net na su agrado. Sin duda nan curpa nobo lo ta físicamente sano i razonablemente similar na nan curpa original di manera cu nan sernan kerí lo reconocé nan.
12. Na ki tempu e resureccion terenal ta tuma lugá?
12 Na ki tempu e resureccion terenal lo tuma lugá? Marta a bisa di su defuntu ruman, Lázaro: “Mi sa cu lo e lanta den e resureccion riba e último dia.” (Juan 11:24) Con e por tabata sa esei? E resureccion tabata un tema di controversia den su tempu, ya cu e fariseonan a kere den dje pero e saduceonan si no. (Echonan 23:8) Tog, Marta mester tabata sa di testigonan pre-cristian cu a spera den e resureccion. (Hebreonan 11:35) Tambe, lo e por a dicerní for di Daniel 12:13 cu e resureccion lo tuma lugá riba e último dia. Kisas el a asta siña esaki for di Jesus mes. (Juan 6:39) E “último dia” ei ta coincidí cu e Reinado di Mil Aña di Cristo. (Revelacion 20:6) Imaginá e excitacion durante e “dia” ei ora e suceso magnífico aki cuminsá!—Compará cu Lucas 24:41.
Ken Ta Bini Bek?
13. Ki vision dje resureccion tin registrá na Revelacion 20:12-14?
13 Revelacion 20:12-14 ta describí Juan su vision dje resureccion terenal: “Mi a mira e mortonan, grandi i chikitu, pará dilanti e trono, i rolnan a ser habrí. Pero un otro rol a ser habrí; esei ta e rol di bida. I e mortonan a ser husgá di acuerdo cu loke ta pará skirbí den e rolnan segun nan obranan. I laman a entregá esnan morto den dje, i morto i Hádes a entregá esnan morto den nan, i nan a ser husgá individualmente segun nan obranan. I morto i Hádes a ser tirá den e lago di candela. Esaki ta nificá e segundo morto, e lago di candela.”
14. Ken lo ta entre esnan resucitá?
14 E resureccion lo incluí “grandi i chikitu,” tantu hende prominente como hende comun cu a biba i muri. Sí, asta mucha chikitu lo ta entre e cantidad ei! (Jeremías 31:15, 16) Na Echonan 24:15, un otro detaye importante ta ser revelá: “Lo bai tin un resureccion di tantu e hustunan como e inhustunan.” Esnan cu lo figurá entre “e hustunan” lo ta homber i muhernan fiel di pasado, manera Abel, Enoc, Noe, Abraham, Sara i Rahab. (Hebreonan 11:1-40) Imaginá bo mes ta combersá cu hende asina i haña datonan dje testigonan ocular aki di sucesonan bíblico di hopi tempu pasá! “E hustunan” lo incluí tambe e miles di individuonan temeroso di Dios cu a muri den tempunan mas recien i cu no tabatin un speransa celestial. Bo tin un miembro di famia of un ser kerí cu lo por ta entre esakinan? Ta ki un consuelo pa sa cu bo por mira nan atrobe! Pero, ken ta e “inhustunan” cu tambe lo bini bek? Nan ta incluí miyones, kisas miles di miyones, di hende cu a muri sin haña un oportunidad di siña i aplicá berdadnan bíblico.
15. Kico kier men cu esnan cu ta bini bek lo ser “husgá di acuerdo cu loke ta pará skirbí den e rolnan”?
15 Con esnan cu ta bini bek lo ser “husgá di acuerdo cu loke ta pará skirbí den e rolnan segun nan obranan”? E rolnan aki no ta e registro di nan obranan di pasado; ora nan a muri, nan a ser absolvé dje picánan cu nan a cometé durante nan bida. (Romanonan 6:7, 23) Sin embargo, ainda hende resucitá lo ta bou dje picá adámico. Lo mester ta, anto, cu e rolnan aki lo describí instruccionnan divino cu tur hende mester sigui afin di beneficiá plenamente dje sacrificio di Jesucristo. Ora e último rastro di picá adámico ser eliminá, ‘morto lo ser reducí na nada’ den e sentido di mas completo. Pa fin dje mil aña, Dios lo “ta tur cos pa tur hende.” (1 Corintionan 15:28) Hende lo no tin mester mas dje intervencion di un Sumo Sacerdote of Rescatador. Henter humanidad lo ser restorá n’e condicion perfecto cu Adam tabatin originalmente.
Un Resureccion Segun Orden
16. (a) Pakico ta razonabel pa kere cu e resureccion lo ta un proceso ordená? (b) Ken probablemente lo ta entre e proménan pa bini bek for di morto?
16 Siendo cu e resureccion celestial ta bai segun órden, “cada un den su mes categoria,” ta evidente cu e resureccion terenal lo no crea un explosion di poblacion caótico. (1 Corintionan 15:23) Ta lógico cu mester percurá pa esnan cu lo a caba di ser resucitá. (Compará cu Lucas 8:55.) Nan lo tin mester di sosten físico i—mas importante—yudansa spiritual pa gana e conocimentu dunadó-di-bida di Jehova Dios i di Jesucristo. (Juan 17:3) Si tur hende bini bek na bida pareu, lo ta imposibel pa percurá pa nan di un manera adecuá. Ta razonabel pa asumí cu e resureccion lo tuma lugá progresivamente. Cristiannan fiel cu a muri djis promé cu e fin dje sistema di Satanas probablemente lo ta entre e proménan pa ser lantá. Nos por spera tambe un resureccion trempan p’e hombernan fiel di pasado cu lo sirbi como “prins.”—Salmo 45:16.
17. Kico ta algun asuntu relacioná cu resureccion tocante cua Bijbel no ta bisa nada, i pakico cristiannan no mester ta indebidamente preocupá tocante cosnan asina?
17 No obstante, nos no mester ta dogmático riba asuntunan asina. Riba hopi cos Bijbel no ta duna un contesta. E no ta specificá e detayenan tocante con, ki tempu, of na cua sitio e resureccion di hende lo tuma lugá. E no ta bisa nos con esnan cu ta bini bek lo ser alohá, alimentá i bistí. Ni nos no por bisa cu certesa con Jehova lo soru pa cosnan manera e criamentu i cuido di muchanan resucitá ni con lo e percurá pa cierto situacionnan cu lo por enbolbé nos amigunan i sernan kerí. Sigur, ta normal pa nos haci nos mes pregunta tocante cosnan asina; pero lo ta imprudente pa dedicá tempu na purba contestá preguntanan cu actualmente no por ser contestá. Nos enfoke mester ta riba sirbi Jehova fielmente i gana bida eterno. Cristiannan ungí ta pone nan speransa den un glorioso resureccion celestial. (2 Pedro 1:10, 11) E “otro carnénan” ta spera riba un herencia eterno den e region terenal dje Reino di Dios. (Juan 10:16; Mateo 25:33, 34) Pa loke ta e hopi detayenan cu nos no sa tocante e resureccion, nos simplemente ta confia den Jehova. Nos futuro felicidad ta sigur den man di Esun cu por ‘satisfacé e deseo di tur cos bibiente.’—Salmo 145:16; Jeremías 17:7.
18. (a) Ki victoria Pablo ta resaltá? (b) Pakico nos tin confiansa sigur den e speransa di resureccion?
18 Pablo ta concluí su argumento sclamando: “Danki na Dios, pasobra e ta duna nos e victoria mediante nos Señor Jesucristo!” (1 Corintionan 15:57) Sí, victoria ta ser lográ riba morto adámico mediante e sacrificio di rescate di Jesucristo, i tantu e ungínan como e “otro carnénan” ta participá den e victoria ei. Naturalmente, e “otro carnénan” na bida awe tin un speransa cu ta único p’e generacion aki. Como parti di un “multitud grandi” cu ta sigui aumentá, nan por sobrebibí e binidero “tribulacion grandi” i hamas experenciá morto físico! (Revelacion 7:9, 14) Sin embargo, asta esnan cu muri pa motibu di “tempu i suceso imprevisto” of na man dje agentenan di Satanas, por pone nan confiansa den e speransa di resureccion.—Eclesiástes 9:11.
19. Ki exhortacion tur cristian mester haci caso di dje awe?
19 P’esei, nos ta spera ansiosamente riba e dia glorioso ei ora cu morto lo ser reducí na nada. Nos confiansa firme den Jehova su promesa dje resureccion ta duna nos un punto di bista realístico di asuntunan. Kico cu pasa cu nos den e bida aki—asta si nos mester muri—nada por horta nos dje recompensa cu Jehova a primintí. Pues, Pablo su exhortacion final n’e corintionan ta mes apropiado awe cu e tabata dos mil aña pasá: “P’esei, mi rumannan stimá, bira firme, inmovibel, semper teniendo hopi di haci den e trabou di Señor, sabiendo cu boso labor no ta en bano en relacion cu Señor.”—1 Corintionan 15:58.
Bo Por Splica?
◻ Con Pablo a contestá e pregunta tocante ki curpa e ungínan lo tin ora nan resucitá?
◻ Con i na ki tempu morto finalmente lo ser reducí na nada?
◻ Ken lo ser incluí den e resureccion terenal?
◻ Kico mester ta nos actitud relacioná cu asuntunan tocante cua Bijbel no ta bisa nada?
[Plachi na página 20]
Un simia ta “muri” dor di pasa den un cambio drástico
[Plachinan na página 23]
Homber i muhernan fiel di pasado, manera Noe, Abraham, Sara i Rahab, lo ta entre esnan resucitá
[Plachi na página 24]
E resureccion lo ta un tempu di gran goso!