“Mi Ta Apelá na César!”

UN MULTITUD desordená ta gara un homber indefenso i ta cuminsá batié. Nan ta pensa cu e merecé morto. Net ora ta parce cu nan ta bai logra nan meta, soldánan ta aparecé. Cu dificultad nan ta logra libra e víctima for di gara dje multitud violento. E homber aki ta apostel Pablo. E personanan cu a atak’é ta hudiunan cu ta fuertemente contra e predicacion di Pablo i nan ta acus’é di a contaminá e tempel. Esnan cu a rescatá Pablo ta soldá romano bou di guia di nan comandante Claudio Lisias. Den e confusion cu ta reina nan ta arestá Pablo bou di sospecho di ta un criminal.

E último shete capítulonan dje buki di Echonan ta describí e caso den corte cu a lanta debí na e aresto aki. Un tiki saber di Pablo su antecedente legal, e acusacionnan contra dje, di su defensa i di e procedura penal di Roma, ta yuda nos comprendé e capítulonan aki mihó.

Bou di Custodia di Claudio Lisias

Un di e responsabilidadnan cu Claudio Lisias tabatin ta pa mantené ordu den Jerusalem. Su superior, e gobernadó romano di Hudea tabata biba na Cesarea. Bo por mira e accion cu Lisias a tuma den e caso di Pablo como un medida pa protehá un persona for di violencia of tambe como detencion di un persona cu ta stroba pas. E manera cu e hudiunan a reaccioná a pone cu Lisias a hiba su prezu n’e cuartel di soldá den e Toren di Antonia.—Echonan 21:27–22:24.

Lisias mester a investigá ta kico Pablo a haci. Den e cáos cu tabatin e no a saca nada afó. Pues sin perde muchu tempu, el a duna ordu pa ‘interogá Pablo cu sota, p’e por sa exactamente pa ki motibu nan tabata grita contra Pablo asina.’ (Echonan 22:24) Esaki tabata e procedura normal pa saca informacion for di criminal, esclabo i otro hende di rango social inferior. Zwiep (flagrum) lo por a yuda den esei, pero e tabata un instrumento masha spantoso. Tin di nan tabatin balanan di metal cologá na cadena. Tabatin otronan trahá di repi di cueru di flegtu cu wesu i pida di metal skerpi aden. Nan tabata causa heridanan doloroso, i desfigurá curpa di hende.

Ta e ora ei Pablo a revelá cu e tin ciudadania romano. No tabata permití pa suta un romano cu no a ser condená, pues e echo cu Pablo a busca su derecho tabatin efecto mesora. Si un oficial romano a castigá of abusá di un ciudadano romano, esei por a cost’é su posicion. Ta di comprendé anto cu desde e dia ei nan a trata Pablo manera un prizonero special cu por a ricibí bishita.—Echonan 22:25-29; 23:16, 17.

Dor cu Lisias no tabata sigur kico tabata e acusacionnan contra Pablo, el a hib’é dilanti Sanedrin pa busca un splicacion p’e bochincha. Pero Pablo a lanta un discusion ora el a bisa cu nan ta husgu’é pa motibu dje cuestion di resureccion. E desacuerdo tabata asina fuerte cu Lisias a teme cu nan lo a habracá Pablo, i atrobe el a hañ’é obligá di scapa Pablo for di gara di hudiunan rabiá.—Echonan 22:30–23:10.

Lisias no kier tabata responsabel pa asesinato di un romano. Ora cu el a haña sa dje complot pa mata su prezu, mesora el a laga hib’é Cesarea. Segun e proceduranan legal, ora a manda un prezu pa autoridad superior di husticia, mester a manda informe cu a describí e caso. Den e raportnan aki mester tabatin entre otro e resultado di investigacionnan inicial, e motibunan pa e medida cu a tuma i opinion cu e investigadó tin dje caso. Lisias a informá cu Pablo a ser ‘acusá tocante cuestionnan dje Ley hudiu, pero cu e no tabata acusá di nada cu ta merecé morto of cadena.’ I el a duna ordu pa esnan cu tabata acusá Pablo presentá nan kehonan cerca e procuradó Félix.—Echonan 23:29, 30.

Gobernadó Félix No Ta Dicta Sentencia

Ta Félix tabatin e poder i autoridad pa manda den e provincia. Si e tabata kier e por a scoge entre sigui custumber local of e ley di criminal segun statutonan cu tabata ser aplicá den caso di miembronan prominente di sociedad i funcionarionan di gobiernu. E último opcion aki tabata conocí como e ordo of lista. Tambe e por a adoptá loke nan tabata yama hurisdiccion di extra ordinem cu por a ser usá pa husga cualkier crímen. Un gobernadó di provincia no tabatin nodi ‘considerá loke a sosodé na Roma, ma loke por lo general mester a haci.’ Pues, hopi cos a keda pa e mes dicidí.

Aunke no ta tur e detayenan di ley romano di antigwedad ta conocí, e caso di Pablo ta ser considerá como “un ehempel típico di e procedura extra ordinem cu e corte penal dje provincia a usa.” Huntu cu su conseheronan, e gobernadó tabata scucha e acusacionnan cu hende individual tabata haci. E acusado mester a presentá dilanti di esnan cu ta acus’é, i maske e por a defendé su mes, ta esnan cu a acus’é mester a bini cu prueba. E magistrado tabata duna cualkier castigu cu el a haña cumbiniente. E por a duna sentencia mesora of posponé e caso pa tempu indefiní, i den e caso ei nan lo a detené e acusado. Segun e experto Henry Cadbury, “sin duda, dor cu e procuradó tabatin asina tantu poder, e por a cai den tentacion di aceptá soborno of usa su influencia den un manera robes pa sea absolvé un acusado di tur culpa, conden’é of posponé e caso.”

Sumo Sacerdote Ananías, ancianonan di e hudiunan i Tértulo a acusá Pablo formalmente dilanti Félix. Nan a acus’é di ta ‘un pèst i di ta instigá rebelion entre tur hudiu.’ Nan a keha cu e ta e lider principal “dje secta dje nazarenonan” i cu el a purba profaná e tempel.—Echonan 24:1-6.

E personanan cu a atacá Pablo na promé instante a pensa cu ta é a introducí e homber dje nacionnan Trófimo den e patio cu ta reservá pa hudiu so.a (Echonan 21:28, 29) Concretamente, e presunto intruso tabata Trófimo. Pero si e hudiunan haña cu e supuesto accionnan di Pablo a promové violacion di regla, nan lo por a mira esei tambe como un delitu cu ta merecé pena di morto. I ta parce cu Roma a haci e concesion pa duna pena di morto pa e crímen aki. Pues, si ta e polisnan dje tempel hudiu a arestá Pablo i no Lisias, e Sanedrin por a husgu’é i sentenci’é sin ningun problema.

E hudiunan a razoná cu loke Pablo tabata siña hende no tabata hudaismo, esta, e religion legal (religio licita). En bes di esei, lo mester a considerá su siñansa como algu ilegal, asta peligroso p’e estado.

Tambe nan a keha cu Pablo tabata “instigá rebelion entre tur hudiu den henter e tera habitá.” (Echonan 24:5) No muchu tempu promé, Emperador Claudio a denunciá cu hudiunan di Alexandria tabata “causa un plaga universal rond mundu.” E similaridad ta remarcabel. Segun historiadó A. N. Sherwin-White: “E acusacion tabata precis e tipo di acusacion pa lansa contra un hudiu durante e Reinado di Claudio of na principio di gobernacion di Nero. E hudiunan tabata purba laga e gobernadó mira e predicacion di Pablo como algu cu ta causa disturbio civil den henter e poblacion hudiu dje Imperio. Nan tabata sa cu e gobernantenan lo no tabata dispuesto pa condená hende pa motibunan puramente religioso, i p’esei nan a purba duna e acusacion religioso un toke político.”

Pablo a defendé su mes punto pa punto. ‘Mi no a causa disturbio. Ta cierto cu mi ta pertenecé na loke nan ta yama un “secta,” pero ser parti di dje ta nificá warda principionan hudiu. Cierto hudiunan di Asia a provocá e desórden. Si nan tin keho, laga nan bin aki pa entregá esaki.’ Básicamente, Pablo a eliminá e acusacionnan político, lagando solamente un disputa religioso entre e hudiunan. I esaki no ta cos cu a regardá Roma. Dor cu Félix tabata cauteloso p’e no iritá e hudiunan cu ya caba tabata rebelde, el a posponé e caso. Asina el a prácticamente crea un situacion den cua no por a tuma ningun accion hudicial mas. E no a entregá Pablo n’e hudiunan cu tabata exigí esei, tampoco e no a husgu’é segun e ley romano, ni e no a dun’é su libertad. Niun hende no por a obligá Félix pa dicta sentencia, i fuera di cu e kier a keda bon cu e hudiunan, e tabatin un otro motibu pa tarda e asuntu. El a verwagt cu Pablo lo a ofrecé un soborno.—Echonan 24:10-19, 26.b

E Momento Decisivo bou di Mando di Porcio Festo

Dos aña despues na Jerusalem ora e gobernadó nobo Porcio Festo a sinta, e hudiunan a bolbe presentá nan acusacionnan i a pidi pa entregá Pablo den nan man. Pero Festo a nenga rotundamente, bisando: “No ta e proceder romano pa entregá ningun hende como fabor promé cu e acusado topa cara-cara cu su acusadónan i haña un oportunidad di papia na su defensa tocante e keho.” Historiadó Harry W. Tajra ta remarcá: “Mesora Festo a comprendé cu nan kier a usa e sistema hudicial pa ehecutá un ciudadano romano.” Pues el a manda e hudiunan presentá nan caso na Cesarea.—Echonan 25:1-6, 16.

Einan e hudiunan a declará cu Pablo “no mag sigui biba,” pero nan no a presentá cu prueba, i Festo a comprendé cu Pablo no a haci nada cu a merecé morto. Festo a splica un otro funcionario: “Nan simplemente tabatin algun pleitu cuné tocante nan mes adoracion dje deidad i tocante un cierto Jesus cu tabata morto pero di ken Pablo a sigui bisa cu tabata bibu.”—Echonan 25:7, 18, 19, 24, 25.

Tabata bisto cu Pablo tabata inocente di cualkier acusacion político. Pero pa loke ta e disputa religioso, probablemente e hudiunan a argumentá cu nan corte ta e único cu por a trata e caso aki. Pablo ta bai Jerusalem pa ser husgá tocante e asuntunan aki? Festo a puntra Pablo si e kier a hacié, pero bon mirá, esei no tabata un bon proposicion. Si mand’é Jerusalem bek caminda esnan cu ta acus’é lo actua como hues, esei lo a nificá cu Pablo lo a ser entregá n’e hudiunan. Pablo a bisa: “Mi ta pará dilanti e asiento di tribunal di César, unda mi mester ser husgá. Mi no a haci nada malu contra e hudiunan . . . Ningun hende por entregá mi na nan como fabor. Mi ta apelá na César!”—Echonan 25:10, 11, 20.

Ora un romano expresá e palabranan ei, tur hurisdiccion regional ta ser suspendé. Su derecho di apelá (provocatio) tabata un derecho “auténtico, completo i eficas.” P’esei, despues cu Festo a deliberá tocante e detayenan técnico cu su conseheronan, el a bisa Pablo: “Bo a apelá na César; lo bo bai cerca César.”—Echonan 25:12.

Festo tabata contentu cu e por a scapa di Pablo. Pasobra, manera el a admití na Herodes Agripa II algun dia despues, e caso aki a confundié. Anto Festo mester a traha un raport dje caso pa emperador. Pero pa Festo, e acusacionnan a encerá cosnan complicá i incomprendibel dje ley hudiu. Sin embargo, Agripa sí tabata un experto riba e tereno aki. Pues ora el a mustra interes, nan a puntr’é pa yuda formulá e carta. Ora cu Festo no por a comprendé e declaracion cu Pablo a haci despues dilanti Agripa, el a sclama: “Bo ta birando loco, Pablo! Tantu siñansa ta haci bo loco!” Pero Agripa sí a comprend’é bon-bon. El a bisa: “Den poco tempu lo bo persuadí mi pa bira un cristian.” Sin importá kico nan tabata pensa tocante Pablo su argumentonan, Festo cu Agripa a bai di acuerdo cu Pablo tabata inocente i cu nan por a lagu’é den libertad si e no a apelá na César.—Echonan 25:13-27; 26:24-32.

Fin di un Biahe Hudicial

Ora Pablo a yega Roma, el a manda yama e hombernan principal dje hudiunan no solamente p’e predicá na nan sino tambe p’e haña sa kico nan tabata sa di dje. Kisas nan por a revelá algu di e intencionnan cu esnan cu a acus’é tabatin. No tabata inusual pa autoridadnan na Jerusalem busca yudansa for di hudiunan di Roma pa presentá acusacionnan den un caso di corte, pero Pablo a haña sa cu nan no tabatin ningun instruccion tocante dje. Pendiente pa su caso bini dilanti, nan a permití Pablo huur un cas i predicá libremente. E tolerancia ei kisas lo a nificá cu den bista dje romanonan, Pablo tabata inocente.—Echonan 28:17-31.

Pablo a keda bou di custodia pa mas cu dos aña. Di con? Bijbel no ta duna e detayenan. Normalmente un persona cu apelá ta keda detené te ora esnan cu ta acus’é presentá cu prueba pa nan acusacionnan, pero podisé e hudiunan di Jerusalem a mira cu nan caso no tabatin peso i nan no a presentá nunca. Kisas e mihó manera cu nan por a cera Pablo su boca mas tantu posibel, tabata di keda sin presentá. En todo caso, ta parce cu Pablo a presentá dilanti Nero, el a ser declará inocente, i por fin despues di mas of ménos cincu aña e tabata liber pa reanudá su actividadnan di misionero.—Echonan 27:24.

Pa hopi tempu caba oponentenan dje berdad ‘via ley a trama maldad’ pa stroba e trabou cristian di predicá. Esaki no mester ta un sorpresa pa nos. Jesus a bisa: “Si nan a persiguí mi, nan lo persiguí boso tambe.” (Salmo 94:20, King James Version; Juan 15:20) Pero tambe Jesus a sigurá nos cu nos lo tin libertad pa conta henter mundu e bon nobo. (Mateo 24:14) P’esei, mescos cu apostel Pablo a resistí persecucion i oposicion, Testigonan di Jehova djawe ta “defendé i establecé e bon nobo legalmente.”—Filipensenan 1:7.

[Nota]