Hende Cristian i e Arreglo Humano Djawe

“Boso lo ser obheto di odio di parti di tur nacion pa causa di mi nomber.”​—⁠MATEO 24:⁠9.

 1. Kico tabatin cu ser un marca di distincion di cristianismo?

SEPARACION for di mundo tabata un marca distintivo di cristian di promé. Den oracion na su Tata celestial, Jehova Dios, Cristo a bisa tocante su disípelnan: “Mi a duna bo palabra na nan, pero mundo a odiánan, pasobra nan no ta parti di mundo, mescos cu mi no ta parti di mundo.” (Juan 17:14) Ora Jesús tabata hibá dilanti Poncio Pilato, el a bisa: “Mi reino no ta parti dje mundo aki.” (Juan 18:36) E separacion di cristianismo di promé for di mundo tabata confirmá den e Scritura Griego Cristian i pa historiador.

 2. (a) Tabatin cu ser un cambio den e relacion entre sigidor di Jesús i mundo cu e pasamento di tempo? (b) E Reino di Jesús tabatin cu bini mediante e conbertimento di tur nacion?

² Jesús a revela despues cu lo tin un cambio den e relacion entre su sigidornan i e mundo i cu su Reino lo bini mediante e conbertimento di mundo na cristianismo? No. Nada cu su sigidornan tabata inspirá pa skirbi despues di morto di Jesús ni sikiera a indica tal cos. (Santiago 4:4 [skirbí un poco tempo promé cu aña 62 EC]; 1 Juan 2:​15-17; 5:19 [skirbí rond di aña 98 EC]) Al contrario, e Bijbel ta relacioná e “presencia” di Jesús i su “binimento” despues cu poder dje Reino cu e “conclusion dje sistema di cosnan,” culminando den su “fin,” of destruccion. (Mateo 24:​3, 14, 29, 30; Daniel 2:44; 7:​13, 14) Den e siñal cu Jesús a duna di su pa·rou·siʹa, of presencia, el a bisa tocante berdadero sigidor di dje: “Anto hende lo entrega boso na tribulacion i lo mata boso, i boso lo ser obheto di odio di parti di tur nacion pa causa di mi nomber.”​—⁠Mateo 24:⁠9.

Cristian berdadero djawe

3, 4. (a) Ki detaye un enciclopedia católico ta duna di cristian di promé? (b) Cu cua palabranan similar Testigo di Jehova i cristian di promé ta ser describí?

³ Cua grupo religioso djawe a gana pa su mes e nomber di ser fiel na principio cristian i di ser separá for di mundo, i cu miembro di dje ta ser odiá i persigí? Wel, cua organizacion cristian mundial ta corresponde den tur aspecto cu detaye histórico di cristian di promé? E New Catholic Encyclopedia ta bisa tocante nan: “E comunidad cristian di promé, aunque na principio e tabata considerá di ser simplemente un otro secta den e milieu hudío, el a resulta di ser distinto den su siñanza teológico, i mas specialmente den e celo di su miembronan, cu a sirbi como testigo di Cristo ‘den tur Hudea i Samaria i asta te na cabamento dje tera’ (Echo 1:⁠8).”​—⁠Volumen 3, bladji 694.

⁴ Tuma nota dje expresion “considerá . . . simplemente un otro secta,” “distinto den su . . . siñanza,” “celo . . . como testigonan.” I awor ripara loke e mesun enciclopedia ta bisa tocante Testigo di Jehova: “Un secta . . . e Testigonan ta keda profundamente convencí cu e fin di mundo lo bini dentro di poco aña so. Tal creencia bibo ta parce di ser e forza conmovedor di mas fuerte tras di nan celo incansable. . . . E obligacion fundamental di cada miembro dje secta ta di duna un testimonio di Jehova door di anuncia Su Reino binidero. . . . Nan ta considera e Bijbel como e único fuente di nan kerimento i regla di conducta . . . Pa ser un berdadero Testigo, nan mester predica efectivamente di un manera of otro.”​—⁠Volumen 7, bladji 864-865.

 5. (a) Di ki manera siñanza di Testigo di Jehova ta singular? (b) Duna ehempel cu ta mustra cu creencia di Testigo di Jehova ta na armonía cu e Scritura.

⁵ Di ki manera e siñanza di Testigo di Jehova ta distinto? E New Catholic Encyclopedia ta menciona algun: “[Testigo di Jehova] ta condena e trinidad como idolatría pagano . . . Nan ta considera Jesús como e Testigo di Jehova mayor, ‘un dios’ (segun nan traduccion di Juan 1:⁠1), inferior cu Jehova Dios so. . . . El a muri como hende i tabata lantá como un Yiu spiritual inmortal. Su Pasion i morto tabata e prijs cu el a paga pa recobra pa humanidad e derecho di biba pa semper riba e tera. Realmente, e ‘multitud grandi’ (Ap 7:⁠9) di berdadero testigonan ta spera den un Paradijs terrenal; solamente 144.000 hende fiel (Ap 7:4; 14:​1, 4) por disfruta di gloria celestial cu Cristo. Hende malbado lo experimenta destruccion completo. . . . Bautismo​—⁠cu e Testigonan ta practica cu bahamento bao di awa . . . ta e símbolo exterior di nan dedicacion ne sirbishi di Jehova Dios. . . . Testigo di Jehova a atraé publicidad nengando transfusion di sanger . . . Nan moralidad matrimonial i sexual ta basta firme.” Testigo di Jehova por ta distinto respecto esei, pero nan posicion riba tur e puntonan ei ta fundá firmemente riba e Bijbel.​—⁠Salmo 37:29; Mateo 3:16; 6:10; Echo 15:​28, 29; Romano 6:23; 1 Corintio 6:​9, 10; 8:6; Revelacion 1:⁠5.

 6. Cua posicion Testigo di Jehova a mantene? Pakico?

⁶ E enciclopedia católico romano ta agrega cu na aña 1965 (aparentemente e aña ora e artículo tabata skirbí) “e Testigonan ainda no a considera cu nan ta pertenece ne arreglo social seglar den locual nan ta biba.” Ta parce cu e autor a kere cu segun cu tempo ta pasa i Testigo di Jehova ta bira mas hopi i ta adopta “mas i mas característica di un religion en bez di un secta,” nan lo bira parti di mundo. Pero, esei no a resulta di ser e caso. Awe, cu mas cu cuater bez e cantidad di Testigonan como na 1965, Testigo di Jehova consistentemente ta mantene nan posicion en cuanto e mundo. “Nan no ta parti di mundo,” mescos cu Jesús no tabata “parti di mundo.”​—⁠Juan 17:⁠16.

Separá pero no enemigo

7, 8. Mescos cu tabata cierto di cristian di promé, kico ta cierto di Testigo di Jehova djawe?

⁷ Mencionando e defensa di cristian di promé di defensor Hustino Mártir di siglo dos, Robert M. Grant a skirbi den su buki Early Christianity and Society: “Si hende cristian ta revolucionario nan lo a keda scondí pa nan por alcanza nan meta. . . . Nan ta e mihor aliado dje emperador defendiendo paz i bon ordu.” Di igual manera, Testigo di Jehova djawe ta conocí den tur e mundo como ciudadano amante di paz i ordená. Gobierno, di cualkier sorto, sa cu nan no tin cu tene miedu di Testigo di Jehova.

⁸ Un editorialista nortamericano a skirbi: “Hende mester tin un imaginacion desilusioná cu intolerancia i cobardía pa kere cu Testigo di Jehova ta peligroso di cualkier manera pa gobierno político; nan ta tanto anti-revolucionario i amante di paz como un cuerpo religioso por ser.” Den su buki L’objection de conscience, Jean-Pierre Cattelain a skirbi: “E Testigonan ta perfectamente sumiso na autoridad i generalmente ta obedece ley; nan ta paga belasting i no ta purba di cuestioná, cambiá, of destruí gobierno, pasobra nan no ta interesánan den asunto di mundo.” Cattelain a sigi bisa cu solamente si gobierno ta exigi nan bida, locual nan a dedica completamente na Dios, anto Testigo di Jehova ta nenga di obedece. Den esei nan ta parce hende cristian di promé.​—⁠Marco 12:17; Echo 5:⁠29.

Hende di gobierno no a comprendénan

 9. En cuanto separacion for di mundo, cua ta un diferencia sobresaliente entre cristian di promé i hende católico djawe?

⁹ E mayor parti di emperador romano no a comprende hende cristian di promé i a persigínan. Mustrando pakico, E epístola di Diogneto, cu algun hende ta kere tabata skirbí den siglo dos EC, ta bisa: “Hende cristian ta biba den mundo, pero no ta parti ni no ta enbolbí cu mundo.” En cambio, e Segundo Concilio Vaticano, den su Constitucion Dogmático tocante e Iglesia, a declara cu hende católico mester “busca e reino di Dios door di participacion temporario den asunto di mundo” i “traha pa santificacion di mundo desde padén.”

10. (a) Con hende gobernante a considera hende cristian di promé? (b) Con hende ta considera Testigo di Jehova hopi bez, i con nan ta reacciona?

¹⁰ Historiador E. G. Hardy ta bisa cu emperador romano a considera hende cristian di promé di ser “fanático un poco despreciabel.” Historiador francés Étienne Trocme a menciona “e desprecio cu locual oficial griego i romano culturá a considerá un secta oriental mashá straño [esta, hende cristian].” Correspondencia entre Plinio e Hoven, gobernador romano di Bitinia, i emperador Trahano ta mustra cu hende di gobierno generalmente tabata ignorante dje berdadero naturaleza di cristianismo. Mescos den e dia djawe, hopi bez hende di gobierno di mundo no ta comprende i asta ta despreciá Testigo di Jehova. Pero, esei no ta un sorpresa ni no ta desanima Testigo di Jehova.​—⁠Echo 4:13; 1 Pedro 4:​12, 13.

“Hende ta papia contra dje na tur parti”

11. (a) Kico hende a bisa tocante cristian di promé, i kico nan ta bisa tocante Testigo di Jehova? (b) Pakico Testigo di Jehova no ta participa den política?

¹¹ Hudío a bisa di hende cristian di promé: “En cuanto e secta aki ta conocí na nos cu hende ta papia contra dje na tur parti.” (Echo 28:22) Den siglo dos EC, e pagano Celcio a bisa cu cristianismo a atrae solamente escoria dje arreglo humano. Di igual manera, nan ta bisa di Testigo di Jehova cu “en general, nan ta bini di hende privá di nos arreglo social.” Historiador religioso Augustus Neander a informa cu “hende cristian tabata representá como hende morto en cuanto mundo, i inútil pa tur asunto di bida; . . . i hende a puntra, kico lo sosode asunto di bida, si tur hende ta manera nan?” Door cu Testigo di Jehova ta abstene di participacion den político, hopi bez també hende ta acusánan di ser hende inútil den e arreglo humano. Pero, con nan por ta activista político i alabez ser defensor dje Reino di Dios como e único speranza di humanidad? Testigo di Jehova ta tuma na pecho e palabra di apóstol Pablo: “Participa den sufrimento como un bon soldad di Cristo Jesús. Ningun soldad den e sirbishi ta enbolbele den interés civil, siendo cu su doel ta pa satisface esnan cu a recluté.”​—⁠2 Timoteo 2:​3, 4, Revised Standard Version, un redaccion ecuménico.

12. Den ki aspecto importante di separacion for di mundo Testigo di Jehova ta parce hende cristian di promé?

¹² Den su buki na inglés Un historia di cristianismo, profesor K. S. Latourette a skirbi: “Un cuestion riba locual hende cristian di promé i e mundo griego-romano tabata na desacuerdo tabata participacion den gera. Pe promé tres siglo ningun skirbimento cristian cu a existi te na nos tempo a soporta participacion cristian den gera.” E buki na inglés di Edward Gibbon E historia di decaimento i cabamento dje imperio romano ta bisa: “Tabata imposibel pa hende cristian, sin renuncia un deber mas sagrado, adoptá carácter di soldad, di magistrado, of di prinz.” Testigo di Jehova di igual manera ta adopta un posicion di neutralidad estricto i ta sigi principio bíblico skirbí den Isaías 2:​2-4 i Mateo 26:⁠52.

13. Cua acusacion ta ser hací contra Testigo di Jehova, pero kico echo ta mustra?

¹³ Enemigo di Testigo di Jehova ta acusánan di kibra famía. Ta cierto cu tin caso di famía cu ta ser partí ora uno of mas miembro ta bira Testigo di Jehova. Jesús a profetiza cu esei lo sosode. (Lucas 12:​51-53) Sin embargo, echo ta mustra cu famía cu ta kibra pe motibo ei ta excepcion. Por ehempel, den Testigo di Jehova den Francia, 1 pareha den 3 ta incluí un casá cu no ta un Testigo. Sin embargo, e porciento di divorcio den famía di hende Testigo i no Testigo no ta mas halto cu e promedio nacional francés. Pakico? Apóstol Pablo i Pedro a duna conseho sabí i inspirá na hende cristian casá cu hende no creyente, i Testigo di Jehova ta haci esfuerzo pa sigi nan conseho. (1 Corintio 7:​12-16; 1 Pedro 3:​1-4) Si un famía mixto ta kibra, e persona no Testigo casi semper ta esun cu ta busca divorcio. En cambio, hopi miles di matrimonio no a kibra pa motibo cu hende casá ta bira Testigo di Jehova i a cuminza aplica principio bíblico den nan bida.

Cristian i no trinitario

14. Cua acusacion tabata hací contra hende cristian di promé, i pakico esei ta straño?

¹⁴ Ta straño cu den e imperio romano, un acusacion hací contra cristian di promé ta cu nan ta ateísta. Dr. Augustus Neander a skirbi: “Nengador di dios [es decir, dios pagano], ateísta, . . . tabata e nomber común cu e pueblo a duna hende cristian.” Ta ki straño cu hende pagano, cu a adora loke “no tabata dios, sino e trabao di man di hende, di palu i di piedra,” mester a yama hende cristian “ateísta”, locual a adora e Creador bibo.​—⁠Isaías 37:⁠19.

15, 16. (a) Kico algun hende religioso a bisa tocante Testigo di Jehova, pero esei ta haci cua pregunta presenta? (b) Kico ta mustra cu Testigo di Jehova ta berdaderamente cristian?

¹⁵ Igualmente straño ta e echo cu awe algun autoridad den cristiandad ta nenga cu Testigo di Jehova ta hende cristian. Pakico? Pasobra Testigo di Jehova ta rechaza e trinidad. Segun e splicacion trocí di cristiandad, “hende cristian ta esnan cu ta acepta Cristo como Dios.” Na contraste cu esei, un diccionario moderno ta splica e nomber “cristian” como “un persona cu ta kere den Jesucristo i cu ta sigi su siñanza” i “cristianismo” como “un religion cu ta fundá ariba e siñanza di Jesucristo i e creencia di cu e tabata yiu di Dios.” Cua grupo ta cuadra cu tal splicacion mas fielmente?

¹⁶ Testigo di Jehova ta acepta e testimonio di Jesús mes en cuanto ken e tá. El a bisa: “Mi ta Yiu di Dios,” i no a bisa, “Mi ta Dios Yiu.” (Juan 10:36; compara cu Juan 20:31.) Nan a acepta e declaracion inspirá di apóstol Pablo tocante Cristo: “Siendo den e forma di Dios, [E] no a conta igualidad cu Dios como algo pa ser codiciá.”a (Filipense 2:​6, The New Jerusalem Bible) E buki na inglés E paganismo den nos cristianismo ta bisa: “Jesucristo nunca a menciona un fenómeno [un trinidad co-igual], i nunca den e Testament Nobo tin e uso dje palabra ‘trinidad.’ E iglesia a adopta tal idea solamente tres cien aña despues di morto di nos Señor; i e origen dje concepto ta henteramente pagano.” Testigo di Jehova ta acepta e siñanza bíblico tocante Cristo. Nan ta hende cristian i no ta trinitario.

Ningun ecumenismo

17. Pakico Testigo di Jehova no ta coopera cu e movimento ecuménico, of union di tur religion?

¹⁷ Dos otro keho contra Testigo di Jehova ta cu nan ta nenga di participa den movimento ecuménico i cu nan ta participa den loke ta ser yamá “conbertimento agresivo.” E dos reproche també tabata mandá na cristian di promé. Cristiandad, componí di católico romano i griego, i protestante, innengablemente ta parti di mundo. Mescos cu Jesús, Testigo di Jehova “no ta parti di mundo.” (Juan 17:14) Con nan por unínan cu movimento di union cu organizacion religioso cu ta promove conducta i creencia no cristian?

18. (a) Pakico hende no por critica Testigo di Jehova pa motibo cu nan ta bisa cu nan so ta practica e religion berdadero? (b) Aunque hende católico romano ta kere cu nan tin e religion berdadero, kico nan no tin?

¹⁸ Ken hustamente por critica Testigo di Jehova pa motibo cu nan ta kere, mescos cu cristian di promé, cu nan so ta practica e único religion berdadero? Asta e Iglesia católico, aunque den nan hipocresía nan ta bisa cu nan ta coopera cu e movimento ecuménico, ta proclama: “Nos ta kere cu e solo religion berdadero ta sigi existi den e Iglesia católico i apostólico, na locual Señor Jesús a confia e trabao di plamé den tur humanidad ora el a bisa e apóstolnan: ‘Bai pues i haci disípel di tur nacion.’” (Concilio Vaticano II, “Declaracion riba libertad di religion”) Pero, ta parce cu tal kerimento no ta suficiente pa yena hende católico cu celo incansable pa sali i haci disípel.

19. (a) Testigo di Jehova ta keda determiná di haci kico, i pa cua motibo? (b) Kico nos lo considera den e sigiente artículo?

¹⁹ Testigo di Jehova tin celo asina. Nan ta keda determiná di sigi duna testimonio tan tempo cu esei ta e boluntad di Dios. (Mateo 24:14) Nan dunamento di testimonio ta celoso pero no agresivo. Amor pa próhimo ta motiva esei i no un odio pa humanidad. Nan ta spera cu tanto hende posibel lo ser salbá. (1 Timoteo 4:16) Mescos cu hende cristian di promé, nan ta haci esfuerzo pa “keda na paz cu tur hende.” (Romano 12:18) Con nan ta efectuá esei lo ser considerá den e sigiente artículo.

[Nota]

Pregunta di repaso

◻ Kico a caracterizá cristian di promé, i di ki manera Testigo di Jehova ta parcénan?

◻ Di ki manera Testigo di Jehova ta mustra cu nan ta bon ciudadano?

◻ Con hende gobernante a considera hende cristian di promé, i tin un diferencia den e dia djawe?

◻ E conviccion di Testigo di Jehova di cu nan tin e berdad ta conmovénan pa haci kico?

[Plachi na página 12]

Testigo di Jehova ta keda determiná di sigi duna testimonio tanto tempo cu esei ta e boluntad di Dios

[Plachi na página 17]

Pilato a bisa: “Mira! E homber”​—⁠Esun cu no tabata parti di mundo.​—⁠Juan 19:5

[Rekonosementu]

“Ecce Homo” dor di A. Ciseri: Florence, Galleria d’Arte Moderna / Alinari/Art Resource, N.Y.