Bo Ta Corda?

Bo a apreciá di lesa e edicionnan recien di E Toren di Vigilancia? Wel, wak si bo por contestá e siguiente preguntanan:

• Kico ta fundamental pa nos por resolvé un desacuerdo cu un persona?

Na promé lugá nos mester reconocé cu ta fácil pa nos tur tin actitud i pensamentunan robes. Despues nos mester considerá seriamente si no ta nos ta e fuente dje problema en bes di e otro persona.—15/8, página 23.

• Ki dia lo ta “e tempu di restoracion di tur cos” cu Echonan 3:21 ta mencioná?

E restoracion ta bini den dos etapa. Promé, tin e restoracion na un paradijs spiritual cu a cuminsá desde aña 1919. Mas restoracion lo tuma lugá ora restorá nos tera na un paradijs físico.—1/9, página 17, 18.

• Den ki manera vruminga no tin comandante, manera Proverbionan 6:6-8 ta mencioná, i tog ta sirbi como un bon ehempel pa nos?

Den un colonia di vruminga tin un reina, pero e ta reina solamente den e sentido cu e ta esun cu ta pone webu i ta mama dje colonia. Vruminga ta diligente, i asina nos mester ta, haciendo esfuerso pa mehorá nos trabou asta ora hende no ta controlá nos.—15/9, página 26.

• E profecia di Hulda registrá na 2 Reynan 22:20, cu ta bisa cu Hosías lo a muri “na pas,” tabata exacto mirando e echo cu Hosías a ser heridá mortalmente den guera?

Sí, el a muri na pas den e sentido cu el a muri promé cu e calamidad di aña 609 pa 607 P.E.C, ora e babilonionan a sitia i destruí Jerusalem.—15/9, página 30.

• Den ki sentido Sálomon a elogiá hende muher ora el a compar’é cu “un biná hembra amabel i un cabritu di ceru encantador”? (Proverbionan 5:18, 19)

E ibex hembra, of cabritu di ceru, tin un naturalesa calmu i estilo elegante. Tog e por sobrebibí i werp den lugánan inaccesibel yen di baranca unda cuminda ta scars.—1/10, página 30, 31.

• Ken Henry Grew i George Storrs tabata?

Nan ta dos homber cu a biba den añanan 1800 i cu tabata studiante entusiasmá di Bijbel. Grew a haña sa cu e siñansa di Trinidad i tambe e doctrinanan di inmortalidad di alma i fiernu di candela no ta bíblico. Storrs a comprendé cu algun hende lo haña bida sin fin riba tera. Nan tur dos tabata predecesor di Charles Taze Russell, kende a cuminsá publicá e revista aki na 1879.—15/10, página 26-30.

• Con Testigonan di Jehova ta mira proceduranan médico den cua ta usa sanger dje persona mes?

Basando nan creencianan riba Bijbel, nan no ta depositá nan mes sanger i acept’é despues como transfusion. Cada cristian ta dicidí pa su mes con lo trata cu su sanger durante un procedura kirúrgico, test médico of un terapia actual. E mester tene cuenta cu loke Bijbel ta bisa di sanger i corda cu e ta completamente dedicá na Dios.—15/10, página 30, 31.

• Un investigacion hací na principio dje aña aki a revelá cua necesidad sobresaliente entre Testigonan di Jehova rond mundu?

Den paisnan den desaroyo caminda medionan financiero ta limitá, tin un necesidad di mas cu 11.000 Salon di Reino. Contribucion di cristiannan for di hopi pais ta ser usá pa yuda den construccion di lugánan adecuá pa reuní.—1/11, página 30.

• Cua ta algun palabra dje idioma original cu Bijbel ta usa, cu tin di haber cu adoracion?

Un di nan ta lei·tour·gía, cu ta ser traducí como “sirbishi público.” Un otro ta la·treía, i e ta ser traducí como “sirbishi sagrado.” (Hebreonan 10:11; Lucas 2:36, 37)—15/11, página 11, 12.

• Cua ta un les fundamental cu nos por saca for dje relato bíblico di Adam cu Eva?

Cualkier pretencion di independencia for di Jehova Dios ta puru bobedad.—15/11, página 24-7.

• Ki prueba bíblico tin cu Dios ta duna su sirbidónan poder?

Tantu David, Habacuc como apostel Pablo a duna testimonio personal dje echo cu Jehova Dios a duna nan energia, esta, poder. (Salmo 60:12; Habacuc 3:19; Filipensenan 4:13) Pues, nos por tin confiansa cu Dios ta dispuesto i cu e tin poder pa fortificá nos.—1/12, página 10, 11.