E Unico Caminda pa Bida Eterno

“Ami ta e caminda i e berdad i e bida.”—JUAN 14:6.

 1, 2. Cu kico Jesus a compará e caminda pa bida eterno, i ki nificacion su ilustracion tin?

DEN su famoso Sermon Riba Ceru, Jesus ta compará e caminda pa bida eterno cu un caminda cu un hende ta drenta via un porta. Ripará con Jesus ta enfatisá cu e caminda pa bida aki no ta fácil. E ta bisa: “Drenta p’e porta smal; pasobra hanchu i espacioso ta e caminda cu ta hiba na destruccion, i hopi ta esnan cu ta drenta dor di dje; miéntras cu smal ta e porta i pertá e caminda cu ta hiba na bida [eterno], i poco ta esnan cu ta hañ’é.”—Mateo 7:13, 14.

² Bo a capta e nificacion dje ilustracion aki? E no ta mustra cu ta un solo caminda, of manera, tin pa yega na bida, i cu nos lo mester paga bon tinu pa no desviá for di tal caminda pa bida? Cua ta e único caminda pa bida eterno anto?

Rol di Jesucristo

 3, 4. (a) Con Bijbel ta mustra e rol vital cu Jesus ta hunga den nos salbacion? (b) Ki ora Dios a revelá pa promé bes cu humanidad por a obtené bida eterno?

³ Ta bisto cu Jesus ta hunga un rol importante relacioná cu e caminda aki, manera su apostel Pedro a proclamá: “No tin salbacion den ningun otro, pasobra no tin otro nomber bou di shelu [cu excepcion di esun di Jesus] cu a ser duná entre hende mediante cua nos mester ta salbá.” (Echonan 4:12) Mescos, apostel Pablo tambe a declará: “E don cu Dios ta duna ta bida eterno mediante Cristo Jesus nos Señor.” (Romanonan 6:23) Jesus mes a revelá cu e único caminda pa bida eterno tabata via dje, pasobra el a declará: “Ami ta e caminda i e berdad i e bida.”—Juan 14:6.

⁴ Pues, ta crucial pa nos aceptá e rol cu Jesus ta hunga den haci bida eterno posibel. P’esei, laga nos examiná su rol den mas detaye. Bo sa ta na ki momento despues cu Adam a peca, Jehova Dios a mustra cu humanidad lo por gosa di bida eterno? Net despues cu Adam a cai den picá. Awor, laga nos examiná con Dios a profetisá pa promé bes tocante e areglo cu e lo a bai haci pa Jesucristo salba humanidad.

E Simia Primintí

 5. Con nos por identificá e colebra cu a seducí Eva?

⁵ Jehova Dios a identificá e Salbador primintí den lenguahe simbólico. El a haci esaki ora el a dicta sentencia riba “e colebra” cu a papia cu Eva i seducié pa desobedecé Dios dor di come e fruta prohibí. (Génesis 3:1-5) Ta claro cu e colebra no tabata un colebra literal. E tabata un criatura spiritual poderoso cu Bijbel ta identificá como “e colebra original, esun yamá Diabel i Satanas.” (Revelacion 12:9) Satanas a usa e bestia inferior aki como su bocero pa seducí Eva. Pues, ora Dios a sentenciá Satanas, el a bis’é: “Lo mi pone enemistad entre abo i e muher i entre bo simia i su simia. E [simia dje muher] lo machicá bo den cabes i abo lo machik’é den hilchi.”—Génesis 3:15.

 6, 7. (a) Ken ta e muher cu ta carga e “simia”? (b) Ken ta e Simia primintí, i kico e ta logra?

⁶ Ken ta e “muher” aki cu Satanas tin enemistad, of odio p’e? Revelacion capítulo 12 ta identificá e muher cu Satanas ta odia, mescos cu el a identificá “e colebra original.” Nota con e ta bisa den versículo 1 cu e ta “dorná cu solo, pará riba luna, i cu diesdos strea riba su cabes.” E muher aki ta representá Dios su organisacion celestial di angel fiel, i e “yu homber” cu e ta duna lus na dje ta representá e Reino di Dios, cu Jesucristo como Rey reinante.—Revelacion 12:1-5, The Jerusalem Bible.

⁷ Pues, ken ta e “simia,” of desendencia, dje muher, mencioná na Génesis 3:15, cu lo heridá Satanas “den cabes,” i dun’é un golpi mortal? Ta esun cu Dios a manda for di shelu pa nace milagrosamente for di un bírgen, sí, Jesus e homber. (Mateo 1:18-23; Juan 6:38) Capítulo 12 di Revelacion ta revelá cu como Gobernante celestial resucitá, e Simia aki, Jesucristo, lo dirigí e derota di Satanas i establecé “e reino di nos Dios i e autoridad di su Cristo,” manera Revelacion 12:10 ta bisa.

 8. (a) Kico nobo Dios a percurá relacioná cu su propósito original? (b) Ken ta forma Dios su gobiernu nobo?

⁸ Pues, e Reino aki den man di Jesucristo ta algu nobo cu Dios a percurá p’é, relacioná cu su propósito original pa hende gosa di bida eterno riba tera. Jehova a actua direct despues di Satanas su rebelion p’e deshací tur mal consecuencia di maldad pa medio dje gobernacion dje Reino nobo aki. Tempu e tabata riba tera, Jesus a revelá cu lo e no ta su so den e gobiernu aki. (Lucas 22:28-30) Dios tabata bai seleccioná mas hende for di humanidad, i nan mester reuní cuné den shelu pa compartí su gobernacion. Asina nan lo bin forma un parti subsidiario dje simia dje muher. (Galationan 3:16, 29) Bijbel ta mustra cu e cantidad di persona cu lo goberná cu Jesus lo ta 144.000, i cu ta for di humanidad nan lo tuma tur.—Revelacion 14:1-3.

 9. (a) Pakico Jesus tabatin cu aparecé na tera como ser humano? (b) Con Jesus a deshací e obranan di Diabel?

⁹ Pero, promé cu e Reino ei por a cuminsá goberná, tabata necesario pa e parti principal dje simia, Jesucristo, aparecé riba tera. Di con? Pasobra Jehova Dios a nombr’é como Esun cu mester “desbaratá [of deshací] e obranan di Diabel.” (1 Juan 3:8) Un dje obranan di Satanas tabata cu el a hiba Adam na peca, loke a trece condenacion di picá i morto riba tur Adam su desendientenan. (Romanonan 5:12) Jesus a deshací e obra aki dje Diabel dor di duna Su bida como rescate. Asina el a pone un base pa libra humanidad for dje condenacion na picá i morto, i el a habri caminda pa bida eterno.—Mateo 20:28; Romanonan 3:24; Efesionan 1:7.

Loke e Rescate Ta Haci Posibel

10. Den ki sentido Adam i Jesus tabata similar?

¹⁰ Ya cu Jesus su bida tabata transferí for di shelu pa e matris di un hende muher, el a nace como un ser humano perfecto, sin mancha di Adam su picá. E tabatin e posibilidad di biba pa semper riba tera. Adam tambe tabata creá como ser humano perfecto cu e posibilidad di gosa di bida eterno riba tera. Apostel Pablo tabatin e similaridad entre e dos hombernan aki na mente ora el a skirbi: “‘E promé homber Adam a bira un alma bibiente.’ E último Adam [Jesucristo] a bira un spiritu cu ta duna bida. E promé homber ta bini di tera i trahá di stof; e segundo homber ta bini di shelu.”—1 Corintionan 15:45, 47.

11. (a) Ki efecto tantu Adam como Jesus tabatin riba humanidad? (b) Con nos mester considerá Jesus su sacrificio?

¹¹ Dor di declará cu Jesus “a duna su mes como un rescate corespondiente pa tur,” Bijbel ta reafirmá e similaridad entre nan dos—e único dos hombernan perfecto cu tera a conocé. (1 Timoteo 2:6) Na ken Jesus a corespondé? Wel, na Adam ora e tabata un homber perfecto ainda! E picá dje promé Adam a resultá den condenacion na morto pa henter famia humano. E sacrificio dje “último Adam” ta pone base pa nos por libra for di picá i morto, i asina biba pa semper. Esta precioso Jesus su sacrificio ta! Apostel Pedro a remarcá: “No tabata cu cosnan coruptibel, cu plata of oro, cu boso a ser librá.” Mas bien, Pedro a splica: “Tabata cu sanger precioso, manera esun di un lamchi sin mancha i sin defecto, sí, esun di Cristo.”—1 Pedro 1:18, 19.

12. Con Bijbel ta describí e manera cu nos condenacion na morto a ser deshací?

¹² Na un forma masha bunita, Bijbel ta describí e manera cu lo deshací e condenacion na picá i morto cu tin riba e famia humano. E ta bisa: “Mediante un solo delitu [di Adam] e resultado na hende di tur clase tabata condenacion, di igual manera tambe mediante un solo acto di hustificacion [henter Jesus su curso di integridad cu a culminá den su morto] e resultado na hende di tur clase ta cu nan ta ser declará hustu pa bida. Pasobra mescos cu dor di desobedencia di un solo hende [Adam] hopi a ser hací pecadó, di igual manera tambe dor di obedencia di un solo persona [Jesus] hopi lo ser hací hustu.”—Romanonan 5:18, 19.

Un Speransa Glorioso

13. Di con hopi hende tin un cierto punto di bista tocante bida eterno?

¹³ E percuracion aki di Dios mester haci nos masha contentu mes! Bo no ta keda emocioná di sa cu Dios a percurá un Salbador? Ora un korant a encuestá algun hende na un stad mericano importante, anto a puntra nan: “E idea di biba pa semper ta atraé bo?,” pa straño cu por parce, 67,4 porciento di esnan cu a respondé a bisa: “No.” Di con nan a bisa cu nan no kier biba pa semper? Evidentemente dor cu awendia hende ta asociá bida riba tera cu yen di problema. Un hende a bisa: “Mi no gusta e idea di tin un aparencia di 200 aña bieu mashá.”

14. Di con bida eterno lo ta un placer completo?

¹⁴ Tog, loke Bijbel ta papia di dje no ta di biba pa semper den un mundu caminda hende ta sufri di enfermedad, behes i otro tragedianan. No, pasobra como Gobernante di Dios su Reino, Jesus lo deshací tur e tipo di problemanan ei cu Satanas a causa. Segun Bijbel, Dios su Reino lo “aplastá i pone un fin na tur” gobiernu opresivo dje mundu aki. (Daniel 2:44) Na e tempu ei, como contesta riba e oracion cu Jesus a siña su siguidónan resa, Dios su “boluntat” mester “sea hasí na tera meskos ku na shelu.” (Mateo 6:9, 10, Beibel na papiamentu koriente, SAB) Den Dios su mundu nobo, despues cu e limpia tur maldad for di riba tera, e beneficionan di Jesus su rescate lo ser aplicá den un sentido completo. Sí, lo restorá tur esnan cu ta cualificá, na salú perfecto!

15, 16. Con e situacion lo ta den Dios su mundu nobo?

¹⁵ E pasashi aki di Bijbel lo aplicá na esnan cu lo biba den Dios su mundu nobo: “Laga su carni bira mas frescu cu den hubentud; lagu’e regresá n’e dianan di su vigor hubenil.” (Job 33:25) Tin un otro promesa di Bijbel cu tambe lo cumpli: “Wowo di esnan ciegu lo ser habrí, i orea mes di esnan surdu lo ser habrí. N’e tempu ei esun coho lo subi mescos cu un biná, i lenga di esun muda lo sclama di alegria.”—Isaías 35:5, 6.

¹⁶ Imaginá bo: Sin importá con bieu nos ta, sea nos tin 80 of 800 aña, of asta mas, n’e tempu ei nos curpa lo keda cu un salú excelente. Lo ta manera Bijbel ta primintí: “Ningun residente lo bisa: ‘Mi ta malu.’” E promesa aki di Dios tambe lo cumpli den e tempu ei: “[Dios] lo seca tur lágrima di nan wowo, i lo no tin morto mas, ni lo tin lamento ni sclamacion ni dolor mas. E cosnan anterior a pasa bai.”—Isaías 33:24; Revelacion 21:3, 4.

17. Kico nos por spera pa hende logra den Dios su mundu nobo?

¹⁷ Den e mundu nobo ei, nos lo ta capas pa usa nos celebro maraviyoso manera nos Creador tabatin intencion pa nos us’é ora el a diseñ’é cu un capacidad ilimitá pa siña. Djis imaginá bo e cosnan maraviyoso cu nos lo por logra! Ser humano imperfecto mes a producí tur loke nos ta mira rond di nos for di tera su mangasina di material—telefon celular, microfon, oloshi, pager, computer, avion: sí, asina bo por sigui mencioná. Nan no a traha ningun dje cosnan aki cu material cu nan a trece for di un lugá remoto di universo. Cu bida sin fin nos dilanti, e potencial di logro creativo den e Paradijs terenal cu ta na camin da lo no tin límite!—Isaías 65:21-25.

18. Di con nunca bida lo no ta laf den Dios su mundu nobo?

¹⁸ I bida lo no bira laf tampoco. Awendia mes nos ta anticipá nos siguiente cuminda, maske cuantu decenas di miles di cuminda nos a come caba. Den perfeccion humano, nos lo disfrutá asta mas dje productonan delicioso dje tera paradísico. (Isaías 25:6) I nos lo tin e placer eterno di cuida e abundante bida animal di tera, i disfrutá di bahadanan di solo, riunan i vayenan espectacular. Definitivamente, nunca bida lo no bira monótono den Dios su mundu nobo!—Salmo 145:16.

Yena Dios Su Rekisitonan

19. Di con ta razonabel pa spera cu tin rekisito pa nos ricibí Dios su don di bida?

¹⁹ Lo bo spera di ricibí Dios su gran don di bida eterno den Paradijs sin ningun esfuerso di bo banda? No ta razonabel cu Dios lo rekerí algu? Sigur cu sí. De echo, Dios no ta djis benta e don ei nos dilanti. E ta ofrecé nos tal don, pero ta nos tin cu rek nos man i acept’é. Sí, e ta rekerí esfuerso. Lo bo por haci e mésun pregunta cu e gobernante hóben ricu a haci Jesus: “Ki bon mi mester haci pa mi haña bida eterno?” Of lo bo por formulá e pregunta manera un wardadó di prezu filipense a puntra apostel Pablo: “Kico mi mester haci pa ser salbá?”—Mateo 19:16; Echonan 16:30.

20. Kico ta un rekisito esencial pa bida eterno?

²⁰ Riba e anochi promé cu su morto, Jesus a mustra kico ta un rekisito básico ora el a bisa su Tata celestial den oracion: “Esaki ta nificá bida eterno, cu nan ta ganando conocimentu di bo, e único Dios berdadero, i di esun cu bo a manda, Jesucristo.” (Juan 17:3) No ta razonabel pa Jehova rekerí pa nos gana conocimentu di dje, esun cu a haci bida eterno posibel, i di esun cu a muri pa nos, Jesucristo? Pero, mas ta necesario cu djis gana tal conocimentu.

21. Con nos por mustra cu nos ta yena e rekisito di ehercé fe?

²¹ Bijbel ta bisa tambe: “Esun cu ehercé fe den e Yu tin bida eterno.” Anto e ta sigui bisa: “Esun cu ta desobedecé e Yu lo no mira bida, sino e rabia di Dios ta permanecé riba dje.” (Juan 3:36) Bo por demostrá cu bo ta ehercé fe den e Yu dor di haci cambio den bo bida i pon’é na armonia cu Dios su boluntad. Bo tin cu rechasá cualkier mal rumbo cu bo por tabata sigui i tuma accion pa haci loke ta agradá Dios. Bo mester haci loke apostel Pedro a manda: “Repentí, i bira bek pa boso picánan ser kitá, pa temporadanan di refrescamentu por bini di parti dje persona di Jehova.”—Echonan 3:19.

22. Sigui Jesus su pasonan ta encerá cua accionnan?

²² Laga nos no lubidá nunca cu ta solamente si nos ehercé fe den Jesus nos por gosa di bida eterno. (Juan 6:40; 14:6) Nos por demostrá cu nos ta ehercé fe den Jesus dor di “sigui su pasonan cu sumo cuidou i atencion.” (1 Pedro 2:21) Kico esei ta encerá? Wel, den su oracion na Dios, Jesus a proclamá: “Mira! Mi a bini . . . pa haci bo boluntad, o Dios.” (Hebreonan 10:7) Ta vital pa bo imitá e manera cu Jesus a aceptá pa cumpli cu Dios su boluntad, i dedicá bo bida na Jehova. Despues bo tin cu simbolisá bo dedicacion cu bautismo bou di awa; Jesus tambe a presentá su mes pa bautismo. (Lucas 3:21, 22) Ta completamente razonabel pa nos tuma e pasonan ei. Apostel Pablo a remarcá cu “e amor cu e Cristo tin ta obligá nos.” (2 Corintionan 5:14, 15) Di ki manera? Wel, amor a motivá Jesus pa duna su bida na nos fabor. Esei no mester laga nos sinti nos mes obligá pa reaccioná dor di ehercé fe den dje? Sí, e mester laga nos sinti un obligacion di sigui su ehempel amoroso di duna di su mes pa yuda otronan. Cristo a biba pa haci e boluntad di Dios; nos tambe mester haci asina, i stop di biba pa nos mes.

23. (a) Na kico esnan cu ricibí bida mester ser agregá? (b) Kico ta ser rekerí di esnan cu ta forma parti dje congregacion cristian?

²³ Esei no ta tur cos. Bijbel ta bisa cu ora 3.000 hende a bautisá na Pentecoste di aña 33 E.C., nan “a ser agregá.” Agregá na kico? Lucas ta splica cu “nan a sigui dedicá nan mes n’e siñansa dje apostelnan i na asociá huntu un cu otro.” (Echonan 2:41, 42) Sí, nan tabata topa pa studia Bijbel i asociá, i di tal manera nan a ser agregá na e congregacion cristian, of a bira parti di dje. E cristiannan di promé tabata asistí regularmente na reunionnan pa ricibí instruccion spiritual. (Hebreonan 10:25) Awe, Testigonan di Jehova tambe ta haci esei, i nan lo kier animá bo pa asistí n’e reunionnan aki huntu cu nan.

24. Kico ta “e berdadero bida,” i con i na ki tempu lo e ser realisá?

²⁴ Awor aki mes tin miyones di hende cu ta riba e caminda smal cu ta hiba na bida. Keda riba e caminda smal aki ta exigí un berdadero esfuerso! (Mateo 7:13, 14) Pablo a mustra esaki den su súplica caluroso: “Lucha e lucha excelente di fe, haña un gara firme riba e bida eterno pa cua bo a ser yamá.” E lucha aki ta necesario pa por “haña un gara firme riba e berdadero bida.” (1 Timoteo 6:12, 19) E bida ei no ta e bida actual di dolor, duele i sufrimentu cu Adam su picá a hinca nos aden. Mas bien, e ta e bida den Dios su mundu nobo cu lo keda realisá pronto ora Cristo su sacrificio di rescate ser aplicá na fabor di tur esnan cu ta stima Jehova Dios i su Yu, despues cu nan a caba cu e sistema di cosnan aki. Laga nos tur scoge bida—“e berdadero bida”—bida eterno den Dios su glorioso mundu nobo.

Con Lo Bo Contestá?

◻ Ken e colebra, e muher i e simia di Génesis 3:15 ta?

◻ Con Jesus a corespondé na Adam, i kico e rescate a haci posibel?

◻ Kico abo por anticipá cu lo haci Dios su mundu nobo asina deleitabel pa bo?

◻ Ki rekisitonan nos mester yena pa nos biba den Dios su mundu nobo?

[Plachi na página 10]

Tantu pa hóben como bieu, Jesus ta e único caminda pa bida sin fin

[Plachi na página 11]

Na Dios su debido tempu, hende bieu lo recobrá nan vigor hubenil