Testigonan Cristian Cu Ciudadania Celestial
“En cuanto nos, nos ciudadania ta existí den cielu.”—FILIPENSENAN 3:20.
1. Ki propósito maraviyoso Jehova tin relacioná cu algun hende?
INDIVIDUONAN cu a nace como hende lo reina como rey i sacerdote den cielu, asta riba e angelnan. (1 Corintionan 6:2, 3; Revelacion 20:6) Ki un berdad asombroso esei ta! Sin embargo, ta Jehova a propon’é, i e ta efectu’é pa medio di su Yu unigénito, Jesucristo. Pakico nos Creador ta haci un cos asina? I con conocimentu di esei mester afectá un cristian awe? Laga nos mira con Bijbel ta contestá e preguntanan aki.
2. Ki cos nobo Juan Bautista a anunciá cu Jesus lo haci, i e cos nobo aki tabata relacioná cu kico?
2 Ora Juan Bautista tabata preparando e caminda pa Jesus, el a anunciá cu Jesus lo haci algu nobo. E registro ta bisa: “[Juan] tabata predicá, bisando: ‘Despues di mi unu mas fuerte cu mi ta bini; mi no ta digno di sak abou i los e feternan di su sandalia. Ami a bautisá boso cu awa, pero e lo bautisá boso cu spiritu santu.’ ” (Marco 1:7, 8) Promé cu e tempu ei, ningun hende a ser bautisá cu spiritu santu. Esaki tabata un areglo nobo cu a enbolbé spiritu santu, i e tabata relacioná cu Jehova su propósito cla pa ser revelá pa prepará hende pa gobernacion celestial.
“Nace di Nobo”
3. Ki cosnan nobo tocante e Reino di cielu Jesus a splica Nicodemo?
3 Den un reunion secreto cu un fariseo prominente, Jesus a revelá mas tocante e propósito divino aki. E fariseo, Nicodemo, a bini cerca Jesus anochi, i Jesus a bis’é: “Aménos cu un hende nace di nobo, e no por mira e reino di Dios.” (Juan 3:3) Nicodemo, kende como fariseo mester a studia e Scritura Hebreo, tabata sa algu tocante e magnífico berdad dje Reino di Dios. E buki di Daniel a profetisá cu e Reino lo ser duná na “unu manera un yu di hende” i na “e pueblo cu ta e santunan di Esun Supremo.” (Daniel 7:13, 14, 27) E Reino lo mester “machicá i pone fin” na tur otro reino i permanecé pa semper. (Daniel 2:44) Muy probablemente, Nicodemo a pensa cu e profecianan aki lo ser cumplí relacioná cu e nacion hudiu; pero Jesus a bisa cu pa por mira e Reino, un hende mester nace di nobo. Nicodemo no a comprendé, pues Jesus a sigui bisando: “Aménos cu un hende nace di awa i di spiritu, e no por drenta den e reino di Dios.”—Juan 3:5.
4. Pa esnan cu nace di spiritu santu, con nan relacion cu Jehova lo cambia?
4 Juan Bautista a papia di bautismo cu spiritu santu. Awor, Jesus ta agregá cu un individuo mester nace di spiritu santu si e kier drenta den e Reino di Dios. Dor dje nacementu único aki, hende homber i muher imperfecto ta drenta den un relacion masha special cu Jehova Dios. Nan ta bira su yunan adoptá. Nos ta lesa: “Na cuantu cu sí a ricibí [Jesus], el a duna autoridad pa bira yu di Dios, pasobra nan tabata ehercé fe den su nomber; i nan a nace, no di sanger ni di un boluntad di carni ni di boluntad di homber, sino di Dios.”—Juan 1:12, 13; Romanonan 8:15.
Yunan di Dios
5. Na ki tempu e fiel disipelnan a ser bautisá cu spiritu santu, i ki obramentu di spiritu santu en coneccion cu esei a tuma lugá n’e mésun tempu?
5 Ora Jesus a papia cu Nicodemo, spiritu santu ya a baha riba Jesus, ungiend’e pa su futuro posicion real den e Reino di Dios, i Dios a reconocé Jesus públicamente como Su Yu. (Mateo 3:16, 17) Jehova a engendrá mas yu spiritual na Pentecoste di 33 E.C. E disipelnan fiel cu tabata reuní den e sala ariba den Jerusalem a ser bautisá cu spiritu santu. N’e mésun tempu, nan a nace di nobo di spiritu santu pa bira Dios su yunan spiritual. (Echonan 2:2-4, 38; Romanonan 8:15) Ademas, nan a ser ungí cu spiritu santu cu bista riba un futuro herencia celestial, i nan a ser seyá inicialmente cu spiritu santu como un señal dje siguransa dje speransa celestial ei.—2 Corintionan 1:21, 22.
6. Kico ta Jehova su propósito relacioná cu e Reino celestial, i pakico ta apropiado cu hende tin un participacion den esaki?
6 Esakinan tabata e promé hendenan imperfecto scogí dor di Dios pa drenta den e Reino. Esta, despues di nan morto i resureccion, nan lo mester bira parti dje organisacion celestial di Reino cu lo goberná riba hende i angel. Jehova ta proponé cu pa medio dje Reino aki, su gran nomber lo ser santificá i su soberania vindicá dilanti tur creacion. (Mateo 6:9, 10; Juan 12:28) Ta ki apropiado cu hende ta participá den e Reino ei! Satanas a usa hende ora el a presentá su promé desafio contra e soberania di Jehova aya den e hofi di Eden, i awor Jehova ta proponé pa hende ser enbolbí den contestá e desafio ei. (Génesis 3:1-6; Juan 8:44) Apostel Pedro a skirbi n’e individuonan scogí pa goberná den e Reino ei: “Bendicioná sea e Dios i Tata di nos Señor Jesucristo, pasobra segun su gran misericordia el a duna nos un nacementu nobo na un speransa bibu mediante e resureccion di Jesucristo for di morto, na un herencia incoruptibel i incontaminá i inmarchitabel. Esei ta reservá den cielu pa boso.”—1 Pedro 1:3, 4.
7. Ki relacion único cu Jesus esnan bautisá cu spiritu santu ta disfrutá di dje?
7 Como yunan adoptá di Dios, e cristiannan scogí aki a bira rumannan di Jesucristo. (Romanonan 8:16, 17; 9:4, 26; Hebreonan 2:11) Siendo cu Jesus a resultá di ta e Simia primintí na Abraham, e cristiannan ungí cu spiritu aki ta un parti asociá of secundario dje Simia ei, cu lo drama un bendicion riba humanidad creyente. (Génesis 22:17, 18; Galationan 3:16, 26, 29) Ki bendicion? E oportunidad di ser librá for di picá i di ser reconciliá cu Dios i di sirbié awor i pa eternidad. (Mateo 4:23; 20:28; Juan 3:16, 36; 1 Juan 2:1, 2) Cristiannan ungí riba tera ta dirigí esnan di curason hustu n’e bendicion aki dunando testimonio tocante nan ruman spiritual, Jesucristo, i tocante nan Tata adoptivo, Jehova Dios.—Echonan 1:8; Hebreonan 13:15.
8. Kico ta e “revelacion” dje yunan di Dios ungí cu spiritu?
8 Bijbel ta papia di un “revelacion” dje yunan di Dios aki ungí cu spiritu. (Romanonan 8:19) Drentando den e Reino como rey socio cu Jesus, nan ta participá den destruí e sistema di cosnan dje mundu di Satanas. Despues, pa mil aña, nan ta yuda dirigí e beneficionan dje sacrificio di rescate na humanidad i asina elevá e rasa humano n’e perfeccion cu Adam a perde. (2 Tesalonicensenan 1:8-10; Revelacion 2:26, 27; 20:6; 22:1, 2) Nan revelacion ta incluí tur e factornan mencioná ariba. E ta algu cu e creacion humano creyente ta anticipá ansiosamente.
9. Con Bijbel ta referí na e cuerpo mundial di cristiannan ungí?
9 E cuerpo mundial di cristiannan ungí ta “e congregacion dje primogénitonan cu a ser inscribí den cielu.” (Hebreonan 12:23) Nan ta e proménan pa beneficiá dje sacrificio di rescate di Jesus. Nan ta tambe “e curpa di Cristo,” locual ta demostrá nan relacion íntimo cu otro i cu Jesus. (1 Corintionan 12:27) Pablo a skirbi: “Mescos cu e curpa ta unu pero tin hopi miembro, i tur e miembronan dje curpa ei, aunke nan ta hopi, ta un solo curpa, asina tambe e Cristo ta. Pasobra berdaderamente pa medio di un solo spiritu nos tur a ser bautisá den un solo curpa, sea hudiu of griego, sea esclabo of liber, i nos tur tabatin cu bebe un solo spiritu.”—1 Corintionan 12:12, 13; Romanonan 12:5; Efesionan 1:22, 23; 3:6.
“E Israel di Dios”
10, 11. Den e promé siglo, pakico un Israel nobo tabata necesario, i ken a forma e nacion nobo aki?
10 Pa mas cu 1.500 aña promé cu Jesus su binimentu como e Mesías primintí, e nacion carnal di Israel tabata Jehova su pueblo special. Apesar di recordatorionan constante, e nacion como totalidad a resultá di ser infiel. Ora Jesus a aparecé, e nacion a rechas’é. (Juan 1:11) Pues, Jesus a bisa e lidernan religioso hudiu: “E reino di Dios lo ser kitá for di boso i duná na un nacion cu ta producí su frutanan.” (Mateo 21:43) Reconociendo tal “nacion cu ta producí [e] frutanan [dje Reino]” ta vital pa salbacion.
11 E nacion nobo ta e congregacion cristian ungí, nací na Pentecoste di 33 E.C. Su promé miembronan tabata e disipelnan hudiu di Jesus cu a acept’é como nan Rey celestial. (Echonan 2:5, 32-36) Sin embargo, nan tabata miembro di Dios su nacion nobo, no a base di nan desendencia hudiu, sino a base di fe den Jesus. Pues, e Israel nobo aki di Dios tabata algu único—un nacion spiritual. Ora e mayoria dje hudiunan a nenga di aceptá Jesus, e invitacion pa bira parti dje nacion nobo a ser extendé n’e samaritanonan i despues n’e gentilnan. E nacion nobo a ser yamá “e Israel di Dios.”—Galationan 6:16.
12, 13. Con a bira evidente cu e Israel nobo no tabata djis un secta di hudaismo?
12 Den Israel di antigwedad, ora hende no-hudiu a combertí, nan tabatin cu someté nan n’e Ley di Moises, i e hende hombernan tabatin cu simbolisá esaki mediante circuncision. (Exodo 12:48, 49) Algun cristian hudiu a haña cu mescos mester a aplicá na esnan no-hudiu den e Israel di Dios. Sin embargo, Jehova tabatin algu otro na mente. Spiritu santu a dirigí apostel Pedro n’e cas dje gentil Cornelio. Ora Cornelio i su famia a reaccioná faborablemente na Pedro su predicacion, nan a ricibí spiritu santu—asta promé cu nan a ser bautisá den awa. Esaki a demostrá claramente cu Jehova a aceptá e gentilnan aki como miembronan dje Israel di Dios sin exigí cu nan mester a someté nan n’e Ley di Moises.—Echonan 10:21-48.
13 Algun creyente a haña esaki difícil pa aceptá, i pronto henter e asuntu tabatin cu ser considerá dor dje apostel i ancianonan den Jerusalem. E cuerpo autoritativo ei a scucha testimonio detayando con spiritu santu tabata activo riba creyentenan nohudiu. Investigacion den Bijbel a mustra cu esaki tabata na cumplimentu di profecia inspirá. (Isaías 55:5; Amos 9:11, 12) Nan a yega na un decision corecto: cristiannan no-hudiu no tabatin cu someté nan n’e Ley di Moises. (Echonan 15:1, 6-29) Pues, Israel spiritual tabata berdaderamente un nacion nobo i no djis un secta di hudaismo.
14. Kico Santiago tabata kier men ora el a yama e congregacion cristian “e diesdos tribunan cu ta plamá na tur parti”?
14 Na armonia cu esaki, ora disipel Santiago a skirbi e cristiannan ungí dje promé siglo, el a dirigí su carta na “e diesdos tribunan cu ta plamá na tur parti.” (Santiago 1:1; Revelacion 7:3-8) Naturalmente, ciudadanonan dje Israel nobo no tabata asigná na tribunan specífico. No tabatin division den 12 tribu distinto den Israel spiritual manera tabatin den Israel carnal. Sin embargo, Santiago su expresion inspirá ta indicá cu den bista di Jehova e Israel di Dios a reemplasá completamente e 12 tribunan di Israel natural. Si un israelita natural di nacementu a bira parti dje nacion nobo, su desendencia carnal—asta si e tabata dje tribu di Huda of Levi—no tabatin ningun nificacion.—Galationan 3:28; Filipensenan 3:5, 6.
Un Pacto Nobo
15, 16. (a) Con Jehova ta mira miembronan no-hudiu dje Israel di Dios? (b) Riba ki base legal e Israel nobo tabata establecí?
15 Den Jehova su bista, miembronan no-israelita dje nacion nobo aki a alcansá e estado completo di un hudiu spiritual! Apostel Pablo a splica: “E no ta un hudiu cu ta hudiu di pafó, tampoco circuncision ta loke ta di pafó riba e carni. Pero e ta un hudiu cu ta hudiu di paden, i su circuncision ta esun di curason mediante spiritu, i no mediante un código skirbí. E alabansa di e persona ei ta bini, no di hende, sino di Dios.” (Romanonan 2:28, 29) Hopi gentil a respondé n’e invitacion pa bira parti dje Israel di Dios, i e desaroyo aki a cumpli cu profecia di Bijbel. Por ehempel, profeta Oséas a skirbi: “Lo mi mustra misericordia na esun na kende misericordia no a ser mustrá, i lo mi bisa na esnan cu no ta mi pueblo: ‘Boso ta mi pueblo’; i nan, di nan parti, lo bisa: ‘Bo ta mi Dios.’ ”—Oséas 2:23; Romanonan 11:25, 26.
16 Si e israelitanan spiritual no tabata bou dje pacto di Ley di Moises, riba ki base nan tabata parti dje nacion nobo? Jehova a cera un pacto nobo mediante Jesus cu e nacion spiritual aki. (Hebreonan 9:15) Ora Jesus a iniciá e Memorial di su morto, riba 14 di Nisan, 33 E.C., el a pasa pan i biña n’e 11 fiel apostelnan i a bisa cu e biña a simbolisá e “sanger dje pacto.” (Mateo 26:28; Jeremías 31:31-34) Manera e registro di Lucas ta relatá, Jesus a bisa cu e copa di biña a simbolisá “e pacto nobo.” (Lucas 22:20) Na cumplimentu cu Jesus su palabranan, ora e spiritu santu a ser dramá na Pentecoste i e Israel di Dios a nace, e Reino a ser kitá for di Israel carnal i duná na e nacion spiritual nobo. Na lugá di Israel carnal, e nacion nobo aki tabata awor Jehova su sirbidor, componí di su testigonan.—Isaías 43:10, 11.
“Jerusalem Nobo”
17, 18. Ki descripcionnan ta ser duná den e buki di Revelacion dje gloria cu ta spera cristiannan ungí?
17 Ki un gloria ta spera esnan privilegiá pa participá den e yamada celestial! I ta ki un deleite pa siña dje maraviyanan cu ta spera nan! E buki di Revelacion ta duna nos un bistaso emocionante di nan herencia celestial. Por ehempel, na Revelacion 4:4, nos ta lesa: “Rond dje trono [di Jehova] tin binticuater trono, i riba e trononan aki mi a mira sintá binticuater anciano bistí cu paña exterior blancu, i riba nan cabes corona di oro.” E 24 ancianonan aki ta cristiannan ungí, resucitá i ocupando awor e posicion celestial cu Jehova a primintí nan. Nan corona i trono ta recordá nos di nan posicion real. Pensa, tambe, di nan privilegio maraviyosamente haltu di sirbi rond dje trono di Jehova!
18 Na Revelacion 14:1, nos ta capta un otro bistaso di nan: “Mi a wak, i mira! e Lamchi pará riba e Ceru di Sion, i cuné cient’i cuarenticuater mil teniendo su nomber i e nomber di su Tata skirbí riba nan frenta.” Aki nos ta mira e cantidad limitá di e ungínan aki—144.000. Nos ta dicerní nan posicion real den e echo cu nan ta pará huntu cu Jehova su Rey entronisá, “e Lamchi,” Jesus. I nan ta riba e Ceru di Sion celestial. E Ceru di Sion terenal tabata e sitio di Jerusalem, e stad real di Israel. E Ceru di Sion celestial ta representá e posicion halsá di Jesus i su co-herederonan, kendenan ta forma Jerusalem celestial.—2 Crónicanan 5:2; Salmo 2:6.
19, 20. (a) Di ki organisacion celestial cristiannan ungí lo forma parti? (b) Durante ki periodo di tempu Jehova a selectá esnan kende nan ciudadania lo ta den cielu?
19 Na armonia cu esaki, e ungínan den nan gloria celestial ta ser yamá tambe “Jerusalem Nobo.” (Revelacion 21:2) Jerusalem terenal tabata “e stad dje gran Rey” i tambe e sitio dje tempel. (Mateo 5:35) E Jerusalem celestial Nobo ta e organisacion real di Reino mediante cua e gran Soberano, Jehova, i su Rey nombrá, Jesus, ta reina awor i den cua sirbishi sacerdotal ta ser efectuá segun cu bendicionnan ricu ta basha for dje trono di Jehova p’e curacion di humanidad. (Revelacion 21:10, 11; 22:1-5) Den un otro vision Juan ta tende con referencia ta ser hací na fiel cristiannan ungí resucitá como ‘e esposa dje Lamchi.’ Ki un ilustracion afectuoso dje intimidad cu nan lo disfrutá di dje cu Jesus i nan sumision boluntario na dje! Imaginá bo e goso den cielu ora e último di nan finalmente ricibí su recompensa celestial. Awor, por fin, “e matrimonio dje Lamchi” por tuma lugá! E organisacion celestial real ei lo ta completo e ora ei.—Revelacion 19:6-8.
20 Sí, bendicionnan maraviyoso ta warda esnan di ken apostel Pablo a bisa: “En cuanto nos, nos ciudadania ta existí den cielu.” (Filipensenan 3:20) Pa casi dos mil aña, Jehova ta selectando su yunan spiritual i ta preparando nan pa un herencia celestial. Segun tur e evidencia, e trabou aki di seleccion i preparacion ta cerca di keda completá. Pero tabatin mas pa sigui, manera a ser revelá na Juan den su vision registrá na Revelacion capítulo 7. Pues awor, un otro grupo di cristiannan ta exigí nos atencion, i nos lo considerá e grupo aki den e siguiente artículo.
Bo Ta Corda?
◻ Cua ta e diferente obramentunan dje spiritu riba esnan cu tin un herencia celestial?
◻ Ki relacion íntimo e ungínan ta disfrutá di dje cu Jehova? cu Jesus?
◻ Con e congregacion di cristiannan ungí ta ser describí den Bijbel?
◻ Riba ki base legal e Israel di Dios a ser establecí?
◻ Ki privilegionan celestial ta spera cristiannan ungí?
[Plachi na página 10]
Durante un periodo di casi dos mil aña, Jehova a scoge esnan cu lo goberná den e Reino celestial