“Dios A Stima Nos Asina”

“Si Dios a stima nos asina, e ora ei nos mes ta obligá di stima otro.”—1 JUAN 4:11.

 1. Dia 23 di mart despues cu solo baha, pakico miyones di hende lo ta reuniendo den Salonnan di Reino i otro lugánan di reunion rond mundu?

DIADOMINGO, 23 di mart, 1997, despues cu solo baha, sin duda lo tin mas cu 13.000.000 hende rond mundu cu lo reuní den Salonnan di Reino i otro lugánan di reunion cu Testigonan di Jehova ta usa. Pa ki motibu? Pasobra nan curason a ser conmoví dor di Dios su mayor expresion di amor pa cu humanidad. Jesucristo a enfocá atencion riba e magnífico evidencia ei di Dios su amor, bisando: “Dios a stima e mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.”—Juan 3:16.

 2. Ki preguntanan ta bon pa nos tur haci nos mes relacioná cu nos reaccion riba e amor di Dios?

² Segun cu nos ta considerá e amor cu Dios a demostrá, ta bon pa nos puntra nos mes, ‘Ami berdaderamente ta apreciá loke Dios a haci? E manera cu mi ta usando mi bida ta duna evidencia di e aprecio ei?’

“Dios Ta Amor”

 3. (a) Pakico despliegue di amor no ta algu straño pa Dios? (b) Con poder i sabiduria ta ser manifestá den su obranan di creacion?

³ Despliegue di amor riba su mes no ta algu extraordinario di parti di Dios pasobra “Dios ta amor.” (1 Juan 4:8) Amor ta su característica dominante. Ora e tabata preparando e tera pa hende biba riba dje, e obra di hisa e cerunan i forma lago i océanonan dje awa tabata un despliegue asombroso di poder. (Génesis 1:9, 10) Ora Dios a pone e ciclo di awa i e ciclo di oxígeno funcioná, ora el a diseñá cantidadnan incontabel di micro-organismo i di variedad di vegetacion pa combertí elementonan kímico dje tera den cuminda cu hende por asimilá afin di sostené nan bida, ora el a pone nos oloshi biológico na ora pa corespondé cu e largura di dianan i di lunanan riba planeta Tera, esaki a manifestá gran sabiduria. (Salmo 104:24; Jeremías 10:12) Sin embargo, asta mas sobresaliente den e creacion físico ta e evidencia di Dios su amor.

 4. Den e creacion físico, ki evidencia di Dios su amor nos tur mester mira i apreciá?

⁴ Nos shelu di boca ta conta nos di Dios su amor ora nos morde den un fruta hechu i suculento cu obviamente a ser creá no solamente pa sostené nos sino tambe pa duna nos placer. Nos wowonan ta mira evidencia inekibocabel di e amor ei den bahamentu imponente di solo, e shelu yen di strea riba un anochi cla, e vários formanan i colornan vibrante di flornan, e payasadanan di yunan di bestia i e sonrisa caluroso di amigunan. Nos nanishi ta haci nos conciente di e amor ei ora nos hala aden e dushi holó di flornan di primavera. Nos oreanan ta capta e amor ei ora nos ta scucha e zonido di un waterval, e cantamentu di paranan i e bosnan di personanan stimá. Nos ta sinti e amor ei ora un ser kerí duna nos un abraso caluroso. Algun animal ta dotá cu abilidad pa mira, tende, of hole cosnan cu hende no por. Pero ta hende, creá den e imágen di Dios, tin e capacidad pa percibí e amor di Dios den un manera cu ningun animal por.—Génesis 1:27.

 5. Con Jehova a mustra amor abundante pa cu Adam i Eva?

⁵ Ora Jehova Dios a crea e promé hendenan, Adam i Eva, el a rondoná nan cu evidencia di su amor. El a planta un hofi, un paradijs, i a pone tur sorto di palu crece den dje. El a percurá un riu pa muh’é i a yen’é cu para i animalnan fasinante. El a duna Adam i Eva tur esaki como nan hogar. (Génesis 2:8-10, 19) Jehova a trata nan manera su yunan, parti di su famia universal. (Lucas 3:38) Despues di a percurá Eden como un patronchi, e Tata celestial dje promé pareha humano aki a pone dilanti nan e asignacion satisfaciente di extendé Paradijs pa cubri e globo. Henter e tera mester a ser habitá cu nan desendientenan.—Génesis 1:28.

 6. (a) Con bo ta sinti pa cu e curso di rebelion cu Adam i Eva a sigui? (b) Kico lo por indicá cu nos a siña for di loke a tuma lugá den Eden i cu nos a saca beneficio for dje conocimentu ei?

⁶ Sin embargo, un poco tempu despues, Adam i Eva a enfrentá un prueba di obedencia, un prueba di lealtad. Promé esun i despues e otro a faya pa mustra aprecio p’e amor cu a ser mustrá na nan. Loke nan a haci tabata escandaloso. Esei tabata inexcusabel! Como resultado, nan a perde nan relacion cu Dios, a ser expulsá for di su famia, i a ser sacá for di Eden. Awe ainda nos ta sinti e efectonan di nan picá. (Génesis 2:16, 17; 3:1-6, 16-19, 24; Romanonan 5:12) Pero nos a siña for di loke a sosodé? Con nos ta respondiendo na Dios su amor? E decisionnan cu nos ta tuma tur dia ta mustra cu nos ta apreciá su amor?—1 Juan 5:3.

 7. Apesar di loke Adam i Eva a haci, con Jehova a mustra amor pa nan desendientenan?

⁷ Asta e falta grave di aprecio cu nos promé mayornan humano a mustra pa tur loke Dios a haci pa nan no a reprimí Dios su mes amor. Debí na compasion pa hende cu e tempu ei no a nace ainda—incluyendo nos cu ta na bida awe—Dios a permití Adam i Eva forma un famia promé cu nan a muri. (Génesis 5:1-5; Mateo 5:44, 45) Si e no a haci esei, ningun di nos lo a nace. Pa medio di revelacion progresivo di su boluntad, tambe Jehova a percurá un base pa speransa pa tur e desendientenan di Adam cu lo a ehercé fe. (Génesis 3:15; 22:18; Isaías 9:6, 7) Su areglo a incluí e medionan dor di cua hende di tur nacion lo por a recobrá loke Adam a perde, esta, bida perfecto como miembro aprobá dje famia universal di Dios. El a haci esaki dor di percurá un rescate.

Pakico un Rescate?

 8. Pakico Dios no por a simplemente decretá cu aunke Adam i Eva tabatin cu muri, ningun di nan desendientenan obediente no mester a muri?

⁸ Tabata realmente necesario pa paga un prijs di rescate den forma di un bida humano? Dios no por a simplemente decretá cu aunke Adam i Eva tabatin cu muri pa nan rebelion, tur nan desendientenan cu lo a obedecé Dios por a biba pa semper? For di un punto di bista humano limitá, esei lo por zona razonabel. Sin embargo, Jehova ta “un stimador di husticia i rectitud.” (Salmo 33:5) Solamente despues cu Adam i Eva a bira pecador nan a producí yunan; di manera cu ningun dje yunan ei a nace perfecto. (Salmo 51:5) Nan tur a heredá picá, i e castigu pa picá ta morto. Si Jehova a ignorá esaki, ki sorto di ehempel esei lo a pone pa e miembronan di su famia universal? E no por a ignorá su mes normanan hustu. El a respetá e rekisitonan di husticia. Ningun persona hamas lo por tin motibu válido pa criticá e manera den cua Dios a trata cu e cuestionnan enbolbí.—Romanonan 3:21-23.

 9. Segun e norma divino di husticia, ki clase di rescate tabata necesario?

⁹ Con, anto, un base apropiado por a ser percurá pa libra e desendientenan di Adam cu lo a demostrá obedencia amoroso na Jehova? Si un hende perfecto a muri un morto sacrificial, husticia lo por a permití pa e balor dje bida perfecto ei cubri e picánan di esnan cu lo a kere den i aceptá e rescate. Siendo cu e picá di un solo homber, Adam, tabata responsabel pa pone henter e famia humano bira pecador, e sanger dramá di un otro hende perfecto, siendo di un balor corespondiente, por a satisfacé e normanan di husticia. (1 Timoteo 2:5, 6) Pero unda un persona asina por a ser hañá?

Con Grandi e Costo Tabata?

10. Pakico e desendientenan di Adam tabata incapas pa percurá e rescate necesario?

¹⁰ Entre e desendientenan dje pecador Adam, no tabatin ningun cu por a percurá loke tabata necesario afin di cumpra bek e prospectonan di bida cu Adam a perde. “Ni un di nan di ningun manera por rescatá sikiera un ruman, ni duna Dios un rescate p’e; (i e prijs di rescate di nan alma ta asina precioso cu el a stop te na tempu indefiní) p’e biba pa semper ainda i no mira e buracu.” (Salmo 49:7-9) En bes di laga humanidad sin ningun speransa, Jehova mes misericordiosamente a haci e percuracion.

11. Di ki manera Jehova a percurá e bida humano perfecto cu tabata necesario pa un rescate apropiado?

¹¹ Jehova no a manda un angel na tera pa pretendé di muri dor di entregá un curpa encarná miéntras el a sigui biba como criatura spiritual. Mas bien, dor di haci un milager cu solamente Dios, e Creador por a inventá, el a transferí e forsa di bida i patronchi di personalidad di un yu celestial n’e matris di un muher, Maria yu di Heli, dje tribu di Huda. Dios su forsa activo, su spiritu santu, a protehá e desaroyo dje mucha den e matris di su mama, i el a nace como un hende perfecto. (Lucas 1:35; 1 Pedro 2:22) Esun aki tabatin e ora ei na su disposicion e prijs necesario pa percurá un rescate cu lo a satisfacé completamente e rekisitonan di husticia divino.—Hebreonan 10:5.

12. (a) Den ki sentido Jesus ta Dios su “Yu unigénito”? (b) Con e echo cu Dios a manda esun aki pa percurá e rescate ta enfatisá Su amor pa nos?

¹² Na cua di su gran cantidad di yunan celestial Jehova a duna e asignacion aki? Na esun describí den e Scritura como su “Yu unigénito.” (1 Juan 4:9) E expresion aki ta ser usá pa describí, no loke el a bira ora el a nace como hende, sino loke e tabata promé cu esei den shelu. E ta e único cu Jehova a crea directamente sin e cooperacion di ningun persona. E ta e Primogénito di tur creacion. E ta esun cu Dios a usa pa trece tur otro criatura na existencia. E angelnan ta yunan di Dios, mescos cu Adam tabata un yu di Dios. Pero Jesus ta ser describí como teniendo “un gloria manera esun cu ta pertenecé na un yu unigénito di un tata.” Di dje ta ser bisá cu e ta “den e posicion di pechu cerca e Tata.” (Juan 1:14, 18) Su relacion cu e Tata ta unu íntimo, confidencial i tierno. E tambe tin e amor cu su Tata tin pa humanidad. Proverbionan 8:30, 31 ta expresá con su Tata ta sinti tocante e Yu aki i con e Yu ta sinti tocante humanidad: “Mi a yega di ta esun pa ken e [Jehova] tabatin cariño special dia tras dia, i mi tabata alegre dilanti dje tur ora, . . . i e cosnan cu ami [Jesus, Jehova su Obrero Maestro, e personificacion di sabiduria] tabatin cariño p’e tabata e yunan di hende.” Tabata e Yu preciosísimo aki cu Dios a manda na tera pa percurá e rescate. P’esei, ki significativo ta Jesus su declaracion: “Dios a stima e mundu asina tantu cu el a duna su Yu unigénito”!—Juan 3:16.

13, 14. Kico e registro bíblico di Abraham su intento pa ofrecé Isaac mester yuda nos apreciá tocante loke Jehova a haci? (1 Juan 4:10)

¹³ Pa yuda nos comprendé un tiki loke esei ta nificá, hopi tempu promé cu Jesus a bini na tera, Dios a instruí Abraham, rond di 3.890 aña pasá: “Tuma, por fabor, bo yu, bo único yu cu bo ta stima asina tantu, Isaac, i haci un biahe p’e tera di Moria i ei ofrec’é como un ofrenda kimá riba un dje cerunan cu ami lo designá bo.” (Génesis 22:1, 2) Cu fe, Abraham a obedecé. Pone bo mes na lugá di Abraham. Kico si esei tabata bo yu, bo único yu cu bo ta stima masha hopi? Ki sintimentunan lo bo tabatin segun cu bo ta kap e palunan p’e ofrenda kimá, haci e biahe di vários dia p’e tera di Moria i pone bo yu riba e altar?

¹⁴ Pakico un mayor compasivo tin sintimentunan asina? Génesis 1:27 ta bisa cu Dios a crea hende den Su imágen. Nos sintimentunan di amor i compasion ta reflehá den un manera masha limitá Jehova su mes amor i compasion. Den e caso di Abraham, Dios a intervení, di manera cu Isaac en realidad no a ser sacrificá. (Génesis 22:12, 13; Hebreonan 11:17-19) Sin embargo, den su mes caso, Jehova no a keda na último momento sin percurá e rescate, aunke esei a costa tantu e como su Yu masha hopi pa hacié. Loke a ser hací no tabata pa motibu di ningun obligacion di parti di Dios, sino, mas bien, como un expresion di bondad inmerecí extraordinario. Nos ta apreciá esei plenamente?—Hebreonan 2:9.

Loke e Rescate Ta Haci Posibel

15. Con e rescate a afectá bida di hende asta den e sistema di cosnan actual?

¹⁵ E percuracion amoroso ei cu Dios a haci tin un efecto profundo riba bida di esnan cu ta acept’é cu fe. Anteriormente nan tabata alehá for di Dios como resultado di picá. Nan tabata, manera su Palabra ta bisa, ‘enemigunan pasobra nan mente tabata riba obranan cu tabata malu.’ (Colosensenan 1:21-23) Pero nan a bira “reconciliá cu Dios mediante e morto di su Yu.” (Romanonan 5:8-10) Despues di a cambia nan curso di bida i despues cu nan a aceptá e pordon cu Dios ta haci posibel pa esnan cu ta ehercé fe den e sacrificio di Cristo, nan ta ser faborecí cu un concenshi limpi.—Hebreonan 9:14; 1 Pedro 3:21.

16. Ki bendicionnan e trupa chikitu ta ser duná debí na nan fe den e rescate?

¹⁶ Jehova a extendé na un cantidad limitá di esakinan, un trupa chikitu, e fabor inmerecí di ser asociá cu su Yu den e Reino celestial, cu mira riba e realisacion di Dios su propósito original p’e tera. (Lucas 12:32) Esakinan a ser tumá “for di tur tribu i lenga i pueblo i nacion . . . pa ta un reino i sacerdotenan pa nos Dios, i nan tin cu reina como rey riba tera.” (Revelacion 5:9, 10) Na esakinan, apostel Pablo a skirbi: “Boso a ricibí un spiritu di adopcion como yu, mediante cua spiritu nos ta sclama: ‘Abba, Tata!’ E spiritu mes ta duna testimonio cu nos spiritu cu nos ta yu di Dios. Pues, anto, si nos ta yu, nos ta heredero tambe: heredero por cierto di Dios, pero co-heredero cu Cristo.” (Romanonan 8:15-17) Dor cu Dios a adoptá nan como su yunan, nan ta ser duná e relacion precioso cu Adam a perde; pero e yunan aki lo ser duná e privilegionan adicional di sirbishi celestial—algu cu Adam nunca no tabatin. Nada straño cu apostel Juan a bisa: “Mira ki clase di amor e Tata a duna nos, pa nos ser yamá yunan di Dios”! (1 Juan 3:1) Na hende asina Dios ta expresá no solamente amor basá riba principio (a·gaʹpe) sino tambe tierno cariño (phi·liʹa), cu ta caracterisá e laso cu ta existí entre berdadero amigunan.—Juan 16:27.

17. (a) Ki oportunidad ta ser duná na tur esnan cu ta ehercé fe den e rescate? (b) Kico “e glorioso libertad dje yunan di Dios” lo nificá pa nan?

¹⁷ Pa otronan tambe—tur cu ta ehercé fe den e percuracion generoso di Dios pa bida mediante Jesucristo—Jehova ta habri e oportunidad pa gana e relacion precioso cu Adam a perde. Apostel Pablo a splica: “E anticipacion anheloso dje creacion [e creacion humano cu a bini for di Adam] ta spera e revelacion dje yunan di Dios [esta, nan ta spera e tempu ora bira claramente bisto cu e yunan di Dios cu ta heredero cu Cristo dje Reino celestial ta tumando accion positivo na fabor di humanidad]. Pasobra e creacion a ser sometí na banidad [nan a nace den picá cu e prospecto di morto, i no tabatin ningun manera den cua nan por a libra nan mes], no dor di su mes boluntad sino dor di esun cu a somet’é, riba base di speransa [cu Dios a duna] di cu e creacion mes tambe lo ser librá for di sclabitud na corupcion i lo tin e glorioso libertad dje yunan di Dios.” (Romanonan 8:19-21) Kico e libertad ei lo nificá? Cu nan a ser librá for di sclabitud na picá i morto. Nan lo tin perfeccion di mente i curpa, Paradijs como nan hogar i bida eterno pa disfrutá di nan perfeccion i expresá nan aprecio na Jehova, e único Dios berdadero. I con tur esaki a ser hací posibel? Mediante e sacrificio di rescate di Dios su Yu unigénito.

18. Dia 23 di mart despues cu solo baha, kico nos lo ta haciendo, i pakico?

¹⁸ Dia 14 di nísan, 33 E.C., den un sala parti ariba den Jerusalem, Jesus a instituí e Memorial di su morto. E conmemoracion anual di su morto a bira un evento importante den bida di tur cristian berdadero. Jesus mes a manda: “Sigui haci esaki na mi recuerdo.” (Lucas 22:19) Den 1997 e Memorial lo ser tené despues cu solo baha dia 23 di mart (cu ta ora 14 di nísan ta cuminsá). Riba e dia ei, nada por ta mas importante cu ser presente p’e ocasion dje Memorial aki.

Con Lo Bo Contestá?

◻ Den ki maneranan Dios a mustra amor abundante pa humanidad?

◻ Pakico un bida humano perfecto tabata necesario pa rescatá Adam su desendientenan?

◻ A costo di ki prijs haltu Jehova a percurá e rescate?

◻ Kico e rescate ta haci posibel?

[Plachi na página 10]

Dios a duna su Yu unigénito