Dios A Determiná Nos Destino Caba?

“ASINA tantu problema imaginario lo por ser evitá si e palabra predestinacion cu hopi biaha ta ser comprendé robes no ser usá mes.” Kisas bo ta puntra bo mes pakico no, si bo a yega di usa e palabra “predestinacion” of tend’é ser usá.

Segun e reciente enciclopedia católico frances Théo, mihó nos no usa e palabra “predestinacion.” Un otro buki ta declará: “Awe, ta parce cu predestinacion no ta e centro mas di debate teológico, ni pa mayoria protestant.”

No obstante, e cuestion di predestinacion a molestiá hopi hende atrabes di historia. E tabata e centro dje controversia cu a ocasioná e Reformacion, i asta den Iglesia Católico, e tabata tópico di discusion pisá pa siglonan. Aunke ménos debatí awe, ainda e ta keda un problema. Ken lo no kier sa si su destino a ser fihá adelantá?

Predestinacion—Nificacion dje Palabra

Kico e palabra “predestinacion” ta nificá den e iglesianan? E Dictionnaire de théologie catholique ta consider’é como “e intencion divino pa guia cierto personanan, kendenan ta ser designá pa nomber, na bida eterno.” Generalmente nan ta pensa cu esnan scogí, “designá pa nomber,” ta esnan na ken apostel Pablo a referí den su carta n’e romanonan, cu e siguiente palabranan: “Dios ta obra p’e bienestar di esnan cu ta stim’é, kendenan ta ser yamá segun su propósito. Pasobra esnan cu el a reconocé di antemano el a predestiná tambe pa nan ser hací conforme cu e imágen di su Yu . . . I esnan cu el a predestiná el a yama tambe; i esnan cu el a yama el a declará nan hustu tambe; i esnan cu el a declará hustu el a glorificá tambe.”—Romano 8:28-30, Revised Standard Version.

Asta promé cu nan nacementu, algun hende supuestamente a ser scogí pa Dios cu mira riba nan participacion den Cristo su gloria den cielu. Esaki ta hiba na e pregunta hopi debatí: Dios ta scoge arbitrariamente esun cu e kier salba, of hende tin un boluntad liber i un papel di hunga den obtené i retené e fabor di Dios?

Augustin, Tata di Predestinacion

Aunke otro Tatanan di Iglesia a skirbi anteriormente tocante predestinacion, Augustin (354-430 E.C.) generalmente ta ser considerá como esun cu a pone e fundeshi dje doctrina pa tantu iglesia católico como protestant. Segun Augustin, for di eternidad Dios a predestiná p’e hustunan ricibí bendicionnan eterno. N’e otro banda, e inhustunan, aunke no predestiná dor di Dios den e sentido estricto dje palabra, tin cu ricibí e castigu merecí pa nan picánan, esta condenacion. Augustin su splicacion a laga poco lugá pa boluntad liber, habriendo asina e caminda pa hopi controversia.

Herederonan di Augustin

E debate relacioná cu predestinacion i boluntad liber tabata lanta regularmente durante Edad Medio, i el a yega na un punto crucial durante e Reformacion. Luther a mira predestinacion individual como un scogementu liber di parti di Dios, sin cu E ta premirá e futuro méritonan of bon obranan di esnan scogí. Calvijn a yega na un conclusion mas radical cu su concepto di predestinacion cu dos resultado: Algun hende ta predestiná pa salbacion eterno, i otronan pa perdicion eterno. Sin embargo, Calvijn tambe a haña cu e scogementu di Dios ta arbitrario, asta incomprensibel.

E asuntu di predestinacion i e cuestion estrechamente ligá cuné, esta “gracia”—un palabra cu e iglesianan ta usa pa designá e acto mediante cua Dios ta salba i ta declará hende hustu—a bira asina grandi cu na 1611 e Sede Santu católico a prohibí pa cualkier cos riba e tópico ser publicá sin su consentimentu. Den Iglesia Católico, Augustin su siñansanan a ricibí apoyo fuerte for dje jansenistanan frances [siguidornan dje obispu católico Cornelius Jansen] di siglo 17 i 18. Nan a boga pa un forma di cristianismo masha severo i selecto, i asta tabatin siguidornan entre e aristocracia. Sin embargo, e controversia riba e asuntu no a mengua. Rey Louis XIV a ordená e destruccion dje monasterio di Port-Royal, e cuna di pensamentu jansenista.

Den e iglesianan Protestant Reformá, e discusion tabata leu for di terminá. Huntu cu otro gruponan religioso, e remonstrantenan, kendenan a sigui Jacobo Arminio, tabatin e creencia cu hende tin un papel di hunga den su mes salbacion. E sinodo protestant di Dordrecht (1618-19) a resolvé e cuestion temporalmente ora el a adoptá un forma estricto di doctrina ortodox calvinista. Segun e buki L’Aventure de la Réforme—Le monde de Jean Calvin, na Alemania e pleitu aki riba predestinacion i boluntad liber a originá un periodo largu di “intentonan fracasá pa reconciliacion, i tambe insulto, encarcelacion i expulsion di teólogonan.”

Predestinacion of Boluntad Liber?

For di cuminsamentu, e dos ideanan completamente contrario aki, predestinacion i boluntad liber, a lanta hopi conflicto cayente. Augustin di su parti no tabata capas pa splica e incompatibilidad aki. Calvijn tambe a mir’é como un expresion di Dios su boluntad soberano i p’esei inexplicabel.

Pero e revelacion bíblico di Dios su cualidadnan i personalidad ta yuda nos comprendé e cuestionnan aki mas claramente? E siguiente artículo lo examiná e puntonan aki den detaye.

[Plachi na página 4]

Calvijn

Luther

Jansen

[Rekonosementu]

Fotonan: Bibliothèque Nationale, Paris