Predestinacion Ta Cuadra cu e Amor di Dios?

“NOS ta definí predestinacion como e plan eterno di Dios, dor di cua el a determiná kico e kier a haci cu cada hende. Pasobra e no a crea nan tur den e mésun condicion, pero e ta predestiná algun pa bida eterno i otronan pa perdicion eterno.”

Asina e reformista protestant Johannes Calvijn a definí su concepto di predestinacion den e buki Institutes of the Christian Religion. E concepto aki ta basá riba e idea cu Dios sa i ta conciente di tur cos i cu e accionnan di su criaturanan no por cuestioná su propósitonan of obligu’é haci cambio.

Pero esaki realmente ta loke Bijbel ta duna di conocé en cuanto Dios? Mas importante, un splicacion asina ta compatibel cu e cualidadnan di Dios, specialmente su cualidad di mas importante—amor?

Un Dios Capas pa Pronosticá e Futuro

Dios ta capas pa pronosticá e futuro. E ta describí su mes como “Esun cu ta declará desde e principio e final, i for di hopi tempu pasá e cosnan cu no a ser hací; Esun bisando, ‘Mi mes conseho lo ser realisá, i tur loke ta mi deleite lo mi haci.’ ” (Isaías 46:10) Atrabes di historia humano, Dios a laga registrá su profecianan pa mustra cu e por ehercé su conocimentu adelantá i pronosticá sucesonan asta promé cu nan tuma lugá.

Asina, den e dianan di Belsasar, rey di Babilonia, ora profeta Daniel a soña tocante dos bestia salbahe, esun reemplasando e otro, Jehova a dun’é su interpretacion: “E chubat’i carné cu bo a mira cu tabata poseé e dos cachunan ta representá e reynan di Media i Persia. I e chubat’i cabritu yen di cabei ta representá e rey di Grecia.” (Daniel 8:20, 21) Obviamente, Dios a ehercé su conocimentu adelantá pa revelá e sucesion di podernan mundial. E Imperio di Babilonia cu a dominá e tempu ei lo a ser siguí pa Medo-Persia i despues pa Grecia.

Profecianan por tin di haber tambe cu un solo individuo. Por ehempel, profeta Miquéas a declará cu e Mesías mester a nace na Betlehem. (Miquéas 5:2) Atrobe, den e caso aki Dios a ehercé su conocimentu adelantá. Sin embargo, e suceso aki a ser anunciá cu un propósito particular—e identificacion dje Mesías. E caso aki no ta hustificá pa generalisá un doctrina di predestinacion cu ta incluí cada individuo.

Al contrario, e Scritura ta revelá cu tin situacionnan den cua Dios ta scoge pa no sa adelantá dje resultado. Djis promé cu e destruccion di Sódoma i Gomora, el a declará: “Mi ta completamente determiná pa baha pa mi por mira si nan ta actua nan tur huntu conforme cu e sclamacion di cua a yega na mi, si no, pa mi por yega na sa esei.” (Génesis 18:21) E texto aki ta mustra nos claramente cu Dios no tabata sa adelantá dje grado dje degeneracion den e stadnan ei promé cu el a investigá asuntunan.

Ta berdad cu Dios por premirá cierto sucesonan, pero den hopi caso, el a scoge pa no usa su conocimentu adelantá. Debí cu Dios ta todopoderoso, e ta liber pa ehercé su abilidadnan manera e ta deseá, no segun e deseonan di sernan humano imperfecto.

Un Dios Kende Por Rectificá Asuntunan

Mescos cu Calvijn, algun persona ta bisa cu Dios a predeterminá hende su caida den picá promé cu su creacion i cu el a predestiná e ‘scogínan’ promé cu e caida ei. Pero si esaki tabata cierto, lo no tabata un hipocresia pa Dios ofrecé e prospecto di bida eterno na Adam i Eva, plenamente conciente di cu nan lo tabata incapas pa alcans’é? Ademas, e Scritura ningun caminda ta nenga cu e promé pareha humano a ser duná un opcion: sea sigui instruccionnan divino i biba pa semper of rechasá nan i muri.—Génesis, capítulo 2.

Pero e picá di Adam i Eva realmente a stroba Dios su propósito? No, pasobra inmediatamente despues cu nan a peca, Dios a anunciá cu lo el a producí un “desendencia” pa destruí Satanas i su agentenan i cu lo e rectificá asuntunan atrobe riba tera. Mescos cu un par di insecto no por stroba un hardinero di producí bon cosecha, asina e desobedencia di Adam i Eva lo no prevení Dios di transformá e tera den un paradijs.—Génesis, capítulo 3.

Mas despues Dios a revelá cu lo tin un gobernacion di Reino encargá na un desendiente di Rey David i cu otronan lo ta asociá cuné den e Reino aki. E otronan aki ta ser yamá “e santunan di Esun Supremo.”—Daniel 7:18; 2 Samuel 7:12; 1 Crónica 17:11.a

Pronosticá No Ta Mescos Cu Predestiná

E echo cu Dios no a scoge pa sa ki curso humanidad lo a tuma no a previni’é di profetisá dje consecuencianan di hende su bon of mal accionnan. Un mecánico cu ta spierta un conductor dje mal condicion di su vehículo no por ser tené responsabel si un accidente sosodé ni ser acusá di a predestin’é. Di igual manera, Dios no por ser acusá di a predestiná e consecuencianan tristu dje accionnan di hende individual.

Mescos tabata e caso cu e desendientenan dje promé pareha humano. Promé cu Cain a mata su ruman, Jehova a pone un opcion dilanti Cain. Lo el a dominá picá, of picá lo a haña dominio riba dje? Nada den e relato ta indicá cu Jehova a predeterminá cu Cain lo a scoge malu i mata su ruman.—Génesis 4:3-7.

Mas despues, e Ley di Moises a spierta e israelitanan tocante kico lo sosodé si nan alehá for di Jehova, por ehempel, tumando esposanan entre e nacionnan pagano. Loke a ser pronosticá a sosodé. Esaki por ser mirá for dje ehempel di Rey Sálomon, kende ora e tabatin mas edad a ser influenciá dor di su esposanan stranhero pa practicá idolatria. (1 Rey 11:7, 8) Sí, Dios a spierta su pueblo, pero e no a predestiná kico nan accionnan individual lo tabata.

E scogínan ta ser animá pa perseverá si nan no ta deseá di perde e recompensa primintí di reina cu Cristo den cielu. (2 Pedro 1:10; Revelacion 2:5, 10, 16; 3:11) Manera algun teólogo di pasado a puntra, Pakico recordatorionan asina a ser duná si e yamada dje scogínan tabata definitivo?

Predestinacion i e Amor di Dios

Hende a ser duná un boluntad liber, siendo creá “den imágen di Dios.” (Génesis 1:27) Boluntad liber tabata indispensabel si sernan humano mester a onra i sirbi Dios motivá pa amor, no como robot cu tur movecion determiná di antemano. Amor manifestá dor di criaturanan inteligente i liber lo permití Dios refutá acusacionnan inhustu. E ta bisa: “Sea sabí, mi yu, i alegrá mi curason, pa mi por duna un contesta na esun cu ta desafiá mi cu mofa.”—Proverbio 27:11.

Si Dios su sirbidornan a ser predestiná—of programá, na moda di papia—e sinceridad di nan amor pa nan Creador lo no por a ser cuestioná? Tambe, lo no tabata contrario cu Dios su imparcialidad p’e haci un scogementu predeterminá di personanan destiná pa gloria i felicidad sin tuma na cuenta nan méritonan individual? Ademas, si algun persona ta ricibí un trato preferencial asina, miéntras otronan ta destiná na castigu eterno, esaki probablemente lo no lanta sintimentunan sincero di gratitud den e “scogínan.”—Génesis 1:27; Job 1:8; Echo 10:34, 35.

Finalmente, Cristo a bisa su disipelnan pa predicá e bon nobo na tur humanidad. Si Dios a scoge caba esnan pa ser salbá, esaki lo no mengua e celo cu cristiannan ta mustra den compartí e bon nobo? Lo e no haci e trabou di predicacion fundamentalmente sin sentido?

Amor imparcial di parti di Dios ta e forsa di mas fuerte cu por impulsá hende pa stim’é en buelta. E mayor expresion di Dios su amor tabata di sacrificá su Yu na fabor di humanidad imperfecto i pecaminoso. Jehova su conocimentu adelantá pa loke ta su Yu ta un caso special, pero e ta sigurá nos cu e promesanan di restoracion fundá riba Jesus en berdad lo ser cumplí. Pues laga nos pone fe den e Yu ei i hala cerca Dios. Laga nos mustra nos aprecio dor di aceptá e invitacion di Dios pa drenta den un relacion excelente cu nos Creador. Awe, Dios ta dirigí e invitacion aki na tur esnan cu kier ehercé nan boluntad liber i mustra nan amor p’e.

[Notanan]

[Kuadro na página 7]

PREDESTINA COMO CLASE

“Esnan cu Dios a reconocé di antemano el a predestiná tambe pa ta conforme cu e semehansa di su Yu, p’e sea e primogénito entre hopi ruman. I esnan cu el a predestiná, el a yama tambe; esnan cu el a yama, el a hustificá tambe; esnan cu el a hustificá, el a glorificá tambe.” (Romano 8:29, 30, New International Version) Con nos mester comprendé e palabra “predestiná” cu Pablo a usa den e versículonan aki?

Pablo su razonamentu aki no ta un argumento absoluto na fabor di predestinacion individual. Mas promé den nos siglo, e Dictionnaire de théologie catholique a splica Pablo su argumentonan (Romano, capítulo 9-11) asina aki: “Mas i mas e opinion predominante entre escolásticonan católico ta cu e concepto real di un predestinacion pa bida eterno no a ser definí.” E mésun obra di referencia despues ta cita M. Lagrange cu a bisa: “E cuestion primordialmente desaroyá dor di Pablo absolutamente no ta unu di predestinacion i preordenacion pa perdicion sino simplemente esun dje invitacion n’e gentilnan p’e gracia di cristianismo, e banda net contrario siendo e incredulidad dje hudiunan. . . . E ta toca gruponan, gentilnan, hudiunan, i no directamente individuonan specífico.”—Letternan cursivo ta di nos.

Mas recientemente, The Jerusalem Bible a ofrecé e mésun conclusion tocante e capítulonan aki (9-11), bisando: “P’esei, e tópico dje capítulonan aki no ta e cuestion di predestinacion individual pa gloria, of asta pa fe, sino ta toca e parti di Israel den e desaroyo dje historia di salbacion di humanidad, e único cuestion cu e declaracionnan den e T[estament] B[ieu] ta presentá.”

E último versículonan di Romano capítulo 8 ta pertenecé n’e mésun contexto. Pues, e versículonan aki por hustamente recordá nos cu Dios a premirá e existencia di un clase, of grupo, for di entre humanidad cu lo a ser yamá pa reina cu Cristo, i tambe e rekisitonan cu nan lo tabatin cu satisfacé—i esaki a ser hací sin designá adelantá e individuonan specífico cu lo a ser scogé, pasobra esei lo tabata contrario cu su amor i husticia.