Laga Yehova Su Disiplina Forma Bo

1, 2. (a) Kiko nos mester hasi pa nos por tin un bon relashon ku Yehova? (b) Kon nos lo benefisiá di un análisis di relatonan bíbliko ku ta mustra kon hende a reakshoná na disiplina di Dios?

“PA LOKE ta ami, ta bon pa mi keda serka di Dios; mi a hasi Señor Dios mi refugio.” (Sal. 73:28) Kon bini e salmista a yega na e konklushon akí? Mas promé, e salmista tabata amargá pasobra e tabata mira ku e malbadonan tabata prosperá. I el a lamentá: “Ta en bano mi a tene mi kurason puru, i a laba mi mannan den inosensia.” (Sal. 73:2, 3, 13, 21) Pero ora el a drenta “e santuario di Dios,” esaki a yud’é kambia su manera di pensa i mantené un bon relashon ku Yehova. (Sal. 73:16-18) E eksperensia akí a siñ’é un lès masha importante: Pa un hende por tin un bon relashon ku Yehova, e mester ta entre Dios su pueblo i e mester aseptá i sigui Dios su konsehonan.—Sal. 73:24.

² Nos tambe ke tin un bon relashon ku Yehova, e Dios bibu i berdadero. P’esei, ta masha importante pa nos sigui su konsehonan i laga su disiplina forma nos pa nos por ta personanan ku ta agrad’é. Den pasado, Dios a mustra miserikòrdia na hende individual i, algun biaha, na nashonnan kompleto, dunando nan oportunidat pa aseptá su disiplina. E manera ku nan a reakshoná ta registrá den Beibel i ta sirbi komo “instrukshon” i “spièrtamentu pa nos ku ta biba na final di e tempu akí.” (Rom. 15:4; 1 Kor. 10:11) Analisando e relatonan akí, nos lo haña sa kon Yehova ta pensa i sinti i kon nos por benefisiá di su disiplina.

 3. Kon Isaías 64:8 i Yeremías 18:1-6 ta ilustrá e outoridat ku Yehova tin riba hende? (Wak e plachi na kuminsamentu di e artíkulo akí.)

³ Isaías 64:8 ta usa un komparashon pa ilustrá e outoridat ku Yehova tin riba hende individual i riba nashonnan. E ta bisa: “O SEÑOR, abo ta nos Tata, nos ta e klei i abo ta nos Alfarero; i nos tur ta e obra di bo man.” Un alfarero por forma un pida klei manera e ke i traha loke e ta deseá kuné. E klei no tin ningun kontrol riba loke ta pasa kuné. Asina ta ku hende i Dios. Meskos ku un pida klei no por bisa e alfarero kon e tin ku form’é, asina hende tampoko no tin derecho di bisa Dios kon e tin ku forma nan.—Lesa Yeremías 18:1-6.

 4. Dios ta obligá hende òf nashonnan pa obedes’é? Splika.

⁴ Den pasado, Yehova a demostrá ku e tambe por hasi loke un alfarero ta hasi ku klei; el a hasi esei ku e nashon di Israel. Pero tin un diferensia masha grandi entre Yehova i un alfarero humano. Un alfarero ta usa su abilidat pa traha loke é ke ku un pida klei. Pero kiko di Yehova? E ta usa su outoridat pa forma e hendenan òf e nashonnan ku e ke i na e manera ku é ke, sea pa nan ta bon hende òf mal hende? Beibel su kontesta ta nò. Yehova a duna humanidat un regalo masha presioso: boluntat liber. I e no ta ehersé su outoridat na un manera ku ta desbaratá e regalo ei. Ta kada hende tin ku disidí si nan ta laga nan Kreador, Yehova, forma nan òf nò.—Lesa Yeremías 18:7-10.

 5. Kon Yehova ta ehersé su outoridat riba hende ku ta nenga di lag’é forma nan?

⁵ Kiko ta pasa si un hende ta nenga opstinadamente di laga e Gran Alfarero form’é? Kon Yehova ta ehersé su outoridat divino e ora ei? Wèl, pensa kiko ta sosodé ku un pida klei ku no ta sirbi mas pa e propósito ku e alfarero tabatin p’e. Sí, e alfarero por disidí di traha un otro kos kuné òf simplemente tir’é afó. Pero generalmente, ora un pida klei no ta sirbi mas, ta e alfarero su falta. Pero esei nunka lo ta e kaso ku nos Alfarero. (Deu. 32:4) Ora un persona no ke laga Yehova form’é, semper e falta ta sinta serka e persona mes. Yehova ta ehersé su outoridat riba hende i ta forma nan segun e manera ku nan ta reakshoná na su disiplina. Si nan reakshoná bon, Yehova por usa nan bon den su sirbishi. Por ehèmpel, kristiannan ungí ta “pòchinan di miserikòrdia;” Yehova ta forma nan i nan ta bira “pòchi pa uso onorabel.” Di otro banda, hende ku ta nenga di obedesé Dios ta bira ‘pòchi di rabia prepará pa destrukshon.’—Rom. 9:19-23.

6, 7. Kon Rei David i Rei Saul a reakshoná ora Yehova a disipliná nan?

⁶ Un manera ku Yehova ta forma hende ta mediante konseho òf disiplina. Pa nos por komprondé kon e ta usa su outoridat, laga nos tuma komo ehèmpel e promé dos reinan di Israel—Saul i David—i wak kon Yehova a forma nan. Ora Rei David a kometé adulterio ku Bètsabé, su mal echo a afektá tantu é komo otronan. Maske David tabata rei, Yehova a disiplin’é severamente. Dios a manda profeta Natan serka dje, kende a dun’é un mensahe fuerte. (2 Sam. 12:1-12) Kon David a reakshoná? El a sinti masha duele di loke el a hasi i a arepentí. I Dios a tene miserikòrdia di dje.—Lesa 2 Samuel 12:13.

⁷ Rei Saul sí a reakshoná kompletamente diferente ora Yehova a disiplin’é; e no a aseptá e disiplina. Ta asina ku Yehova, pa medio di profeta Samuel, a duna Saul instrukshon spesífiko: E mester a destruí tur amalekita i nan bestianan. Pero Saul a desobedesé e instrukshon di Dios. El a laga Rei Agag i e mihó bestianan keda na bida. Dikon? Un di e motibunan ta ku e tabata ke gloria pa su mes. (1 Sam. 15:1-3, 7-9, 12) Ora Samuel a trata di rasoná kuné, e no a skucha. E no a laga e Gran Alfarero form’é; mas bien, el a hustifiká su kondukta, rasonando ku loke el a hasi tabata bon pasobra nan por a usa e bestianan pa hasi sakrifisio. Komo ku Saul a nenga di hasi kambio, Yehova a rechas’é komo rei, i nunka mas el a drecha su relashon ku e Dios berdadero.—Lesa 1 Samuel 15:13-15, 20-23.

 8. Ki lès nos por siña for di e manera ku e nashon di Israel a reakshoná ora Yehova kier a forma nan?

⁸ No ta hende individual so Yehova ta duna oportunidat di aseptá su disiplina, pero nashonnan kompleto tambe. Na aña 1513 promé ku nos era, despues ku Yehova a libra e israelitanan for di sklabitut na Egipto, el a sera un pakto ku nan. E nashon di Israel a bira Yehova su pueblo spesial, i nan tabatin e privilegio di laga e Gran Alfarero forma nan. Pero e pueblo a sigui hasi loke tabata malu den bista di Yehova i a asta kuminsá adorá e diosnan di e nashonnan bisiña. Bes tras bes, Yehova a manda su profetanan pa yuda nan kambia nan kondukta, pero nan no a skucha. (Yer. 35:12-15) Komo ku nan tabata asina kabesura, Yehova a disipliná nan severamente. Manera un pòchi di klei prepará pa destrukshon, e reino di dies tribu di Israel a kai den man di e asirionan i e reino di dos tribu di Huda, den man di e babilonionan. Esaki mester siña nos un lès masha importante: Yehova su disiplina ta benefisiá nos solamente si nos asept’é i laga Yehova forma nos.

9, 10. Kon e ninivitanan a reakshoná ora nan a haña spièrtamentu divino?

⁹ Yehova a duna e habitantenan di Nínive, e kapital di Asiria, tambe oportunidat di reakshoná na su spièrtamentu. Yehova a bisa Yonas: “Lanta, bai Nínive, e stat grandi, i prediká kontra dje, pasobra nan maldat a yega te mi dilanti.” Yehova tabata pa destruí Nínive pasobra e hendenan tabata hasi hopi maldat.—Yon. 1:1, 2; 3:1-4.

¹⁰ Pero ora Yonas a bisa e pueblo kiko Yehova lo a bai hasi, “e hendenan di Nínive a kere den Dios, i nan a proklamá un yunamentu i a bisti paña-di-saku, for di esun di mas haltu te na esun di mas humilde.” Nan rei “a lanta for di su trono, a kita su mantel, a bisti paña-di-saku, i a bai sinta den shinishi.” Pues, e ninivitanan a hasi kaso di Yehova su spièrtamentu, a permití Yehova forma nan i a arepentí. P’esei, Yehova no a destruí e stat mas.—Yon. 3:5-10.

11. Ki karakterístika di Yehova su personalidat ta ser resaltá den su trato ku Israel i Nínive?

¹¹ Manera nos a mira, maske e israelitanan tabata Yehova su nashon skohí, e tabatin ku disipliná nan. Di otro banda, e ninivitanan no tabatin un relashon spesial ku Dios. Tòg, Yehova a deklará un mensahe di huisio kontra nan i a tene miserikòrdia di nan ora nan a demostrá ku nan por a ser formá meskos ku klei. E dos kasonan akí ta mustra bon kla ku nos Dios Yehova “no ta hasi distinshon di persona.”—Deu. 10:17.

12, 13. (a) Dikon Dios ta kambia su desishon ora un persona aseptá su disiplina? (b) Kiko e echo ku Yehova a sinti ‘duele’ òf a “arepentí” den kaso di Saul i di Nínive ta nifiká?

¹² E manera ku Dios ta forma nos ta mustra ku e ta rasonabel i fleksibel. Esaki ta bisto den kasonan ku Yehova a yega di kambia di idea òf keda sin tuma sierto akshon ku el a proklamá debí na e manera ku e hendenan a reakshoná. Por ehèmpel, den kaso di Saul, e promé rei di Israel, Beibel ta bisa ku a “duel” Yehova ku el a hasi Saul rei. (1 Sam. 15:11) Ademas, Beibel ta bisa ku ora e habitantenan di Nínive a arepentí i a bira bèk for di nan mal kaminda, “Dios a arepentí di e kalamidat ku el a deklará ku e lo trese riba nan. I e no a hasié.”—Yon. 3:10.

¹³ E echo ku Beibel ta bisa ku algu a “duel” Yehova òf ku Yehova “a arepentí” ta indiká un kambio di opinion òf di intenshon. Tuma por ehèmpel e kaso di Saul. Promé, e tabatin Yehova su aprobashon, ma despues Yehova a rechas’é komo rei. Yehova no a kambia di opinion pasobra el a tuma un mal desishon ora el a skohe Saul komo rei, pero debí ku Saul a demostrá falta di fe i a bira desobediente. Den kaso di e ninivitanan, Yehova Dios a kambia su intenshon, òf desishon, i no a destruí nan. Ta un gran konsuelo pa sa ku Yehova, nos Alfarero, ta rasonabel, fleksibel, bondadoso i miserikòrdioso i ku e ta kla pa kambia su desishon ora hende bira di nan mal kaminda.

14. (a) Kiko Yehova ta usa pa forma nos awe? (b) Kon nos mester reakshoná ora Yehova ta forma nos?

¹⁴ Awe Yehova ta forma nos prinsipalmente pa medio di su Palabra, Beibel, i su organisashon. (2 Tim. 3:16, 17) P’esei, nos mester aseptá kualke konseho òf disiplina ku nos ta risibí via e medionan akí. Sin importá kuantu aña nos tin batisá òf kuantu privilegio nos tin den Yehova su sirbishi, semper nos mester sigui obedesé Yehova su konsehonan. Ora nos ta hasi esei, nos ta permití Yehova forma nos di manera ku nos ta bira pòchinan pa uso onorabel.

15, 16. (a) Kon un persona lo por sinti ora e pèrdè su privilegionan den kongregashon? Duna un ehèmpel. (b) Kiko por yuda nos trata ku sintimentunan negativo ora nos ser disipliná?

¹⁵ Tin biaha, nos ta haña disiplina den forma di instrukshon òf korekshon pa nos kambia nos manera di pensa. Pero tin biaha, nos ta haña disiplina pasobra nos a hasi algu ku no tabata bon. Esei por enserá ku nos por asta pèrdè sierto privilegio. Tuma por ehèmpel e kaso di Dennis,a kende tabata sirbi komo ansiano. El a ser reprendé pa motibu di mal desishon ku el a tuma den asuntunan di negoshi. Kon Dennis a sintié e anochi ku nan a anunsiá den kongregashon ku lo e no sirbi mas komo ansiano? El a bisa: ‘Mi a sinti ku mi a frakasá. E último 30 añanan, mi tabatin hopi privilegio. Mi a traha pionero regular, sirbi na Bètel, mi a ser nombrá komo sirbidó ministerial i despues komo ansiano. Ademas, mi a kaba di duna mi promé parti na kongreso di distrito. I diripiente, mi a pèrdè tur kos. Mi tabatin masha bèrgwensa, i mi a pensa ku kisas nunka mas lo mi por ta útil den e organisashon di Yehova.’

¹⁶ Dennis mester a bira bèk di su mal kaminda i stòp ku e mal echo ku a pon’é haña korekshon. Pero kiko a yud’é trata ku sintimentunan negativo? El a splika: “Mi tabata determiná pa sigui ku un bon rutina spiritual. Loke a yuda mi mashá tambe tabata e sosten ku mi tabata haña di mi rumannan den fe i e animashon for di nos publikashonnan. E artíkulo ‘Bo tin gana di haña bo privilegionan di sirbishi atrobe?’ den La Atalaya di 15 di ougùstùs 2009 tabata manera un karta dirigí na mi ku a kontestá mi orashonnan. E konseho ku mas mi a balorá tabata: ‘Awor ku bo no tin muchu responsabilidat den kongregashon, probechá di e tempu ei pa hasi bo mes fuerte spiritualmente.’” Kon Dennis a benefisiá di e disiplina ku el a risibí? Despues di algun aña, el a bisa: “Yehova a bendishoná mi atrobe ku e privilegio di por sirbi komo sirbidó ministerial.”

17. Kon ekspulshon por yuda un pekadó? Duna un ehèmpel.

¹⁷ Ekspulshon ta un otro medida ku Yehova a perkurá pa disipliná un persona. Ekspulshon ta protehá e kongregashon kristian kontra mal influensia i por yuda e pekadó arepentí di su piká. (1 Kor. 5:6, 7, 11) Tuma por ehèmpel Robert, kende tabata ekspulsá pa kasi 16 aña. Durante e tempu ei, su mayornan i su ruman hòmbernan a kumpli fielmente ku e mandato bíbliko pa no anda ku hende ku ta hasi malu, ni kumindá nan. Awor tin vários aña ku Robert a ser restorá i e ta progresá bon den e bèrdat. Ora a puntr’é kiko a motiv’é despues di asina tantu tempu pa bolbe serka Yehova i Su pueblo, el a bisa ku en parte tabata e manera ku su famia a trat’é. “Si mi famia a anda ku mi djis un tiki so, òf a djis puntra mi kon ta bai, lo mi no a sinti nan falta asina tantu. I probablemente e deseo pa anda ku nan lo no tabata un motivashon pa mi bolbe serka Dios.”

18. Ki tipo di klei nos mester ta den man di e Gran Alfarero?

¹⁸ Podisé nos no tin mester di un disiplina asina severo, pero ki tipo di klei nos lo ta den man di e Gran Alfarero? Kon nos lo reakshoná ora nos haña disiplina? Nos lo reakshoná manera David òf manera Saul? E Gran Alfarero ta nos Tata. Laga nos semper keda kòrda ‘ku e ta reprendé esun ku e ta stima, manera un tata ta reprendé e yu ku e tin delisia den dje.’ P’esei, ‘no rechasá disiplina di Yehova, ni aboresé su reprendementu.’—Pro. 3:11, 12.