Dios—Gèmbeldor of Creador?

“NO TIN duda cu hopi científico ta temperamentalmente contra cualkier forma di argumento metafísico, pa no papia mes di argumentonan místico. Nan ta haci mofa dje idea cu lo por existí un Dios, of asta un principio creativo impersonal . . . Personalmente mi no ta compartí nan menosprecio.” Asina Paul Davies, profesor di física matemático n’e Universidad di Adelaide, Sur Australia, a bisa den su buki The Mind of God (E Mente di Dios).

Davies ta bisa tambe: “Un estudio cuidadoso ta indicá cu e leynan dje universo ta pas notablemente bon pa e aparicion di rikesa i variedad. Den caso di organismonan bibiente, nan existencia ta parce di dependé di un cantidad di coincidencia afortuná cu algun científico i filósofo a aclamá como nada ménos cu asombroso.”

E ta sigui bisa: “E búskeda científico ta un biahe na lo desconocí. . . . Pero atrabes di tur esaki ta core un liña conocí di racionalidad i ordu. Nos lo mira cu e ordu cósmico aki ta ser apoyá dor di leynan matemático precis cu ta hincá den otro pa forma un unidad sutil i armonioso. E leynan ta poseé un simplicidad elegante.”

Davies ta concluí bisando: “Pa ki motibu ta Homo sapiens mester tin e chispa di inteligencia pa comprendé e universo, ta un enigma profundo. . . . Mi no por kere cu nos existencia den e universo aki ta solamente un capricho di destino, un accidente di historia, un iregularidad casual den e gran drama cósmico. Nos ta muchu estrechamente enlasá. . . . Berdaderamente tabata e intencion pa nos ta aki.” Sin embargo, Davies no ta yega n’e conclusion cu tin un Diseñador, un Dios. Pero na ki conclusion abo ta yega? Tabata e intencion pa humanidad ta aki? Si ta asina, ken su intencion e tabata pa nos ta aki?

Clavenan pa e “Enigma”

Den Bijbel apostel Pablo ta duna un clave pa comprendé loke Davies ta yama “un enigma profundo.” Pablo ta mustra con Dios a revelá su mes: “Pasobra loke por ta conocí tocante Dios ta ser manifestá entre nan [“hende cu ta sconde e berdad”], pasobra Dios a haci esei manifestá na nan. Pasobra su cualidadnan invisibel ta ser mirá claramente desde creacion di mundu padilanti, pasobra nan ta ser percibí den e cosnan trahá, asta su poder eterno i Divinidad, di manera cu nan ta inexcusabel.” (Romanonan 1:18-20)a Sí, e variedad infinito di formanan di bida, nan complehidad increibel, nan diseño exkisito, mester pone un persona humilde i reverente reconocé cu tin un poder, inteligencia of mente supremo, inmensamente superior na cualkier cos cu hende hamas a yega di conocé.—Salmo 8:3, 4.

Pablo su siguiente palabranan tocante esnan cu ta nenga Dios ta poné bo para pensa un ratu: “Aunke nan a pretendé di ta sabí, nan a bira bobo . . . , asta esnan cu a cambia e berdad di Dios p’e mentira i a venerá i rindi sirbishi sagrado n’e creacion en bes di na Esun cu a crea, kende ta bendicioná pa semper. Amen.” (Romanonan 1:22, 25) Esnan cu ta venerá “naturalesa” i ta nenga Dios sigur no ta sabí for dje punto di bista di Jehova. Pegá den e moeras di teorianan evolucionista contradictorio, nan no ta reconocé e Creador ni e complehidad i diseño di su creacion.

“Un Seri Gigantesco di Accidente”

Pablo a skirbi tambe: “Sin fe ta imposibel pa agradá Dios bon, pasobra esun cu acudí na Dios mester kere cu e ta existí i cu e ta bira recompensador di esnan cu ta busk’é cu empeño.” (Hebreonan 11:6) Fe basá riba conocimentu exacto, no credulidad, por hiba nos na un comprendimentu di pakico nos ta existí. (Colosensenan 1:9, 10) Sí, nos por yam’é credulidad ora algun científico kier haci nos kere cu bida ta existí pa motibu cu ta “como si fuera nos a gana un loteria miyonario un miyon di biaha tras di otro.”

Científico británico Fred Hoyle a teorisá cu reaccionnan nuclear cu a hiba n’e formacion di dos elemento esencial pa bida, esta carbon i oxígeno, a producí un cantidad balansá relativo dje elementonan aki solamente pa un accidente afortuná.

E ta duna un ehempel mas: “Si e masa di proton i electron huntu di ripiente bira un tiki mas en bes di un tiki ménos cu e masa di neutron, e efecto lo ta devastador. . . . Den henter Universo tur e atomnan di hidrógeno lo cai for di otro inmediatamente pa forma neutron i neutrino. Sin su combustibel nuclear, e Solo lo paga poco-poco i cai den otro.” Mescos lo ta cierto dje miles di miyones di otro streanan den universo.

Hoyle a concluí: “E lista di . . . aparente accidentenan di un naturalesa no-biológico sin cua bida basá riba carbon, i pues bida humano, lo no por existí, ta largu i impresionante.” E ta bisa: “E cualidadnan aki [esencial pa bida] ta parce di ta estrechamente hincá den e areglo dje mundu natural manera un liña di accidentenan afortuná. Pero tin asina tantu dje coincidencianan improbabel aki esencial pa bida cu ta parce cu mester tin un splicacion pa nan.”—Cursivo ta di nos.

Tambe el a bisa: “E problema ta pa dicidí si e ahustenan aparentemente accidental aki berdaderamente ta accidental of no, i p’esei si bida ta accidental of no. Ningun científico ta gusta haci un pregunta asina, pero mester hacié tog. Ta posibel cu ahustenan ta inteligentemente intencioná?”

Paul Davies ta skirbi: “Hoyle tabata asina impresioná cu e ‘seri gigantesco di accidente’ aki, cu el a sintié impulsá pa comentá cu tabata como si fuera ‘e leynan di física nuclear a ser deliberadamente diseñá pa loke ta e consecuencianan cu nan ta producí dentro dje streanan.’” Ken of kico ta responsabel pa e “seri gigantesco di accidente” afortuná aki? Ken of kico a producí e pida planeta aki, yen-yen di un variedad casi infinito di miyones di mata i criatura exkisitamente formá?

E Contesta di Bijbel

E salmista a skirbi reverentemente un tres mil aña pasá: “Cuantu ta bo obranan, O Jehova! Bo a traha nan tur den sabiduria. E tera ta yen di bo produccion. Pa loke ta e laman aki, asina grandi i hanchu, ei tin cosnan incontabel cu ta move, criaturanan bibiente, chikitu como tambe grandi.”—Salmo 104:24, 25.

Apostel Juan a bisa: “Bo ta digno, Jehova, asta nos Dios, pa ricibí e gloria i e onor i e poder, pasobra abo a crea tur cos, i pa causa di bo boluntad nan a existí i a ser creá.” (Revelacion 4:11) Bida no ta e resultado di coincidencia ciegu, di un of otro loteria cósmico cu a resultá di a cai net bon pa miyones di formanan di bida.

E berdad simpel ta cu Dios “a crea tur cos, i pa causa di [su] boluntad nan a existí i a ser creá.” Jesucristo mes a bisa e fariseonan: “Boso no a lesa cu esun cu a crea nan desde e principio a traha nan machu i hembra?” Jesus tabata conocé e Creador! Como Jehova su Obrero Maestro, e tabata na Su lado durante e creacion.—Mateo 19:4; Proverbionan 8:22-31.

Sin embargo, ta rekerí fe i humildad pa percibí i aceptá e berdad básico aki tocante e Creador. E fe aki no ta credulidad ciegu. E ta basá riba evidencia palpabel i visibel. Sí, “[Dios] su cualidadnan invisibel ta ser mirá claramente desde creacion di mundu padilanti.”—Romanonan 1:20.

Cu e conocimentu científico limitá cu nos tin actualmente, nos no por splica con Dios a crea. P’esei, nos mester reconocé cu awor aki nos no por sa ni comprendé tur cos tocante e orígen di bida. Nos ta ser recordá riba esaki ora nos lesa Jehova su palabranan: “E pensamentunan di boso no ta mi pensamentunan, ni mi camindanan ta boso camindanan . . . Pasobra mescos cu shelu ta mas haltu cu e tera, asina mi camindanan ta mas haltu cu boso camindanan, i mi pensamentunan mas haltu cu boso pensamentunan.”—Isaías 55:8, 9.

Ta abo mester scoge: sea kere sin mas den evolucion ciegu i basá riba casualidad, e purbamentunan incontabel cu supuestamente a cai bon, of fe den Jehova, e Dios di Propósito, e Creador i Diseñador. Cu bon motibu e profeta inspirá a bisa: “Jehova, e Creador dje extremidadnan dje tera, ta un Dios pa tempu indefiní. E no ta cansa ni fatigá. Su comprendimentu no por ser scudriñá.”—Isaías 40:28.

Pues, kico lo bo kere? Bo decision lo haci hopi diferencia den bo futuro prospectonan di bida. Si evolucion ta berdad, anto morto lo nificá cu nos lo bai den olvido total, apesar dje argumentonan engañoso dje teologia católico enbolbí cu ta purba introducí e “alma” den evolucion. Hende no tin un alma inmortal pa suavisá e sla duru pero inevitabel di morto.—Génesis 2:7; Ezekiel 18:4, 20.

Si nos aceptá cu Bijbel ta berdad i cu e Dios bibu ta e Creador, anto tin e promesa di un resureccion pa haña bida eterno, un bida perfecto, riba un tera restorá na su estado original di balansa i armonia. (Juan 5:28, 29) Na unda lo bo pone bo fe? Den e purbamentu increibel di Darwin su teoria di evolucion? Of den e Creador, cu a actua cu propósito i ta sigui haci esei?b

[Notanan]

[Komentario na página 14]

Eigenlijk, algun evolucionista ta bisa cu nos existencia riba tera ta “como si fuera nos a gana un loteria miyonario un miyon di biaha tras di otro.”

[Kuadro/Plachi na página 15]

Variedad i Diseño Infinito

Insectonan “Científiconan ta descubrí entre 7.000 pa 10.000 especie nobo di insecto tur aña,” segun The World Book Encyclopedia. Sin embargo, “por tin entre 1 miyon pa 10 miyon especie ainda pa descubrí.” E corant frances Le Monde, citá den Guardian Weekly, den un artículo skirbí dor di Catherine Vincent, ta papia dje especienan cu a ser documentá como un “cantidad patéticamente chikitu compará cu e berdadero cantidad . . . calculá di ta entre 5 miyon i, increiblemente, 50 miyon.”

Pensa riba e mundu di insectonan asombroso—abeha, vruminga, marimomba, barbulètè, kakalaka, bacator, bichi di candela, comehein, mòt, muskita, yeye, sangura, papiermot, dalakochi, pieu, kriki, pruga—djis pa cuminsá! E lista ta parce infinito.

Paranan Kico nos por bisa tocante un para cu ta pisa rond di 20 gram? “Imaginá bo con e ta migra bai mas cu 16.000 kilometer tur aña for dje palunan situá mas haltu den cerunan di Alaska, te na e selva di yobida di Sur América bin bek, pasando rápidamente riba topnan di ceru yen di palu, rond di rascashelunan urbano i crusando pidanan inmenso di laman ganchu den e Océano Atlántico i Golfo di México.” Cua para increibel esaki ta? “E zwartkopzanger, un dinamo kende su abilidad extraordinario di biaha ta prácticamente sin rival entre e paranan di tera di Norteamérica.” (Book of North American Birds) Atrobe nos ta puntra: Esaki ta e resultado di miriadanan di coincidencia caprichoso di naturalesa cu a djis resultá bon? Of e ta un maraviya di diseño inteligente?

Agregá n’e ehempelnan aki e paranan cu tin un repertorio aparentemente infinito di cantica: e ruiseñor (nachtegaal), conocí den henter Europa i partinan di Africa i Asia pa su cantonan encantador; e chuchubi di Norteamérica [Mimus polyglottos], un para cu ta “un imitadó ábil i ta incorporá frasenan memorisá como parti di su cantica”; e magnífico para lira di Australia, cu su “cantica altamente desaroyá, cu elementonan di imitacion asombrosamente sabí.”—Birds of the World.

Ademas, e perfeccion di e colornan i e diseño di ala i pluma di asina tantu para ta lagá bo keda babucá. Agregá na esei nan abilidadnan di hila i traha neshi, sea riba tera, den partinan haltu den baranca, of den palu. Un inteligencia inherente asina mester impresioná un persona humilde. Con nan a bin na existencia? Pa casualidad of dor di diseño?

E Celebro Humano “Por tin entre 10 biyon pa 100 biyon sinápsis den e celebro, i cada un ta funcioná manera un calculator chikititu cu ta registrá señalnan cu ta yega como impulsonan eléctrico.” (The Brain) Nos lo por tin e tendencia di tuma e celebro como algu di mes, pero e ta un universo complicá, hincá i protehá den e cráneo. Con nos a bin haña e órgano aki cu ta permití hende pensa, razoná i papia miles di idioma? Atrabes di miyones di purbamentunan afortuná? Of dor di diseño inteligente?

[Diagram na página 16, 17]

Diagram Simplifica dje Celebro Exterior

Cortex sensorial

Ta analisá impulsonan sensorial for di henter e curpa

Achterhoofds- kwab

Ta procesá señalnan visual

Cerebellum

Ta controlá balansa i coordinacion

Cortex premotor

Ta controlá coordinacion muscular

Cortex motor

Ta yuda controlá movementu conciente

Voorhoofds-kwab

Ta yuda controlá razonamentu, emocionnan, abla, movementu

Zijhoofdskwab

Ta procesá zonido; ta controlá aspectonan di siña, memoria, idioma, emocionnan

[Diagram na página 16]

Terminal di axon

Neurotransmitter

Dendrit

Sinápsis

[Diagram na página 16, 17]

Neuron

Dendrit

Axon

Dendrit

Sinápsis

Neuron

Axon

“Por tin entre 10 biyon pa 100 biyon sinápsis den e celebro, i cada un ta funcioná manera un calculator chikititu cu ta registrá señalnan cu ta yega como impulsonan eléctrico.”—THE BRAIN see EVOLT-3 pg. 8 l-8

[Plachi Rekonosementu na página 13]

Luna i planetanan: NASA photo