Forza Padilanti Apesar Dje Curpa Trahá Di Stof!

“E mes ta wel conoce e formacion di nos, cordando cu nos ta stof.” ​—⁠SALMO 103:⁠14.

DI MANERA física, nos ta stof. “Jehova Dios a procede di forma homber di stof di tera i di supla den su nanishi e rosea di bida, i e homber a yega di ser un alma bibiente.” (Génesis 2:⁠7) Tal detaye senciyo dje creacion di hende, ta na armonía cu berdad científico. Tur dje mas cu 90 elemento cu ta compone e curpa humano ta ser hayá den e “stof di tera.” Un biaha un químico a declara cu e curpa humano adulto ta 65 porciento oxígeno, 18 porciento carbón, 10 porciento hidrógeno, 3 porciento stikstof, 1.5 porciento calki, i un porciento fósforo, i cu lo demás ta consisti di otro elemento. Sea cu tal calculacion ta henteramente exacto no ta importante. E echo ta permanece: “Nos ta stof”!

² Ken, además di Jehova Dios, por produci un creacion tanto complicá for di stof so? Obra di Dios ta perfecto i sin defecto, pues su decision di crea hende dje manera ei siguramente no ta un motibo pa keha. Realmente, e echo cu e Gran Creador por a crea hende di stof di tera di manera maraviyoso i inspirador di temor ta aumenta nos aprecio pa su poder sin límite, su aptitud, i su sabiduría práctica.​—⁠Deuteronomio 32:​4, nota; Salmo 139:⁠14.

Un cambio di circunstancia

³ Criatura trahá di stof tin limitacion. Sin embargo, e propósito di Dios no tabata pa esei ser un carga pisá ni ser demasiado restrictivo. No tabata su propósito pa tal limitacion ser un causa pa desanimacion ni pa resulta den infelicidad. Sin embargo, manera e contexto dje palabra di David den Salmo 103:14 ta indica, e sumision di hende na cierto limitacion por causa desanimacion i resulta den infelicidad. Pakico? Ora Adam i Eva a desobedece Dios, nan a efectuá un cambio den e situacion di nan famía di futuro. E echo cu nan tabata trahá di stof a dúnanan un otro aspecto.a

⁴ David no tabata papia tocante limitacion natural cu asta hende perfecto trahá di stof por tin, sino tocante debilidad humano cu imperfeccion heredá ta causa. Di otro manera David lo no a bisa di Jehova: “Esun cu ta pordona tur error di bo, cu ta cura tur enfermedad di bo, cu ta reclama e bida di bo for di graf mes, [cu] no a haci cu nos ni conforme cu nos picánan; ni no a manda riba nos loke nos ta merece conforme cu nos error.” (Salmo 103:​2-4, 10) Aunque nan tabata trahá di stof, si hende perfecto a keda fiel, nan nunca lo a haci error, lo no a peca, pa nan tin mester di pordón; ni nan nunca lo a haya enfermedad necesitando curacion. Sobre todo, nan nunca mester baha den graf di morto for di locual nan por ta reclamá solamente via un resureccion.

⁵ Siendo cu nos ta imperfecto, nos tur a experimenta loke David a menciona. Nos ta consiente constantemente di nos limitacion debí na nos imperfeccion. Nos ta bira tristu ora aveces nos limitacion ta parce di empeora nos relacion cu Jehova Dios of cu nos rumanan cristian. Ta duelnos cu nos imperfeccion i e presion dje mundo di Satanás de bez en cuando ta híbanos na desanimacion. Siendo cu e gobernacion di Satanás ta yegando na su conclusion rápidamente, su mundo ta pone cada bez mas presion riba e pueblo en general i specialmente riba hende cristian.​—⁠Revelacion 12:⁠12.

⁶ Bo ta kere cu ta bira mas dificultoso pa hiba un bida cristian? Nos ta tende algun hende cristian bisa cu mientras mas tempo nan ta den e berdad, mas imperfecto nan ta parce di bira. Sin embargo, muy probablemente e echo tá cu nan simplemente a bira cada bez mas consiente di nan mes imperfeccion i nan incapacidad di conforma cu norma perfecto di Jehova Dios na moda cu nan kier. Pero, realmente, esei ta un probable consecuencia di aumento continuo di conocimento i aprecio pa requisito husto di Jehova Dios. Ta vital pa nos nunca laga tal conocimento desanimános te ne punto cu nos ta haci loke e Diabel kier. Durante e siglonan el a purba continuamente pa probecha di desanimacion pe haci sirbidor di Jehova Dios bandona e adoracion berdadero. No obstante, berdadero amor pa Dios, i també “odio completo” pa Diabel, a preveni e mayor parti di nan haci esei.​—⁠Salmo 139:​21, 22; Proverbio 27:⁠11.

⁷ Sin embargo, sirbidor di Jehova Dios na un tempo of otro por síntinan desanimá. Disgusto cu nos mes logramento també por ta un motibo. Esei por enbolbe factor fisical of relacion dificultoso cu miembro di famía, amigo, of compañé di trabao. Fiel Job a bira asina desanimá cu el a pidi Dios: “Ai, scondémi den Sheol, pa bo wardámi secreto te cu bo rabia ta retira, pa bo pone un límite di tempo pa mi i cordámi!” Awor, si circunstancia dificultoso por a forza Job, “un homber sin culpa i recto, temeroso di Dios i apartando for di maldad,” pasa tempo di desanimacion, no ta straño cu mescos por sosode nos.​—⁠Job 1:​8, 13-19; 2:​7-9, 11-13; 14:⁠13.

⁸ Ta ki consolador pa sa cu Jehova Dios ta mira curazón i no ta pasa por halto di bon intencion! E nunca lo rechaza hende cu ta forza den tur sinceridad pa agradé. Realmente, desanimacion de bez en cuando por ta un siñal positivo, indicando cu nos no ta considera nos sirbishi di Jehova Dios di poco importancia. Mirá desde tal punto di bista, hende cu nunca ta lucha contra desanimacion tal bez no ta tanto consiente spiritualmente como otro hende di nan debilidad. Corda: “Laga ken cu ta kere cu e ta pará tene cuidao pe no cai.”​—⁠1 Corintio 10:12; 1 Samuel 16:7; 1 Rey 8:39; 1 Crónica 28:⁠9.

Nan també tabata trahá di stof

⁹ Hebreo capítulo 11 tin un lista di varios testigo di Jehova precristian cu a eherce fe fuerte. Hende cristian dje promé siglo i esnan djawe ta haci mescos. E balor di les siñá for di nan ta incalculable. (Compara cu Hebreo 13:⁠7.) Por ehempel, hende cristian por imita e fe di ken cu ta mihor cu e fe di Moisés? Dios a yamé pa proclama mensahe di huzgamento na Faraó di Egipto, e gobernante di mas fuerte di mundo di su tempo. Awe, Testigo di Jehova tin cu declara un huzgamento similar contra religion falso i otro organizacion cu ta na oposicion cu e Reino di Cristo establecí caba.​—⁠Revelacion 16:​1-15.

¹⁰ Cumplimento dje comision no ta un asignacion fácil, manera Moisés a mustra. “El a puntra: “Ken ta ami pa mi bai cerca Faraó i pa mi tin cu saca e yiunan di Israel for di Egipto?” Nos por comprende su sintimento di ser inadecuado. També, el a keda preocupá tocante con otro israelita lo reacciona: “Supongamos cu nan no ta kerémi i no ta scucha mi boz?” Anto Jehova a splica na dje con e por duna prueba di su autorizacion, pero Moisés tabatin un otro problema. El a bisa: “Dispensámi, Jehova, pero mi no ta un persona cu sa papia flot, ni desde ayera ni desde promé cu esei ni desde cu bo a papia cu bo sirbidor, pasobra mi ta lento di boca.”​—⁠Éxodo 3:11; 4:​1, 10.

¹¹ De bez en cuando, nos por síntinos mescos cu Moisés. Aunque nos ta reconoce nos obligacion teocrático, nos por puntra con nos por hamás cumplí cu nan. ‘Ken ta ami pa mi bai cerca hende, algun di rango social, económico, of educativo mas halto, i sopone cu mi por educánan den e camina di Dios? Con mi rumanan spiritual lo reacciona ora mi ta duna comentario den reunion cristian of duna presentacion riba podio den e Scol di Ministerio Teocrático? Nan no por mira cu mi ta inadecuado?’ Pero corda, Jehova Dios tabata cu Moisés i a equipé pa su asignacion pasobra Moisés a eherce fe. (Éxodo 3:12; 4:​2-5, 11, 12) Si nos ta imita e fe di Moisés, Jehova Dios lo ta cu nos i equipános pa nos trabao també.

¹² Ken cu ta síntinan frustrá of desanimá debí na picá of falta, siguramente por corda David ora el a bisa: “Mi mes ta conoce mi delitonan, i mi picá ta dilanti mi constantemente.” Rogando Jehova, David a bisa també: “Sconde bo cara for di mi picánan, i elimina tur mi errornan.” Pero, e nunca a laga desanimacion horté di su deseo di sirbi Jehova. “No tirámi afó di dilanti bo cara; O no kita foi mi bo spiritu santo.” David tabata claramente “stof,” pero Jehova Dios no a aparta foi dje pasobra David a eherce fe den e promesa di Jehova di no desprecia “un curazón kibrá i aplastá.”​—⁠Salmo 38:​1-9; 51:​3, 9, 11, 17.

¹³ Sin embargo, ripara cu aunque nos tin cu considera “un nubia tanto grandi di testigonan” como un animacion pa “corre cu awante e carreda cu ta poní dilanti nos,” e Bijbel no ta bísanos bira sigidor di eseinan. E ta bísanos sigi e pasonan dje “Agente Principal i Perfeccionador di nos fe, Jesús,” i no sigi hende imperfecto​—⁠ni sikiera e fiel apóstolnan dje promé siglo.​—⁠Hebreo 12:​1, 2; 1 Pedro 2:⁠21.

¹⁴ Tabatin bez cu apóstol Pablo i Pedro, pilar den e congregacion cristian, a trompica. Pablo a skirbi: “E bon cu mi ta deseá mi no ta haci, pero e malu cu mi no ta deseá ta loke mi ta practica. Hende miserabel cu mi tá!” (Romano 7:​19, 24) I Pedro den un momento di demasiado confianza a bisa Jesús: “Maske tur e otronan ta trompica en cuanto abo, lo mi no trompicá nunca!” Ora Jesús a avisa Pedro cu lo e nengué tres bez, Pedro cu soberbería a contradici su Maestro, bromando: “Maske mi tin cu muri cu bo, lo mi no nengábo di ningun manera.” Pero, el a nenga Jesús, un equibocacion cu a hacié yora amargamente. Sí, Pablo i Pedro tabata trahá di stof.​—⁠Mateo 26:​33-35.

¹⁵ Sin embargo, apesar di nan debilidad, Moisés, David, Pablo, Pedro, i otronan mescos cu nan a sali victorioso. Pakico? Pasobra nan a eherce fe fuerte den Jehova Dios, a confia den dje completamente, i a pega estrechamente na dje apesar di contratiempo. Nan a depende di dje pa percura “e poder mas ayá cu loke ta normal.” I Jehova Dios a haci esei, i nunca a láganan cai mas ayá cu recobramento. Si nos ta sigi eherce fe, nos por keda sigur cu ora huicio ta ser declará den nos caso, lo e ser na armonía cu e palabra: “Dios no ta inhusto pe lubida boso trabao i e amor cu boso a mustra pa su nomber.” Ki un estímulo esei ta dúnanos pa forza padilanti apesar dje echo cu nos ta trahá di stof!​—⁠2 Corintio 4:7; Hebreo 6:⁠10.

Kico nos curpa di stof kier men pa nos individualmente?

¹⁶ Experencia a siña hopi mayornan i maestro e sabiduría di huzga yiu of alumno segun nan capacidad individual, i no riba e base di comparacion cu otro ruman of alumno. Esei ta na armonía cu un principio bíblico cu hende cristian ta ser mandá pa sigi: “Laga cada un duna prueba di loke su mes trabao tá, anto lo e tin motibo pa hubila en cuanto su mes so, i no den comparacion cu e otro persona.”​—⁠Galatio 6:⁠4.

¹⁷ Na armonía cu tal principio, aunque Jehova Dios ta trata cu su pueblo como un grupo organizá, e ta húzganan como hende individual. Romano 14:12 ta bisa: “Cada un di nos lo rindi cuenta di su mes na Dios.” Jehova Dios wel conoce e composicion genética di cada sirbidor di dje. E ta conoce nan composicion fisical i mental, nan capacidad, nan fortaleza i debilidad heredá, e posibilidad cu nan tin, i també e grado na locual nan lo probecha di tal posibilidad pa produci fruta cristian. Comentario di Jesús tocante e biuda cu a tira dos cen den e tesorería dje tempel i su comparacion di simía sembrá den bon tera ta ehempel animador pa hende cristian cu por síntinan desconsolá debí na comparacion di nan mes imprudentemente cu otro hende.​—⁠Marco 4:20; 12:​42-44.

¹⁸ Ta vital pa nos determiná loke nos curpa di stof ta nifica den nos mes caso individual di manera cu nos por sirbi te na nos potencial cabal. (Proverbio 10:4; 12:24; 18:9; Romano 12:⁠1) Solamente door di reconoce intensamente nos faltanan i debilidad personal nos por keda alerto ne necesidad i posibilidad di mehora. Ora nos ta haci un examinacion propio, láganos nunca pasa por halto dje poder dje spiritu santo pa yúdanos mehora. Pa medio di dje, Dios a crea e universo, a inspirá skirbimento dje Bijbel, i, en medio di un mundo muribundo, a produci existencia di un sociedad di mundo nobo di paz. P’sei, e spiritu santo di Dios siguramente tin suficiente forza pa duna esnan cu ta pidié, e sabiduría i forza necesario pa mantene integridad.​—⁠Miqueas 3:8; Romano 15:13; Efesio 3:⁠16.

¹⁹ Ta ki consolador pa sa cu Jehova Dios ta corda cu nos ta stof! Sin embargo, nos nunca mester razona cu esei ta un excuus legítimo pa floha nos man of kizás asta haci malu. Di ningun manera! E echo cu Jehova Dios ta corda cu nos ta stof ta un expresion di su bondad inmerecida. Pero, nos no kier bira “hende malbado, birando e bondad inmerecida di nos Dios na un excuus pa conducta inmoral i resultando di ser falso na nos único Doño i Señor, Jesucristo.” (Hudas 4) Nos curpa di stof no ta un excuus pa hacimento di maldad. Hende cristian ta forza pa combati mal tendencia, dominando i hibando nan curpa como esclabo, afin di evita di “afligí e spiritu santo di Dios.”​—⁠Efesio 4:30; 1 Corintio 9:⁠27.

²⁰ Awor, durante e añanan conclusivo dje sistema mundial di Satanás, no ta tempo pa floha​—⁠no den loke ta toca e predicacion dje Reino ni den loke ta toca desaroyo mas plenamente di fruta dje spiritu di Dios. Den e dos sector ei nos tin “basta pa haci.” Awor ta e tempo pa forza padilanti pasobra nos sa cu nos “trabao no ta en bano.” (1 Corintio 15:58) Jehova Dios lo sostenénos, pasobra David a bisa di dje: “E nunca lo laga hende husto tambaleá.” (Salmo 55:22) Ta ki un gozo pa sa cu Jehova Dios ta permitínos participa personalmente den e trabao di mayor importancia cu hende imperfecto hamás a ser asigná pa haci​—⁠i haci esei aunque nos ta trahá di stof!

[Footnotes]

[Study Questions]

1. E Bijbel ta correcto científicamente bisando cu hende ta trahá di stof? Splica.

2. E manera cu Dios a traha hende ta produci cua reaccion den bo, i pakico?

3, 4. (a) Cua propósito Dios no tabatin ora el a crea hende di stof? (b) David tabata referi na kico den Salmo 103:​14, i con e contexto ta yúdanos saca tal conclusion?

5. Pakico no ta dificultoso pa nos comprende e palabra di David?

6. Pakico algun hende cristian por síntinan desanimá, i con Satanás por probecha di tal clase di sintimento?

7. Di ki manera nos aveces por ta manera Job?

8. Pakico desanimacion de bez en cuando por ta un siñal positivo?

9, 10. (a) Hende cristian ta haci bon imitando e fe di ken? (b) Con Moisés a reacciona na su asignacion?

11. Mescos cu Moisés, con nos por reacciona na obligacion teocrático, pero cu e ehercicio di fe, nos por tene confianza di kico?

12. Con e fe di David por animános pa enfrentá desanimacion en cuanto picá of faltanan?

13, 14. (a) Pakico nos no mag bira sigidor di hende? (b) Con ehempel di Pablo i Pedro ta mustra cu asta nan tabata trahá di stof?

15. Apesar dje echo cu nos ta trahá di stof, cua estímulo nos tin pa forza padilanti?

16, 17. Den e asunto di huzgamento, con Jehova ta aplica e principio splicá den Galatio 6:⁠4?

18. (a) Pakico nos mester determina loke un curpa di stof ta nifica pa nos individualmente? (b) Pakico un examinacion propio francu no mester hácinos desesperá?

19. Nos curpa di stof no ta un excuus pa haci kico?

20. (a) Den cua dos aspecto nos tin “basta pa haci den e trabao di Señor”? (b) Pakico nos tin motibo pa optimismo?

[Caption on page 10]

Hende cristian ta imita e fe di otro adorador, pero nan ta sigi e Perfeccionador di nan fe, Jesús

[Caption on page 12]

Bo por splica?

◻ Di ki manera tin un diferencia entre e referencia di Génesis 2:7 i Salmo 103:14 ne curpa di hende trahá di stof?

◻ Pakico Hebreo capítulo 11 ta un fuente di animacion pa hende cristian djawe?

◻ Pakico nos ta sabí si nos ta aplica e principio skirbí den Galatio 6:⁠4?

◻ Con Hebreo 6:10 i 1 Corintio 15:58 por yúdanos evita desanimacion?