Tercio Pablo Su Fiel Secretario

TERCIO a enfrentá un desafio. Apostel Pablo kier a us’é como su secretario ora el a skirbi un carta largu na compañeronan cristian na Roma. Esaki lo tabata un trabou difícil.

Pakico tabata asina difícil pa sirbi como secretario den e promé siglo E.C.? Con un trabou asina a ser hací? Ki material pa skirbi ariba tabatin disponibel e tempu ei?

Secretarionan den Antigwedad

Den e sociedad antiguo griego-romano, tabatin vários clase di secretario. Algun homber a sirbi como secretario di estado—funcionarionan público cu tabata traha den e canciyerianan. Tambe tabatin secretarionan público cu na marshe tabata ofrecé nan servicionan na ciudadanonan. Esnan ricu tabatin secretarionan privá (hopi bes esclabonan). Anto, tambe, tabatin amigunan boluntario cu gustosamente tabata skirbi carta pa otronan. Segun erudito E. Randolph Richards, e abilidadnan di e secretarionan no-oficial aki “por a varia for di un capacidad mínimo pa cu e idioma i/of e procedura di skirbi te n’e abilidad di mas haltu pa producí rápidamente un carta exacto, corecto i deleitabel.”

Ken tabata usa secretario? Na promé lugá, esnan cu no tabata sa lesa ni skirbi. Hopi contrato i carta comercial di antigwedad a ser completá cu notanan den cua e secretario tabata afirmá cu el a skirbi e documento pa motibu dje inabilidad dje persona cu a encargu’é cu e trabou. Un di dos motibu pa usa un secretario ta ser ilustrá dor di un carta antiguo for di Tebas, Egipto. Skirbí pa un cierto Asklepiades, e carta a bisa na conclusion: “Eumelus, yu di Herma, a skirbi p’e . . . pasobra e ta skirbi un poco slow.”

Sin embargo, sa con pa lesa i skirbi no ta parce di tabata e factor determinante pa usa un secretario. Segun e comentarista di Bijbel John L. McKenzie, “probablemente no tabata ni sikiera un asuntu pa e documento ta lesabel, sino mas bien un asuntu di bunitesa, of por lo ménos di ‘netheid’” cu a inducí hende pa recurí n’e servicionan di un secretario. Asta pa esnan educá, skirbimentu tabata fastidioso, specialmente caminda tabata trata di textonan largu i elaborá. Erudito J. A. Eschlimann ta bisa cu ken cu por a usa un secretario “gustosamente a evitá e trabou aki, encargand’e na esclabonan, skirbidónan profesional.” Ademas, ta fácil pa comprendé pakico hende no tabata gusta skirbi nan propio cartanan ora tuma na consideracion e material cu tabata ser usá i e condicionnan di trabou.

E material di skirbi comunmente usá den e promé siglo E.C. tabata papiro. Tabata obtené repinan fini for dje mata aki dor di corta e curason diki di su stengel den largura. Tabata pone un capa di repi. Tabata pone un otro capa crusá riba e promé capa. A pega e dos capanan duru riba otro dor di presion, produciendo asina un blachi di “papel.”

No tabata fácil pa skirbi riba e superficie aki. E tabata grof i yen di fibra. Segun erudito Angelo Penna, “e fibranan yen di porio dje papiro tabata pone cu e ink tabata plama, specialmente banda dje canalnan chikitu cu tabata keda meimei dje repinan fini.” E secretario por tabata traha sintá pia crusá riba suela i teniendo e blachi riba un tabla cu un man. Si e no tabatin experencia of si e materialnan no tabata di e mihó calidad, su pen di pluma, of pen di richi, por a hak den e papiro, e blachi lo por a kibra, of lo por tabata difícil pa lesa e letternan.

E ink tabata trahá di un mescla di chèmènè [roet] i guma. Bendí den forma di bara, e tabatin cu ser mesclá cu awa den un pochi di ink promé cu por a us’é pa skirbi. Entre e otro instrumentonan cu un secretario manera Tercio probablemente lo tabatin huntu cuné tabata un cuchú pa slijp e pen di richi i un spons un tiki muhá pa veeg su foutnan. Mester a skirbi cada símbolo cu cautela. P’esei skirbimentu tabata bai slow i cu algun dificultad.

‘Ami, Tercio, Ta Cumindá Boso’

Entre e saludonan incluí na fin dje carta n’e romanonan tin esun dje secretario di Pablo, kende a skirbi: “Ami, Tercio, cu a skirbi e carta aki, ta cumindá boso den e Señor.” (Romanonan 16:22) Esaki ta e único ocasion den e cartanan di Pablo caminda e ta haci referencia explícito na un di su secretarionan.

Nos no sa mashá tocante Tercio. For di su saludo “den e Señor,” nos por concluí cu e tabata un fiel cristian. Probablemente e tabata miembro dje congregacion na Corinto i lo por tabata conocé hopi cristian na Roma. Erudito di Bijbel Giuseppe Barbaglio ta duna e posibilidad cu Tercio tabata un esclabo of un homber librá di sclabitud. Pakico? Di promé, pasobra “generalmente skirbidónan tabata pertenecé n’e clase aki; tambe, pasobra su nomber latin . . . tabata masha comun entre esclabonan i hombernan librá.” “P’esei,” Barbaglio ta bisa, “e no tabata un escritor profesional ‘neutral,’ e tabata un colaboradó cu den e manera aki a yuda Pablo compilá su obra skirbí di mas largu i cu mihó articulacion: un servicio precioso cu a permití Pablo scapa tempu i cansancio.”

E trabou aki di Tercio siguramente ta precioso. Baruc a haci un trabou similar pa Jeremías, mescos cu Silvano a haci pa Pedro. (Jeremías 36:4; 1 Pedro 5:12) Ki un privilegio e colaboradónan ei tabatin!

Skirbiendo n’e Romanonan

E carta n’e romanonan tabata skirbí miéntras cu Pablo tabata un huésped di Gayo, probablemente na Corinto. Esei tabata rond di 56 E.C., durante e apostel su di tres biahe di misionero. (Romanonan 16:23) Aunke nos sa sigur cu Pablo a usa Tercio como su secretario pa skirbi e carta aki, nos no sa exactamente con el a us’é. Sea cual sea e método cu el a usa, e trabou no por a ser hací fácilmente. Pero di esaki nos por ta sigur: Mescos cu e resto di Bijbel, Pablo su carta n’e romanonan tabata “inspirá di Dios.”—2 Timoteo 3:16, 17.

Ora e carta aki tabata cla, Tercio i Pablo a skirbi miles di palabra, usando vários blachi di papiro. Despues cu nan a ser pegá na otro cantu di e márgen, e blachinan aki a forma un rol, probablemente un 3 pa 4 meter largu. E carta a ser lorá cuidadosamente i seyá. Anto probablemente Pablo a encargá Febe cuné, un ruman muher di Cencreas, kende tabata cla pa cuminsá un biahe pa Roma.—Romanonan 16:1, 2.

Desde e promé siglo pa awor, e métodonan usá pa producí material skirbí a cambia enormemente. Pero atrabes di siglonan, Dios a conserbá e carta n’e cristiannan romano. Ki gradicidu nos por ta p’e parti aki dje Palabra di Jehova, skirbí cu yudansa di Pablo su secretario fiel i trahadó, Tercio!