Akila i Prisila—Un Pareha Ehemplar

“DUNA mi cumindamentu na Prisca i Akila mi colaboradornan den Cristo Jesus, kendenan a risca nan mes garganta pa mi alma, na ken no ami so sino tambe tur e congregacionnan dje nacionnan ta duna gradicimentu.”—Romanonan 16:3, 4.

E palabranan aki di apostel Pablo n’e congregacion cristian na Roma ta indicá e gran aprecio i sintimentunan caluroso cu e tabatin p’e pareha casá aki. El a haci sigur cu e no a pasa por haltu di nan ora el a skirbi nan congregacion. Pero ken e dos “colaboradornan” aki di Pablo tabata, i pakico tantu e como e congregacionnan tabatin asina tantu aprecio pa nan?—2 Timoteo 4:19.

Akila tabata un hudiu dje diaspora (e plamamentu dje hudiunan), i un nativo di Pontus, un region den nort di Asia Menor. E i su esposa Prisila (Prisca) a establecé nan mes na Roma. Tabatin un comunidad hudiu basta grandi den e stad ei por lo ménos desde cu Pompeye a capturá Jerusalem na 63 P.E.C., ora un gran cantidad di prezu a ser hibá Roma como catibu. De facto, inscripcionnan romano ta revelá e existencia di un dozijn of mas di snoa den e stad antiguo. Un cantidad di hudiu for di Roma tabata presente na Jerusalem na Pentecoste 33 E.C., ora nan a tende e bon nobo. Tal bes tabata dor di nan cu e mensahe cristian a alcansá e capital dje Imperio Romano pa promé biaha.—Echonan 2:10.

Sin embargo, e hudiunan a ser expulsá for di Roma na aña 49 of cuminsamentu di 50 E.C. riba ordu di Emperador Claudio. P’esei, tabata den e stad griego di Corinto cu apostel Pablo a topa Akila i Prisila. Ora Pablo a yega Corinto, Akila i Prisila bondadosamente a ofrec’é tantu hospitalidad como trabou, pasobra nan tabatin e mésun fishi—traha tent.—Echonan 18:2, 3.

Trahadornan di Tent

Esaki no tabata un trabou fácil. Trahamentu di tent a enbolbé corta i cose na otro pidanan di material of cueru stijf i brutu. Segun e historiador Fernando Bea, esei tabata “un trabou cu a rekerí pericia i cuidou” di parti di trahador di tent cu tabata traha cu “tela grof i resistente, cu a ser usá pa kampeer ora di biaha, dunando proteccion contra solo i awaceru, of pa paketá comestibel den bodega di barcu.”

Esaki ta lanta un pregunta. Pablo no a bisa cu el a ser ‘educá na pia di Gamaliel,’ pues preparand’e pa sigui un carera prestigioso den e añanan pa bini? (Echonan 22:3) Aunke esaki ta cierto, hudiunan dje promé siglo a considerá como algu onorabel pa siña un hóben un fishi asta si e mester a ricibí un educacion mas avansá. P’esei ta probabel cu tantu Akila como Pablo a adkerí nan abilidad den traha tent ora nan tabata yong. E experencia ei a resultá di ta masha útil despues. Pero como cristiannan, nan no a considerá tal trabou seglar nan obhetivo principal. Pablo a splica cu e trabou cu el a haci na Corinto huntu cu Akila i Prisila tabata solamente un medio di sosten pa su actividad principal, esun di declará e bon nobo sin ‘imponé un carga costoso riba ningun hende.’—2 Tesalonicensenan 3:8; 1 Corintionan 9:18; 2 Corintionan 11:7.

Evidentemente, Akila i Prisila tabata contentu pa haci tur loke nan tabata por pa facilitá Pablo su sirbishi di misionero. Ken sa cuantu biaha e tres amigunan a pausa durante nan trabou pa duna un testimonio informal na clientenan of hendenan cu tabata pasa ei banda! I aunke nan trabou di traha tent tabata unu humilde i di cansancio, nan tabata contentu pa hacié, trahando asta ‘dia i anochi’ afin di promové e interesnan di Dios—mescos cu hopi cristian dje tempu actual ta mantené nan mes cu trabou part-time of trabou pa cierto temporada afin di dedicá mayoria dje tempu cu ta resta pa yuda hende tende e bon nobo.—1 Tesalonicensenan 2:9; Mateo 24:14; 1 Timoteo 6:6.

Ehempelnan di Hospitalidad

Pablo probablemente a usa e cas di Akila como base pa su actividadnan di misionero durante e 18 lunanan cu el a keda na Corinto. (Echonan 18:3, 11) Ta probabel, anto, cu Akila i Prisila tabatin e placer di tin tambe Sílas (Silvano) i Timoteo como huésped ora nan a yega for di Macedonia. (Echonan 18:5) E dos cartanan di Pablo n’e tesalonicensenan, cu despues a bira parti dje cánon bíblico, kisas a ser skirbí miéntras e apostel tabata keda cerca Akila i Prisila.

Ta fácil pa imaginá cu n’e tempu aki, e cas di Prisila i Akila tabata un berdadero centro di actividad teocrático. Probablemente hopi amigu stimá tabata bini ei—Stéfanas i su famia, e promé cristiannan den e provincia di Acaya, kendenan a ser bautisá dor di Pablo mes; Ticio Hustu, kende a permití Pablo usa su cas pa duna discurso; i Crispo, presidente dje snoa, cu a aceptá e berdad huntu cu henter su famia. (Echonan 18:7, 8; 1 Corintionan 1:16) Tambe tabatin Fortunato i Acaico; Gayo, den kende su cas e reunionnan di congregacion kisas a ser tené; Erasto, e mayordomo dje stad; Tercio, e secretario na ken Pablo a dicta su carta p’e romanonan; i Febe, un ruman muher fiel dje congregacion cercano di Cencreas, kende probablemente a hiba e carta for di Corinto pa Roma.—Romanonan 16:1, 22, 23; 1 Corintionan 16:17.

Sirbidornan di Jehova dje tempu actual cu tabatin e oportunidad di mustra hospitalidad na un minister biahero sa ki animador i memorabel esei por ta. E experencianan edificante cu ta ser relatá na ocasionnan asina por ta un berdadero fuente di refrescamentu spiritual pa tur presente. (Romanonan 1:11, 12) I, mescos cu Akila i Prisila a haci, esnan cu ta habri nan cas pa reunionnan, tal bes un Studio di Buki di Congregacion, tin e goso i satisfaccion di por contribuí den e manera aki n’e progreso di adoracion berdadero.

E amistad entre Pablo i Akila cu Prisila tabata asina cerá cu nan a compañ’é ora el a bandoná Corinto den e primavera di 52 E.C., bayendo te Efeso cuné. (Echonan 18:18-21) Nan a permanecé den e stad ei i a pone e fundeshi p’e siguiente bishita dje apostel. Tabata aki cu e maestronan talentoso aki dje bon nobo a tuma e elocuente orador Apólos “den nan compania” i tabatin e goso di yud’é comprendé “e caminda di Dios mas corectamente.” (Echonan 18:24-26) Ora Pablo en berdad a bolbe bishitá Efeso durante su di tres biahe di misionero, rond dje winter di 52/53 E.C., e tereno cu e pareha dinámico aki a cultivá tabata cla caba pa cosechá. Pa mas o ménos tres aña, Pablo a predicá i siña otronan ei tocante “E Caminda,” miéntras e congregacion efesio tabata tene reunion den cas di Akila.—Echonan 19:1-20, 26; 20:31; 1 Corintionan 16:8, 19.

Despues, ora nan a regresá Roma, e dos amigunan aki di Pablo a continuá den “sigui e caminda di hospitalidad,” haciendo nan cas disponibel pa reunionnan cristian.—Romanonan 12:13; 16:3-5.

Nan A ‘Risca Nan Garganta’ pa Pablo

Tal bes Pablo tambe a keda cerca Akila i Prisila ora e tabata na Efeso. E tabata kedando cu nan n’e tempu dje bochincha dje platénan? Segun e relato na Echonan 19:23-31, ora e artesanonan cu tabata traha imágennan di plata a lanta contra e predicacion dje bon nobo, e rumannan tabatin cu wanta Pablo p’e no risca su bida enfrentando e multitud desordená. Segun e teoria di algun comentarista di Bijbel tabata kisas exactamente den un circunstancia peligroso asina cu Pablo a sinti su mes ‘insigur asta di su mes bida’ i cu Akila i Prisila a intervení den un manera of otro, ‘riscando nan mes garganta’ p’e.—2 Corintionan 1:8; Romanonan 16:3, 4.

Ora e “desordu a calma,” Pablo prudentemente a bandoná e stad. (Echonan 20:1) Sin duda Akila i Prisila tambe a enfrentá oposicion i mofa. Esei a pone nan sinti desanimá? Al contrario, Akila i Prisila cu curashi a continuá den nan actividadnan cristian.

Un Pareha Hopi Pegá na Otro

Despues cu e mando di Claudio a terminá, Akila i Prisila a regresá Roma. (Romanonan 16:3-15) Sin embargo, e último biaha cu nan ta ser mencioná den Bijbel, nos ta haña nan bek na Efeso. (2 Timoteo 4:19) Atrobe, mescos cu den tur otro referencia den e Scritura, e esposo i esposa aki ta ser mencioná huntu. Ki un pareha uní i pegá na otro! Pablo no por a pensa dje ruman homber stimá ei, Akila, sin corda e cooperacion fiel di su esposa. I ki un ehempel excelente pa parehanan cristian awe, pasobra e asistencia leal di un casá deboto ta permití un persona haci hopi “den e trabou di Señor” i, tin biaha, asta mas cu lo tabata posibel p’e haci como un persona soltero.—1 Corintionan 15:58.

Akila i Prisila a sirbi den vários diferente congregacion. Mescos cu cu nan, hopi cristian celoso di tempu moderno a haci nan mes disponibel pa muda caminda e necesidad ta mas grandi. Tambe nan ta experenciá e goso i satisfaccion cu ta bini dor di mira interesnan di Reino crece i di por cultivá amistadnan cristian caluroso i precioso.

Mediante nan ehempel espléndido di amor cristian, Akila i Prisila a gana e aprecio di Pablo i otronan. Pero asta mas importante, nan a establecé un reputacion excelente cerca Jehova mes. E Scritura ta sigurá nos: “Dios no ta inhustu p’e lubidá boso trabou i e amor cu boso a mustra pa cu su nomber, p’e echo cu boso a sirbi e santunan i ta sigui sirbi.”—Hebreonan 6:10.

Kisas nos no tin e oportunidad pa gasta nos mes den maneranan similar cu loke Akila i Prisila a haci, ma nos por imitá nan ehempel excelente. Nos lo haña un satisfaccion profundo segun cu nos ta dedicá nos energia i bida na sirbishi sagrado, nunca lubidando “e hacimentu di bon i e compartimentu di cosnan cu otronan, pasobra sacrificionan asina ta agradá Dios mashá tantu.”—Hebreonan 13:15, 16.