Si e Matrimonio Ta na Punto di Kibra

1, 2. Ora un matrimonio ta bou di presion, ki pregunta mester ser hací?

NA 1988 un señora italiano yamá Lucia tabata hopi deprimí.a Despues di dies aña su matrimonio tabata yegando na un fin. Hopi biaha el a purba efectuá un reconciliacion cu su esposo, pero esei simplemente no a resultá. Pues el a separá debí na incompatibilidad i awor tabata confrontá e tarea di cria dos yu muher su so. Mirando bek n’e tempu ei, Lucia ta corda: “Mi tabata sigur cu nada por a salba nos matrimonio.”

² Si bo tin problemanan matrimonial, lo bo por comprendé con Lucia a sinti. Bo matrimonio kisas tin problema i kisas bo ta puntrando bo mes si ainda e por ser salbá. Si esei ta e caso, lo bo haña ta útil pa considerá e pregunta aki: Mi a sigui tur e bon conseho cu Dios a duna den Bijbel pa yuda haci matrimonio un éxito?—Salmo 119:105.

 3. Aunke divorcio a bira popular, segun informe, con hopi persona divorciá i nan famianan ta reaccioná?

³ Ora tin hopi tension entre esposo i esposa, e proceder mas fácil por parce di ta pa disolvé e matrimonio. Pero, aunke cu hopi pais a experenciá un aumento spantoso den famianan kibrá, estudionan recien ta indicá cu un porcentahe haltu di homber i muhernan divorciá ta lamentá e kiebro. Un cantidad dje homber i muhernan aki ta sufri mas di problema cu salú, tantu físico como mental, cu esnan cu ta keda casá. E confusion i infelicidad di yunan di divorcio hopi bes ta dura pa añanan. Mayornan i amigunan dje famia kibrá tambe ta sufri. I kico dje manera cu Dios, e Originador di matrimonio, ta mira e situacion?

 4. Con problemanan den un matrimonio mester ser tratá?

⁴ Manera e capítulonan anterior a señalá, tabata Dios su propósito pa matrimonio ser un union pa bida largu. (Génesis 2:24) Pakico, anto, asina tantu matrimonio ta kibra? Kisas esei no ta sosodé di anochi pa di dia. Generalmente tin señalnan di advertencia. Problemanan chikitu den un matrimonio por crece bira mas i mas grandi te ora cu nan parce di ta insuperabel. Pero si e problemanan aki a ser tratá unbes cu e yudansa dje Bijbel, hopi kiebro matrimonial lo por a ser evitá.

 5. Ki situacion realístico mester ser enfrentá den cualkier matrimonio?

⁵ Un elemento cu avéces ta hiba na problemanan ta e expectativanan irealístico cu un of ámbos dje partnernan matrimonial por tin. Historianan di amor, revistanan popular, programanan di television i películanan por crea speransa i soñonan cu ta hopi distinto di bida real. Ora e soñonan aki no ser realisá, un persona por sintié gañá, insatisfecho, asta amargá. Sin embargo, con dos persona imperfecto por haña felicidad den matrimonio? Ta rekerí esfuerso pa logra un relacion exitoso.

 6. (a) Ki punto di bista balansá di matrimonio Bijbel ta duna? (b) Cua ta algun motibu pa desacuerdonan den matrimonio?

⁶ Bijbel ta práctico. E ta reconocé e gosonan di matrimonio, pero tambe e ta spierta cu esnan cu casa “lo tin tribulacion den nan carni.” (1 Corintionan 7:28) Manera ya caba a ser señalá, ámbos casá ta imperfecto i tin tendencia di peca. E composicion mental i emocional i e criansa di cada casá ta diferente. Parehanan tin biaha tin desacuerdo tocante placa, yunan i famianan dje casá. Falta di tempu pa haci cosnan huntu i problemanan sexual tambe por ta un fuente di conflicto.b Ta tuma tempu pa drecha tal asuntunan, pero cobra ánimo! Mayoria pareha casá ta capas pa enfrentá tal problemanan i logra solucionnan mutuamente aceptabel.

7, 8. Si tin sintimentunan di ofensa of malcomprendimentu entre casánan, cua ta e manera bíblico pa trata cu nan?

⁷ Hopi hende ta haña ta difícil pa keda calmu ora nan ta papia over di sintimentunan di ofensa, malcomprendimentunan, of fracasonan personal. En bes di bisa francamente: “Mi ta sinti cu bo no ta comprendé mi,” un casá por bira emocional i exagerá e problema. Hopi casá lo bisa: “Bo ta preocupá solamente pa bo mes,” of, “Bo no stimá mi.” E otro casá cu no kier drenta den un pleitamentu, ta nenga di contestá.

⁸ Un mihó proceder pa sigui ta pa presta atencion n’e conseho bíblico: “Rabia, i tog no peca; no laga solo baha cu boso den un estado provocá.” (Efesionan 4:26) Un pareha felismente casá, na ocasion di nan di 60 aniversario di boda, a ser puntrá cua ta e secreto di nan matrimonio exitoso. E esposo a bisa: “Nos a siña pa no bai drumi sin resolvé e desacuerdonan, no ta importá con chikitu nan por tabata.”

 9. (a) Kico ta ser identificá den e Scritura como un parti vital di comunicacion? (b) Kico casánan hopi bes mester haci, asta si esaki ta rekerí curashi i humildad?

⁹ Ora un esposo i esposa tin desacuerdo, cada un mester ta “lihé pa tende, slow pa papia, slow pa rabia.” (Santiago 1:19) Despues di scucha atentamente, tal bes ámbos casá ta mira e necesidad pa pidi disculpa. (Santiago 5:16) Bisando cu sinceridad, “Dispensá mi cu mi a ofendé bo,” ta rekerí humildad i curashi. Pero tratando cu desacuerdonan den e manera aki lo haci hopi pa yuda un pareha casá no solamente resolvé nan problemanan sino tambe desaroyá un calor i intimidad cu lo laga nan haña mas placer den compania di otro.

10. Ki proteccion cu Pablo a recomendá n’e cristiannan di Corinto lo por aplicá na un cristian awe?

¹⁰ Ora apostel Pablo a skirbi n’e corintionan, el a recomendá matrimonio ‘debí na e prevalencia di fornicacion.’ (1 Corintionan 7:2) E mundu djawe ta mes of asta pió cu Corinto di antigwedad. E tópiconan inmoral cu hende di mundu ta papia di dje abiertamente, e manera inmodesto cu nan ta bisti, i e relatonan sensual presentá den revista i bukinan, na television i den películanan, tur ta combiná pa excitá apetit sexual ilegal. N’e corintionan bibando den un ambiente similar, apostel Pablo a bisa: “Ta mihó pa casa cu pa ta cendí cu pasion.”—1 Corintionan 7:9.

11, 12. (a) Kico e esposo i esposa ta debe otro, i cu ki actitud esaki mester ser duná? (b) Con mester trata e situacion si e deber matrimonial mester ser suspendé temporalmente?

¹¹ P’esei, Bijbel ta manda cristiannan casá: “Laga e esposo duna su esposa loke ta debí na dje; pero laga e esposa haci mescos tambe cu su esposo.” (1 Corintionan 7:3) Ripará cu e énfasis ta riba duna—no riba exigí. Intimidad físico den matrimonio ta berdaderamente satisfaciente solamente si cada casá ta interesá den e bienestar dje otro. Por ehempel, Bijbel ta manda esposonan pa trata cu nan esposanan “di acuerdo cu conocimentu.” (1 Pedro 3:7) Esaki ta particularmente cierto den duna i ricibí e deber matrimonial. Si un esposa no ta ser tratá tiernamente, e por haña ta difícil pa disfrutá dje aspecto aki di matrimonio.

¹² Tin ocasionnan ora partnernan di matrimonio kisas tin cu privá otro dje deber matrimonial. Esaki por ta e caso dje esposa na cierto periodonan dje luna of ora e ta sinti su mes hopi cansá. (Compará cu Levítico 18:19.) E por ta cierto dje esposo ora e ta tratando cu un problema serio na trabou i ta sinti su mes emocionalmente agotá. Casonan asina di suspendé pa un tempu pa cumpli cu e deber matrimonial ta ser tratá mihó si ámbos casá considerá francamente e situacion i concordá di “comun acuerdo.” (1 Corintionan 7:5) Esaki lo prevení ámbos casá di saca conclusionnan robes muchu lihé. Sin embargo, si un esposa intencionalmente ta priva su esposo of si un esposo deliberadamente ta faya di cumpli cu e deber matrimonial den un manera amoroso, e casá por cai mas fácil den tentacion. Den un situacion asina, problemanan por presentá den un matrimonio.

13. Con cristiannan por traha pa mantené nan pensamentu limpi?

¹³ Mescos cu tur cristian, sirbidornan di Dios casá mester evitá pornografia, loke por crea deseonan impuru i innatural. (Colosensenan 3:5) Nan mester vigilá tambe nan pensamentu i accionnan ora di trata cu tur miembro dje sexo opuesto. Jesus a spierta: “Tur persona cu sigui wak un muher afin di tene un pasion p’e a cometé adulterio cuné caba den su curason.” (Mateo 5:28) Dor di aplicá e conseho di Bijbel en cuanto sex, parehanan mester por evitá di cai den tentacion i cometé adulterio. Nan por sigui disfrutá di intimidad agradabel den un matrimonio caminda sex ta ser atesorá como un don saludabel for dje Originador di matrimonio, Jehova.—Proverbionan 5:15-19.

14. Ki situacion tristu tin biaha ta presentá? Pakico?

¹⁴ Felismente, den mayoria matrimonio cristian, cualkier problema cu presentá por ser tratá. Sin embargo, tin biaha esaki no ta e caso. Debí cu hende ta imperfecto i ta biba den un mundu pecaminoso cu ta bou di control di Satanas, algun matrimonio ta yega n’e punto di kibra. (1 Juan 5:19) Con cristiannan mester trata cu un situacion difícil asina?

15. (a) Cua ta e único base bíblico pa divorcio cu e posibilidad pa bolbe casa? (b) Pakico algun persona a dicidí di no divorciá un casá infiel?

¹⁵ Manera Capítulo 2 dje buki aki a mencioná, fornicacion ta e único base bíblico pa divorcio cu e posibilidad di bolbe casa.c (Mateo 19:9) Si bo tin prueba definitivo cu bo casá tabata infiel, anto bo ta enfrentá un decision difícil. Lo bo sigui den e matrimonio of busca un divorcio? No tin reglanan. Algun cristian a pordoná completamente un casá berdaderamente repentí, i e matrimonio preservá a resultá bon. Otronan a dicidí di no divorciá pa causa dje yunan.

16. (a) Cua ta algun factor cu a impulsá algun pa divorciá nan casá pecador? (b) Ora un casá inocente tuma un decision pa divorciá of no, pakico ningun hende mester criticá e persona ei su decision?

¹⁶ Di otro un banda, e acto pecaminoso tal bes a resultá den embaraso of un malesa transmití sexualmente. Of kisas e yunan tin cu ser protehá for di un mayor sexualmente abusador. Claramente, tin hopi cos pa considerá promé cu tuma un decision. Sin embargo, si bo haña sa dje infieldad di bo casá i despues reanudá relacionnan sexual cuné, bo ta indicá dje manera ei cu bo a pordoná bo casá i ta deseá pa sigui den e matrimonio. Base pa divorcio cu e posibilidad bíblico pa bolbe casa no ta válido mas. Ningun hende mester mete den bo asuntu i trata na influenciá bo decision, ni tampoco ningun hende mester criticá bo decision ora bo tum’é. Abo lo tin cu biba cu e consecuencianan di loke bo dicidí. “Cada un lo hiba su mes carga di responsabilidad.”—Galationan 6:5.

17. Si no tin fornicacion, ki limitacionnan e Scritura ta pone pa separacion of divorcio?

¹⁷ Tin situacionnan cu por hustificá separacion of posiblemente divorcio for di un casá asta si e persona ei no a cometé fornicacion? Sí, pero den un caso asina, un cristian no ta liber pa busca un persona cu no ta su casá cu e meta pa bolbe casa. (Mateo 5:32) Aunke Bijbel ta tene cuenta cu separacion asina, e ta stipulá cu esun cu ta bayendo mester “permanecé sin casa of, si no, reconciliá.” (1 Corintionan 7:11) Cua ta algun situacion extremo cu por haci un separacion parce consehabel?

18, 19. Cua ta algun dje situacionnan extremo cu por hiba un casá pa considerá cu ta consehabel pa haña un separacion legal of divorcio, maske bolbe casa no ta un posibilidad?

¹⁸ Wel, kisas e famia ta cai den un situacion di necesidad debí n’e flohera extremo i mal hábitonan dje esposo.d E por ta gasta henter e entrada dje famia na wega di placa of us’é pa sostené un adiccion na droga of alcohol. Bijbel ta declará: “Si un persona no ta percurá pa . . . miembronan di su cas, el a nenga e fe i ta pió cu un persona sin fe.” (1 Timoteo 5:8) Si un homber asina nenga di cambia su maneranan, kisas asta tumando placa cu su esposa ta gana afin di financiá su bicionan, e esposa por scoge pa protehá su mes bienestar i di su yunan dor di obtené un separacion legal.

¹⁹ Tambe por considerá tal accion legal si un casá ta extremadamente violento pa cu su casá, kisas repetidamente batiendo e casá ei te n’e grado cu e salú i asta e bida dje casá ta na peliger. Ademas, si un casá constantemente ta trata na forsa e otro pa kibra Dios su mandamentunan den algun manera, e casá menasá por considerá tambe separacion, specialmente si asuntunan yega e punto caminda e bida spiritual ta na peliger. E casá cu ta core rísico por concluí cu e único manera pa “obedecé Dios como gobernante mas bien cu hende” ta dor di obtené un separacion legal.—Echonan 5:29.

20. (a) Den e caso di un kiebro di famia, kico amigunan maduro i ancianonan por ofrecé, i kico nan no mester ofrecé? (b) Individuonan casá no mester usa referencianan bíblico pa separacion i divorcio como un excuus pa haci kico?

²⁰ Den tur caso di abusu extremo di casá, ningun hende mester pone presion riba e casá inocente ni pa separá ni pa keda cu e otro. Aunke amigunan maduro i ancianonan por ofrecé apoyo i conseho basá riba Bijbel, nan no por sa tur e detayenan di loke ta pasando entre un esposo i esposa. Solamente Jehova por mira esei. Naturalmente, un esposa cristian lo no ta onrando Dios su areglo di matrimonio si e ta usa excuusnan slap pa sali for di un matrimonio. Pero si un situacion extremadamente peligroso ta persistí, ningun hende mester criticá e esposa si e dicidí pa separá. Exactamente e mésun cosnan por ser bisá tocante un esposo cristian cu ta busca separacion. “Nos tur lo para dilanti e tribunal di Dios.”—Romanonan 14:10.

21. Cua experencia ta mustra cu e conseho bíblico riba matrimonio ta duna resultado?

²¹ Tres luna despues cu Lucia, mencioná anteriormente, a separá for di su esposo, el a topa Testigonan di Jehova i a cuminsá studia Bijbel cu nan. “Pa mi gran sorpresa,” e ta splica, “e Bijbel a suministrá solucionnan práctico pa mi problema. Despues di solamente un siman di studio, inmediatamente mi tabata kier a drecha cu mi casá. Awe mi por bisa cu Jehova sa con pa salba matrimonionan den crísis pasobra su siñansanan ta yuda casánan siña con pa sinti aprecio pa otro. No ta berdad, manera algun hende ta afirmá, cu Testigonan di Jehova ta dividí famianan. Den mi caso, exactamente lo contrario tabata berdad.” Lucia a siña aplicá principionan bíblico den su bida.

22. Den kico tur pareha casá mester tin confiansa?

²² Lucia no ta un excepcion. Matrimonio mester ta un bendicion, no un carga. Cu e obhetivo ei, Jehova a percurá e fuente di mas excelente di conseho matrimonial hamas skirbí—su Palabra precioso. Bijbel por haci “esun sin experencia sabí.” (Salmo 19:7-11) Bijbel a salba hopi matrimonio cu tabata na punto di kibra i a drecha hopi otro cu tabatin problemanan serio. Laga tur pareha casá tene pleno confiansa den e conseho matrimonial cu Jehova Dios ta percurá. E realmente ta duna resultado!