Bon Konseho pa Bida Soltero i Bida Kasá
“Mi ta bisa boso esaki . . . pa motivá boso pa e kosnan ku ta apropiá . . . i pa boso por sirbi Señor konstantemente sin distraishon.”—1 KOR. 7:35.
1, 2. Dikon nos mester buska pa sa kiko Beibel ta bisa tokante bida soltero òf bida kasá?
MASHA poko kos den bida ta kousa mas alegria, frustrashon òf preokupashon ku nos trato ku e sekso opuesto. Ya ku nos ta eksperensiá e diferente emoshonnan ei, nos tin ku pidi Dios su guia pa hasi loke ta korekto den e situashonnan akí. Pero tin mas motibu pa pidi su guia. Por ehèmpel, tin kristian ku ta kontentu ku nan ta soltero, pero kisas nan ta haña ku nan famia- òf amigunan ta pone preshon riba nan pa kasa. Otro ruman ke kasa, pero ainda nan no a haña e persona adekuá. Algun ruman tin mester di guia pa sa kon pa prepará pa e responsabilidatnan di esposo òf di esposa. Anto tantu rumannan soltero komo esnan kasá ta konfrontá prueba en konekshon ku moralidat seksual.
2 E asuntunan akí ta influensiá no solamente nos felisidat personal sino tambe nos relashon ku Yehova Dios. Pablo a duna konseho pa bida soltero i bida kasá den kapítulo 7 di su promé karta na e korintionan. Su meta tabata pa motivá su lektornan “pa e kosnan ku ta apropiá pa un persona ku no ta kasá i pa [nan] por sirbi Señor konstantemente sin distraishon.” (1 Kor. 7:35) Segun ku bo ta konsiderá su konseho riba e asuntunan importante akí, purba di mira bo situashon—sea soltero òf kasá—komo un forma pa sirbi Yehova mas plenamente.
Un Desishon Personal Serio
3, 4. (a) Ki problema por surgi ora amigu òf famia ta pone preshon riba un kristian pa e kasa? (b) Kon e konseho di Pablo ta yuda nos pa nos tin un punto di bista balansá di matrimonio?
3 Meskos ku e sosiedat hudiu di promé siglo, hopi kultura awe ta konsiderá matrimonio komo algu masha importante. Si un mucha hòmber òf mucha muhé pasa un sierto edat sin kasa, amigu- i famianan preokupá ta sinti ku nan mester dun’é algun konseho. Kisas den kòmbersashon, nan ta sugerié pa e tuma mas inisiativa pa buska un kasá, òf nan ta menshoná indirektamente ku ken asina e por kasa. Nan por asta usa triki pa laga dos hende soltero topa otro. Ora hende ta hasi e kosnan akí, nan por brongosá e rumannan soltero i daña nan amistat ku nan. Ademas, nan por hùrt sintimentu di e rumannan soltero.
4 Pablo nunka a pone preshon riba otro hende pa kasa ni pa keda soltero. (1 Kor. 7:7) E tabata kontentu ku e por a sirbi Yehova sin un kasá, pero el a respetá e derecho di otro hende di kontraé matrimonio. Awe tambe kada kristian tin e derecho di disidí pa su mes si e ta kasa òf keda soltero. Otro ruman no mester pone preshon pa un kristian hasi esun òf e otro.
Un Bida Soltero Eksitoso
5, 6. Dikon Pablo a rekomendá bida soltero?
5 Un aspekto notabel di e palabranan di Pablo na e korintionan ta su punto di bista positivo di bida soltero. (Lesa 1 Korintionan 7:8.) Aunke Pablo no tabata kasá, e no a halsa su mes riba esnan kasá, manera klero di kristiandat ku ta apstené di matrimonio sí ta hasi. E apòstel mas bien a enfatisá un bentaha ku hopi predikadó soltero di e bon notisia tin. Ki bentaha esei ta?
6 Hopi biaha un kristian soltero tin e fleksibilidat ku e por aseptá asignashonnan den e sirbishi di Yehova ku un ruman kasá kisas no por aseptá. Pablo a risibí e privilegio spesial pa sirbi komo “un apòstel mandá na e nashonnan.” (Rom. 11:13) Lesa Echonan kapítulo 13 pa 20, i sigui e biahe di Pablo i su kompañeronan misionero segun ku nan a habri teritorionan nobo i establesé kongregashonnan den un lugá tras di otro. Pablo a eksperensiá difikultatnan den su sirbishi ku masha poko di nos lo pasa aden awe. (2 Kor. 11:23-27, 32, 33) Pero e goso ku e tabatin di por a yuda asina hopi hende bira disipel a pone ku e difikultatnan ei tabata bale la pena. (1 Tes. 1:2-7, 9; 2:19) Akaso lo e por a logra tur e kosnan ei si e tabata kasá òf tabatin un famia pa kria? Probablemente ku nò.
7. Menshoná un ehèmpel di Testigunan soltero ku a usa nan sirkunstansia pa promové interesnan di e Reino.
7 Hopi kristian soltero ta usa nan sirkunstansia aktual pa hasi mas na fabor di e predikashon. Sara ku Limbania, dos ruman muhé pionero soltero na Bolivia, a muda pa un pueblito ku pa hopi aña no a haña bishita di Testigunan di Yehova. Akaso e echo ku no tabatin koriente lo tabata un problema? E rumannan a konta: “No tin radio ni televishon. Ke men, no tin nada pa kita e hendenan su tinu for di nan pasatempu prinsipal: lesamentu.” Algun hende di e pueblito a mustra e pioneronan sierto publikashonnan di Testigunan di Yehova ku ainda nan tabata lesa ma ku masha tempu no ta ser imprimí mas. Na kasi tur porta e dos rumannan tabata haña hende interesá, i p’esei a tuma hopi tempu pa nan kubri e teritorio. Un señora di edat a bisa nan: “Fin mester ta serka pasobra por fin Testigunan di Yehova a yega serka nos.” No a tarda mashá ku hende di e pueblito a kuminsá asistí na reunion.
8, 9. (a) Kiko Pablo tabatin na mente ora el a papia asina positivo di bida soltero? (b) Menshoná algun bentaha ku kristiannan soltero tin.
8 Klaru ku kristiannan kasá tambe ta haña bon resultado ora nan ta prediká e bon notisia den teritorionan difísil. Pero tin asignashonnan ku pioneronan soltero por aseptá ku lo por ta difísil pa rumannan kasá òf pa esnan ku tin yu. Pablo a pensa riba kuantu trabou mas tabatin di hasi pa prediká e bon notisia den teritorio di e kongregashonnan lokal. E tabata ke pa tur ruman eksperensiá e goso di hasi disipel, meskos ku é a eksperensi’é. Ta p’esei el a papia asina positivo di sirbi Yehova komo un persona soltero.
9 Un ruman muhé soltero di Merka a skirbi: “Tin hende ta kere ku bo no por ta felis si bo ta soltero. Pero ami a ripará ku felisidat duradero ta dependé di un persona su amistat ku Yehova. Aunke bida soltero ta un sakrifisio, e por ta un regalo maravioso si bo hasi bon uso di dje.” Enkuanto kon pa haña felisidat, el a skirbi: “Bida soltero ta habri kaminda pa alkansá felisidat; e no ta un strobansa pa esei. Mi sa ku Yehova no ta ekskluí ningun hende—sea soltero òf kasá—for di su tierno kariño.” Awor akí e ruman ei ta sirbiendo felis di dje den un pais kaminda tin mas nesesidat di publikadó di Reino. Si akaso bo ta soltero, lo bo por usa bo libertat pa hasi mas den e trabou di siña hende e bèrdat? Podisé bo tambe lo deskubrí ku bida soltero ta un regalo presioso di Yehova.
Rumannan Soltero Ku Ta Deseá di Kasa
10, 11. Kon Yehova ta sostené e rumannan ku ta deseá di kasa pero ku ainda no a haña un kasá adekuá?
10 Despues di keda soltero pa un tempu, hopi sirbidó fiel di Yehova ta disidí di buska un ruman pa kasa kuné. Konsiente ku nan tin mester di guia, nan ta pidi Yehova yuda nan haña un kasá adekuá.—Lesa 1 Korintionan 7:36.
11 Si bo ta deseá di kasa ku un ruman ku ta kompartí bo deseo di sirbi Yehova di henter su kurason, sigui menshoná esei na Yehova den orashon. (Flp. 4:6, 7) Asta si ta parse ku bo ta wardando pa hopi tempu, no desesperá. Konfia den nos Dios amoroso komo esun ku lo yuda bo, i lo e sostené bo emoshonalmente segun bo nesesidat.—Heb. 13:6.
12. Kiko un kristian mester evaluá bon ora un hende kuminsá mustra interes romántiko den dje?
12 Kiko si un ruman ku no tin un bon relashon ku Yehova òf asta un persona ku no ta kreyente kuminsá mustra interes romántiko den bo? Podisé bo tin masha gana di kasa. Pero kòrda ku si bo hasi un mal eskoho, e doló di kurason ku esei por kousa lo ta hopi mas grandi ku e soledat ku bo tabata sinti tempu ku bo tabata soltero. Ademas, unabes kasá, bo ta mará na bo kasá pa bida largu, den bon i den malu. (1 Kor. 7:27) No kasa ku un hende djis pasobra bo ta sinti ku esei ta e úniko chèns ku lo bo tin. Lo bo por lamentá e desishon ei despues.—Lesa 1 Korintionan 7:39.
Prepará pa e Realidatnan di Bida Kasá
13-15. Menshoná algun kos ku lo por kousa difikultat den matrimonio i ku parehanan mester papia riba dje durante namorashon.
13 Aunke Pablo a rekomendá pa sirbi Yehova komo soltero, e no a menospresiá esnan ku a disidí di kasa. Mas bien, su konseho inspirá ta yuda parehanan trata ku e realidatnan di bida kasá i hasi nan union permanente.
14 Algun pareha mester ahustá nan ideanan tokante kon bida kasá lo ta. Durante namorashon, e pareha kisas ta pensa ku nan amor ta algu úniko, ekstraordinario i un garantia di felisidat matrimonial. Nan ta drenta matrimonio ku e sintimentunan fantástiko akí i ta kere ku nada hamas lo por kaba ku nan felisidat. E manera di pensa ei no ta realístiko. E aspektonan romántiko di bida kasá ta masha dushi, pero no ta sufisiente pa prepará e brùit i e brùidehòm pa e tribulashon ku tur matrimonio ta konfrontá.—Lesa 1 Korintionan 7:28.a
15 Hopi pareha resien kasá ta keda sorprendí, asta desapuntá, ora nan kasá no ta di akuerdo ku nan den asuntunan importante. Por ehèmpel, kisas nan no ta di akuerdo ku otro riba kon mester usa nan plaka i tempu liber, unda nan lo biba i kuantu biaha mester bai bishitá nan famianan. Ademas, kada un tin imperfekshonnan ku por iritá e otro. Durante namorashon, kisas ta fásil pa no tuma e asuntunan importante ei na serio, pero despues nan por kousa hopi tenshon den e matrimonio. Ta bon pa un pareha papia tokante e asuntunan ei promé ku nan kasa.
16. Dikon un pareha mester ta di akuerdo ku otro riba kon nan lo resolvé problemanan di bida kasá?
16 Pa un pareha por ta felis i eksitoso, nan mester trata ku nan difikultatnan na un manera uní. Nan mester ta di akuerdo ku otro riba kon lo disipliná nan yunan i kon nan lo kuida nan mayornan ku ta birando grandi. E preshon ku difikultatnan familiar ta kousa no mester trese divishon entre nan dos. Si nan apliká Beibel su konseho, nan lo resolvé hopi problema, soportá e problemanan ku nan no por resolvé fásilmente i keda felismente kasá.—1 Kor. 7:10, 11.
17. Ki preokupashon pa “e kosnan di mundu” un pareha por ferwagt ku nan lo tin?
17 Pablo a menshoná un otro realidat di matrimonio na 1 Korintionan 7:32-34. (Les’é.) Hende kasá di mes ta “ansioso pa atendé e kosnan di mundu,” manera kuminda, paña, kas i otro asuntunan básiko. Dikon? Wèl, tempu ku un ruman hòmber tabata soltero, el a usa kisas gran parti di su tempu i energia den sirbishi. Pero despues ku e kasa, e ta ripará ku e tin ku usa parti di e tempu i energia ei pa kuida i komplasé su kasá. Anto e esposa ta ripará ku e tin ku hasi meskos pa su kasá. Yehova, den su sabiduria, ta rekonosé ku tantu e esposo komo e esposa ke komplasé otro. E sa ku e esposo i esposa mester usa poko di e tempu i energia ku ántes nan tabata dediká na Su sirbishi—ora ku nan tabata soltero—pa hasi nan matrimonio eksitoso.
18. Ki ahustenan un pareha mester hasi en konekshon ku aktividatnan sosial despues ku nan kasa?
18 Pero nos por siña mas for di esaki. Si un pareha mester kita poko tempu i energia for di nan sirbishi na Dios pa atendé ku otro, nan lo no mester hasi meskos tambe ku e tempu i energia ku nan tabata usa pa rekreo ora ku nan tabata soltero? Kon un esposa lo sintié si su kasá keda dediká hopi tempu na deporte huntu ku su amigunan? Òf kon un esposo lo sintié si su kasá keda dediká hopi tempu na su hòbinan huntu ku su amiganan? E kasá neglishá lo kuminsá sinti su mes solitario, infelis i sin amor. Pa evitá esaki, un pareha kasá mester hasi tur loke nan por pa fortalesé nan union komo esposo i esposa.—Efe. 5:31.
Yehova Ta Rekerí pa Nos Ta Moralmente Limpi
19, 20. (a) Dikon hende kasá tin ku protehá nan mes kontra inmoralidat? (b) Ki riesgo un pareha kasá ta tuma si nan keda separá for di otro pa periodonan largu?
19 Sirbidónan di Yehova ta determiná pa keda moralmente puru. Tin ruman ta disidí di kasa pa asina evitá problema riba e tereno ei. Pero no ta asina ku matrimonio outomátikamente ta duna nos protekshon kontra inmoralidat seksual. Den tempu bíbliko, un stat fortifiká a protehá e hendenan solamente si nan a keda paden di su murayanan; pafó di e porta di stat tabata peligroso ya ku tabatin bandidu i atrakadó. Asina tambe, hende kasá ta haña protekshon kontra inmoralidat solamente si nan keda denter di e límitenan di relashon seksual ku Esun ku a originá matrimonio a establesé pa nan.
20 Pablo a deskribí e límitenan ei na 1 Korintionan 7:2-5. Ta e esposa so tin derecho di tene relashon seksual ku su esposo; i ta e esposo so tin derecho di tene relashon ku su esposa. Dios ta bisa ku kada un mester duna otro su “deber” matrimonial, esta, e relashon seksual ku un persona kasá tin derecho di risibí. Sinembargo, tin esposo i esposa ku ta pasa periodonan largu leu for di otro i asina nan ta stroba otro di haña su “deber.” Tin ta tuma fakansi separá òf nan ta biba leu for di otro pa motibu di trabou. Pensa riba e daño ku un persona ta kousa si pa “falta di dominio propio” e entregá na preshon satániko i kometé adulterio! Yehova ta bendishoná kabesnan di famia ku ta perkurá pa nan famia sin pone nan matrimonio na peliger.—Sal. 37:25.
E Benefisionan di Obedesé Konseho di Beibel
21. (a) Dikon ta difísil pa tuma desishonnan ku tin di haber ku keda soltero òf kasa? (b) Dikon e konseho ku tin den 1 Korintionan kapítulo 7 ta masha útil?
21 Un di e desishonnan di mas difísil ku un persona tin ku tuma tin di haber ku keda soltero òf kasa. Tur hende ta imperfekto, i esei ta e kousa di mayoria di problema den relashonnan humano. Pues, asta hende ku tin Yehova su aprobashon i bendishon no por skapa di tur desepshon, sea ku nan ta soltero òf kasá. Si bo apliká e konseho sabí ku tin den 1 Korintionan kapítulo 7, bo por evitá hopi di e problemanan ku nos a kaba di konsiderá. Den bista di Yehova lo bo “hasi bon,” sea bo ta soltero òf kasá. (Lesa 1 Korintionan 7:37 i 38.) E meta di mas grandi ku bo por alkansá ta di haña e aprobashon di Dios. Ku su aprobashon, lo bo sigui avansá den direkshon di bida den su mundu nobo. E tempu ei hende hòmber i hende muhé lo no tin e preshon- i problemanan ku awe ta asina komun.
[Nota]
Bo Por Kontestá?
• Dikon ningun hende no mester pone preshon riba un otro persona pa kasa?
• Kon bo por hasi e mihó uso di bo tempu komo un sirbidó di Yehova soltero?
• Kon un pareha ku ta namorá por prepará pa e difikultatnan di matrimonio?
• Dikon matrimonio no ta protehá un persona outomátikamente kontra inmoralidat seksual?
[Plachi na página 16]
Rumannan soltero ta sinti hopi goso ora nan usa nan tempu pa hasi mas den sirbishi
[Plachi na página 18]
Ki ahuste algun pareha tin ku hasi despues ku nan kasa?