Tata i Anciano—Cumpliendo cu Ambos Papel

“Si en berdad un homber no sa con pa presidí riba su mes famia, con lo e por cuida e congregacion di Dios?” —1 TIMOTEO 3:5.

 1, 2. (a) Den e promé siglo, con e superintendentenan soltero i esnan casá sin yu por a sirbi nan rumannan? (b) Con Aquila i Priscila ta un ehempel pa hopi pareha casá awe?

SUPERINTENDENTENAN den e congregacion cristian di promé por tabata hombernan soltero, of hombernan casá sin yu of hombernan di famia cu yu. Sin duda algun dje cristiannan ei por a sigui e conseho cu apostel Pablo a duna den su promé carta n’e Corintionan, capítulo 7, kedando soltero. Jesus a declará: “Tin eunuconan cu a haci nan mes eunuco pa causa dje reino di shelu.” (Mateo 19:12) E hombernan soltero ei, manera Pablo i tal bes algun di su compañeronan biahero, lo tabata liber pa biaha pa yuda nan rumannan.

² Bijbel no ta bisa si Barnabas, Marco, Sílas, Lucas, Timoteo i Tito tabata hombernan soltero. Si nan tabata casá, evidentemente nan tabata suficiente liber di responsabilidadnan di famia pa por a biaha bai tur parti na vários asignacion. (Echonan 13:2; 15:39-41; 2 Corintionan 8:16, 17; 2 Timoteo 4:9-11; Tito 1:5) Nan por tabata compañá pa nan esposa, manera Pedro i “e resto dje apostelnan,” cu aparentemente a bai cu nan esposa ora nan tabata move di un lugá pa otro. (1 Corintionan 9:5) Aquila i Priscila ta un ehempel di un pareha casá cu tabata dispuesto pa establecé nan mes na un lugá nobo, siguiendo Pablo for di Corinto te na Efeso, despues mudando pa Roma, i bek atrobe pa Efeso. Bijbel no ta bisa si nan tabatin yu. Nan sirbishi dedicá na fabor di nan rumannan a haci nan gana e gratitud di “tur e congregacionnan dje nacionnan.” (Romanonan 16:3-5; Echonan 18:2, 18; 2 Timoteo 4:19) Awe, sin duda tin hopi pareha casá cu, mescos cu Aquila i Priscila, lo por sirbi otro congregacionnan, tal bes mudando pa caminda e necesidad ta mas grandi.

Tata i Anciano

 3. Kico ta indicá cu hopi anciano dje promé siglo tabata hombernan casá cu famia?

³ Ta parce cu den e promé siglo E.C., mayoria anciano cristian tabata hombernan casá cu yunan. Ora Pablo a describí e cualificacionnan cu ta ser rekerí di un homber cu “ta percurando pa alcansá un puesto di superintendente,” el a declará cu un cristian asina mester ta “un homber cu ta presidí riba su mes famia di un manera excelente, teniendo yunan sumiso cu tur seriedad.”—1 Timoteo 3:1, 4.

 4. Kico a ser rekerí di ancianonan casá cu yu?

⁴ Manera nos a mira caba, un superintendente no tabata obligá di tin yu, ni sikiera di ta casá. Pero si e tabata casá, pa cualificá como anciano of sirbidor ministerial, un cristian tabatin cu ehercé un hefatura apropiado i amoroso riba su esposa i demostrá di ta capas pa tene su yunan den sumision apropiado. (1 Corintionan 11:3; 1 Timoteo 3:12, 13) Cualkier debilidad serio den maneho di su famia lo a descualificá un ruman pa privilegionan special den e congregacion. Pakico? Pablo ta splica: “Si en berdad un homber no sa con pa presidí riba su mes famia, con lo e por cuida e congregacion di Dios?” (1 Timoteo 3:5) Si esnan di su mes carni no tabata dispuesto pa someté nan mes na su supervision, con otronan lo a reaccioná?

“Teniendo Yunan Creyente”

 5, 6. (a) Ki rekisito en cuanto yunan Pablo a mencioná na Tito? (b) Kico ta ser sperá di ancianonan cu tin yu?

⁵ Ora Pablo a instruí Tito pa nombra superintendentenan den e congregacionnan di Creta, el a stipulá: “Si tin un homber liber di acusacion, esposo di un solo esposa, teniendo yunan creyente cu no tabata acusá di libertinahe ni ingobernabel. Pasobra un superintendente mester ta liber di acusacion como mayordomo di Dios.” Kico exactamente e rekisito “teniendo yunan creyente” ta nificá?—Tito 1:6, 7.

⁶ E expresion “yunan creyente” ta referí na hóbennan cu ya a dedicá nan bida caba na Jehova i a ser bautisá, of na esnan yong cu ta progresando den direccion di dedicacion i bautismo. E miembronan di un congregacion ta spera pa yunan di ancianonan comportá nan mes generalmente bon i ta obediente. Mester ta bisto cu un anciano ta haciendo tur loke e por pa edificá e fe di su yunan. Rey Sálomon a skirbi: “Entrená un mucha homber conforme cu e caminda p’e; ni ora e bira bieu lo e no desviá for di dje.” (Proverbionan 22:6) Pero kico si un hóben cu a ricibí un entrenamentu asina nenga di sirbi Jehova of asta cometé un malecho serio?

 7. (a) Pakico ta evidente cu Proverbionan 22:6 no ta expresá un regla inflexibel? (b) Si un yu di anciano no ta scoge pa sirbi Jehova, pakico e anciano lo no perde su privilegionan automáticamente?

⁷ Ta evidente cu e proverbio citá ariba no ta declarando un regla estricto. E no ta anulá e principio di boluntad liber. (Deuteronomio 30:15, 16, 19) Ora un yu homber of un yu muher alcansá e edad di responsabilidad, e mester tuma un decision personal relacioná cu dedicacion i bautismo. Si un anciano claramente a duna e yudansa, guia i disiplina spiritual necesario, i tog e hóben no scoge pa sirbi Jehova, e tata no ta ser descualificá automáticamente pa sirbi como un superintendente. Di otro banda, si un anciano tin diferente yu menor di edad bibando na cas cu, un tras di otro, ta bira spiritualmente enfermo i ta haña nan den problema, e no por ser considerá mas “un homber cu ta presidí riba su mes famia di un manera excelente.” (1 Timoteo 3:4) E punto ta, mester ta bisto cu un superintendente ta haciendo su best pa tin ‘yunan creyente cu no ta acusá di libertinahe ni ingobernabel.’a

Casá cu un “Esposa Incrédulo”

 8. Con un anciano mester actua pa cu su esposa incrédulo?

⁸ Relacioná cu hombernan cristian casá cu un persona incrédulo, Pablo a skirbi: “Si un ruman homber tin un esposa incrédulo, i tog e ta cumbiní pa biba cuné, lagu’e no bandon’é . . . Pasobra . . . e esposa incrédulo ta santificá en relacion cu e ruman; di otro manera, boso yunan realmente lo tabata impuru, pero awor nan ta santu. Pasobra, . . . esposo, con bo sa cu lo bo no salba bo esposa?” (1 Corintionan 7:12-14, 16) E palabra “incrédulo” aki no ta referí na un esposa cu no tin creencianan religioso sino na un cu no ta dedicá na Jehova. E por tabata un hudiu, of un creyente di diosnan pagano. Awe, un anciano por ta un homber casá cu un muher cu ta activo den un otro religion, cu ta un agnóstico, of asta un ateo. Si e ta dispuesto pa keda cuné, e homber no mester bandon’é simplemente pa motibu di creencianan distinto. Ainda e mester ‘biba cuné segun conocimentu, asignando onor na dje manera na un wea mas swak, esun femenino,’ bibando cu e speransa di por salb’é.—1 Pedro 3:7; Colosensenan 3:19.

 9. Den paisnan unda e ley ta duna tantu esposo como esposa e derecho di exponé nan yunan na nan respectivo creencianan religioso, con un anciano mester actua, i con esaki lo afectá su privilegionan?

⁹ Si un superintendente tin yunan, lo e ehercé hefatura apropiado di esposo i tata den cria nan “den e disiplina i reglamentu mental di Jehova.” (Efesionan 6:4) Den hopi pais e ley ta duna ámbos partner matrimonial e derecho di duna instruccion religioso na nan yunan. Den e caso aki e esposa por exigí pa ehercé su derecho pa exponé su yunan na su creencianan i custumbernan religioso, locual por incluí hiba nan na su iglesia.b Naturalmente, e yunan mester sigui nan concenshi bíblicamente entrená relacioná cu no participá den ceremonianan di religion falsu. Como cabes di famia, e tata lo ehercé su propio derecho pa studia cu su yunan i hiba nan Salon di Reino ora ta posibel. Ora nan alcansá e edad na cua nan por tuma nan propio decisionnan, nan lo dicidí pa nan mes cua caminda nan lo bai. (Hosué 24:15) Si su co-ancianonan i e miembronan dje congregacion por mira cu e anciano ta haciendo tur loke e ley di César ta permitié haci pa instruí su yunan apropiadamente den e caminda dje berdad, lo e no ser descualificá como un superintendente.

‘Presidiendo Riba Su Famia den un Manera Excelente’

10. Si un cabes di famia ta un anciano, kico lo ta su obligacion primario?

¹⁰ Asta pa un anciano cu ta tata i kende su esposa ta un compañero cristian, no ta un tarea fácil pa parti su tempu i atencion apropiadamente entre su esposa, yunan i responsabilidadnan di congregacion. E Scritura ta splica claramente cu un tata cristian tin un obligacion di cuida su casá i yunan. Pablo a skirbi: “Siguramente si un hende no ta percurá pa esnan cu ta di dje mes, i specialmente pa esnan cu ta miembro di su famia, el a nenga e fe i ta pió cu un persona sin fe.” (1 Timoteo 5:8) Den e mésun carta ei, Pablo a declará cu ta solamente hombernan casá cu ya a proba di ta bon esposo i tata, mester ser recomendá pa sirbi como superintendente.—1 Timoteo 3:1-5.

11. (a) Den ki maneranan un anciano mester “percurá pa esnan cu ta di dje”? (b) Con esaki por yuda un anciano cumpli cu su responsabilidadnan di congregacion?

¹¹ Un anciano mester “percurá” pa esnan cu ta di dje no solamente den sentido material, sino tambe den sentido spiritual i emocional. Rey sabí Sálomon a skirbi: “Prepará bo trabou pafó, i hacié cla pa bo mes den cunucu. Despues tambe bo tin cu edificá bo famia.” (Proverbionan 24:27) Pues, miéntras cu un superintendente ta percurá p’e necesidadnan material, emocional i recreativo di su esposa i yunan, e mester edificá nan tambe den sentido spiritual. Esaki ta tuma tempu—tempu cu lo e no por dedicá na asuntunan di congregacion. Pero esei ta tempu cu por duna recompensanan ricu den forma di un famia felis i spiritual. Cu tempu, si su famia ta spiritualmente fuerte, e anciano kisas no tin nodi dedicá dje tantu tempu ei pa atendé problemanan di famia. Esaki lo laga su mente mas liber p’e percurá pa asuntunan di congregacion. Su ehempel como un bon esposo i un bon tata lo ta di beneficio spiritual p’e congregacion.—1 Pedro 5:1-3.

12. Den ki asuntu di famia tatanan cu ta anciano mester pone un ehempel excelente?

¹² Presidí riba un cas den un manera excelente ta incluí programá tempu pa dirigí un studio di famia. Ta particularmente importante pa ancianonan pone un bon ehempel al respecto, pasobra famianan fuerte ta forma congregacionnan fuerte. E tempu di un superintendente no mag di ta regularmente asina ocupá cu otro privilegionan di sirbishi cu e no tin tempu pa studia cu su esposa i yunan. Si esaki tabata e caso, e mester examiná su programa di nobo. Kisas e tin cu reprogramá of reducí e tempu cu e ta dedicá na otro asuntunan, asta nenga cierto privilegionan de bes en cuando.

Supervision Balansá

13, 14. Ki conseho “e esclabo fiel i discreto” a duna ancianonan cu ta cabes di famia?

¹³ Conseho pa balansá responsabilidadnan di famia i di congregacion no ta algu nobo. Pa añanan “e esclabo fiel i discreto” ta dunando conseho na ancianonan tocante e asuntunan aki. (Mateo 24:45) Mas cu 37 aña pasá, E Toren di Vigilancia [na ingles], di 15 di september, 1959, página 553 i 554, a consehá: “Acaso e no ta un asuntu di balansá tur e cosnan aki cu ta exigí nos tempu? Den e balansa aki bo mester duna debido importancia n’e interesnan di bo propio famia. Siguramente Jehova Dios lo no spera pa un homber usa tur su tempu den actividad di congregacion, den yuda su rumannan i próhimo gana salbacion, i tog no soru p’e salbacion di su mes cas. Un homber su esposa i yunan ta un responsabilidad primario.”

¹⁴ La Atalaya di 1 di november, 1986, página 22, a consehá: “Participacion den e ministerio di veld como famia lo hala boso mas cerca di otro, sin embargo, e necesidadnan único di yunan ta rekerí pa bo duna nan di bo tempu personal i energia emocional. P’esei, balansa ta necesario pa determiná cuantu tempu bo por usa pa . . . obligacionnan di congregacion miéntras cu bo ta percurá tambe spiritualmente, emocionalmente i materialmente pa ‘esnan cu ta di bo mes.’ [Un cristian] mester ‘siña promé pa practicá debocion piadoso den [su] mes cas.’ (1 Timoteo 5:4, 8)”

15. Pakico un anciano cu tin casá i yunan mester tin sabiduria i dicernimentu?

¹⁵ Un proverbio bíblico ta declará: “Cu sabiduria un famia lo ser edificá, i cu dicernimentu lo e resultá di ta firmemente establecí.” (Proverbionan 24:3) Sí, pa un superintendente cumpli cu su debernan teocrático i na mésun tempu edificá su famia, e siguramente mester di sabiduria i dicernimentu. For dje punto di bista bíblico, e tin mas cu un área di supervision. Su responsabilidadnan di famia i di congregacion ta enbolbí. E mester tin dicernimentu pa mantené un balansa entre esakinan. (Filipensenan 1:9, 10) E mester tin sabiduria pa fiha su prioridadnan. (Proverbionan 2:10, 11) Sin embargo, maske cuantu e ta sintié responsabel pa percurá pa su privilegionan di congregacion, e mester realisá cu como esposo i tata, su responsabilidad primario cu Dios a dun’é ta e cuido i salbacion di su famia.

Bon Tata i Tambe Bon Anciano

16. Ki bentaha un anciano tin si e ta tata tambe?

¹⁶ Por ta berdaderamente beneficioso pa tin un anciano cu tin yunan cu ta comportá nan mes bon. Si el a siña percurá bon pa su famia, e ta den un posicion pa yuda otro famianan den e congregacion. E ta comprendé nan problemanan mihó i por duna conseho cu ta reflehá su mes experencia. Felismente, miles di anciano na tur parti di mundu ta haciendo un trabou excelente como esposo, tata i superintendente.

17. (a) Kico un homber cu ta tantu un tata como anciano no mester lubidá nunca? (b) Con otro miembronan dje congregacion mester mustra empatia?

¹⁷ Pa un cabes di famia por ta un anciano, e mester ta un cristian maduro cu, segun cu e ta cuida su esposa i yunan, por organisá su asuntunan di manera cu e por dedicá tempu i atencion na otronan den e congregacion. E no mester lubidá nunca cu su trabou di pastoreá ta cuminsá na cas. Sabiendo cu ancianonan cu tin un esposa i yunan tin e responsabilidad di tantu nan obligacionnan di famia como di congregacion, miembronan dje congregacion lo purba di no exigí demasiado di nan tempu. Por ehempel, un anciano cu tin yunan cu tin cu bai scol e siguiente mainta kisas no por keda semper pa algun ratu despues di reunionnan anochi. Otro miembronan dje congregacion mester comprendé esaki i mustra sintimentu di compañero.—Filipensenan 4:5.

Nos Mester Tin Aprecio pa Ancianonan

18, 19. (a) Kico nos examinacion di 1 Corintionan capítulo 7 a yuda nos realisá? (b) Con nos mester considerá hombernan cristian asina?

¹⁸ Nos examinacion di capítulo 7 di Pablo su promé carta n’e corintionan a yuda nos mira cu, siguiendo Pablo su conseho, tin hopi hombernan soltero cu ta usando nan libertad pa sirbi interesnan di Reino. Tin tambe miles di rumannan homber casá sin yu cu, segun cu nan ta duna e debido atencion na nan esposanan, ta sirbi como superintendentenan excelente den districto, circuito, congregacion i sucursalnan di Watch Tower, cu e cooperacion encomendabel di nan esposanan. Finalmente, den e casi 80.000 congregacionnan di Jehova su pueblo, tin hopi tata cu no solamente ta cuida nan esposa i yunan amorosamente, sino tambe ta saca tempu pa sirbi nan rumannan como wardadornan amoroso.—Echonan 20:28.

¹⁹ Apostel Pablo a skirbi: “Laga e ancianonan cu ta presidí den un manera excelente ser considerá digno di dobel onor, specialmente esnan cu ta traha duru den papiamentu i siñamentu.” (1 Timoteo 5:17) Sí, ancianonan cu ta presidí den un manera excelente na nan cas i den e congregacion ta merecé nos amor i respet. En berdad nos mester “sigui tene aprecio p’e clase di hombernan ei.”—Filipensenan 2:29.

[Nota]

Como Repaso

◻ Con nos por sa cu hopi anciano den e promé siglo E.C. tabata cabesnan di famia?

◻ Kico ta ser rekerí di ancianonan casá cu tin yu, i pakico?

◻ Kico kier men “yunan creyente,” pero kico lo pasa si un yu di anciano no ta scoge pa sirbi Jehova?

◻ Den ki sentido un anciano mester “percurá pa esnan cu ta di dje”?

[Plachi na página 23]

Famianan fuerte ta forma congregacionnan fuerte