Dios Ta Bini Na Prome Luga den Bo Famia?
“Bo mester stima Jehova bo Dios cu henter bo curason.”—MARCO 12:29, 30.
1. Ki importante ta pa nos stima Jehova?
“CUA mandamentu ta promé cu tur?” un escriba a puntra Jesus. En bes di duna su mes opinion, Jesus a contestá su pregunta citando for dje Palabra di Dios na Deuteronomio 6:4, 5. El a contestá: “E promé ta, ‘Tende, O Israel, Jehova nos Dios ta un solo Jehova, i bo mester stima Jehova bo Dios cu henter bo curason i cu henter bo alma i cu henter bo mente i cu henter bo forsa.’”—Marco 12:28-30.
2. (a) Ki oposicion Jesus tabatin cu enfrentá? (b) Kico por hacié difícil tin biaha pa agradá Jehova?
2 Pa obedecé loke Jesus a yama e promé mandamentu—esun di mas importante—ta rekerí pa nos semper haci loke ta agradá Jehova. Jesus a haci esei, maske na un ocasion apostel Pedro a oponé e curso di Jesus, i na un otro ocasion su mes parientenan yegá a haci esei tambe. (Mateo 16:21-23; Marco 3:21; Juan 8:29) Kico si bo haña bo mes den un situacion similar? Suponé cu miembronan di famia kier pa bo stop cu bo studio di Bijbel i cu bo asociacion cu Testigonan di Jehova. Lo bo pone Dios na promé lugá dor di haci loke ta agrad’é? Dios ta bini na promé lugá, asta ora miembronan di famia kisas ta oponé bo esfuersonan pa sirbié?
E Trampa di Oposicion di Famia
3. (a) Kico por ta e consecuencianan di Jesus su siñansanan p’e famia? (b) Con miembronan di famia por mustra pa ken nan tin mayor cariño?
3 Jesus no a minimisá e dificultad cu lo por resultá ora otronan den e famia ta oponé e miembro cu ta aceptá su siñansanan. “Un hende su enemigunan lo ta personanan di su mes famia,” Jesus a bisa. Tog, apesar dje consecuencia tristu ei, Jesus a mustra ken mester bini na promé lugá dor di bisa: “Esun cu tin mayor cariño pa tata of mama cu pa mi no ta digno di mi; i esun cu tin mayor cariño pa yu homber of pa yu muher cu pa mi no ta digno di mi.” (Mateo 10:34-37) Nos ta pone Jehova Dios na promé lugá dor di sigui e siñansanan di su Yu, Jesucristo, kende ta “e representacion exacto di [Dios] su ser mes.”—Hebreonan 1:3; Juan 14:9.
4. (a) Kico Jesus a bisa tabata enbolbí den ser su siguidor? (b) Den ki sentido cristiannan tin cu odia miembronan di famia?
4 Na un otro ocasion ora Jesus tabata considerando loke realmente ta enbolbí den ser su berdadero siguidor, el a bisa: “Si cualkier hende bini cerca mi i no ta odia su tata i mama i esposa i yunan i ruman homber i muher, sí, i asta su mes alma, e no por ta mi disipel.” (Lucas 14:26) Jesus obviamente no tabata kier men cu su siguidornan mester odia literalmente nan miembronan di famia, ya cu el a manda hende pa stima asta nan enemigunan. (Mateo 5:44) Mas bien, aki Jesus tabata kier men cu su siguidornan mester stima miembronan di famia ménos cu nan ta stima Dios. (Compará cu Mateo 6:24.) Di acuerdo cu e comprendimentu ei, Bijbel ta bisa cu Jacob “a odia” Lea i a stima Raquel, locual a nificá cu e no tabata stima Lea mes tantu cu e tabata stima su ruman muher, Raquel. (Génesis 29:30-32) Asta nos propio “alma,” of bida, Jesus a bisa, mester ser odiá, of stimá ménos, cu Jehova!
5. Con Satanas astutamente ta probechá dje areglo di famia?
5 Como Creador i Dunador di Bida, Jehova ta merecé debocion completo for di tur su sirbidornan. (Revelacion 4:11) “Mi ta dobla mi rudia p’e Tata,” apostel Pablo a skirbi, “na ken tur famia den cielu i riba tera debe nan nomber.” (Efesionan 3:14, 15) Jehova a crea e areglo di famia den un manera asina maraviyoso cu miembronan di famia tin cariño natural un pa otro. (1 Reynan 3:25, 26; 1 Tesalonicensenan 2:7) Sin embargo, Satanas e Diabel astutamente ta probechá dje cariño natural di famia aki, cu ta incluí un deseo pa agradá personanan stimá. E ta waya e vlamnan di oposicion di famia, i hopi hende ta haña cu ta un desafio pa para firme p’e berdad di Bijbel ora nan haña nan confrontá cuné.—Revelacion 12:9, 12.
Enfrentando e Desafio Exitosamente
6, 7. (a) Con miembronan di famia por ser yudá pa comprendé e importancia di studio di Bijbel i asociacion cristian? (b) Con nos por demostrá cu nos berdaderamente ta stima nos miembronan di famia?
6 Kico lo bo haci si bo ser forsá pa scoge entre agradá Dios of agradá un miembro di famia? Lo bo hustificá cu Dios no ta spera di nos pa studia su Palabra i aplicá su principionan si hacimentu di esei ta crea desacuerdo den famia? Pero pensa riba dje. Si bo entregá i stop di studia Bijbel i asociá cu Testigonan di Jehova, con e personanan cu bo ta stima hamas por comprendé cu conocimentu exacto di Bijbel ta un asuntu di bida i morto?—Juan 17:3; 2 Tesalonicensenan 1:6-8.
7 Nos por ilustrá e situacion den e manera aki: Tal bes un miembro di famia tin un anhelo excesivo pa alcohol. Ignorando of pasando por haltu di su problema cu bebementu lo ta di berdadero beneficio p’e? Lo ta mihó pa conserbá e pas dor di entregá i no haci nada tocante su problema? No, probablemente bo ta di acuerdo cu lo ta mihó pa purba yud’é vence su problema di bebementu, asta si esei ta nificá cu bo tin cu soportá su rabia i menasanan. (Proverbionan 29:25) Di igual manera, si bo berdaderamente ta stima bo miembronan di famia, lo bo no cede na nan esfuersonan pa stop bo di studia Bijbel. (Echonan 5:29) Solamente dor di tuma un posicion firme lo bo por yuda nan comprendé cu biba segun e siñansanan di Cristo ta nificá nos bida mes.
8. Con nos ta beneficiá dje echo cu Jesus a haci e boluntad di Dios fielmente?
8 Poniendo Dios na promé lugá por ta masha difícil tin biaha. Pero corda, Satanas tambe a hacié difícil pa Jesus haci e boluntad di Dios. Sin embargo Jesus nunca a entregá; el a wanta asta e agonia di un staca di tormento pa nos. “Jesucristo [ta] nos Salbador,” Bijbel ta bisa. “El a muri pa nos.” (Tito 3:6; 1 Tesalonicensenan 5:10) Nos no ta gradicidu cu Jesus no a entregá na oposicion? Debí cu el a wanta un morto sacrificial, nos tin e prospecto di bida eterno den un pacífico mundu nobo di husticia dor di ehercé fe den su sanger dramá.—Juan 3:16, 36; Revelacion 21:3, 4.
Un Posibel Recompensa Ricu
9. (a) Con cristiannan por contribuí n’e salbacion di otronan? (b) Kico tabata e situacion di Timoteo su famia?
9 Bo a realisá cu bo tambe por contribuí n’e salbacion di otronan, incluyendo famianan masha kerí? Apostel Pablo a urgi Timoteo: “Persistí den e cosnan aki [cu bo a ser siñá], pasobra haciendo esaki lo bo salba tantu bo mes como esnan cu ta scuchá bo.” (1 Timoteo 4:16) Timoteo a biba den un famia dividí, siendo cu su tata griego tabata un incrédulo. (Echonan 16:1; 2 Timoteo 1:5; 3:14) Aunke nos no sa si Timoteo su tata hamas a bira un creyente, e posibilidad cu e por a bira a ser aumentá mashá dor dje fiel conducta di su esposa, Eunice, i di Timoteo.
10. Kico cristiannan por haci na fabor di nan casá incrédulo?
10 E Scritura ta revelá cu esposo i esposanan cu ta sostené firmemente e berdad di Bijbel por contribuí n’e salbacion di nan casá no-cristian dor di yuda nan bira creyente. Apostel Pablo a skirbi: “Si cualkier ruman homber tin un esposa incrédulo, i tog e [esposa] ta cumbiní pa biba cuné, lagu’e no bandon’é; i un muher cu tin un esposo incrédulo, i tog e [esposo] ta cumbiní pa biba cuné, lagu’e no bandoná su esposo. Pasobra, esposa, con bo sa cu lo bo no salba bo esposo? Of, esposo, con bo sa cu lo bo no salba bo esposa?” (1 Corintionan 7:12, 13, 16) Apostel Pedro a describí con esposanan, en efecto, por a salba nan esposonan, urgiendo: “Sea sumiso na boso mes esposonan, afin cu, si cualkier no ta obediente n’e palabra, nan por ser ganá sin un palabra dor dje conducta di nan esposanan.”—1 Pedro 3:1.
11, 12. (a) Ki recompensa miles di cristian a ricibí, i kico nan a haci pa ricibié? (b) Relatá un experencia di un miembro di famia cu a ser recompensá pa awante fiel.
11 Den añanan recien hopi miles di persona a bira Testigo di Jehova despues di a oponé pa lunanan i asta pa añanan largu e actividad cristian di nan parientenan Testigo. Ki un recompensa esaki ta pa cristiannan cu a permanecé firme, i ki un bendicion p’e antiguo opositornan! Cu emocion den su bos, un anciano cristian di 74 aña di edad a relatá: “Hopi bes mi ta gradicí mi casá i mi yunan pa a pega n’e berdad durante e añanan cu mi a oponé nan.” El a bisa cu pa tres aña el a nenga obstinadamente asta pa permití su esposa papia cuné tocante Bijbel. “Pero el a usa sicologia cu mi,” el a bisa, “i a cuminsá duná mi testimonio segun cu e tabata duna mi pia masashi. Ki agradecidu mi ta cu e no a entregá na mi oposicion!”
12 Un otro esposo cu a oponé su famia a skirbi: ‘Mi tabata e pió enemigu di mi esposa pasobra despues cu el a haña e berdad, mi tabata menas’é, i nos tabata pleita tur dia; mi kier men, semper ta ami tabata cuminsá e pleitu. Pero tur esei en bano; mi esposa a pega n’e Bijbel. Diesdos aña a pasa asina den mi lucha amargo contra e berdad i contra mi esposa i yu. Pa nan tur dos, mi tabata e Diabel en persona.’ Cu tempu e homber a cuminsá analisá su bida. ‘Mi a mira con fastioso mi tabata,’ el a splica. ‘Mi a lesa e Bijbel, i gracias na su instruccion, awor mi ta un Testigo bautisá.’ Pensa dje gran recompensa dje esposa, sí, di a yuda ‘salba su esposo’ dor di a wanta su oposicion fielmente pa 12 aña!
Siñando for di Jesus
13. (a) Cua ta e les principal cu esposo i esposanan mester siña for dje curso di bida di Jesus? (b) Con hende cu ta haña ta difícil pa someté nan mes n’e boluntad di Dios por beneficiá for dje ehempel di Jesus?
13 E les principal cu esposo i esposanan mester siña for di Jesus su curso di bida ta esun di obedencia na Dios. “Semper mi ta haci e cosnan cu ta agrad’é,” Jesus a bisa. “Mi ta busca, no mi mes boluntad, sino e boluntad di esun cu a mandá mi.” (Juan 5:30; 8:29) Asta ora Jesus un biaha a haña un aspecto particular dje boluntad di Dios desagradabel, e tabata obediente. “Si bo ta deseá, kita e copa aki for di mi,” el a pidi den oracion. Pero el a agregá mesora: “No obstante, laga, no mi boluntad, sino di bo tuma lugá.” (Lucas 22:42) Jesus no a pidi Dios pa cambia Su boluntad; el a mustra cu e berdaderamente a stima Dios dor di someté su mes obedientemente na sea loke sea tabata e boluntad di Dios p’e. (1 Juan 5:3) Poniendo semper e boluntad di Dios na promé lugá, mescos cu Jesus, ta vitalmente importante pa éxito no solamente den bida soltero sino tambe den bida casá i di famia. Considerá pakico esaki ta asina.
14. Con algun cristian ta razoná incorectamente?
14 Manera a ser señalá anteriormente, ora hende creyente ta pone Dios na promé lugá, nan ta trata pa keda cu nan casá incrédulo i hopi biaha nan por yuda nan drenta den e fila pa salbacion. Asta ora ámbos partner ta creyente, nan matrimonio por ta leu for di ideal. Debí na inclinacionnan pecaminoso, esposo i esposanan no semper tin pensamentunan amoroso pa cu otro. (Romanonan 7:19, 20; 1 Corintionan 7:28) Algun asta ta bai asina leu pa busca moda di haña un otro casá, aunke nan no tin base bíblico pa divorcio. (Mateo 19:9; Hebreonan 13:4) Nan ta razoná cu pa nan esaki ta mihó, cu e boluntad di Dios pa esposo i esposanan keda huntu ta demasiado difícil. (Malakías 2:16; Mateo 19:5, 6) Esaki indudablemente ta un otro caso di pensa pensamentu humano mas bien cu esnan di Dios.
15. Pakico poniendo Dios na promé lugá ta un proteccion?
15 Ta ki un proteccion pa pone Dios na promé lugá! Parehanan casá cu ta haci esei lo purba keda huntu i resolvé nan problemanan aplicando e conseho dje Palabra di Dios. Asina nan ta evitá tur sorto di dolor di curason cu ta resultá ora su boluntad ser ignorá. (Salmo 19:7-11) Esaki ta ser ilustrá dor di un pareha yong cu, ora nan tabata na punto di divorciá, a dicidí na sigui e conseho bíblico. Añanan despues ora e esposa a refleccioná riba e goso cu e tabatin den su matrimonio, el a bisa: “Mi mester cai sinta i yora ora mi considerá e posibilidad di cu mi por tabata bibando separá for di mi esposo tur e añanan aki. E ora ei mi ta haci oracion na Jehova Dios i gradicié pa su conseho i guia cu a trece nos huntu den un relacion asina felis.”
Esposo i Esposa—Imitá Cristo!
16. Ki ehempel Jesus a pone pa tantu esposo como esposanan?
16 Jesus, kende semper a pone Dios na promé lugá, a pone un ehempel maraviyoso pa tantu esposo como esposanan, i nan ta haci bon pa presta atencion cuidadoso na dje. Esposonan ta ser instá pa imitá e manera cu Jesus ta ehercé tierno hefatura riba e miembronan dje congregacion cristian. (Efesionan 5:23) I esposanan cristian por siña for di Jesus su ehempel intachabel di sumision na Dios.—1 Corintionan 11:3.
17, 18. Den ki maneranan Jesus a pone un ehempel excelente pa esposonan?
17 Bijbel ta manda: “Esposonan, sigui stima boso esposanan, mescos cu Cristo tambe a stima e congregacion i a entregá su mes p’e.” (Efesionan 5:25) Un manera importante cu Jesus a demostrá su amor pa su congregacion di siguidornan tabata dor di ser nan amigu íntimo. “Mi a yama boso amigu,” Jesus a bisa, “pasobra tur loke mi a tende di mi Tata mi a duna di conocé na boso.” (Juan 15:15) Pensa riba tur e tempu cu Jesus a dedicá papiando cu su disipelnan—e hopi, hopi consideracionnan cu e tabatin cu nan—i dje confiansa cu el a pone den nan! Esei no ta un ehempel excelente pa esposonan?
18 Jesus a mustra berdadero interes den su disipelnan i tabatin cariño genuino pa nan. (Juan 13:1) Ora su siñansanan no tabata muchu cla pa nan, cu pacenshi e tabata saca tempu den privá pa clarificá asuntunan. (Mateo 13:36-43) Esposonan, e bienestar spiritual di bo esposa ta di mésun importancia pa bo? Bo ta dedicá tempu na dje, haciendo sigur cu boso tur dos tin berdadnan bíblico claro den mente i curason? Jesus a compañá su apostelnan den e ministerio, tal bes entrenando nan cada un individualmente. Abo ta compañá bo esposa den e ministerio, compartiendo den e bishitanan di cas-pa-cas i den conducí studionan di Bijbel?
19. Con e manera cu Jesus a trata cu e repetido debilidadnan di su apostelnan ta pone un ehempel pa esposonan?
19 Specialmente den tratamentu cu e imperfeccionnan di su apostelnan Jesus a duna un ehempel sobresaliente pa esposonan. Durante su último cena cu su apostelnan, e por a detectá un spiritu di rivalidad cu a keda bini bek. El a criticá nan severamente? No, pero humildemente el a laba pia di cada un. (Marco 9:33-37; 10:35-45; Juan 13:2-17) Abo ta mustra tal pacenshi cu bo esposa? En bes di keha tocante un debilidad cu ta keda bini bek, bo ta purba yud’é cu pacenshi i alcansá su curason dor di bo ehempel? Cu tur probabilidad esposanan lo reaccioná na tal compasion amoroso, mescos cu e apostelnan a haci cu tempu.
20. Kico esposanan cristian no mester lubidá nunca, i ken ta duná como un ehempel pa nan?
20 Esposanan tambe mester considerá Jesus, kende nunca a lubidá cu “e cabes di Cristo ta Dios.” Semper el a someté su mes na su Tata celestial. Di manera similar, esposanan no mester lubidá cu “e cabes di un muher ta e homber,” sí, cu nan esposo ta nan cabes. (1 Corintionan 11:3; Efesionan 5:23) Apostel Pedro a urgi esposanan cristian pa considerá e ehempel di “muhernan santu” dje tempunan mas promé, specialmente esun di Sara, kende “tabata obedecé Abraham, yamand’e ‘señor.’ ”—1 Pedro 3:5, 6.
21. Pakico e matrimonio di Abraham i Sara tabata un éxito pero esun di Lot i su esposa un fracaso?
21 Sara evidentemente a entregá un cas comfortabel den un stad próspero pa biba den tentnan den un tera stranhero. Pakico? Pa motibu cu el a preferá e estilo di bida ei? Probablemente cu no. Pa motibu cu su esposo a pidié p’e bai? Esaki sin duda tabata un factor, ya cu Sara a stima i a respetá Abraham pa motibu di su cualidadnan piadoso. (Génesis 18:12) Pero e motibu principal cu el a bai huntu cu su esposo tabata su amor pa Jehova i su deseo sincero pa sigui e instruccion di Dios. (Génesis 12:1) El a haña deleite den obedencia na Dios. En cambio, Lot su esposa a vacilá pa haci e boluntad di Dios i p’esei a wak atras cu anhelo n’e cosnan cu el a laga atras den su stad di residencia na Sódoma. (Génesis 19:15, 25, 26; Lucas 17:32) Ki un fin trágico n’e matrimonio ei—tur esei pa motibu dje esposa su desobedencia na Dios!
22. (a) Ki examinacion propio miembronan di famia lo haci sabiamente? (b) Kico nos lo considerá den nos siguiente estudio?
22 Pues como esposo of esposa, ta vital pa bo puntra bo mes, ‘Dios ta bini na promé lugá den nos famia? Berdaderamente mi ta haci esfuerso pa cumpli cu e papel di famia cu Dios a otorgá na mi? Mi ta haci un esfuerso sincero pa stima mi casá i yud’é gana of mantené un bon relacion cu Jehova?’ Den mayoria famia tin yu tambe. Nos lo considerá siguientemente e papel di mayornan i e necesidad pa nan tur dos i nan yunan pone Dios na promé lugá.
Bo Ta Corda?
◻ Kico por ta e consecuencianan di Jesus su siñansanan pa hopi famia?
◻ Ki recompensa miles di cristian firme a ricibí?
◻ Kico lo yuda casánan evitá inmoralidad i divorcio?
◻ Kico esposonan por siña for dje ehempel di Jesus?
◻ Con esposanan por contribuí na un matrimonio felis?
[Plachi na página 10]
Con Sara a contribuí n’e éxito di su matrimonio?