Yehova Ta Konsolá Nos den Tur Nos Pruebanan

1, 2. Kon Yehova ta konsolá nos ora nos ta pasa den prueba, i ki siguransa su Palabra ta duna nos?

UN RUMAN hòmber yòn, ku nos lo yama Eduardo, a papia tokante su preokupashonnan ku Stephen, un ansiano kasá di mas edat. Eduardo tabata pensa riba e teksto di 1 Korintionan 7:28, ku ta bisa en parte: “Esnan ku kasa lo haña nan ku difikultat den bida.” Eduardo a puntra Stephen: “Kiko e ‘difikultat’ akí ta, i kon lo mi trata kuné si mi kasa?” Promé ku Stephen a kontest’é, el a bisa Eduardo pa tuma nota di algu otro ku apòstel Pablo a skirbi, esta, ku Yehova ta e “Dios di tur konsuelo, kende ta konsolá nos den tur nos tribulashonnan,” òf difikultatnan.—2 Kor. 1:3, 4.

² Yehova en bèrdat ta un Tata ku ta stima nos, i e ta konsolá nos ora nos ta pasa den difikultat. Kisas bo mes a yega di eksperensiá kon Dios a sostené bo i guia bo, hopi biaha mediante su Palabra. Nos por tin sigur ku, meskos ku su sirbidónan den pasado, e ke lo mihó pa nos tambe.—Lesa Yeremías 29:11, 12.

 3. Ki preguntanan nos lo analisá?

³ Ta di komprondé ku nos lo ta den un mihó posishon pa trata ku difikultat si nos por identifiká e kousanan di nos problema- òf pruebanan. I esei ta konta tambe pa e difikultatnan ku nos por haña den matrimonio òf den bida di famia. Kiko ta algun kos ku por trese e ‘difikultatnan den bida’ ku Pablo a papia di dje? Ki ehèmpel di tempu bíbliko i di nos tempu por yuda nos haña e konsuelo ku nos tin mester di dje? E kontesta riba e preguntanan ei por yuda nos trata ku difikultat.

4, 5. Kiko por kousa algun “difikultat den bida”?

⁴ Ora Yehova a kasa e promé sernan humano, el a bisa: “Un hòmber lo bandoná su tata i su mama i lo uni ku su esposa. I nan lo bira ún karni.” (Gén. 2:24) Pero, komo ku hende ta imperfekto, kasamentu i formamentu di un famia nobo por kousa tenshon. (Rom. 3:23) Generalmente, e outoridat di e mayornan ta ser remplasá pa e outoridat di e esposo. Dios a hasi e esposo kabes di su kasá. (1 Kor. 11:3) Algun esposo ku esposa ta haña ku esei no ta nada fásil. Segun e Palabra di Dios, un esposa mester aseptá ku awor e mester sigui guia di su kasá en bes di su mayornan. E relashon ku e suegronan por bira tenso i esei por kousa difikultat pa un pareha resien kasá.

⁵ Ademas, un pareha por haña mas ansiedat ora e esposa bisa su kasá: “Mi ta na estado.” Aunke e pareha ta kontentu ku nan ta bai haña un yu, hopi biaha nan ta preokupá ku e komplikashonnan di salú ku por surgi durante òf despues di embaraso. I tambe tin e gastunan pa tene kuenta kuné, tantu esnan mesora komo esnan di largu plaso. Anto e pareha mester hasi mas ahuste ainda ora e bebi nase. Un mama kisas ta dediká mayoria di su tempu i atenshon na kuida su yu. Hopi esposo ta sinti ku nan esposa no ta duna nan mes tantu atenshon ku ántes pasobra e ta okupá ku su bebi. Di otro banda, e tata tambe ta haña mas responsabilidat pasobra awor e tin un miembro di famia nobo ku e tin ku kuida i perkurá p’e.

6-8. Kon un pareha kasá por sinti nan si nan no por haña yu, aunke nan ta deseá esei?

⁶ Pero tin un otro tipo di difikultat ku algun pareha kasá ta haña nan kuné. Nan tin masha gana di haña yu, pero nan no por haña yu. Ora e esposa no por sali na estado, kisas e ta sintié hopi kibrá. Klaru ku ni matrimonio ni hañamentu di yu no ta un garantia ku un hende lo no tin preokupashon, pero si un esposa su deseo pa haña yu no kumpli, esei por ta un forma di “difikultat den bida” p’e. (Pro. 13:12) Den tempu di Beibel, si un muhé tabata steril, esei tabata un bèrgwensa p’e i pa su famia. Raquel, kasá di Yakòb, a keda hopi deprimí ora el mira ku su ruman muhé sí por a haña yu. (Gén. 30:1, 2) Den paisnan kaminda ta un kustumber pa hende tin famia grandi, hopi biaha nan ta puntra e misioneronan ku ta sirbi einan dikon nan no tin yu. Asta ora e misioneronan splika ku takto dikon nan no tin yu, tòg tin biaha e hendenan ta bisa nan: “Wèl, nos ta hasi orashon pa boso.”

⁷ Òf wak e ehèmpel di un ruman muhé na Inglatera ku tabatin masha gana di haña yu, pero kende su deseo no a kumpli. Despues ku el a yega e edat ku e no por a haña yu mas, el a atmití ku el a sintié hopi kibrá pasobra el a realisá ku su deseo lo no por kumpli den e sistema di kosnan akí. E ora ei e ku su kasá a disidí di adoptá un yu. Sinembargo, el a bisa: “Tòg mi a pasa den un periodo hopi tristu, komo si fuera ta rou mi tabata tene. Mi tabata sa ku adoptá un yu lo no ta meskos ku duna lus na mi propio yu.”

⁸ Ta bèrdat ku Beibel ta bisa ku un muhé kristian “lo keda protehá pa medio di hañamentu di yu.” (1 Tim. 2:15) Pero esaki no ta nifiká ku hañamentu di yu ta hiba na bida eterno. Mas bien, e echo ku un hende muhé tin yu pa kuida i tambe tin otro responsabilidatnan di famia pa atendé por yud’é evitá di kai den e kustumber di hasi redu i mete den asuntu di otro hende. (1 Tim. 5:13) Sinembargo, tòg e por hañ’é ku difikultat den matrimonio i bida di famia.

 9. Ki prueba difísil algun hende ta pasa aden?

⁹ Ora nos ta pensa riba e difikultatnan relashoná ku matrimonio, tin unu ku no ta semper nos ta pensa ariba: morto di un ser kerí. Sí, hopi hende a pèrdè nan kasá stimá den morto. Esaki ta un prueba ku hopi hende no a ferwagt ku nan lo pasa aden den e sistema di kosnan akí. Kristiannan ta kere firmemente den e promesa di Hesus tokante un resurekshon den futuro. (Huan 5:28, 29) Ki efekto e speransa ei tin riba e kasá ku a keda atras? E ta un gran fuente di konsuelo. Esaki ta un otro manera ku nos Tata kariñoso, mediante su Palabra, ta duna sosten i konsuelo na hende ku ta pasa den difikultat. Ban wak kon algun sirbidó di Dios a eksperensiá e konsuelo ku Yehova ta proveé i kon nan a benefisiá di dje.

10. Kon Ana a haña alivio pa su angustia? (Wak e promé plachi.)

¹⁰ Ana, e esposa stimá di Elkana, a pasa den un prueba difísil: e tabata steril, miéntras ku Penina, e otro esposa di Elkana, sí tabata haña yu. (Lesa 1 Samuel 1:4-7.) Aña aden aña afó, Penina tabata hasi chèrchi di dje, i esei a pone Ana sintié hopi angustiá. Ma kiko el a hasi e ora ei? El a aserká Yehova pa buska konsuelo serka dje. Sí, el a hasi un orashon largu na Yehova. El a spera ku Yehova lo a kumpli ku su deseo? Probablemente. Sea kual sea e kaso, “su kara no tabata tristu mas.” (1 Sam. 1:12, 17, 18) El a konfia ku Yehova por a kumpli ku su deseo di dun’é yu òf konsol’é den un òf otro manera.

11. Kon orashon por konsolá nos?

¹¹ Miéntras ku nos ta imperfekto i ta biba den e sistema akí ku ta bou di kontrol di Satanas, nos lo sigui haña nos ku prueba i difikultat. (1 Huan 5:19) Pero ki trankilisante ta pa sa ku Yehova ta e “Dios di tur konsuelo”! Un manera ku nos por haña yudansa pa trata ku nos prueba- òf difikultatnan ta mediante orashon. Ana a deshogá su mes serka Yehova. Di igual manera, ora nos ta pasa den difikultat, nos mester hasi mas ku djis bisa Yehova kon nos ta sinti nos mes. Nos mester suplik’é, sí, nos tin ku hasi orashon ferviente i di kurason i asina lag’é sa kon nos ta sinti nos mes.—Flp. 4:6, 7.

12. Kiko a yuda e biuda Ana haña goso?

¹² Asta si nos ta sinti un bashí grandi den nos bida, sea ta pa motibu ku nos no por haña yu òf nos a pèrdè nos kasá den morto, tòg nos por haña konsuelo. Den tempu di Hesus, e profetisa Ana a pèrdè su kasá den morto despues di tabatin solamente shete aña kasá. Beibel no ta menshoná ku e tabatin yu. Kiko Ana tabata hasi ainda ku 84 aña di edat? Lukas 2:37 ta bisa: “Nunka e no tabata falta tèmpel i tabata rindi sirbishi sagrado di dia i anochi, kumpliendo ku yunamentu i hasiendo orashon ferviente.” Sí, Ana a haña konsuelo i goso ora e tabata sirbi Yehova.

13. Duna un ehèmpel di kon un bon amigu por konsolá nos ora nos famia no por duna nos e konsuelo ei.

¹³ Ora nos ta asosiá estrechamente ku nos rumannan, nos ta haña berdadero amigu. (Pro. 18:24) Paula ta kòrda kon tristu el a sintié ora ku su mama a bai for di e bèrdat tempu e tabatin apénas sinku aña. No tabata fásil pa trata ku e prueba akí. Pero ku tempu, el a haña hopi animashon ora Ann, un pionero di su kongregashon, a mustra interes personal den su bienestar spiritual. Paula ta konta: “Maske Ann no ta mi famia, su amor i interes den mi a yuda mi hopi. Esei a yuda mi sigui sirbi Yehova.” Paula a sigui sirbi Yehova fielmente. Ademas, e ta masha kontentu ku e por sirbi Yehova huntu ku su mama atrobe. Ann tambe ta masha kontentu ya ku e tabata manera un mama spiritual pa Paula.

14. Ki bendishonnan nos ta haña ora nos ta konsolá otro hende?

¹⁴ Ta interesante pa nota ku ora nos mustra amor i interes den otro hende, nos por libra nos mes di algun di nos sintimentunan negativo. Ruman muhénan, sea kasá òf soltero, sa ku nan ta haña hopi goso ora nan kompartí e bon notisia komo kolaboradónan di Dios. Nan meta ta pa onra Dios, hasiendo su boluntat. Algun ruman muhé ta asta konsiderá trahamentu den sirbishi komo un terapia. Sin duda, nos tur ta kontribuí na e union di e kongregashon ora nos mustra interes den otro hende, tantu den hende den teritorio komo den nos rumannan. (Flp. 2:4) Apòstel Pablo tabata un ekselente ehèmpel. El a bira manera “un mama” pa e rumannan di e kongregashon di Tesalónika. Ademas, e tabata manera un tata spiritual.—Lesa 1 Tesalonisensenan 2:7, 11, 12.

15. Ken tin e responsabilidat prinsipal pa siña yu e bèrdat?

¹⁵ Algu ku meresé nos atenshon ta konsuelo i yudansa ku nos ta duna famianan. Tin biaha, hende nobo den e kongregashon ta pidi publikadónan maduro yuda nan pa siña nan yunan e bèrdat, asta pa studia Beibel ku e yunan. Segun Beibel, ta e mayornan tin e responsabilidat prinsipal pa siña i entrená nan yunan. (Pro. 23:22; Efe. 6:1-4) Den algun kaso, tin mayor ku tin mester di yudansa den esei i lo apresiá e yudansa ei mashá. Pero esei no ta kita e mayornan su responsabilidat. P’esei ta importante pa nan papia ku nan yunan tur ora bai.

16. Kiko nos tin ku tene kuenta kuné ora nos ta studia ku mucha?

¹⁶ Si un mayor disidí pa laga un ruman studia ku su yunan, e ruman ei no mester tuma e ròl di e mayor over. Asta ora pidi un Testigu pa studia ku yu di hende ku no ta interesá den e bèrdat, e Testigu mester tene na mente ku ora e ta duna yudansa spiritual na e mucha, esei no ta hasié su mayor. I si un Testigu mester dirigí tal estudio, ta sabí pa hasi esei ora e mucha su mayornan ta na kas òf akompañá pa un otro kristian maduro òf den un área públiko apropiá. Asina niun hende lo no por malinterpretá e situashon. Ta di spera ku e mayornan ku tempu lo kumpli ku e responsabilidat ku Dios a duna nan pa kuida nan yunan den sentido spiritual.

17. Kon yunan por bira un fuente di konsuelo?

¹⁷ Hóbennan ku a siña stima e Dios berdadero i ku ta sigui su konseho por bira un fuente di konsuelo pa nan famia. Nan ta hasi esaki ora nan ta mustra rèspèt na nan mayornan i ta duna yudansa material i spiritual. Promé ku e Diluvio, Lamèk, un desendiente di Sèt, tabata adorá Yehova. El a bisa tokante su yu Noe: “Esun akí lo konsolá nos den nos labor i den e trabou duru di nos mannan, pa motibu di e tera ku SEÑOR a maldishoná.” E profesia ei a kumpli ora Dios a kita e maldishon for di e tera. (Gén. 5:29; 8:21) Den nos tempu, yunan ku keda leal na Yehova por konsolá nan famia i yuda nan wanta prueba i sobrebibí un destrukshon mas grandi ku e Diluvio.

18. Kiko por yuda nos perseverá apesar di kualke prueba ku nos ta enfrentá?

¹⁸ Orashon, meditashon riba ehèmpelnan den Beibel i asosiashon estrecho ku e pueblo di Yehova ta yuda miónes di hende awe haña konsuelo den tur prueba ku nan por ta pasando aden. (Lesa Salmo 145:18, 19.) E echo ku nos sa ku Yehova ta e Fuente di konsuelo duradero sigur lo yuda nos wanta ku kurashi kualke prueba ku nos por enfrentá, sea aworakí òf den futuro.