Kon Bo Por Tin un Matrimonio Fuerte i Felis?

1-3. Kiko ta e difikultatnan ku parehanan kasá ta enfrentá? (Wak e promé plachi.)

“SI DI bèrdat bo ta hasi esfuerso i ta mustra ku bo ke pa bo matrimonio bai bon, Yehova ta bendishon’é.” Esei ta loke un esposo ku tin 38 aña felismente kasá a bisa. Sí, esposo- i esposanan por ta masha felis huntu, i den tempu difísil nan por apoyá otro.—Pro. 18:22.

² Ta normal ku de bes en kuando parehanan kasá ta haña nan ku difikultat den bida. Beibel ta yama esei “tribulashon den karni.” (1 Kor. 7:28; wak nota) Dikon esei ta sosodé? Tin vários motibu. Pa kuminsá, problema- i preokupashonnan di tur dia por kousa tenshon den un matrimonio. Ademas, tantu e esposo komo e esposa ta imperfekto i tin biaha nan por bisa òf hasi algu ku ta hùrt sintimentu di otro, òf nan no ta komuniká bon ku otro i esaki por hiba na malkomprondementu. (Sant. 3:2, 5, 8) Banda di esei, hopi pareha tin problema pa kombiná un trabou ku ta eksigí hopi di nan ku e responsabilidat di kuida yu. Tambe nan tin ku trata ku problema finansiero, malesa òf otro difikultat. Strès i kansansio ta akumulá i tur esei ta pone ku no ta fásil pa nan saka e tempu nesesario pa fortalesé nan matrimonio. Pokopoko, nan amor i rèspèt pa otro por kuminsá mengua. Pero no esei so, personanan kasá ta enfrentá un otro peliger. Ta trata aki di loke Beibel ta yama “e obranan di karni,” i esei ta enserá inmoralidat seksual, kondukta sinbèrgwensa, hostilidat, bringamentu, yalursheit, atake di rabia i pleitamentu. E kosnan ei por kibra e fundeshi di asta un matrimonio ku ta parse fuerte.—Gal. 5:19-21.

³ Loke ta empeorá e asuntu ta ku nos ta biba den “e último dianan” i e hendenan rònt di nos hopi biaha ta egoista i tin otro mal aktitut ku por perhudiká un matrimonio. (2 Tim. 3:1-4) Por último, matrimonionan tin ku resistí atake di un enemigu malisioso ku ta determiná na kibra nan union. Apòstel Pedro a spièrta nos: “Boso atversario, Diabel, ta kana rònt manera un leon ku ta grita, buskando ken e por habraká.”—1 Ped. 5:8; Rev. 12:12.

 4. Kon un pareha por tin un matrimonio sólido i felis?

⁴ Un ruman hòmber na Hapon a atmití: “Mi tabata bou di hopi tenshon pa motibu di nos situashon ekonómiko. Anto komo ku ami ku mi kasá no tabata ègt komuniká ku otro, e tambe a haña hopi strès. Pa kolmo, el a bira hopi malu poko tempu pasá. Tur e strès akí a pone ku tin biaha nos tabata klèsh ku otro.” Ta bisto ku den matrimonio tin algun problema ku nos no por evitá, pero ku Yehova su yudansa, nos por superá nan i disfrutá di un relashon sólido i felis. (Lesa Salmo 127:1.) Laga nos analisá sinku faktor ku, meskos ku blòki pa traha kas, por yuda nos konstruí un matrimonio fuerte i duradero. Tambe nos lo wak kon amor ta e semènt ku ta pega e blòkinan ei na otro.

5, 6. Kiko esposo i esposa por hasi pa inkluí Yehova den nan matrimonio?

⁵ Si un esposo i esposa ta leal i sumiso na Yehova, Esun ku a krea matrimonio, nan relashon lo tin un fundeshi sólido. (Lesa Eklesiástes 4:12.) Kon nan por inkluí Yehova den nan matrimonio? Nan por hasi esei siguiendo su guia i konseho. Beibel a bisa di e pueblo di Dios di antigwedat: “Bo orea lo tende un palabra tras di bo ta bisa: ‘Esaki ta e kaminda, kana den dje,’ ki ora ku boso bira na man drechi òf na man robes.” (Isa. 30:20, 21) Awe, parehanan ta “tende” loke Yehova ta bisa ora nan ta lesa su Palabra huntu. (Sal. 1:1-3) Tambe nan por fortalesé nan matrimonio si nan sòru pa nan programa di Adorashon Komo Famia ta agradabel i edifikante. Un otro faktor importante ta pa nan dos hasi orashon huntu tur dia. Asina nan ta konstruí un matrimonio ku por resistí e atakenan di e mundu akí di Satanas.

⁶ Gerhard, di Alemania, a bisa: “Ki ora ku nos tin un problema ku otro òf un malkomprondementu ku ta kita nos goso, e konseho for di e Palabra di Dios ta yuda nos tene pasenshi i pordoná. E dos kualidatnan akí ta indispensabel pa un matrimonio bai bon.” Ora tantu e esposo komo e esposa ta hasi tur nan posibel pa inkluí Dios den nan matrimonio i ta partisipá huntu den aktividatnan spiritual, nan relashon ku Dios i ku otro ta bira mas fuerte, i nan lo ta mas felis.

 7. Kon un esposo mester ehersé su outoridat komo kabes?

⁷ E manera ku un esposo ta dirigí su famia por yuda konstruí un matrimonio fuerte i felis. Beibel ta bisa: “Kabes di tur hòmber ta Kristu; kabes di muhé ta hòmber.” (1 Kor. 11:3) Den e konteksto di e deklarashon akí, Pablo a splika kon esposonan mester ehersé nan outoridat komo kabes i dirigí nan matrimonio, esta, meskos ku Kristu a dirigí su disipelnan. Hesus nunka tabata kruel ni brutu. Al kontrario, semper e tabata amoroso, amabel, rasonabel, di genio suave i humilde.—Mat. 11:28-30.

 8. Kon un esposo por gana e amor i rèspèt di su kasá?

⁸ Un esposo kristian no tin nodi di kòrda su kasá kada bes ku e mester respet’é. Mas bien, e esposo ta trata su esposa ku “konosementu,” es desir, ku konsiderashon i komprenshon. E ta duna e esposa “onor manera na un poron mas frágil, esun femenino.” (1 Ped. 3:7; wak nota) Tantu den públiko komo den privá, un esposo mester papia ku rèspèt ku su kasá i tene konsiderashon kuné. Na e manera ku e ta trata i papia ku su esposa, e hòmber ta mustra ku su kasá ta presioso p’e. (Pro. 31:28) Ora un esposo ta dirigí su matrimonio na e manera ei, e ta gana e amor i rèspèt di su kasá, i Yehova lo bendishoná nan matrimonio.

 9. Kon un esposa ta demostrá ku e ta humilde i sumiso?

⁹ Algu ku por yuda nos humiá nos mes “bou di e man poderoso di Dios” ta si nos amor p’e ta sin reserva i basá riba su prinsipionan. (1 Ped. 5:6) Kon un esposa por demostrá ku e ta respetá e outoridat di Yehova? Un manera ta di apoyá su kasá i kooperá kuné. Beibel ta bisa: “Esposanan, sea sumiso na boso esposo, ya ku esei ta apropiá den bista di Señor.” (Kol. 3:18) Klaru ku no ta tur desishon di un esposo ta kai na agrado di su kasá. Pero tanten ku e desishonnan ei no ta bai kontra e leinan di Dios, un esposa sumiso ta dispuesto pa kooperá ku su kasá.—1 Ped. 3:1.

10. Dikon sumishon motivá pa amor ta asina importante?

¹⁰ Yehova a duna esposa un papel masha balioso den e matrimonio. E ta e “kompañera [òf, partner, sosio]” di su esposo. (Mal. 2:14) Ora e pareha tin ku tuma un desishon, e esposa por ekspresá ku rèspèt kiko e ta pensa i kon e ta sintié, sin imponé su opinion. Aunke e ta sumiso, su aporte ta balioso, i p’esei e esposo sabí ta skuch’é ku atenshon. (Pro. 31:10-31) Ora amor ta motivá un esposa pa ta sumiso, esei ta kontribuí na felisidat, pas i armonia den e famia. Di e manera ei, tantu e esposo komo e esposa lo tin e satisfakshon di sa ku nan matrimonio ta agradá Yehova.—Efe. 5:22.

11. Dikon pordon ta masha importante?

¹¹ Un di e blòkinan krusial pa konstruí un matrimonio duradero ta pordon. Ora parehanan ta hasi nan bèst pa biba bon ku otro i ta “pordoná otro libremente,” nan relashon komo pareha ta bira mas fuerte. (Kol. 3:13) Di otro banda, nan matrimonio ta bira suak ora nan ta keda kòrda e fayonan di pasado i ta usa esakinan pa ataká otro kuné. Meskos ku sker den un muraya ta suak e, asina rabia i renkor ta suak e matrimonio, i ta bira mas i mas difísil pa un pareha pordoná otro i kooperá ku otro. Ma si nan ta dispuesto pa pordoná otro libremente, meskos ku Yehova ta pordoná nan, nan matrimonio ta bira muchu mas fuerte.—Mik. 7:18, 19.

12. Kon amor ta tapa “un multitut di piká”?

¹² Amor berdadero “no ta keda kòrda e malu ku hende a hasié”; mas bien, e “ta tapa un multitut di piká.” (1 Kor. 13:4, 5; lesa 1 Pedro 4:8.) Ku otro palabra, ora nos ta stima un hende, nos lo no pone un límite na e kantidat di biaha ku nos ta pordon’é. Ora apòstel Pedro a puntra kuantu biaha e mester pordoná un hende, Hesus a kontest’é: “Te ku 77 biaha.” (Mat. 18:21, 22) Kiko Hesus tabata ke men? Wèl, e kier a mustra ku no tin un límite na e kantidat di biaha ku un kristian mester pordoná otro.—Pro. 10:12.a

13. Kiko nos por hasi si nos tin problema pa pordoná?

¹³ Annette, di Alemania, a bisa: “Si un pareha no gusta pordoná otro, renkor i deskonfiansa ta krese, i esei ta manera venenu pa un matrimonio. Ma ora boso ta dispuesto pa pordoná otro, esei ta hasi e lasonan matrimonial mas fuerte i ta hala boso mas serka di otro.” Kiko nos por hasi si nos tin problema pa pordoná? Un kos ku por yuda nos ta di kultivá un aktitut positivo i apresiativo. Konsentrá riba e kosnan bon di otro, i elogiá otro pa esei. (Kol. 3:15) Komo resultado, nos lo tin pas mental, nos lo ta mas uní i Yehova lo bendishoná nos.—Rom. 14:19.

14, 15. (a) Kiko ta e Regla di Oro? (b) Kon e Regla di Oro por yuda un matrimonio?

¹⁴ Nos tur gusta pa hende trata nos ku dignidat i rèspèt. Nos ta apresiá ora hende ta skucha nos i ta tene kuenta ku nos sintimentunan. Pero kasi sigur bo a yega di tende un persona bisa: “Mi ta bai hasi kuné manera el a hasi ku mi!” Tin biaha nos por komprondé dikon hende ta reakshoná asina, pero Beibel ta bisa nos: “No bisa: ‘Lo mi hasi kuné meskos ku el a hasi ku mi.’” (Pro. 24:29) Anto Hesus a siña nos un mihó manera pa atendé ku hende ku trata nos malu. E norma ku Hesus a rekomendá ta konosí serka hopi hende komo e Regla di Oro, esta, “manera boso ke pa hende hasi ku boso, boso mester hasi meskos ku nan.” (Luk. 6:31) Loke Hesus tabata ke men ta ku nos mester trata hende manera nos lo gusta pa nan trata nos, i no djis paga malu ku malu. Den matrimonio, esaki ta nifiká ku nos tin ku hinka den e relashon loke nos lo kier saka for di dje.

¹⁵ Parehanan kasá ta hasi nan relashon mas fuerte ora nan ta pendiente di e sintimentunan di otro. Un esposo na Suráfrika a bisa: “Nos ta purba di trata otro segun e Regla di Oro. Di mes sa tin biaha ku nos ta bira iritá, pero nos ta hasi nos bèst pa trata otro manera nos lo ke ser tratá, esta, ku rèspèt i dignidat.”

16. Kiko un pareha kasá no mester hasi nunka ku otro?

¹⁶ No ta bon pa nos papia ku otro hende tokante e defektonan di nos kasá ni keda keha tokante e kosnan di nos kasá ku nos no gusta; no hasié ni sikiera den wega. Kòrda ku matrimonio no ta un kompetensia pa mira ken ta mas fuerte, ken por grita mas duru ni ken por papia e palabranan di mas skèrpi. Klaru ku tin biaha nos kasá ta hasi algu ku ta iritá nos, ya ku nos tur ta imperfekto. Pero esei no ta duna nos e derecho di hasi bofon di dje, brongos’é ni papia palabra skèrpi kuné òf, pió ainda, push’é òf dal e.—Lesa Proverbionan 17:27; 31:26.

17. Kon un esposo por biba segun e Regla di Oro?

¹⁷ Den algun kultura nan ta konsiderá un esposo ku ta maltratá su kasá un pal’i hòmber, pero Beibel ta bisa bon kla: “Esun ku no ta rabia lihé ta mihó ku e poderoso, i esun ku ta goberná su spiritu ta mihó ku esun ku ta kapturá un stat.” (Pro. 16:32) Un persona mester tin gran fortalesa moral p’e ‘goberná su spiritu,’ esta, p’e ehersé dominio propio. Si bo tin e fortalesa ei, bo ta imitando Hesukristu, e hòmber di mas importante ku a kana riba tera. Un esposo ku ta maltratá su kasá ku palabra òf ku sla no ta demostrá ku e ta un pal’i hòmber. Al kontrario, lo e pèrdè su relashon ku Yehova. Salmista David, kende tabata un hòmber fuerte i ku kurashi, a bisa: “Rabia, ma no hasi piká; meditá den bo kurason riba bo kama i keda ketu.”—Sal. 4:4.

18. Dikon ta asina importante pa sigui kultivá amor?

¹⁸ Lesa 1 Korintionan 13:4-7. Amor ta e kualidat di mas importante den un matrimonio. “Bisti tierno kompashon, bondat, humildat, suavedat i pasenshi. Pero, ademas di tur e kosnan akí, bisti amor, pasobra e ta e laso perfekto di union.” (Kol. 3:12, 14) Nos tur mester imitá e amor di sakrifisio propio ku Hesus a demostrá. E tipo di amor ei ta manera e semènt ku ta pega e blòkinan ku ta usa pa traha un matrimonio sólido i fuerte. Ora tin amor, e matrimonio por resistí kualke problema, sea ta e defekto- òf manianan iritante di bo kasá, malesa grave, problema ku sèn i kuestionnan ferfelu ku por surgi ku famianan di bo kasá.

19, 20. (a) Kon parehanan por konstruí un matrimonio fuerte i felis? (b) Kiko nos lo analisá den e siguiente artíkulo?

¹⁹ Pues, pa boso tin un bon matrimonio, boso mester stima otro masha hopi, keda fiel na otro i realmente hasi esfuerso pa boso union tin éksito. En bes di bandoná e matrimonio asina ku surgi un problema, e pareha mester ta desididu pa lucha pa mehorá nan relashon i hala mas serka otro i no djis keda soportá otro. Parehanan kasá ku ta stima otro i ta stima Yehova ta resolvé nan problemanan ku amor, pasobra “amor no ta kaba nunka.”—1 Kor. 13:8; Mat. 19:5, 6; Heb. 13:4.

²⁰ Den e “tempunan krítiko” akí ku nos ta biba aden ta masha difísil pa konstruí un matrimonio fuerte i felis. (2 Tim. 3:1) Ma ku Yehova su yudansa, esei ta posibel. Pero asina mes, parehanan tin ku lucha kontra un problema mas: e preshon di un mundu opseshoná ku sèks. Den e siguiente artíkulo nos lo analisá kon esposo i esposa por fortifiká nan defensa spiritual pa protehá nan matrimonio kontra inmoralidat.