Solteria den Tempu Económico Difícil

“MI TABATA kier a casa ora mi tabatin 25 aña di edad,” Chuks, kende ta biba na West Africa, a bisa. “Mi tabatin un mucha muher na bista, i e tabata interesá den mi. E problema tabata placa. Mi tata i mi ruman homber mayor no tabatin trabou, i mi rumannan mas yong tabata bai scol. Tur hende a dependé riba mi pa sostené e famia. Anto, pa haci asuntunan pió, mi mayornan a bira malu, i esei a nificá busca placa adicional pa paga gastunan médico.”

Chuks, un Testigo di Jehova, no kier a drenta matrimonio sin cu e por a sostené un esposa. E tabata conciente dje palabranan di Pablo hañá na 1 Timoteo 5:8: “Siguramente si un hende no ta percurá pa esnan cu ta di dje mes, i specialmente pa esnan cu ta miembro di su famia, el a nenga e fe i ta pió cu un persona sin fe.”

“Mi tabata traha duru,” Chuks a continuá, “pero e placa nunca tabata suficiente. Como resultado, nos plannan di matrimonio mester a ser posponé bes tras bes. Finalmente mi a ricibí un carta for dje mucha muher bisando cu un otro persona a acercá su tata pa pidi su man. E tata a bai di acuerdo. Algun dia despues cu su carta a bini, e famia tabatin e fiesta di compromiso.”

Mescos cu Chuks, hopi hende homber cristian a mira con nan plannan di matrimonio a fracasá of a ser posponé debí na mal condicionnan económico. Den hopi pais tin un inflacion exorbitante. Por ehempel, den un pais centroafricano, prijsnan a subi cu 8.318 porciento den un solo aña! Den algun pais ta difícil pa haña trabou. Hopi biaha tambe, e salarionan ta asina abou cu ta difícil pa un hende homber sostené su mes, muchu ménos un esposa i yunan. Un homber hóben na Nigeria a lamentá cu e trabou di tempu completo cu el a ser ofrecé den un fábrica a paga solamente NAƒ 32,00 pa luna—ménos cu e tarifa mensual di bus pa bai i regresá for di su lugá di empleo!

Hopi hende muher cristian soltero tambe ta hañando cu dificultadnan económico ta frustrando nan plannan di matrimonio. Hopi biaha nan mester traha pa sostené miembronan di nan famia. Algun hende homber soltero, mirando e situacion, ta indeciso tocante matrimonio, realisando cu e homber cu ta casa bou di circunstancianan asina mester gana suficiente pa sostené no solamente un esposa sino tambe su famia. Ayo, un graduado di universidad, ta lucha pa sostené su mes, su mama i su rumannan menor. “Mi kier casa,” e ta lamentá, “pero ora un mucha homber bini i mira mi lista di responsabilidad financiero, e ta core limpi bai.”

Apesar di dificultadnan financiero, hopi cristian soltero ta ricibí presion di parientenan i otro hende pa casa i haña yu. Tin biaha e presion aki ta haña un forma di bofon. Por ehempel, na cierto partinan di Africa, ta un custumber pa ora di saludá un adulto, puntra con ta bai cu su casá i yunan. Tin biaha, saludonan asina ta ser usá pa haci mofa di personanan soltero. John, kende ta cerca di yega su 50 aña, ta bisa: “Ora hende ta tentá mi i ta bisa, ‘Con ta cu bo esposa?,’ mi ta contestá, ‘E ta biniendo.’ E berdad ta, con mi por haña un esposa si mi no por sosten’é?”

Pa John i hopi otronan manera e, e situacion ta ser resumí den un proverbio di Yoruba: “Casamentu lihé no ta un cos pa gaba riba dje; e costo di cuminda ta e dificultad.”

Saca e Mihó Probecho di Bo Situacion

Ta ki fácil pa bira angustiá ora nos ta anhelá pa algu cu no ta ser realisá. Proverbionan 13:12 ta bisa: “Expectativa cu ta ser posponé ta haci e curason enfermo.” Tal bes ta asina bo ta sinti si bo ta anhelá pa casa pero financieramente no ta posibel pa hacié. Esaki por ta specialmente e caso si bo ta entre esnan kende apostel Pablo a describí como “cendí cu pasion.”—1 Corintionan 7:9.

Pa vence e problemanan kisas no ta fácil, pero tin cosnan cu bo por haci pa wanta i asta haña goso den bo situacion. Jesucristo, un homber no casá, a describí un principio di Bijbel práctico cu por yudá bo vence e decepcion cu ta resultá for di expectativa cu ta ser posponé. El a bisa: “Tin mas felicidad den duna cu tin den ricibí.”—Echonan 20:35.

Bo por aplicá esaki haciendo bon cosnan pa bo famia i pa otronan den e congregacion. Tal bes tambe bo por aumentá bo actividad den e ministerio cristian. Si bo ta ocupá bo mes completamente den dunamentu inegoista, bo por haña cu bo ta bira ‘determiná den bo curason, teniendo autoridad riba bo propio boluntad.’—1 Corintionan 7:37.

Un otro homber soltero, apostel Pablo, a skirbi e conseho útil aki: “Vigilá cuidadosamente p’e manera cu boso ta cana no ta manera hende imprudente sino manera hende prudente, cumprando e tempu oportuno pa boso mes, pasobra e dianan ta malu.” (Efesionan 5:15, 16) Hopi cristian soltero a haña ‘refrescamentu pa nan alma’ dor di usa nan tempu pa hala mas cerca Jehova mediante oracion, studio dje Palabra di Dios i participacion den reunionnan cristian. (Mateo 11:28-30) Si bo ta haci esaki, lo bo ta capas pa lucha cu mas éxito cu un situacion económico difícil. Esei tambe lo yudá bo manifestá asta mayor spiritualidad, haciendo bo un mihó esposo of esposa si bo casa despues di tempu.

Nunca lubidá cu Jehova ta interesá den tur esnan cu ta sirbié. E ta conciente dje problemanan i dificultadnan cu bo ta pasando aden. Nos amoroso Tata celestial sa tambe kico a lo largu ta mihó pa bo, tantu spiritualmente como emocionalmente. Si bo aplicá cu pacenshi e principionan di su Palabra den bo bida diario, bo por ta sigur cu lo e trece alivio na su debido tempu i satisfacé bo necesidad i deseonan den un manera cu ta pa bo bienestar eterno. Bijbel ta duna e siguransa: “Jehova mes lo no retené nada cu ta bon for di esnan cu ta cana sin culpa.”—Salmo 84:11.

Wak e Banda Positivo di Cosnan

Tene na mente, tambe, cu siguramente tin bentaha den solteria. Apostel Pablo a skirbi: “Esun . . . cu ta duna su birginidad den matrimonio ta haci bon, pero esun cu no ta dun’é den matrimonio lo haci mihó.”—1 Corintionan 7:38.

Pakico solteria ta “mihó” cu matrimonio? Pablo a splica: “E homber no casá ta ansioso p’e cosnan di Señor, con e por gana aprobacion di Señor. Pero e homber casá ta ansioso p’e cosnan di mundu, con e por gana aprobacion di su esposa, i e ta dividí. Ademas, e muher no casá, i e bírgen, ta ansioso p’e cosnan di Señor, p’e por ta santu tantu den su curpa como den su spiritu. Sin embargo, e muher casá ta ansioso p’e cosnan di mundu, con e por gana aprobacion di su esposo.”—1 Corintionan 7:32-34.

Cu otro palabra, cristiannan casá ta haci bon di interesá den e necesidadnan di nan partner i den loke nan partner ta gusta of laga. Pero cristiannan soltero por enfocá riba Jehova su sirbishi cu mas concentracion. Compará cu esnan cu ta casá, cristiannan soltero ta den un mihó posicion pa ta den “sirbishi constante na Señor sin distraicion.”—1 Corintionan 7:35.

Pablo no ta bisando cu e cristian soltero no tin distraicion. Si bo ta cargá cu problema económico, bo por sinti cu tin hopi cos cu ta menasá di distraí bo for di bo ministerio. No obstante, libertad personal pa sirbi Dios generalmente ta mas grandi p’e homber of muher no casá cu e ta pa esnan cu ta casá.

Aunke apostel Pablo ta recomendá solteria como e mihó proceder, e no a bisa cu ta malu pa casa. El a skirbi: “Asta si bo a casa, lo bo no a cometé ningun picá.” Sin embargo, el a spierta: “Esnan cu sí ta [casa] lo tin tribulacion den nan carni.”—1 Corintionan 7:28.

Kico e tabata kier men cu esei? Matrimonio ta trece cierto ansiedadnan. Den tempu económico difícil, tal tribulacion por incluí un tata su preocupacion tocante percurá pa su esposa i yunan. Malesa tambe por trece mas carga financiero i emocional p’e famia.

Pues aunke bo situacion kisas no ta loke bo ta preferá, kisas bo ta den un mihó posicion cu lo bo tabata si bo tabata casá i responsabel pa percurá pa yu. E dificultadnan cu bo ta enfrentá awor ta temporal; nan lo ser eliminá den Dios su sistema nobo—i algun tal bes asta mas pronto.—Compará cu Salmo 145:16.

Bo Por Amplia Bo Ministerio?

Aunke no ta tur hende por haci esei, algun tabata capas pa drenta e sirbishi di tempu completo apesar di problemanan financiero. Chuks, mencioná anteriormente, tabata cumpra i bende artículo di oficina pa sostené su famia. Rond di e mésun tempu cu su plannan di matrimonio a fracasá, el a ricibí un carta invitand’e pa haci trabou di construccion temporal n’e oficina local di sucursal dje Sociedad Watch Tower. Preocupá tocante placa, su ruman mayor a desanim’é pa bai. Pero Chuks a razoná cu Jehova a yud’é establecé su negoshi di bende cos, pues e mester pone interesnan di Reino na promé lugá i confia den Dios su abilidad pa percurá p’e. (Mateo 6:25-34) Ademas, el a pensa, tabata djis pa un periodo di tres luna.

Chuks a aceptá e invitacion i a pasa e negoshi over na su ruman. Seis aña despues, ainda Chuks ta den e sirbishi di tempu completo, e ta un anciano den e congregacion cristian i ta financieramente prepará pa casa. E ta lamentá e manera cu cosnan a desaroyá den su bida? Chuks ta bisa: “Mi tabata desapuntá tempu mi no por a casa ora mi tabata kier, pero cosnan realmente a resultá mihó pa mi. Mi a experenciá hopi goso i privilegio di sirbishi cu probablemente lo mi no a disfrutá di dje si mi a casa e tempu ei i a forma un famia.”

Siguridad pa Futuro

Den tempu difícil hopi hende ta busca e siguridad di matrimonio como un proteccion contra futuro dificultadnan financiero. Algun pais, cargá cu debe, ta ofrecé poco of ningun yudansa na esnan di edad avansá. Pues hopi biaha mayornan ta dependé riba nan famia, i specialmente riba nan yunan, pa sostené nan den nan behes. Consecuentemente, homber i muhernan soltero hopi biaha ta haña presion pa casa i haña yu, asta ora nan posicion financiero ta precario.

Pero matrimonio i hañamentu di yu no ta garantisá siguridad. Algun yu mundano no ta dispuesto pa percurá pa mayornan di edad, otronan no ta capas pa hacié, miéntras algun otro yu ta muri promé cu nan mayornan. Cristiannan ta busca siguridad primeramente otro caminda, teniendo na mente e promesa di Dios: “Di ningun manera lo mi bandoná bo ni di ningun manera desampará bo.”—Hebreonan 13:5.

Esnan cu a posponé matrimonio pa sirbi Jehova di tempu completo no a keda desampará. Christiana ta soltera i tin 32 aña di edad. El a sirbi como pionero regular na Nigeria p’e último nuebe añanan. E ta bisa: “Mi ta pone mi confiansa den Jehova, kende ta sigurá nos cu e nunca lo bandoná su sirbidornan. Su promesa ta mi confiansa. Jehova ta percurá pa mi tantu spiritualmente como materialmente. El a proba di ta un Tata generoso. Por ehempel, mi a muda pa traha pionero den un área unda e necesidad pa Testigonan ta grandi. Aunke tin poco comodidad, mi a siña anda. Ora mi a ser hospitalisá pa tífus, rumannan den mi ex-congregacion a basha bin pa yudá mi.

“Mi ta masha satisfecho cu e sirbishi di tempu completo. Mi ta mir’é como un privilegio magnífico pa ta trahando cu e Creador dje universo i cu asina tantu ruman rond mundu. Mi ta mira hopi hóben cu ta frustrá i desesperá como resultado dje cosnan cu ta sosodiendo rond di nan. Pa loke ta ami, mi bida ta yen di nificacion; mi ta mira futuro cu confiansa. Mi sa cu kedando cerca di Jehova ta e mihó solucion p’e problemanan cu nos ta enfrentá awe.”

Si bo ta anhelá pa casa pero no por debí na dificultad económico, no desanimá! Bo no ta so. Tin hopi cu ta wantando pruebanan similar cu e yudansa di Jehova. Saca lo mihó di bo situacion dor di dedicá bo mes na haci bon cosnan pa otro hende i dor di mehorá bo spiritualidad. Hala cerca Dios; lo e yudá bo pasobra e realmente ta interesá den bo.—1 Pedro 5:7.