Kore e Kareda ku Perseveransia

“Ku perseveransia laga nos kore e kareda ku ta poní nos dilanti.”​—HEB. 12:1.

1, 2. Ku kiko apòstel Pablo a kompará e bida kristian?

TUR aña, nan ta tene máratòn den hopi lugá. E asina yamá koredónan di taya ta partisipá den e kareda ku un solo meta: pa gana. Pa mayoria di e otro partisipantenan, simplemente yega na final di e kareda ta un logro ku nan lo ta masha orguyoso di dje.

² Beibel ta kompará e bida kristian ku un kareda. Apòstel Pablo a hala atenshon di e rumannan kristian di antiguo Korinto na esaki den e promé karta ku el a manda pa nan. El a skirbi: “Boso no sa ku esnan ku ta kore un kareda, ta tur ta kore, ma ku ta ún so ta risibí e premio? Kore di tal manera anto pa boso por gana.”​—1 Kor. 9:24.

 3. Kiko Pablo tabata ke men ora el a bisa ku ta un koredó so ta gana?

³ Akaso Pablo tabata ke men ku ta un di e kristiannan ei so lo a gana e premio di bida i ku tur sobrá lo a kore pòrnada? Klaru ku nò! E koredónan ku a kompetí tabata train pisá i hasi masha esfuerso ku e meta di bira ganadó. Pues, Pablo tabata ke pa e rumannan kristian tambe hasi tur nan esfuerso den nan afan pa alkansá bida eterno. Di e manera ei nan por tabatin e speransa di haña e premio di bida, pasobra den e kareda kristian ta tur ku terminá e kareda ta gana e premio ei.

 4. Kiko ta algun kos ku nos tin ku konsiderá en konekshon ku e kareda ku tin nos dilanti?

⁴ E palabranan ei ta un animashon pa tur ku ta den e kareda pa bida awe, pero a la bes nan ta pone nos pensa seriamente. Dikon? Pasobra e premio ta un premio sin igual, sea ku ta bida den shelu òf bida den Paradeis riba tera. Pero e kareda ta largu i pisá; a lo largu di e kaminda tin hopi opstákulo i kos ku ta kita nos atenshon i tambe peliger. (Mat. 7:​13, 14) Lamentablemente, algun sirbidó di Yehova a baha nan spit na mitar di kaminda, otronan a stòp di kore i algun asta a sali for di e kareda. Ki trampa i peliger tin den e kareda pa bida? Kon bo por evitá nan? Kiko bo por hasi pa terminá e kareda ei i asina gana?

Nos Mester Perseverá pa Nos Gana

 5. Kiko Pablo a splika na Hebreonan 12:1?

⁵ Den Pablo su karta na e kristiannan hebreo na Yerusalèm i Hudea, el a bolbe referí na algun rasgo di un kompetensia di korementu. (Lesa Hebreonan 12:1.) El a indiká no solamente e motibu pa partisipá den e kareda, sino tambe el a mustra kiko un hende mester hasi pa gana. Promé ku nos bai analisá e konseho inspirá ku Pablo a duna e kristiannan hebreo pa mira ki lès nos por saka afó, laga nos konsiderá kiko a motivá Pablo pa skirbi e karta i kiko e kier a animá su lektornan pa hasi.

 6. Ki sorto di preshon kristiannan a haña di e lidernan religioso?

⁶ E kristiannan di promé siglo, foral esnan ku tabata biba na Yerusalèm i Hudea, a konfrontá hopi prueba i difikultat. E lidernan religioso hudiu, kendenan ainda tabatin hopi influensia riba e pueblo, tabata pone hopi preshon riba e kristiannan. Kasi tres dékada promé, e lidernan akí a pone outoridatnan kondená Hesukristu komo un instigadó di rebelion i mat’é komo un kriminal. Anto nan no tabatin intenshon di stòp ku nan oposishon. Den e buki di Echonan, nos por lesa un relato tras di otro tokante nan menasa- i atakenan kontra e kristiannan, lokual a kuminsá djis despues di e susesonan milagroso di Pentekòste di aña 33. Tur esaki a hasi bida di e rumannan fiel masha difísil.​—Echo. 4:​1-3; 5:​17, 18; 6:​8-12; 7:59; 8:​1, 3.

 7. Den ki tempu krítiko e kristiannan ku Pablo a skirbi tabata biba?

⁷ Ademas, e kristiannan ei tabata biba den e periodo nèt promé ku fin di e sistema di kosnan hudiu. Hesus a konta nan tokante e destrukshon ku lo a bini riba e nashon hudiu infiel. Tambe el a konta su siguidónan tokante susesonan ku lo a tuma lugá nèt promé ku e fin i a bisa nan spesífikamente kiko nan mester a hasi pa sobrebibí. (Lesa Lukas 21:​20-22.) Kiko nan lo a hasi? Hesus a spièrta nan: “Tene kuidou pa boso kurason no ta kargá pa kousa di paranda i buracheria i e preokupashonnan di bida, i e dia ei no bin diripiente riba boso.”​—Luk. 21:34.

 8. Kiko kisas a pone algun kristian mengua nan sirbishi na Yehova òf asta stòp mes?

⁸ Ora Pablo a skirbi su karta na e Hebreonan, kasi 30 aña a pasa desde ku Hesus a duna su spièrtamentu. Kon e tempu ku a pasa a afektá e kristiannan ei? Algun di nan a entregá na e preshon- i preokupashonnan di bida diario, i nan no a hasi e progreso spiritual ku lo por a fortifiká nan. (Heb. 5:​11-14) Otro kristiannan aparentemente a pensa ku bida lo ta hopi mas fásil si nan simplemente a biba manera mayoria di hudiu rònt di nan tabata biba. Kon ku bai bini, e hudiunan ei no a bandoná Dios kompletamente; te na sierto grado ainda nan tabata sigui su Lei. Algun miembro di e kongregashon a konvensé òf asta intimidá otro kristiannan pa nan sigui tene na Lei di Moisés i na tradishon. Kiko Pablo por a bisa pa yuda su rumannan kristian keda alerta den sentido spiritual i perseverá den e kareda?

9, 10. (a) Ki animashon di Pablo nos ta lesa na final di Hebreonan kapítulo 10? (b) Dikon Pablo a skirbi tokante e echonan di fe di testigunan di antigwedat?

⁹ Ta interesante pa tuma nota di e manera ku Pablo, bou di inspirashon divino, a trata di fortalesé e kristiannan hebreo. Pablo a indiká den kapítulo 10 di su karta ku e Lei tabata djis “un sombra di e bon kosnan ku ta bini,” i el a demostrá bon kla tambe e balor di e sakrifisio di reskate di Kristu. Na final di e kapítulo ei, Pablo a konsehá su lektornan: “Boso tin mester di perseveransia, pa ora boso a hasi e boluntat di Dios, boso risibí loke a wòrdu primintí. Pasobra denter di masha poko tempu, ‘esun ku ta pa bini, lo bini, i lo no tarda.’”​—Heb. 10:​1, 36, 37.

¹⁰ Den Hebreonan kapítulo 11, Pablo ta splika na un manera maestral kiko berdadero fe den Dios ta. El a ilustrá esei ku ehèmpelnan históriko di hòmber- i muhénan ku tabatin berdadero fe. Dikon Pablo a kambia di tópiko, stòp di papia di perseveransia i bai papia di fe? E apòstel tabata ke pa su kompañeronan di adorashon realisá ku pa demostrá berdadero fe den Yehova, nan tabatin mester di kurashi i perseveransia. E ehèmpel ekselente ku Yehova su sirbidónan fiel di antigwedat a pone lo a fortalesé e kristiannan hebreo pa trata ku e prueba- i difikultatnan ku nan tabata konfrontá. P’esei, despues ku Pablo a menshoná e echonan di fe di e fiel sirbidónan ei di pasado, e por a bisa: “Komo ku nos tin un nubia asina grandi di testigunan ta rondoná nos, laga nos tambe pone un banda tur strobashon, i e piká ku ta mara nos asina fásil, i ku perseveransia laga nos kore e kareda ku ta poní nos dilanti.”​—Heb. 12:1.

‘Un Nubia di Testigu’

11. Ora nos meditá riba e ehèmpel di e ‘nubia grandi di testigu,’ ki efekto esei mester tin riba nos?

¹¹ E ‘nubia grandi di testigu’ no tabata simplemente espektador òf mirónes ku, na moda di papia, tabata djis para na kantu pa mira e kareda òf pa mira nan atleta òf tim faborito gana. Al kontrario, e sirbidónan pre-kristian akí di Yehova tabata partisipante, manera koredó den un kareda. Anto nan a kore e kareda ku éksito i yega te final. Aunke awor nan ta morto, nan ehèmpel por animá otro hende pa sigui kore e kareda. Imaginá kon un koredó lo sinti si e sa ku e ta rondoná pa algun di e koredónan mas eksperensiá ku tin i ku nan ta opserv’é. Lo e no sintié motivá pa hasi su bèst òf asta surpasá su mes i terminá e kareda? E testigunan di pasado por a konfirmá ku pa pisá ku e kareda figurativo ei ta, un hende por gana. Pues, e kristiannan hebreo di promé siglo lo a hasi bon di meditá riba e ehèmpel di e ‘nubia di testigu’; esei lo por a duna nan kurashi i yuda nan ‘kore e kareda ku perseveransia.’ I esei ta konta pa nos tambe.

12. Kiko nos por siña for di e ehèmpelnan ku Pablo a sita?

¹² Hopi di e sirbidónan fiel ku Pablo a menshoná tabatin mesun sirkunstansianan ku nos. Por ehèmpel, Noe a biba tempu ku e mundu promé ku Diluvio tabata yegando na su fin. Nos ta bibando serka di e fin di e aktual sistema di kosnan. Yehova a pidi Abraham ku Sara pa bai laga nan kas. El a primintí di forma for di nan un nashon pa sirbié, i nan a warda riba Yehova pa kumpli ku e promesa ei. Yehova ta pidi nos nenga nos mes i biba p’e. Si nos hasi esei, nos ta haña su aprobashon i e bendishonnan ku e ta primintí. Moisés mester a pasa atraves di un desierto masha peligroso, rumbo pa e Tera Primintí. Nos ta pasando atraves di e mundu malbado akí ku ta muribundo, rumbo pa e mundu nobo primintí. Ta bale la pena pa nos konsiderá loke e hendenan fiel ei a pasa aden: nan éksitonan i frakasonan, i tambe nan puntonan fuerte i débil.​—Rom. 15:4; 1 Kor. 10:11.

Kiko A Yuda Nan Terminá e Kareda?

13. Ki situashon difísil Noe a konfrontá, i kiko a yud’é superá esei?

¹³ Kiko a yuda e sirbidónan akí di Yehova perseverá den e kareda i termin’é? Tuma nota di loke Pablo a skirbi tokante Noe. (Lesa Hebreonan 11:7.) ‘Un diluvio di awa riba tera ku lo destruí tur karni’ tabata algu ku Noe no a yega di mira nunka. (Gén. 6:17) Tabata algu ku nunka promé a yega di tuma lugá, algu sin presedente. Tòg Noe no a deskartá esei komo un kos imposibel òf asta improbabel. Dikon nò? Pasobra e tabatin fe ku tur loke Yehova bisa, Yehova lo hasi. Noe no a haña ku loke Yehova a pidié hasi tabata muchu difísil. Mas bien, el a hasi “konforme tur loke Dios a orden’é.” (Gén. 6:22) Si nos tuma na kuenta tur loke Noe mester a hasi—traha e arka, reuní e bestianan, stòk e arka ku kuminda pa hende i bestia, prediká un mensahe di spièrtamentu i yuda su famia keda ku fe firme den Yehova—no tabata fásil p’e hasi “konforme tur loke Dios a orden’é.” Sinembargo, Noe su fe i perseveransia a resultá den bida i bendishon p’e i pa su famia.

14. Ki pruebanan Abraham ku Sara a haña nan kuné, i ki lès nos ta saka for di esei?

¹⁴ Esnan ku ta sigui riba Pablo su lista di e ‘nubia di testigu ku ta rondoná nos’ ta Abraham ku Sara. Nan mester a bai laga nan bida normal na Ur, i nan futuro tabata parse insigur. Nan ta un bon ehèmpel di hende ku a obedesé Yehova i mustra un fe firme asta den situashonnan difísil. Debí na tur e sakrifisionan ku Abraham tabata dispuesto pa hasi pa adorashon berdadero, Beibel ta yam’é “tata di tur ku tin fe.” (Rom. 4:11, BPK) Pablo a menshoná solamente e puntonan prinsipal di e bida di Abraham, ya ku su lektornan tabata konosé e detayenan bon kaba. Asina mes, Pablo a saka un lès masha importante: “Tur esakinan [inkluso Abraham i su famia] a muri den fe, sin a risibí e promesanan, ma ku a mira nan i a duna nan un bonbiní for di un distansia, i ku a konfesá ku nan tabata stranhero i eksiliado riba tera.” (Heb. 11:13) Ta bisto ku nan fe den Dios i nan relashon personal kuné a yuda nan perseverá den e kareda.

15. Kiko a motivá Moisés pa skohe e bida ku el a hiba?

¹⁵ Moisés ta un otro sirbidó ehemplar di Yehova den e ‘nubia di testigu.’ Moisés a laga atras un bida próspero i privilegiá, “skohiendo pa mas bien sufri maltrato huntu ku e pueblo di Dios.” Kiko a motiv’é pa hasi esei? Pablo a kontestá: “E tabatin su bista riba e rekompensa. . . . El a keda firme, komo si fuera e tabata mira Esun ku ta invisibel.” (Lesa Hebreonan 11:​24-27.) Moisés no a laga “e plasernan pasahero di piká” kita su atenshon. Dios i su promesanan tabata asina real p’e ku el a demostrá kurashi i perseveransia ekstraordinario. El a hasi esfuerso inkansabel pa guia e israelitanan for di Egipto na e Tera Primintí.

16. Kon nos por sa ku Moisés no a desanimá ora e no tabatin mag di drenta e Tera Primintí?

¹⁶ Meskos ku Abraham, Moisés no a mira e promesa di Dios kumpli durante su bida. Ora e israelitanan tabata kla pa drenta e Tera Primintí, Dios a bisa Moisés: “Lo bo mira e tera na un distansia, ma lo bo no bai ayanan, den e tera ku mi ta duna e yunan di Israel.” Motibu di esaki tabata pasobra mas promé Moisés ku Aaron, fadá pa e rebelion di e pueblo, “a peka kontra [Dios] meimei di e yunan di Israel banda di e awanan di Meriba.” (Deu. 32:​51, 52) Akaso Moisés a bira tur desanimá òf a keda ku renkor? Nò. El a bendishoná e pueblo i a terminá ku e palabranan akí: “Bendishoná bo ta, o Israel; ken ta manera bo, un pueblo salbá pa SEÑOR, kende ta e eskudo di bo yudansa i e spada di bo mahestat!”​—Deu. 33:29.

Algun Lès pa Nos

17, 18. (a) Pa loke ta nos kareda pa bida, kiko nos por siña for di e ‘nubia di testigu’? (b) Kiko nos lo konsiderá den e siguiente artíkulo?

¹⁷ For di nos repaso di e bida di algun di e personanan ku ta forma e ‘nubia di testigu ku ta rondoná nos’ ta bisto ku pa nos kore e kareda te na final, nos mester tin pleno fe den Dios i den su promesanan. (Heb. 11:6) Fe no por ta djis den un huki chikitu di nos bida; e mester ta e sentro di nos bida. Distinto for di hende sin fe, sirbidónan di Yehova por mira mas ayá di e bida aktual. Nos por mira “Esun ku ta invisibel” i p’esei nos ta kore e kareda ku perseveransia.​—2 Kor. 5:7.

¹⁸ E kareda ku kristiannan ta kore no ta fásil. Sinembargo, nos por terminá e kareda ku éksito. Den e siguiente artíkulo, nos lo konsiderá kiko mas tin disponibel pa yuda nos.

Bo Por Splika?

• Dikon Pablo a skirbi ekstensamente tokante e fiel testigunan di antigwedat?

• Kon nos por ser animá pa kore ku perseveransia si nos visualisá e ‘nubia di testigu ku ta rondoná nos’?

• Kiko bo a siña di e ehèmpel di testigunan fiel manera Noe, Abraham, Sara i Moisés?

[Plachi na página 22]

Abraham ku Sara tabata dispuesto pa bai laga e bida kómodo di Ur