Angelnan Ta “Spiritunan Ku Ta Sirbi”

“Nan tur no ta spiritunan ku ta sirbi, mandá pa sirbi esnan ku lo heredá salbashon?”​—HEB. 1:14.

 1. Ki konsuelo nos por saka for di Mateo 18:10 i Hebreonan 1:14?

HESUKRISTU a spièrta tur persona ku lo por pone su siguidónan trompeká. El a bisa: “Mira pa boso no despresiá un di e chikitunan akí, pasobra mi ta bisa boso ku nan angelnan den shelu kontinuamente ta kontemplá kara di mi Tata ku ta den shelu.” (Mat. 18:10) Papiando di angelnan fiel, apòstel Pablo a skirbi: “Nan tur no ta spiritunan ku ta sirbi, mandá pa sirbi esnan ku lo heredá salbashon?” (Heb. 1:14) E palabranan ei ta sirbi komo un garantia alentador ku Dios ta usa e kriaturanan selestial akí pa yuda hende. Kiko Beibel ta siña nos tokante angel? Kon nan ta yuda nos? Kiko nos por siña for di nan ehèmpel?

2, 3. Menshoná algun asignashon ku e angelnan ta kumpli kuné.

² Den shelu tin miónes di angel fiel. Nan tur ta ‘poderoso den fortalesa i ta ehekutá Dios su palabra.’ (Sal. 103:20; lesa Revelashon 5:11.) E yunan spiritual akí di Dios tin nan propio personalidat; nan tin kualidatnan similar na esnan di Dios i un boluntat liber. Nan ta hopi bon organisá i tin posishonnan haltu den Dios su areglo. E arkangel ta Miguel (e nòmber ku Hesus tin den shelu). (Dan. 10:13; Hudas 9) E ta e “primogénito di henter kreashon” i “e Palabra,” òf Bosero, di Dios. Ademas, el a yuda Yehova traha tur otro kos.​—Kol. 1:​15-17; Juan 1:1-3.

³ Despues di e arkangel tin e serafinnan, kendenan ta deklará Yehova su santidat i ta yuda su pueblo biba segun su normanan i asina keda limpi spiritualmente. Ademas, tin e kerubinnan, kendenan ta sirbi komo kriaturanan ku ta apoyá Yehova su soberania. (Gén. 3:24; Isa. 6:​1-3, 6, 7) E otro angel-, òf mensaheronan, ta kumpli ku Dios su boluntat den vários manera.​—Heb. 12:​22, 23.

 4. (a) Kon e angelnan a reakshoná ora Dios a pone fundeshi di mundu? (b) Kiko un bon uso di boluntat liber lo a nifiká pa hende?

⁴ Tur e angelnan a alegrá ora Dios “a pone fundeshi di mundu,” i ku goso nan a kumpli ku nan trabou asigná segun ku Yehova tabata prepará e hoya úniko akí, esta e tera, pa hende biba riba dje. (Jòb 38:​4, 7) Ounke Yehova a krea hende un poko “ménos ku e angelnan,” el a krea nan den Su “imágen.” P’esei, nan por reflehá e kualidatnan elevá di e Kreador. (Heb. 2:7; Gén. 1:26) Si Adam ku Eva lo a hasi bon uso di nan boluntat liber, nan i nan desendientenan lo por a sigui disfrutá di bida den un paradeis komo parti di Yehova su famia universal di kriaturanan inteligente.

5, 6. Ki rebelion a tuma lugá den shelu, i kon Dios a reakshoná?

⁵ Sin duda, e angelnan santu lo a keda di shòk ora nan a mira kon e rebeldia a kuminsá den Dios su famia selestial. Un angel no tabata kontentu mas ku e privilegio di alabá Yehova. Mas bien, e mes tabata ke haña adorashon. El a kuestioná Yehova su derecho di goberná, i ambisiosamente el a purba establesé su propio gobernashon na konflikto ku esun di Yehova. Di e manera ei, el a hasi su mes Satanas (ku ta nifiká “Resistidó”). Ora Satanas a gaña e promé pareha, na un manera astuto el a persuadí nan pa uni kuné den su rebeldia kontra nan Kreador amoroso.​—Gén. 3:​4, 5; Juan 8:44.

⁶ Mesora Yehova a dikta sentensia kontra Satanas mediante e promé profesia di Beibel. El a bis’é: “Lo mi pone enemistat entre abo i e muhé, i entre bo simia i su simia; e lo heridá bo kabes, i abo lo heridá su hilchi di pia.” (Gén. 3:15) Pues, lo tabatin un enemistat kontinuo entre Satanas i e “muhé,” òf e esposa, di Dios. Sí, Yehova, komo Esposo, ta konsiderá su organisashon selestial ku ta konsistí di fiel kriaturanan spiritual komo un esposa stimá. E profesia akí a pone un base sigur pa speransa ounke su detayenan a keda un “misterio” òf sekreto sagrado ku lo mester a ser revelá progresivamente. Dios su propósito tabata pa un miembro di su organisashon selestial aplastá tur e rebeldenan i mediante e persona akí reuní “tantu loke ta den e shelunan komo loke ta riba tera.”​—Efe. 1:8-10.

 7. Kiko algun angel a hasi den tempu di Noe, i kiko Yehova a hasi ku nan?

⁷ Den tempu di Noe, algun angel a bandoná nan “propio lugá di biba” i a tuma kurpa di karni pa por a disfrutá di plaser egoista riba tera. (Hudas 6; Gén. 6:​1-4) Yehova a tira e angelnan rebelde akí den skuridat profundo, i asina nan a uni ku Satanas i a bira “forsanan spiritual di maldat” i enemigunan peligroso di Dios su sirbidónan.​—Efe. 6:​11-13; 2 Ped. 2:4.

Kon Angelnan Ta Yuda Nos?

8, 9. Kon Yehova a usa angelnan pa yuda hende den pasado i den nos tempu?

⁸ Abraham, Jakòb, Moisés, Josué, Isaias, Daniel, Hesus, Pedro, Juan i Pablo ta algun di e personanan ku angelnan a yuda. Angelnan hustu a ehekutá Dios su huisionan i a transmití su profesia- i instrukshonnan, inkluso e Lei di Moisés, na hende. (2 Rei. 19:35; Dan. 10:​5, 11, 14; Echo. 7:53; Rev. 1:1) Awendia, kisas no ta nesesario pa angelnan transmití mensahe di Dios na nos pasobra nos tin e Palabra di Dios kompletu. (2 Tim. 3:​16, 17) Sinembargo, ounke hende no ta mira esei, angelnan ta mashá okupá; nan ta kumpli ku Dios su boluntat i ta apoyá su sirbidónan.

⁹ Beibel ta duna nos e siguransa akí: “E angel di SEÑOR ta kampa rònt di esnan ku ta tem’é, i ta reskatá nan.” (Sal. 34:7; 91:11) Debí ku Satanas a pretendé ku hende lo no mantené nan integridat na Dios ora nan ta bou di prueba, Yehova ta permitié bin ku tur klase di prueba riba nos. (Luk. 21:​16-19) Sinembargo, Dios sa ki ora un prueba a dura sufisiente, esta, ki ora nos a demostrá kaba ku nos lo sigui mantené nos integridat. (Lesa 1 Korintionan 10:13.) E angelnan semper ta alerta pa intervení na armonia ku Dios su boluntat. Nan a reskatá Sadrak, Mesak, Abed-nego, Daniel i Pedro. Pero, nan no a evitá ku Esteban i Santiago a muri na man di enemigu. (Dan. 3:​17, 18, 28; 6:22; Echo. 7:​59, 60; 12:​1-3, 7, 11) E sirkunstansia- i situashonnan den kada un di e kasonan ei tabata diferente. Di mes manera, ounke Yehova a yuda mayoria di nos rumannan sobrebibí den e kamponan di konsentrashon nazi, tabatin algun ku a ser ehekutá.

10. Ademas di yudansa mediante angelnan, ki otro yudansa nos por risibí?

¹⁰ E Skritura no ta siña ku kada hende riba tera tin su propio angel wardadó. Nos ta hasi orashon ku e konfiansa ku “si nos pidi kualke kos konforme [Dios] su boluntat, e ta tende nos.” (1 Juan 5:14) Ta klaru ku Yehova por manda un angel pa yuda nos, pero nos por haña yudansa den un otro manera tambe. Kisas e por motivá nos kompañeronan kristian pa yuda nos i konsolá nos. Podisé Dios ta duna nos e sabiduria i fortalesa nesesario pa soportá “un sumpiña den karni” ku ta afligí nos.​—2 Kor. 12:​7-10; 1 Tes. 5:14.

Imitá Hesus

11. (a) Kon Yehova a usa angel pa yuda Hesus? (b) Kiko Hesus a logra debí ku el a keda fiel na Dios?

¹¹ Laga nos konsiderá kon Yehova a usa angel den e kaso di Hesus. Angelnan a anunsiá su nasementu i resurekshon i a yud’é ora e tabata riba tera. E angelnan por a evitá ku hende a arest’é i mat’é kruelmente. Pero en bes di esei, Dios a manda e angelnan pa fortales’é. (Mat. 28:​5, 6; Luk. 2:​8-11; 22:43) Na armonia ku Yehova su propósito, Hesus a duna su bida komo sakrifisio i a proba ku un hende perfekto por mantené su integridat na Dios apesar di prueba severo. P’esei, Yehova a resusitá Hesus na bida inmortal den shelu, a dun’é “tur outoridat,” i a someté e angelnan na dje. (Mat. 28:18; Echo. 2:32; 1 Ped. 3:22) Di e manera ei, Hesus a duna prueba ku é ta e parti prinsipal di e “simia” di e “muhé,” òf esposa, di Dios.​—Gén. 3:15; Gal. 3:16.

12. Kon nos por imitá Hesus su ehèmpel balansá?

¹² Hesus tabata sa ku no tabata korekto p’e pone Yehova na prueba dor di aktua na un manera deskabeyá i spera pa angelnan reskat’é. (Lesa Mateo 4:​5-7.) P’esei, laga nos imitá Hesus su ehèmpel dor di biba “huisioso,” esta, ku sano huisio. I no tuma rísikonan innesesario, ma enfrentá persekushon ku konfiansa den Yehova.​—Tito 2:12.

Loke Nos Por Siña for di Angelnan Fiel

13. Kiko nos por siña for di e ehèmpel di e angelnan hustu ku Beibel ta menshoná na 2 Pedro 2:​10b i 11?

¹³ Ora apòstel Pedro a reprendé esnan ku tabata “papia malu” di Yehova su sirbidónan ungí, el a señalá na e ekselente ehèmpel di angelnan hustu. Ounke e angelnan akí tin hopi poder, debí na nan rèspèt pa Yehova, humildemente nan ta evitá di hunga e papel di hues i akusá otro persona. (Lesa 2 Pedro 2:​10b i 11.a) Laga nos tambe evitá krítika ofensivo, respetá esnan ku Yehova a konfia ku supervishon den e kongregashon i laga kosnan den man di Yehova, e Hues Supremo.​—Rom. 12:​18, 19; Heb. 13:17.

14. Kiko e angelnan por siña nos tokante humildat?

¹⁴ Yehova su angelnan ta sirbi humildemente, i esei ta un ekselente ehèmpel pa nos. Tabatin algun angel ku a nenga di bisa hende nan nòmber. (Gén. 32:29; Hues. 13:​17, 18) Maske tin miónes di kriatura spiritual den shelu, ta nòmber di Miguel i Gabriel so Beibel ta revelá. Kisas esaki ta pa evitá ku nos ta duna onor inkorekto na angelnan. (Luk. 1:26; Rev. 12:7) Ora apòstel Juan a tira su kurpa abou dilanti un angel pa ador’é, e angel akí a spièrt’é: “No hasi e kos ei; mi ta un ko-sirbidó di bo i di bo rumannan.” (Rev. 22:​8, 9) Nos adorashon, inkluso nos orashonnan, mester ta dirigí únikamente na Dios.​—Lesa Mateo 4:​8-10.

15. Den ki sentido e angelnan ta un ehèmpel pa nos den mustra pasenshi?

¹⁵ E angelnan ta un ehèmpel den mustra pasenshi tambe. Ounke nan ta masha interesá pa sa kiko ta Dios su sekretonan sagrado, nan no sa tur. Beibel ta bisa: ‘Angelnan ta anhelá di mira e kosnan ei.’ (1 Ped. 1:12) Pues, kiko nan ta hasi? Ku pasenshi nan ta spera te ora Dios su debido tempu yega p’e duna di konosé su ‘sabiduria multiforme pa medio di e iglesia,’ òf kongregashon.​—Efe. 3:​10, 11.

16. Ki efekto nos kondukta por tin riba e angelnan?

¹⁶ Kristiannan ku ta bou di prueba ta ‘un espektákulo pa angelnan.’ (1 Kor. 4:9, BPK) Ku gran satisfakshon, e angelnan ta opservá nos aktonan di fieldat i ta asta alegrá ora un pekadó repentí. (Luk. 15:10) Angelnan ta opservá e kondukta deboto di ruman muhénan kristian. Beibel ta bisa ku hende “muhé mester tin un símbolo di outoridat riba su kabes, pa motibu di e angelnan.” (1 Kor. 11:​3, 10) Sí, e angelnan ta keda kontentu ora nan mira ruman muhénan kristian i tur otro sirbidó di Dios riba tera kumpli ku areglo teokrátiko i e areglo di hefatura. Nan obedensia ta un rekordatorio apropiá pa e yunan selestial akí di Dios.

Angelnan Ta Apoyá e Trabou di Prediká

17, 18. Dikon nos por bisa ku e angelnan ta apoyá nos trabou di prediká?

¹⁷ Angelnan ta enbolbí den algun di e susesonan remarkabel ku ta tuma lugá durante “e dia di Señor.” Esakinan ta, entre otro, e nasementu di e Reino den shelu na 1914 i e tiramentu abou di Satanas i su demoñonan for di shelu dor di “Miguel i su angelnan.” (Rev. 1:10; 11:15; 12:​5-9) Apòstel Juan a mira un “angel ta bula meimei di shelu, kende tabatin un evangelio eterno pa prediká na esnan ku ta biba riba tera.” E angel a deklará: “Teme Dios i dun’é gloria, pasobra e ora di su huisio a yega; i adorá Esun ku a traha shelu i tera i laman i fuentenan di awa.” (Rev. 14:​6, 7) E palabranan akí ta duna sirbidónan di Yehova e siguransa ku angelnan ta yuda nan segun ku nan ta prediká e bon notisia tokante e Reino ku a ser establesí apesar di Diabel su oposishon feros.​—Rev. 12:​13, 17.

¹⁸ Awendia, angelnan no ta guia nos na hende di kurason onrado dor di papia ku nos manera den e kaso di Felipe, kende un angel a papia kuné i instruyé pa bai serka e eunuko di Etiopia. (Echo. 8:​26-29) Sinembargo, hopi eksperensia den nos tempu ta duna evidensia ku ounke nos no ta mira e angelnan, nan ta apoyá e trabou di prediká e Reino i ta guia nos na hende ku tin “e disposishon korekto pa bida eterno.”b (Echo. 13:48, NW) P’esei, ta masha importante pa nos partisipá regularmente den sirbishi! Di e manera ei, nos por hasi nos parti den haña esnan ku ta deseoso pa “adorá e Tata den spiritu i bèrdat.”​—Juan 4:23, 24.

19, 20. Ki papel e angelnan ta hunga den e susesonan ku ta karakterisá “e konklushon dje sistema di kosnan”?

¹⁹ Hesus a referí na nos tempu ora el a bisa ku durante “e konklushon dje sistema di kosnan” (NW), e angelnan lo “separá e malbadonan for di meimei di e hustunan.” (Mat. 13:​37-43, 49) Angelnan ta partisipá den e reunimentu i seyamentu final di e ungínan. (Lesa Mateo 24:31; Rev. 7:​1-3) Es mas, e angelnan lo ta huntu ku Hesus ora e “ta separá karné for di kabritu.”​—Mat. 25:​31-33, 46.

²⁰ “Ora Señor Hesus wòrdu manifestá for di shelu ku su angelnan poderoso,” tur ‘esnan ku no konosé Dios i esnan ku no ta obedesé e evangelio di nos Señor Hesus’ lo ser destruí. (2 Tes. 1:​6-10) Juan a mira un vishon di e mesun suseso ei, i el a deskribí Hesus i e ehérsito selestial di angel koriendo riba kabai blanku ku e propósito di hasi guera den hustisia.​—Rev. 19:​11-14.

21. Ki akshon e angel “ku e yabi di e abismo i un kadena grandi den su man” lo tuma kontra Satanas i su demoñonan?

²¹ Ademas, Juan “a mira un angel ta baha for di shelu ku e yabi di e abismo i un kadena grandi den su man.” E angel akí ta e arkangel Miguel, kende lo mara e Diabel i tir’é—i evidentemente e demoñonan tambe—den abismo. Nan lo ser librá pa un tempu kòrtiku na fin di Kristu su Reinado di Mil Aña ora humanidat perfekto lo pasa e prueba final. Despues di esei, Satanas i tur e otro rebeldenan lo ser destruí. (Rev. 20:​1-3, 7-10; 1 Juan 3:8) Asina, tur rebelion kontra Dios lo ser eliminá.

22. (a) Kon angelnan ta enbolbí den loke ta bai sosodé pronto? (b) Ki efekto nan papel mester tin riba nos?

²² E gran liberashon for di Satanas su mal sistema di kosnan ta hopi serka. Angelnan lo hunga un papel importante den e susesonan signifikativo akí ku lo vindiká Yehova su soberania i ku lo hiba na kumplimentu kompletu di su propósito pa e tera i humanidat. E angelnan hustu en bèrdat ta “spiritunan ku ta sirbi, mandá pa sirbi esnan ku lo heredá salbashon.” P’esei, laga nos ta gradisidu na Yehova Dios p’e manera ku e ta usa e angelnan pa yuda nos hasi su boluntat i gana bida eterno.

[Nota]

Kon Lo Bo Kontestá?

• Kon e kriaturanan selestial ta organisá?

• Kiko algun angel a hasi den tempu di Noe?

• Kon Dios ta usa angelnan pa yuda hende?

• Ki papel angelnan hustu ta hunga den nos tempu?

[Plachi na página 21]

Angelnan ta kontentu pa hasi Dios su boluntat

[Plachi na página 23]

Meskos ku den Daniel su kaso, angelnan semper ta alerta pa intervení na armonia ku Dios su boluntat

[Plachi na página 24]

Tene kurashi, pasobra e angelnan ta apoyá e trabou di prediká e Reino!

[Rekonosementu]

Tera: Potrèt di NASA