Bai, i Hasi Disipel

1-2. (a) Segun e mandamentu di Hesus skirbí na Mateo 28:18-20, kiko ta e tarea prinsipal di e kongregashon kristian? (b) Kua ta algun pregunta ku nos lo kontestá den e artíkulo akí?

E APÒSTELNAN tabata yen di ekspektativa ora nan a reuní na e seru. Hesus, despues di su resurekshon, a pidi nan pa top’é einan. (Mat. 28:16) Kisas esei tabata e okashon unda “el a aparesé na mas ku 500 ruman pareu.” (1 Kor. 15:6) Dikon Hesus a pidi su disipelnan bin top’é einan? Esei ta pa duna nan un tarea emoshonante: “P’esei bai, i hasi hende di tur nashon mi disipel.”—Lesa Mateo 28:18-20.

² E disipelnan ku a skucha e palabranan di Hesus despues a forma parti di e kongregashon kristian di promé siglo. E tarea prinsipal di e kongregashon ei tabata di hasi mas hende disipel di Kristu.b Awe, rònt mundu tin hopi kongregashon di kristian berdadero, i e tarea prinsipal di e kongregashonnan ei a keda meskos. Den e artíkulo akí, nos lo kontestá kuater pregunta: Dikon hasimentu di disipel ta asina importante? Kiko hasimentu di disipel ta enserá? Tur kristian ta yuda hasi disipel? I dikon nos mester tin pasenshi den e trabou akí?

 3. Segun Huan 14:6 i 17:3, dikon e trabou di hasi disipel ta asina importante?

³ Dikon e trabou di hasi disipel ta asina importante? Pasobra ta disipel di Kristu so por ta amigu di Dios. Ademas, hende ku sigui Kristu tin un mihó bida awor i tin e speransa di biba pa semper den futuro. (Lesa Huan 14:6; 17:3.) Sin duda, Hesus a duna nos un responsabilidat importante. Pero nos no tin ku hasi e trabou ei nos so. Apòstel Pablo a bisa ku e i otro kristian tabata “kompañero di trabou di Dios.” (1 Kor. 3:9) Esta un privilegio Yehova i Kristu a duna hende imperfekto!

 4. Kiko nos ta siña for di e ehèmpel di Ivan ku Matilde?

⁴ E trabou di hasi disipel por duna nos hopi goso. Wak e ehèmpel di Ivan ku su esposa, Matilde, na Colombia. Nan a prediká na un hóben ku yama Davier, kende a bisa nan: “Mi ke kambia mi bida, pero mi no por.” Davier tabata un bòksdó ku tabata usa droga i bebe di mas, i e tabata biba ku Erika. Ivan a splika: “Nos a kuminsá studia Beibel kuné. Su pueblo tabata masha leu, i nos mester a kore baiskel pa hopi ora largu riba kaminda yen di lodo. Despues ku Erika a mira ku Davier su komportashon i aktitut a mehorá, e tambe a kuminsá studia.” Ku tempu, Davier a stòp ku droga, ku bebementu i ku bòkseo. Anto el a kasa ku Erika. Matilde a bisa: “Na 2016, ora Davier ku Erika a batisá nos a kòrda loke Davier tabata bisa: ‘Mi ke kambia mi bida, pero mi no por.’ Nos no por a kontené nos lágrimanan.” Sin duda, nos ta bira masha kontentu ora nos yuda hende bira disipel di Kristu.

 5. Kiko ta e promé paso pa hasi disipel?

⁵ E promé paso pa hasi disipel ta di “buska te ora [nos] haña” hende ku ke siña tokante di Yehova. (Mat. 10:11) Si nos hasi esfuerso pa prediká na tur hende den nos teritorio i obedesé Hesus su mandamentu, nos ta demostrá ku nos ta Testigunan di Yehova i berdadero kristian.

 6. Kiko lo yuda nos tin éksito den sirbishi?

⁶ Algun hende ku nos ta topa ta kla pa siña e bèrdatnan di Beibel, pero hopi otro hende na promé instante por parse di no ta interesá. Nos lo tin ku lanta nan interes. Pa nos tin éksito den sirbishi, nos tin ku prepará bon. Kon? Skohe algun tópiko spesífiko ku hende lo ta interesá den dje. Kaba pensa kon lo bo introdusí kada tópiko.

 7. (a) Kon bo por kuminsá un kòmbersashon? (b) Dikon bo ta kere ta importante pa skucha i mustra rèspèt?

⁷ Por ehèmpel, bo por puntra un persona: “Mi tin mag di haña sa bo opinion tokante algu? Hopi di e problemanan ku nos tin awe ta afektá hende rònt mundu. Bo ta kere ku nos lo tin mester di un gobièrnu mundial pa resolvé mundu su problemanan?” Djei, bo por analisá Daniel 2:44. Òf bo por puntra: “Kiko ta e klave pa lanta nos yunan ku bon manera? Lo mi tin gana di sa bo opinion.” Djei, analisá Deuteronomio 6:6 i 7. Sea kual sea e tópiko ku bo skohe pa papia di dje, pensa riba e hendenan ku lo skucha. Imaginá kon nan lo benefisiá ora nan haña sa loke Beibel realmente ta siña. Ora bo ta papia ku nan, ta importante pa bo skucha nan i respetá nan punto di bista. Asina ei, lo bo komprondé nan mihó i nan lo tin mas gana di skucha bo.

 8. Dikon ta importante pa sigui hasi rebishita?

⁸ Promé ku un hende disidí pa aseptá un estudio di Beibel, bo tin ku invertí tempu i esfuerso pa rebishit’é. Dikon? Pasobra kisas e no ta na kas ora bo bai rebishit’é. I kisas lo bo tin ku bai vários biaha promé ku e sintié kómodo pa aseptá un estudio di Beibel. Kòrda, un mata lo krese mihó ora bo muh’é regularmente. Asina tambe, un hende su amor pa Yehova i Kristu lo krese mihó ora nos papia regularmente kuné tokante e Palabra di Dios.

9-10. Dikon nos por bisa ku tur kristian ta enbolbí den buskamentu di hende di kurason sinsero?

⁹ Tur kristian ta enbolbí den buskamentu di hende di kurason sinsero. Nos por kompará e trabou ei ku buskamentu di un mucha pèrdí. Kon asina? Wak e ehèmpel di loke a pasa ku un mucha di tres aña ku a dual for di kas. Un 500 hende tabata enbolbí den buskamentu di e mucha. Finalmente, un 20 ora despues ku e mucha a pèrdè, un boluntario a bin hañ’é den un plantashon di maishi. E boluntario ei no kier a aseptá e onor pa a haña e mucha. El a bisa: “A tuma sentenáres di hende pa hañ’é.”

¹⁰ Hopi hende ta manera e mucha ei. Nan ta sinti nan pèrdí. Nan no tin speransa, p’esei nos tin ku yuda nan. (Efe. 2:12) Mas ku ocho mion di nos ta traha huntu pa haña e hendenan ei. Kisas abo mes lo no haña un studiante di Beibel. Pero, otro publikadó ku ta traha e mesun teritorio por haña un hende ku ke siña e bèrdat ku tin den Beibel. Ora un ruman topa un hende ku despues bira disipel di Kristu, tur publikadó ku a yuda den e buskamentu tin bon motibu pa ta kontentu.

11. Asta si bo no ta dirigí un estudio di Beibel, den ki otro manera bo por yuda hasi disipel?

¹¹ Asta si aworakí bo no ta dirigí un estudio di Beibel, bo por yuda hasi disipel den otro manera. Por ehèmpel, ora un hende nobo bini Salòn di Reino, bo por yam’é bon biní i lag’é sintié na kas. Di e manera ei, bo por yud’é mira ku nos ta kristian berdadero. (Huan 13:34, 35) Ademas di esei, hasi esfuerso pa duna komentario na reunion. Bo komentarionan, aunke kòrtiku, por yuda esnan nobo ekspresá nan mes di un manera sinsero i ku rèspèt. Tambe, bo por traha ku un publikadó nobo den sirbishi i yud’é usa Beibel pa rasoná ku hende. Ora bo ta hasi esei, bo ta siñ’é kon pa imitá Kristu.—Luk. 10:25-28.

12. Nos mester tin abilidat spesial pa hasi disipel? Splika.

¹² Nos niun no tin ku pensa ku nos mester tin abilidat spesial pa por hasi hende disipel di Hesus. E ehèmpel di Faustina, kende ta biba na Bolivia, lo yuda nos komprondé dikon. Ora Testigunan di Yehova a topa Faustina, e no por a lesa, pero awor el a siña lesa un tiki. El a batisá i ta gusta siña hende bèrdat di Beibel. Normalmente, e ta dirigí sinku estudio di Beibel tur siman. Aunke mayoria di su studiantenan ta lesa mihó kuné, el a yuda seis hende yega na boutismo.—Luk. 10:21.

13. Asta si nos ta masha okupá, kiko ta algun benefisio ku nos por haña den e trabou di hasi disipel?

¹³ Hopi kristian tin vários responsabilidat importante di atendé; p’esei nan ta masha okupá. Asina mes, nan ta traha tempu pa dirigí estudio di Beibel i esei ta duna nan hopi goso. Wak e ehèmpel di Melanie, kende ta biba den un pueblo aislá na Alaska. Su so a lanta su yu di ocho aña. E tabatin un trabou fultaim i tabata kuida su tata ku tabatin kanser. Melanie tabata e úniko Testigu den e pueblo ei. Regularmente e tabata pidi Yehova pa dun’é forsa pa bai prediká aunke tabata hasi hopi friu. E kier a ègt haña un studiante di Beibel. Ku tempu el a topa Sara, kende tabata kontentu pa haña sa ku Dios tin un nòmber. Un par di tempu despues, Sara a kuminsá studia Beibel. Melanie a bisa: “Djabièrnè anochi, aunke mi tabata kansá, ami ku mi yu tabata bai dirigí e estudio ei i esei a laga nos sinti nos mes bon. Nos tabata gusta hasi investigashon pa kontestá Sara su preguntanan i nos tabata asina kontentu pa mir’é bira amigu di Yehova.” Ku kurashi Sara a enfrentá oposishon, stòp di bai su iglesia i batisá.

14. (a) Dikon nos por kompará hasimentu di disipel ku piskamentu? (b) Kiko e palabranan di Pablo skirbí na 2 Timoteo 4:1 i 2 ta motivá bo pa hasi?

¹⁴ Asta si ainda bo no a logra haña un hende ku ke bira un disipel, sigui buska. Kòrda ku Hesus a kompará hasimentu di disipel ku piskamentu. Un piskadó ta pasa hopi ora promé ku e por kohe un piská. Tin biaha e tin ku traha anochi lat òf mainta trempan, i tin biaha e tin ku nabegá distansia largu. (Luk. 5:5) Di mes manera, un kristian ta pasa hopi ora ta “piska” ku pasenshi na diferente ora i na vários lugá. Dikon? Pa e tin mas chèns di topa hende. Esnan ku ta hasi e èkstra esfuerso ei hopi biaha ta logra papia ku hende ku ta interesá den nos mensahe. Abo por purba di prediká na un ora di dia òf na un lugá ku bo tin mas chèns di topa hende?—Lesa 2 Timoteo 4:1, 2.

15. Dikon nos mester tin pasenshi ora di dirigí estudio di Beibel?

¹⁵ Dikon nos mester tin pasenshi ora di dirigí estudio di Beibel? Un motibu ta ku nos tin ku hasi mas ku djis yuda e studiante konosé i stima loke Beibel ta siña. Nos tin ku yud’é konosé i stima Yehova, e Outor di Beibel. Aparte di siña un studiante kiko Hesus a manda su disipelnan hasi, nos tin ku siñ’é tambe kon pa apliká e mandamentunan ei den su bida. Ku pasenshi nos tin ku yud’é segun ku e ta purba di apliká prinsipio di Beibel. Algun studiante por hasi kambio den djis algun luna, pero tin studiante por tuma mas tempu.

16. Kiko bo a siña for di e eksperensia di Raúl?

¹⁶ E eksperensia di un misionero na Perú ta yuda nos komprondé dikon ta bon pa nos tin pasenshi. El a konta: “Mi a kaba di studia e di dos buki ku un studiante ku yama Raúl. Pero ainda e tabatin difikultat pa apliká loke el a siña for di Beibel. E tabatin problema den su matrimonio, tabata papia palabra malu i su yunan no tabata respet’é. Komo ku e tabata bini reunion regularmente, mi a sigui bishit’é pa yuda e i su famia. Mas ku tres aña despues ku mi a top’é, el a kualifiká pa batisá.”

17. Kiko nos lo trata den e siguiente artíkulo?

¹⁷ Hesus a bisa nos pa “bai, i hasi hende di tur nashon [su] disipel.” Pa kumpli ku e tarea ei, hopi biaha nos tin ku papia ku hende ku ta pensa hopi diferente for di nos. Esei ta inkluí esnan ku no tin religion òf ku no ta kere den Dios. E siguiente artíkulo lo mustra kon pa prediká e bon notisia na e hendenan ei.