Mayornan i Yunan: Pone Dios Na Prome Luga!
“Teme e Dios berdadero i warda su mandamentunan.”—ECLESIASTES 12:13.
1. Ki temor mayornan i yunan tin cu cultivá, i kico esei lo duna nan?
UN PROFECIA relacioná cu Jesucristo a bisa cu lo “tin disfrute di su parti den e temor di Jehova.” (Isaías 11:3) Su temor tabata esencialmente un reverencia profundo i respet pa Dios, un temor di desagradá Dios pa motibu cu el a stim’é. Mayornan i yunan tin cu cultivá tal temor di Dios na imitacion di Cristo, cua lo producí disfrute pa nan mescos cu el producí pa Jesus. Nan tin cu pone Dios na promé lugá den nan bida dor di obedecé su mandamentunan. Segun un escritor di Bijbel, “esaki ta henter e obligacion di hende.”—Eclesiástes 12:13.
2. Cua tabata e mandamentu di mas importante dje Ley, i na ken principalmente el a ser duná?
2 E mandamentu di mas importante dje Ley, esta, cu nos mester ‘stima Jehova cu tur nos curason, alma i forsa vital,’ a ser duná principalmente na mayornan. Esaki ta ser demostrá dor dje palabranan mas aleu dje Ley: “Bo tin cu inculcá [e palabranan aki tocante stima Jehova] den bo yu i papia di nan ora bo ta sinta den bo cas i ora bo ta cana riba caminda i ora bo ta drumi i ora bo ta lanta.” (Deuteronomio 6:4-7; Marco 12:28-30) Dje manera ei mayornan a ser mandá pa pone Dios na promé lugá dor di nan mes stim’é i dor di siña nan yunan pa haci mescos.
Un Responsabilidad Cristian
3. Con Jesus a demostrá e importancia di duna atencion na yunan?
3 Jesus a demostrá e importancia di duna asta mucha chikitu atencion. Na un ocasion cerca e fin di Jesus su ministerio terenal, hende a cuminsá trece nan criaturanan p’e. Evidentemente keriendo cu Jesus tabata muchu ocupá pa ser molestiá, e disipelnan a purba stop e hendenan. Pero Jesus a reprendé su disipelnan: “Laga e muchanan chikitu bini cerca mi, i no purba stop nan.” Jesus asta a “tuma e muchanan den su brasa,” mustrando asina den un manera conmovedor e importancia di duna atencion na esnan chikitu.—Lucas 18:15-17; Marco 10:13-16.
4. Ken a ser duná e mandamentu pa “haci disipel di hende di tur nacion,” i kico esaki lo a rekerí pa nan haci?
4 Tambe Jesus a haci cla cu su siguidornan tabatin e responsabilidad di siña otronan ademas di nan mes yunan. Despues di su morto i resureccion, Jesus “a aparecé na mas cu cincu cien ruman den un solo biaha”—incluyendo algun mayornan. (1 Corintionan 15:6) Aparentemente esaki a sosodé na un ceru den Galilea unda su 11 apostelnan tambe tabata reuní. Ei Jesus a urgi nan tur: “Bai, pues, i haci disipel di hende di tur nacion, . . . siñando nan pa warda tur loke mi a manda boso.” (Mateo 28:16-20) Ningun cristian por tin un motibu válido pa neglishá e mandamentu aki! Pa tatanan i mamanan cumpli cuné ta rekerí pa nan percurá pa nan yunan i tambe participá den e trabou di predicacion i siñamentu público.
5. (a) Kico ta mustra cu mayoria dje apostelnan, si no ta tur, tabata casá i posiblemente tabatin yu? (b) Ki conseho cabesnan di famia tabatin cu tuma na serio?
5 Tin bon pa ripará cu asta e apostelnan tabatin cu balansá nan responsabilidadnan di famia cu e obligacion pa predicá i tambe pastoreá e tou di Dios. (Juan 21:1-3, 15-17; Echonan 1:8) Esaki ta asina pasobra mayoria di nan, si no ta tur, tabata casá. Pues apostel Pablo a splica: “Nos tin autoridad pa hiba un ruman muher como esposa, mescos cu e resto dje apostelnan i e rumannan di Señor i Céfas, no ta berdad?” (1 Corintionan 9:5; Mateo 8:14) Algun apostel kisas tabatin yu tambe. Historiadornan di pasado, manera Eusebio, ta bisa cu Pedro tabatin yu. Tur e mayornan cristian di pasado tabatin cu haci caso dje conseho bíblico: “Siguramente si un hende no ta percurá pa esnan cu ta di dje mes, i specialmente pa esnan cu ta miembro di su famia, el a nenga e fe i ta pió cu un persona sin fe.”—1 Timoteo 5:8.
E Responsabilidad Primario
6. (a) Ki desafio ancianonan cristian cu famia tin? (b) Kico ta un anciano su responsabilidad primario?
6 Ancianonan cristian cu tin famia awe ta den un situacion similar cu esun dje apostelnan. Nan mester balansá nan responsabilidad di percurá p’e necesidadnan spiritual i físico di nan famia cu nan obligacion di predicá públicamente i di pastoreá e tou di Dios. Cua actividad mester haña prioridad? E Toren di Vigilancia [na ingles] di 15 di mart, 1964, a señalá: “E promé obligacion [dje tata] ta pa cu su famia, i en realidad lo e no por sirbi adecuadamente como anciano den e congregacion si e no a percurá p’e obligacion aki.”
7. Con tatanan cristian ta pone Dios na promé lugá?
7 Pues tatanan mester pone Dios na promé lugá dor di haci caso dje mandamentu ‘pa sigui cria nan yunan den e disiplina i regulacion mental di Jehova.’ (Efesionan 6:4) E responsabilidad ei no por ser pasá pa un otro hende, aunke un tata por tin tambe un asignacion pa supervisá actividadnan den e congregacion cristian. Con e tatanan ei por soru pa nan responsabilidadnan—percurando físicamente, spiritualmente i emocionalmente pa miembronan di famia—i na mésun tempu, presidí i percurá pa supervision den e congregacion?
Dunando Apoyo Necesario
8. Con e esposa di un anciano por apoy’é?
8 Claramente, ancianonan cu responsabilidad di famia por beneficiá dje apoyo cu nan ta ricibí. E Toren di Vigilancia citá ariba a bisa cu un esposa cristian por ta un apoyo pa su casá. El a bisa: “E esposa por hacié mas cumbiniente posibel pa su casá prepará su vários asignacionnan, i yuda spar tempu precioso p’e i pa su mes dor di tin un bon programa na cas, preparando cuminda na ora, kedando cla pa sali pa bai reunionnan di congregacion na tempu. . . . Bou dje guia di su esposo, e esposa cristian por contribuí hopi pa entrená e yunan den e caminda cu nan tin cu cana pa agradá Jehova.” (Proverbionan 22:6) Sí, e esposa a ser creá p’e ta “un yudante,” i su esposo cu gusto lo aceptá su yudansa sabiamente. (Génesis 2:18) Su sosten por permití e esposo percurá mas eficasmente pa tantu su famia como su responsabilidadnan di congregacion.
9. Ken den e congregacion di Tesalónica a ser animá pa yuda otro miembronan di congregacion?
9 Sin embargo, esposanan di ancianonan cristian no ta e úniconan cu por participá den actividad cu ta apoyá un superintendente cu mester tantu “pastoreá e tou di Dios” como percurá pa su mes famia. (1 Pedro 5:2) Ken otro por? Apostel Pablo a urgi e rumannan na Tesalónica pa mustra respet pa esnan cu ta “presidí riba” nan. Sin embargo, continuando i dirigiendo su mes n’e mésun rumannan aki—specíficamente esnan cu no ta presidí—Pablo a skirbi: “Nos ta urgi boso, rumannan, spierta esnan desordená, papia di un manera consolador cu e almanan deprimí, apoyá esnan swak, tene gran pacenshi pa cu tur.”—1 Tesalonicensenan 5:12-14.
10. Ki efecto excelente e yudansa amoroso di tur e rumannan tin riba e congregacion?
10 Ta ki excelente ora e rumannan den un congregacion tin e amor cu ta impulsá nan pa consolá esnan deprimí, apoyá esnan swak, spierta esnan desordená i tene gran pacenshi pa cu tur! E rumannan na Tesalónica, kendenan recientemente a brasa e berdad di Bijbel apesar di tabata sufriendo gran tribulacion, a aplicá Pablo su conseho pa haci esaki. (Echonan 17:1-9; 1 Tesalonicensenan 1:6; 2:14; 5:11) Pensa dje efecto excelente cu nan cooperacion amoroso tabatin di fortalecé i uni henter e congregacion! Di manera similar, awe ora e rumannan ta consolá, ta apoyá i ta spierta un e otro, e ta haci e responsabilidadnan di pastoreo dje ancianonan, kendenan hopi biaha tin famia pa percurá p’e, muchu mas fácil pa atendé.
11. (a) Pakico ta razonabel pa concluí cu hende muher tabata incluí den e término “rumannan”? (b) Ki yudansa un hende muher cristian maduro por rindi na muhernan mas yong awe?
11 Hende muher tabata incluí entre e “rumannan” cu apostel Pablo tabata dirigiendo su mes na dje? Sí, nan tabata, ya cu hopi hende muher a bira creyente. (Echonan 17:1, 4; 1 Pedro 2:17; 5:9) Ki clase di yudansa tal hende muher por a rindi? Wel, tabatin muhernan mas yong den e congregacionnan cu tabatin un problema pa controlá nan “impulsonan sexual” of kendenan a bira “almanan deprimí.” (1 Timoteo 5:11-13) Algun hende muher awe tin problemanan similar. Loke nan por tin mas necesidad di dje ta simplemente un persona pa scucha nan problemanan i mustra empatia. Hopi biaha un ruman muher cristian maduro ta e mihó persona pa percurá tal yudansa. Por ehempel, e por considerá problemanan personal cu un otro hende muher, loke un homber cristian su so lo no por atendé apropiadamente. Resaltando e balor di duna tal yudansa, Pablo a skirbi: “Laga e hende muhernan di edad ser . . . maestranan di loke ta bon; pa nan por pone e muhernan yong recobrá nan sentidonan pa stima nan esposonan, pa stima nan yunan, pa ser di sano huicio, decente, trahador na cas, bon, sometiendo nan mes na nan esposonan, p’e palabra di Dios no ser zundrá.”—Tito 2:3-5.
12. Ken su guia ta vital pa tur den e congregacion sigui?
12 Ki un bendicion rumannan muher humilde ta den un congregacion ora nan di un manera cooperativo ta apoyá tantu nan esposonan como e ancianonan! (1 Timoteo 2:11, 12; Hebreonan 13:17) Ancianonan cu responsabilidad di famia specialmente ta saca beneficio ora tur ta cooperá pa yuda un e otro den un spiritu di amor i ora tur ta sumiso n’e guia dje wardadornan nombrá.—1 Pedro 5:1, 2.
Mayornan, Kico Boso Ta Pone na Promé Lugá?
13. Con hopi tata ta faya cu nan famia?
13 Hopi aña pasá, un entretenedor prominente a comentá: “Mi ta mira hombernan exitoso manehá companianan cu cientos di hende; nan sa con pa trata cu cada situacion, con pa disipliná i duna recompensa den e mundu empresarial. Pero e empresa di mas importante cu nan ta dirigiendo ta nan famia i nan ta faya cuné.” Pakico? Esei no ta pasobra nan ta pone negoshi i otro interesnan na promé lugá i ta neglishá Dios su conseho? Su Palabra ta bisa: “E palabranan aki cu mi ta mandando bo . . . , bo mester inculcá . . . den bo yu.” I esaki mester a ser hací diariamente. Mayornan tin cu duna libremente di nan tempu—i specialmente di nan amor i interes profundo.—Deuteronomio 6:6-9.
14. (a) Con mayornan mester percurá pa nan yunan? (b) Kico entrenamentu apropiado dje yunan ta incluí?
14 Bijbel ta recordá nos cu yunan ta un herencia di Jehova. (Salmo 127:3) Abo ta percurá pa bo yunan como Dios su propiedad, un regalo cu el a confia na bo? Bo yu probablemente lo reaccioná faborablemente si bo tum’é den bo brasa demostrando asina bo cuido i atencion amoroso. (Marco 10:16) Pero pa ‘entrená un yu conforme e caminda p’e’ ta rekerí mas cu simplemente dun’é brasa cu sunchi. Pa ta ekipá cu e sabiduria pa evitá dificultadnan di bida, un yu mester di disiplina amoroso tambe. Un mayor ta mustra amor genuino dor di ‘busca su yu cu disiplina.’—Proverbionan 13:1, 24; 22:6.
15. Kico ta mustra e necesidad di disiplina di mayornan?
15 E necesidad di disiplina di mayornan por ser mirá for di un consehera di scol su descripcion di e muchanan cu ta bini na su oficina: “Nan ta duná bo lástima, ta deprimí i desesperá. Nan ta yora segun cu nan ta papia di con cosnan realmente ta. Hopi—hopi mas cu kisas bo ta pensa—a trata di cometé suicidio, no pasobra nan ta asina felis cu nan no por soportá esei; ta pasobra nan ta sinti nan asina infelis, bandoná i dominá pa tension pa motibu cu na un edad asina yong nan ‘tin encargo’ i esei ta net di mas pa nan atendé.” El a agregá: “Ta un cos temorisante pa un persona yong sinti cu e ta na encargo di asuntunan.” Ta cierto cu yunan por purba evitá of rechasá disiplina, pero nan realmente ta apreciá e guia i restriccionnan di mayornan. Nan ta contentu cu nan mayornan ta suficientemente interesá den nan pa fiha límitenan pa nan. “Tabata un gran alivio pa mi,” un tiener kende su mayornan a pone límite p’e a bisa.
16. (a) Kico ta sosodé cu algun yu cu a ser lantá den casnan cristian? (b) Pakico e curso di desobedencia di un yu no necesariamente kier men cu e entrenamentu cu a ser duná dor dje mayornan no tabata bon?
16 Tog, apesar di tin mayornan cu ta stima nan i cu ta proveé bon entrenamentu, algun hóben, mescos cu e yu perdí den Jesus su ilustracion, ta rechasá guia di mayor i ta coge mal caminda. (Lucas 15:11-16) Sin embargo, esei riba su mes no necesariamente kier men cu e mayornan no a cumpli cu nan responsabilidad di entrená nan yu adecuadamente, manera Proverbionan 22:6 ta manda. E declaracion tocante ‘entrená un yu conforme e caminda p’e i lo e no desviá for dje’ a ser duná como un regla general. Lamentablemente, mescos cu e yu perdí, algun yu lo ‘despreciá obedencia na un mayor.’—Proverbionan 30:17.
17. For di kico mayornan di yunan cu a bai den mal caminda por saca consuelo?
17 Un tata di un yu cu a bai den mal caminda a lamentá: “Mi a haci un esfuerso constante pa alcansá su curason. Mi no sa kico pa haci pasobra mi a purba asina tantu cos. Nada no a duna resultado.” Ta di spera cu yunan desobediente asina, cu tempu, lo corda e entrenamentu amoroso cu nan a ricibí i lo regresá mescos cu e yu perdí. Pero, e echo ta keda sí cu algun yu ta rebelá i ta haci cosnan inmoral causando gran dolor pa nan mayornan. Mayornan por saca consuelo sabiendo cu asta e maestro di mas grandi cu a yega di biba riba tera a mira con su alumno di hopi tempu, Hudas Iscariote, a traicion’é. I Jehova mes sin duda a pena ora hopi di su mes yunan spiritual a rechasá su conseho i a resultá di ta rebelde sin cu tabata Su falta.—Lucas 22:47, 48; Revelacion 12:9.
Yunan—Ken Boso Lo Agradá?
18. Con yunan por mustra cu nan ta pone Dios na promé lugá?
18 Hóbennan, Jehova ta insta boso: “Sea obediente na boso mayornan den union cu Señor.” (Efesionan 6:1) Hóbennan ta pone Dios na promé lugá dor di haci esaki. No sea bobo! “Cualkier persona bobo ta trata cu falta di respet e disiplina di su tata,” e Palabra di Dios ta bisa. Tampoco bo mag suponé di un forma arogante cu bo por biba sin disiplina. Echo ta cu “tin un generacion cu ta puru den su propio bista, i tog no ta labá di su sushedad.” (Proverbionan 15:5; 30:12, American Standard Version) Pues obedecé e instruccion divino—“scucha” na, “warda como tesoro,” “no lubidá,” “presta atencion” na, “warda,” i “no bandoná” e mandamentunan i disiplina di mayornan.—Proverbionan 1:8; 2:1; 3:1; 4:1; 6:20.
19. (a) Ki motibunan poderoso yunan tin pa obedecé Jehova? (b) Con hóbennan por mustra cu nan ta gradicidu na Dios?
19 Bo tin motibunan poderoso pa obedecé Jehova. E stimá bo, i el a duna su leynan, incluyendo e ley pa yunan obedecé nan mayornan, pa protehá bo i pa yudá bo disfrutá di un bida felis. (Isaías 48:17) Tambe el a duna su Yu pa muri pa bo di manera cu bo por ser salbá for di picá i morto i disfrutá di bida eterno. (Juan 3:16) Bo ta gradicidu? Dios ta mirando for di cielu, examinando bo curason pa mira si bo berdaderamente ta stim’é i ta apreciá su percuracionnan. (Salmo 14:2) Satanas tambe ta mirando, i e ta desafiando Dios, pretendiendo cu lo bo no obedecé Dios. Bo ta haci Satanas contentu i Jehova “sintié ofendí” ora bo desobedecé Dios. (Salmo 78:40, 41) Jehova ta suplicá bo: “Sea sabí, mi yu, i haci mi curason alegrá [dor di ser obediente na mi], pa mi por contestá esun cu ta desafiá mi cu desprecio.” (Proverbionan 27:11) Sí, e pregunta ta, Ken lo bo agradá, Satanas of Jehova?
20. Con un hóben a mantené e curashi pa sirbi Jehova asta ora e tin miedu?
20 No ta fácil pa haci e boluntad di Dios en bista dje presionnan cu Satanas i su mundu ta ehercé riba bo. E por ta temorisante. Un hóben a comentá: “Tene miedu ta mescos cu sinti friu. Bo por haci algu tocante dje.” El a splica: “Ora bo ta sinti friu, bo ta bisti un sweater. Si ainda bo ta sinti friu, bo ta bisti un mas. I bo ta sigui bisti algu te ora e frialdad disparcé i bo no ta sinti friu mas. Pues haciendo oracion na Jehova ora bo tin miedu ta mescos cu bisti un sweater ora bo ta sinti friu. Si despues di un oracion ainda mi tin miedu, mi ta haci un oracion mas, i un mas, i un mas, te ora mi no ta sinti miedu mas. I e ta duna resultado. El a librá mi di problema!”
21. Con Jehova lo apoyá nos si nos realmente ta trata na pon’é na promé lugá den nos bida?
21 Si nos realmente ta purba pone Dios na promé lugá den nos bida, Jehova lo apoyá nos. Lo e fortalecé nos, proveendo yudansa angelical ora esei ta necesario, mescos cu el a haci pa su Yu. (Mateo 18:10; Lucas 22:43) Mayornan i yunan, boso tur tene curashi. Tene temor na imitacion di Cristo, i esei lo trece disfrute pa boso. (Isaías 11:3) Sí, “teme e Dios berdadero i warda su mandamentunan, pasobra esaki ta henter e obligacion di hende.”—Eclesiástes 12:13.
Bo Por Contestá?
◻ Ki responsabilidadnan Jesus su siguidornan di promé tabatin cu balansá?
◻ Ki responsabilidad mayornan cristian mester cumpli cuné?
◻ Ki yudansa ta disponibel pa ancianonan cristian cu tin famia?
◻ Ki sirbishi balioso rumannan muher por efectuá den e congregacion?
◻ Ki conseho i guia ta vital pa yunan haci caso di dje?
[Plachi na página 15]
Hopi biaha un muher cristian maduro por percurá yudansa necesario na un muher mas yong
[Plachi na página 17]
Ki consuelo mayornan di yunan cu a bai den mal caminda por saca for dje Scritura?