E Resurekshon di Hesus—Di Bèrdat El A Tuma Lugá?

HERODOTO, un historiadó griego ku a biba 2.500 aña pasá, a konta un relato tokante e egipsionan di su tempu. El a skirbi: “Na bankete di hende riku, anochi despues di kome, un hòmber tabata kana rònt ku un kahita di palu pintá i grabá, ku tabatin un kadaver aden, di mei meter pa un meter largu. E tabata mustra esaki na tur hende ku tabata einan, bisando: ‘Bebe i pasa bon, ma wak e kos akí; pasobra asina lo bo bira ora bo muri.’”

No ta e egipsionan so tabatin e aktitut ei pa ku bida i morto. Awe tambe e ekspreshon “Kome, bebe i pasa bon” a bira masha komun. Si bo tin ku muri un dia, pakiko no gosa mas tantu posibel? Pakiko lucha pa hasi loke ta bon? Si morto ta pone fin na tur kos, no tin nada malu pa gosa di bida awe. Apòstel Pablo a indiká esaki ora el a deskribí e aktitut di hende ku no ta kere den resurekshon, bisando: “Si e mortonan no ta ser lantá, ‘laga nos kome i bebe, pasobra mañan nos ta muri.’”—1 Korintionan 15:32.

Klaru ku Pablo mes no a kere ku ora un hende muri lo e pasa pa olvido. E tabata konvensí ku e mortonan lo bolbe biba, ku e posibilidat di no tin ku muri nunka mas. E konvikshon ei tabata basá riba un suseso verídiko i di sumo importansia ku el a konsiderá irefutabel, esta, e resurekshona di Kristu Hesus. De echo, e resurekshon ei tabata e suseso di mas impreshonante ku a fortalesé e fe di e promé disipelnan.

Pero kiko e resurekshon di Hesus ta nifiká pa nos anto? Kon nos por sa si di bèrdat el a tuma lugá? Laga nos wak kon Pablo a rasoná riba e puntonan akí ora el a skirbi e kristiannan ku tabata biba na Korinto.

Algun kristian ku tabata biba den e stat di Korinto di antigwedat tabata konfundí tokante e asuntu, i otronan no tabata kere mes den un resurekshon. Den su promé karta na e kristiannan einan, apòstel Pablo a menshoná kiko lo tabata e konsekuensianan si no tin resurekshon. El a skirbi: “Si en bèrdat e mortonan no ta resusitá, e ora ei ni Kristu no a lanta for di morto. Pero si Kristu no a ser lantá, siguramente nos predikashon ta enbano, i nos fe tambe ta enbano. Es mas, nos ta resultá di ta testigu falsu kontra Dios . . . Boso fe no ta bal nada; boso ta ketu bai den boso pikánan. . . . E ora ei esnan ku a bai sosegá den union ku Kristu tambe a bai kompletamente pèrdí.”—1 Korintionan 15:13-18.

“El a aparesé na mas ku 500 ruman pareu . . . Despues di esei el a aparesé na Santiago, kaba na tur e apòstelnan; ma por último, el a aparesé na mi tambe.”—1 Korintionan 15:6-8

Pablo a kuminsá su argumento ku un deklarashon ku ningun hende no por a refutá: Si e mortonan no ta ser lantá, e ora ei Kristu, kende a muri, lo no por a ser lantá for di morto tampoko. I si Kristu no a ser lantá for di morto, kiko esei lo a nifiká? E ora ei e predikashon di e bon notisia lo tabata enbano, un mentira di marka mayó. Al fin i al kabo, e resurekshon di Kristu ta un siñansa fundamental di e fe kristian, estrechamente ligá ku algun di e siñansanan mas básiko di Beibel tokante e soberania di Dios, su nòmber, su Reino i nos salbashon. Si e resurekshon no a tuma lugá, e mensahe ku Pablo i e otro apòstelnan a proklamá lo no tabatin ningun sentido.

Esei lo a impliká algu mas. Si Kristu no a ser lantá for di morto, e fe kristian lo tabata enbano, inútil, basá riba mentira. Ademas, Pablo i e otro apòstelnan lo a gaña no solamente ku Hesus a resusitá, sino tambe tokante Yehova Dios, esun ku nan ta bisa a resusit’é. Es mas, e deklarashon ku Kristu a “muri pa nos pikánan” tambe lo ta infundá, ya ku si e Salbador mes no por a ser salbá for di morto, lo e no por salba niun hende tampoko. (1 Korintionan 15:3) Esei lo a nifiká ku e kristiannan ku a muri, den algun kaso komo mártir, a fayesé ku un speransa falsu ku nan lo a haña resurekshon.

Pablo a yega na e siguiente konklushon: “Si ta den e bida akí so nos ta spera den Kristu, nos ta esnan ku hende mester tin mas duele di dje.” (1 Korintionan 15:19) Pablo, meskos ku otro kristian, a sufri pèrdida, a ser persiguí, a pasa den difikultat i a enfrentá morto pasobra el a kere den e resurekshon i tur loke esaki a enserá. Tur esei lo tabata enbano si e resurekshon lo tabata nada mas ku un mentira!

Pablo no a pensa ku loke e kristiannan a kere aden tabata basá riba mentira. E tabata sa ku Hesus a ser lantá for di morto, i el a resumí e evidensianan pa e korintionan, esta, “ku Kristu a muri pa nos pikánan, segun e Skritura, ku nan a der’é, ku el a ser lantá for di morto riba e di tres dia, segun e Skritura, ku el a aparesé na Sefas i despues na e 12 apòstelnan.”b Anto Pablo a agregá: “Despues di esei el a aparesé na mas ku 500 ruman pareu; algun di nan a bai sosegá, ma mayoria di nan t’ei huntu ku nos ainda. Despues di esei el a aparesé na Santiago, kaba na tur e apòstelnan; ma por último, el a aparesé na mi tambe.”—1 Korintionan 15:3-8.

Pablo a kuminsá deklará na un manera konvinsente ku Kristu a muri pa nos pikánan, a ser derá i a ser resusitá. Kiko a duna Pablo e siguransa ei? Un motibu ta e testimonio di hopi testigu okular. Hesus komo persona resusitá a aparesé na vários hende (inkluso Pablo mes), na gruponan chikitu i asta na un multitut di 500 persona. Hopi di nan no a kere mes ora nan a tende ku Hesus a ser resusitá. (Lukas 24:1-11) Mayoria di e testigunan okular ainda tabata na bida den e dianan di Pablo i kualke hende por a puntra nan si Hesus en bèrdat a aparesé. (1 Korintionan 15:6) Lo tabata fásil pa nenga testimonio di un òf dos testigu, pero no e testimonio di 500 òf mas testigu okular.

Tuma nota tambe ku Pablo a menshoná dos biaha ku e morto, entiero i resurekshon di Hesus tabata “segun e Skritura.” E susesonan akí ta konfirmá ku e profesianan den e Skritura Hebreo tokante e Mesías a kumpli, dunando prueba ku Hesus di bèrdat tabata e Mesías primintí.

Apesar di e testimonio di testigu okular i otro pasashinan di e Skritura, tabatin i te ainda tin hende ku ta duda ku Hesus a lanta for di morto. Algun ta bisa ku su disipelnan a hòrta su kurpa pa despues pretendé ku nan ta testigu di su resurekshon. Sinembargo, e disipelnan no tabatin ni e poder ni e influensia pa lucha kontra e sòldánan romano ku tabata stashoná na entrada di e graf. Otro hende ta pretendé ku loke e testigunan ei a mira tabata djis un ilushon. E echo ku Hesus a aparesé dilanti di hopi hende na diferente okashon ta kontradisí e teoria ei. Ademas, no ta rasonabel pa kere ku un persona imaginario lo por a kushiná i sirbi piská, manera Hesus a hasi na Galilea despues ku el a resusitá. (Huan 21:9-14) Akaso un hòmber imaginario lo a invitá mirónes pa mishi kuné?—Lukas 24:36-39.

Tòg tin algun hende ta pretendé ku e resurekshon tabata un kuenta ku e disipelnan a inventá. Pero kiko nan lo a gana ku esei? Nada, pasobra ora nan a duna testimonio tokante e resurekshon, nan a haña nan ku bofon, sufrimentu i morto. Pakiko nan lo a riska pasa den asina tantu sufrimentu djis pa apoyá un mentira? Ademas, nan a duna testimonio promé na Herúsalèm, nèt den bista di nan opositornan, kendenan tabata kla pa probechá di kualke chèns ku nan a haña pa kondená nan.

Ta e resurekshon a duna e disipelnan e kurashi pa duna testimonio tokante nan Señor apesar di e persekushon sumamente violento ku nan a haña nan kuné. E realidat di e resurekshon a bira un parti fundamental di e fe kristian. E promé kristiannan no a riska nan bida djis pa duna testimonio tokante un maestro sabí ku a ser matá. Nan a riska nan bida pa proklamá e resurekshon di Hesus, pasobra esei a duna prueba ku e tabata e Kristu, e Yu di Dios, un persona bibu i poderoso ku a apoyá nan i guia nan. Su resurekshon a nifiká ku nan tambe lo a lanta for di morto. De echo, si Hesus no a ser lantá for di morto, awe lo no tabatin kristianismo. Si Hesus no a lanta for di morto, kisas nos lo no a yega di tende di dje mes.

Pero kiko e resurekshon di Kristu ta nifiká pa nos awe?