E Resurekshon di Hesus Ta Nifiká Bida!

HESUS su resurekshon no ta djis un suseso di pasado ku no tin muchu nifikashon pa nos awe. Apòstel Pablo a papia di su importansia ora el a skirbi: “Kristu a ser lantá for di morto, e promé fruta di esnan ku a bai sosegá. Pasobra ya ku morto a bini pa medio di un hende, resurekshon di e mortonan tambe ta bini pa medio di un hende. Meskos ku den Adam tur ta muri, asina tambe den Kristu tur lo haña bida.”—1 Korintionan 15:20-22.

Hesus a ser resusitá dia 16 di nisan di aña 33 di nos era, riba e dia di aña ku e hudiunan tabata ofresé nan promé frutanan na Yehova Dios. Nan tabata ofresé e promé kosecha di trigu ei na e santuario di e tèmpel na Herúsalèm. E echo ku Pablo a bisa ku Hesus ta e promé fruta ta indiká ku lo tin mas hende ku lo ser lantá for di morto.

E siguiente palabranan di Pablo ta splika kiko a bira posibel pa medio di e resurekshon di Hesus. El a bisa: “Ya ku morto a bini pa medio di un hende, resurekshon di e mortonan tambe ta bini pa medio di un hende.” Adam a pasa piká i imperfekshon pa nos; p’esei nos tur ta muri. Sinembargo, Hesus a duna su bida humano perfekto komo reskate i asina a habri kaminda pa humanidat ser librá for di sklabitut na piká i morto pa medio di e resurekshon. Dunando un resúmen apropiá di e asuntu, Pablo a skirbi na Romanonan 6:23: “E salario ku piká ta paga ta morto, ma e regalo ku Dios ta duna ta bida eterno pa medio di Kristu Hesus, nos Señor.”

Hesus mes a splika kiko su morto i resurekshon ta nifiká pa nos. Papiando di su mes, el a bisa: “Mester hisa e Yu di hende na haltu, pa tur hende ku kere den dje por haña bida eterno. Pasobra Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.”—Huan 3:14-16.

Imaginá bo—bida eterno sin doló, sufrimentu òf ferdrit! (Revelashon 21:3, 4) Ki un futuro maravioso! Un eksperto riba tereno di Beibel a bisa: “Santana ta pone nos kòrda kon kòrtiku bida ta, ma e resurekshon ta garantisá nos kon kòrtiku morto ta.” Sí, e resurekshon di Hesus ta nifiká bida!