“E Mortonan Lo Ser Lantá”

“Pasobra e trompet lo toca, i e mortonan lo ser lantá incoruptibel, i nos lo ser cambiá.”—1 CORINTIONAN 15:52.

 1, 2. (a) Ki promesa consolador Dios a duna mediante profeta Oséas? (b) Con nos por sa cu Dios ta dispuesto pa trece e mortonan bek na bida?

BO A yega di perde un ser kerí den morto? Si ta asina, bo conocé e dolor cu morto por trece. No obstante, cristiannan ta haña consuelo den e promesa cu Dios a duna pa medio di profeta Oséas: “For dje man di Sheol lo mi rescatá nan; for di morto lo mi recobrá nan. O Morto, unda bo puinan ta? O Sheol, unda bo poder destructivo ta?”—Oséas 13:14.

² E idea di cu e mortonan lo bolbe na bida ta parce absurdo pa hende sképtico. Pero Dios Todopoderoso sigur tin e poder pa efectuá un milager asina! E berdadero cuestion ta si Jehova ta dispuesto pa trece e mortonan bek na bida. E homber hustu Job a puntra: “Si un homber físicamente capacitá muri, e por biba atrobe?” Anto, el a duna e contesta trankilisante aki: “Lo bo yama, i mi mes lo contestá bo. Pa e obra di bo mannan lo bo sinti un anhelo.” (Job 14:14, 15) E palabra “anhelo” ta denotá un deseo ardiente. (Compará cu Salmo 84:2.) Sí, Jehova ta anticipá e resureccion intensamente—e ta anhelá pa mira un biaha mas e fielnan cu a muri i cu ta bibu den su memoria.—Mateo 22:31, 32.

Jesus Ta Tira Lus Riba e Resureccion

 3, 4. (a) Ki lus Jesus a tira riba e speransa di resureccion? (b) Pakico Jesus a ser lantá como un spiritu, i no den carni?

³ Hombernan di fe di antigwedad, mescos cu Job, tabatin solamente un comprendimentu parcial dje resureccion. Tabata Jesucristo cu a tira lus completo riba e speransa maraviyoso aki. El a mustra e papel clave cu e mes ta hunga ora el a bisa: “Esun cu ta ehercé fe den e Yu tin bida eterno.” (Juan 3:36) Unda hende lo disfrutá dje bida ei? P’e gran mayoria di esnan cu ta ehercé fe, esei lo ta riba tera. (Salmo 37:11) Sin embargo, Jesus a bisa su disipelnan: “No tene miedu, trupa chikitu, pasobra boso Tata a aprobá pa duna boso e reino.” (Lucas 12:32) E Reino di Dios ta celestial. P’esei, e promesa aki ta nificá cu un “trupa chikitu” lo bai ta huntu cu Jesus den shelu como criaturanan spiritual. (Juan 14:2, 3; 1 Pedro 1:3, 4) Ki un prospecto glorioso! Mas aleu Jesus a revelá na apostel Juan cu e cantidad di e “trupa chikitu” aki lo ta limitá na 144.000.—Revelacion 14:1.

⁴ Pero con e 144.000 ta drenta den gloria celestial? Jesus “a tira lus riba bida i incorupcion pa medio dje bon nobo.” Pa medio di su sanger, el a inaugurá “un caminda nobo i bibu” pa drenta shelu. (2 Timoteo 1:10; Hebreonan 10:19, 20) Na promé lugá, el a muri manera Bijbel a profetisá cu lo a sosodé. (Isaías 53:12) Anto, manera apostel Pedro a proclamá mas despues, “e Jesus aki Dios a resucitá.” (Echonan 2:32) Pero Jesus no a ser lantá como hende. El a bisa: “E pan cu lo mi duna ta mi carni na fabor di bida di mundu.” (Juan 6:51) Tumando su carni bek lo a invalidá e sacrificio ei. P’esei Jesus a ser “matá den carni, pero hací bibu den spiritu.” (1 Pedro 3:18) Asina Jesus “a obtené liberacion eterno pa nos,” esta, pa e “trupa chikitu.” (Hebreonan 9:12) El a presentá na Dios e balor di su bida humano perfecto como un rescate pa humanidad pecaminoso, i e 144.000 tabata e proménan cu a beneficiá for di esaki.

 5. Ki speransa a ser extendé na Jesus su siguidónan di promé siglo?

⁵ Jesus lo no tabata e único persona resucitá pa bida celestial. Pablo a bisa compañeronan cristian na Roma cu nan a ser ungí cu spiritu santu pa ta yu di Dios i co-heredero cu Cristo si nan confirmá nan ungimentu dor di perseverá te na fin. (Romanonan 8:16, 17) Tambe Pablo a splica: “Si nos a bira uní cuné den semehansa di su morto, nos siguramente tambe lo ser uní cuné den semehansa di su resureccion.”—Romanonan 6:5.

Defendiendo e Speransa di Resureccion

 6. Pakico creencia den e resureccion tabata bou di atake na Corinto, i con apostel Pablo a reaccioná?

⁶ Resureccion ta parti dje “doctrina primario” di cristianismo. (Hebreonan 6:1, 2) No obstante, e doctrina tabata bou di atake na Corinto. Algun persona den e congregacion, evidentemente influenciá pa filosofia griego, tabata bisa: “No tin resureccion dje mortonan.” (1 Corintionan 15:12) Ora informenan di esaki a alcansá apostel Pablo, el a sali na defensa dje speransa di resureccion, specialmente e speransa di cristiannan ungí. Laga nos examiná Pablo su palabranan manera nan ta registrá na 1 Corintionan capítulo 15. Lo bo ripará cu ta bon si bo a lesa e capítulo den su totalidad, manera a ser recomendá den e artículo anterior.

 7. (a) Riba ki cuestion clave Pablo a enfocá? (b) Ken a mira e Jesus resucitá?

⁷ Den e promé dos versículonan di 1 Corintionan capítulo 15, Pablo ta establecé e tema di su consideracion: “Mi ta duna boso di conocé, rumannan, e bon nobo cu mi a declará na boso, cu boso tambe a ricibí, den cua boso tambe ta firme, mediante cua boso ta ser salbá tambe, . . . a ménos cu boso realmente a bira creyente pornada.” Si e corintionan no a para firme den e bon nobo, tabata en bano cu nan a aceptá e berdad. Pablo a continuá: “Mi a pasa na boso, entre e promé cosnan, loke ami tambe a ricibí, cu Cristo a muri pa nos picánan segun e Scritura; i cu el a ser derá, sí, cu el a ser lantá e di tres dia segun e Scritura; i cu el a aparecé na Céfas, despues n’e diesdosnan. Despues di esei el a aparecé na mas cu cincushen ruman a la bes, e mayoria di ken ta permanecé te n’e tempu actual, pero algun a bai drumi den morto. Despues di esei el a aparecé na Santiago, caba na tur e apostelnan; pero por último di tur el a aparecé na mi tambe como si fuera na un hende nací prematuramente.”—1 Corintionan 15:3-8.

 8, 9. (a) Con importante ta pa kere den resureccion? (b) Probablemente na ki ocasion Jesus a aparecé na “mas cu cincushen ruman”?

⁸ Pa esnan cu a aceptá e bon nobo, kere den e resureccion di Jesus no tabata un opcion. Tabatin hopi testigo ocular pa confirmá cu “Cristo a muri pa nos picánan” i cu el a ser lantá. Un di nan tabata Céfas, mihó conocí como Pedro. E echo cu Jesus a aparecé na Pedro mester tabata un gran consuelo p’e despues cu Pedro a nengu’é e anochi cu Jesus a ser traicioná i arestá. Jesus resucitá a bishitá tambe “e diesdosnan,” e apostelnan como grupo—un experencia cu sin duda a yuda nan vence nan temor i bira testigonan yen di curashi di Jesus su resureccion.—Juan 20:19-23; Echonan 2:32.

⁹ Tambe Cristo a aparecé na un grupo mas grandi, “mas cu cincushen ruman.” Siendo cu ta na Galilea so e tabatin gran cantidad di siguidó asina, esaki tal bes tabata n’e ocasion describí na Mateo 28:16-20, ora Jesus a duna e mandamentu pa haci disipel. Ki un testimonio poderoso e individuonan aki por a duna! Algun tabata na bida ainda na 55 E.C. ora Pablo a skirbi e promé carta aki n’e corintionan. Pero ripará cu Pablo ta papia di esnan cu a muri como si fuera nan a “bai drumi den morto.” Ainda nan no a ser resucitá pa ricibí nan recompensa celestial.

10. (a) Kico tabata e efecto di Jesus su último reunion cu su disipelnan? (b) Con Jesus a aparecé na Pablo “como si fuera na un hende nací prematuramente”?

¹⁰ Un otro testigo sobresaliente di Jesus su resureccion tabata Santiago, yu di José i di Maria, mama di Jesus. Evidentemente promé cu e resureccion, Santiago no tabata un creyente. (Juan 7:5) Pero despues cu Jesus a aparecé na dje, Santiago a bira un creyente i tal bes a hunga un rol den combertí su otro rumannan. (Echonan 1:13, 14) Na su último reunion cu su disipelnan, n’e ocasion cu el a subi na shelu, Jesus a comisioná nan pa “ta testigonan . . . te na e parti mas lehano dje tera.” (Echonan 1:6-11) Mas despues, el a aparecé na Saulo di Tarso, persiguidó di cristian. (Echonan 22:6-8) Jesus a aparecé na Saulo “como si fuera na un hende nací prematuramente.” Tabata como si fuera Saulo ya a ser resucitá pa bida como spiritu i por a mira e Señor glorificá siglonan promé cu e resureccion ei mester a tuma lugá. E experencia aki a para Saulo abruptamente riba su curso di oposicion cruel contra e congregacion cristian i a causa un cambio remarcabel den dje. (Echonan 9:3-9, 17-19) Saulo a bira apostel Pablo, un dje defensornan mas principal dje fe cristian.—1 Corintionan 15:9, 10.

Fe den e Resureccion Ta Esencial

11. Con Pablo a exponé e eror dje expresion: “No tin resureccion”?

¹¹ Pues anto, e resureccion di Jesus tabata un echo bon confirmá. “Awor si ta predicá di Cristo cu el a ser lantá for di morto,” Pablo ta argumentá, “con bini algun den boso ta bisa cu no tin resureccion dje mortonan?” (1 Corintionan 15:12) Hende asina no solamente tabatin duda of pregunta personal tocante e resureccion, sino tambe nan tabata expresando abiertamente cu nan no tabata kere den dje. P’esei Pablo ta exponé e eror di nan razonamentu falsu. E ta bisa cu si Cristo no a ser lantá, e mensahe cristian tabata un mentira, i esnan cu a duna testimonio di Cristo su resureccion tabata “testigonan falsu di Dios.” Si Cristo no a ser lantá, ningun rescate a ser pagá na Dios; cristiannan lo tabata ‘ainda den nan picánan.’ (1 Corintionan 15:13-19; Romanonan 3:23, 24; Hebreonan 9:11-14) I cristiannan cu a “bai drumi den morto,” den algun caso como mártir, a perecé sin un speransa genuino. Ki un estado lastimoso cristiannan lo tabata aden si e bida aki tabata tur loke nan por a spera! Nan sufrimentu lo tabata completamente pornada.

12. (a) Kico e echo cu Cristo ta ser yamá “e promé fruta di esnan cu a bai drumi den morto” ta implicá? (b) Con Cristo a haci e resureccion posibel?

¹² Sin embargo, esei no tabata e caso. Pablo ta continuá: “Cristo a ser lantá for di morto.” Ademas, e ta “e promé fruta di esnan cu a bai drumi den morto.” (1 Corintionan 15:20) Ora e israelitanan obedientemente a duna Jehova e promé frutanan di nan producto, Jehova a bendicioná nan cu un cosecha grandi. (Exodo 22:29, 30; 23:19; Proverbionan 3:9, 10) Dor di yama Cristo “e promé fruta,” Pablo ta implicá cu lo tin un cosecha mas di individuonan cu lo ser lantá for di morto pa bida celestial. “Siendo cu morto ta pa medio di un homber,” Pablo ta bisa, “resureccion dje mortonan tambe ta pa medio di un homber. Pasobra mescos cu den Adam tur ta muriendo, asina tambe den Cristo tur lo ser hací bibu.” (1 Corintionan 15:21, 22) Jesus a haci e resureccion posibel dor di entregá su bida humano perfecto como un rescate, habriendo e caminda pa humanidad ser librá for di sclabitud na picá i morto.—Galationan 1:4; 1 Pedro 1:18, 19.a

13. (a) Na ki tempu e resureccion celestial ta tuma lugá? (b) Con ta posibel cu algun di esnan ungí no ta “bai drumi den morto”?

¹³ Pablo ta continuá: “Pero cada un den su mes categoria: Cristo e promé fruta, despues esnan cu ta pertenecé na Cristo durante su presencia.” (1 Corintionan 15:23) Cristo a ser resucitá na 33 E.C. Sin embargo, su siguidónan ungí—“esnan cu ta pertenecé na Cristo”—lo tabatin cu warda te djis despues cu Jesus a cuminsá su presencia real, cu segun profecia di Bijbel a tuma lugá na 1914. (1 Tesalonicensenan 4:14-16; Revelacion 11:18) Kico di esnan cu lo ta na bida durante e presencia ei? Pablo ta bisa: “Mira! Mi ta conta boso un secreto sagrado: Nos tur lo no bai drumi den morto, pero nos tur lo ser cambiá, den un momento, den un kinipí di wowo, durante e último trompet. Pasobra e trompet lo toca, i e mortonan lo ser lantá incoruptibel, i nos lo ser cambiá.” (1 Corintionan 15:51, 52) Ta keda claro cu no ta tur ungí ta drumi den graf pa warda un resureccion. Esnan cu muri durante e presencia di Cristo ta ser transformá instantáneamente.—Revelacion 14:13.

14. Den ki sentido esnan ungí ta ser “bautisá p’e propósito di ser hende morto”?

¹⁴ “Di otro manera,” Pablo ta puntra, “kico esnan cu ta ser bautisá p’e propósito di ser hende morto lo haci? Si e mortonan no tin cu ser lantá absolutamente, pakico nan tambe ta ser bautisá p’e propósito di ser tal? Pakico nos tambe ta den peliger tur ora?” (1 Corintionan 15:29, 30) Pablo no tabata kier men cu individuonan bibiente a ser bautisá na nomber dje mortonan, manera algun traduccion di Bijbel ta laga parce. Al fin i al cabo, bautismo tin di haber cu ser un disipel cristian, i alma morto no por ta disipel. (Juan 4:1) Pablo mas bien tabata papiando di cristiannan na bida, di cua hopi, manera Pablo mes, tabata “den peliger tur ora.” Cristiannan ungí a ser ‘bautisá den Cristo su morto.’ (Romanonan 6:3) Desde nan ungimentu, nan ta ser “bautisá,” na moda di papia, den un curso cu lo hiba na un morto mescos cu esun di Cristo. (Marco 10:35-40) Nan lo muri cu e speransa di un glorioso resureccion celestial.—1 Corintionan 6:14; Filipensenan 3:10, 11.

15. Ki peligernan Pablo tal bes a pasa aden, i con fe den e resureccion a yud’é wanta nan?

¹⁵ Pablo ta splica awor cu e mes a enfrentá asina tantu peliger cu e por a bisa: “Tur dia mi ta enfrentá morto.” Pa algun persona no acus’é di ta exagerando, Pablo ta agregá: “Mi ta afirmá esaki cu e húbilo cu pa causa di boso, rumannan, mi tin den Cristo Jesus nos Señor.” The Jerusalem Bible ta traducí e versículo aki: “Mi ta enfrentá morto tur dia, rumannan, i mi por hura esei cu e orguyo cu mi tin den boso den Cristo Jesus nos Señor.” Como ehempel dje peligernan cu el a enfrentá, na versículo 32, Pablo ta bisa cu el a “bringa cu bestia salbahe na Efeso.” Hopi biaha e romanonan a ehecutá criminalnan dor di tira nan pa bestia salbahe den arena. Si Pablo a wanta un bataya cu bestia salbahe literal, lo e por a sobrebibí solamente cu yudansa di Jehova. Sin e speransa di resureccion, lo tabata prufiá di su parti pa scoge un curso di bida cu lo a exponé na tal peliger. Sin e speransa di un futuro bida, lo no tabatin muchu sentido pa wanta contratempu i sacrificionan cu a compañá sirbishi na Dios. “Si e mortonan no ta ser lantá,” Pablo ta bisa, “‘laga nos come i bebe, pasobra mañan nos tin cu muri.’”—1 Corintionan 15:31, 32; mira 2 Corintionan 1:8, 9; 11:23-27.

16. (a) Di unda e expresion “laga nos come i bebe, pasobra mañan nos tin cu muri” kisas a originá? (b) Ki peligernan tabatin den aceptá e idea aki?

¹⁶ Tal bes Pablo a cita Isaías 22:13, cu ta describí e actitud fatalista dje habitantenan desobediente di Jerusalem. Of lo e por tabatin e creencia dje epicureonan na mente, cu a rechasá cualkier speransa di un bida despues di morto i cu a kere cu placer carnal tabata e cos principal den bida. Sea cual sea e caso, e filosofia di “come i bebe” tabata malbado. P’esei, Pablo ta spierta: “No sea gañá. Mal asociacion ta daña custumbernan útil.” (1 Corintionan 15:33) Asociacion cu esnan cu a rechasá e resureccion lo por tabata venenoso. E asociacion ei por a hunga un rol den e problemanan cu Pablo tabatin cu atendé den e congregacion corintio, manera inmoralidad sexual, division, casonan den corte, i falta di respet p’e Cena di Señor.—1 Corintionan 1:11; 5:1; 6:1; 11:20-22.

17. (a) Ki exhortacion Pablo a duna e corintionan? (b) Ki preguntanan mas mester ser contestá?

¹⁷ P’esei Pablo ta duna e corintionan e exhortacion positivo aki: “Spierta di un manera hustu i bira sobrio i no practicá picá, pasobra algun ta sin conocimentu di Dios. Mi ta papia pa haci boso sinti bergwensa.” (1 Corintionan 15:34) Un punto di bista negativo di resureccion a hiba algun den un condicion spiritualmente sùf, como si fuera burachi. Nan tabatin cu spierta, keda sobrio. Awe cristiannan ungí di igual manera mester ta spiritualmente lantá, sin ser influenciá p’e punto di bista sképtico di mundu. Nan tin cu tene duru na nan speransa di un resureccion celestial. Pero tabatin mas pregunta—p’e corintionan dje tempu ei i pa nos awe. Por ehempel, den ki forma e 144.000 ta ser lantá pa bai shelu? I kico dje miyones di otronan cu ainda ta den graf i cu no tin un speransa celestial? Kico e resureccion lo nificá pa nan? Den nos siguiente artículo, nos lo examiná e resto di Pablo su consideracion dje resureccion.

[Nota]

Bo Ta Corda?

◻ Ki lus Jesus a tira riba e resureccion?

◻ Ken tabata algun dje testigonan di Cristo su resureccion?

◻ Pakico e doctrina di resureccion a ser desafiá, i con Pablo a reaccioná?

◻ Pakico fe den e resureccion tabata esencial pa cristiannan ungí?

[Plachi na página 15]

Jairo su yu muher a bira prueba cu resureccion tabata posibel

[Plachi na página 16, 17]

Sin e speransa di un resureccion, e martirio di cristiannan fiel lo no tabatin sentido