Hóbennan Sa Puntra . . .

Con Mi Por Bira un Amigu di Dios?

“LEALTAD.” “Debocion personal.” Esaki ta términonan cu hende ta usa hopi bes pa describí nan apego na nan amigunan di mas íntimo. Bo tabata sa cu e términonan aki por describí tambe un apego na e Magnífico Creador dje universo imponente aki—cu Dios mes por ta bo amigu personal? Sí, Bijbel ta papia di tin debocion piadoso, i e expresion ei ta enbolbé no solamente obedencia, sino tambe un apego personal na Dios, un intimidad cu ta sali for di un curason apreciativo.

Artículonan anterior den e seri aki a mustra cu un apego asina ta posibel i tambe beneficioso.a Pero ta con bo ta haña e amistad personal aki cu Dios? Esei no ta algu cu bo ta nace cuné ni cu bo ta heredá automáticamente di mayornan piadoso. Mas bien, e ta algu cu ta bini solamente cu berdadero esfuerso. Apostel Pablo a bisa e hóben Timoteo pa ‘entrená su mes cu debocion piadoso como su meta.’ Sí, e mester a ehercé e clase di esfuerso cu un atleta ta ehercé den entrenamentu! (1 Timoteo 4:7, 8, 10) Bo mester haci mescos si bo kier pa Dios bira bo amigu. Pero con bo por cuminsá entrená den esaki?

Conocimentu Personal di Dios

Ya cu debocion piadoso ta sali for di curason, bo mester yena bo curason cu conocimentu di Dios. Ta tristu pa bisa, pero ora a puntra 500 hóben “Cuantu biaha bo ta lesa Bijbel riba bo mes?” 87 porciento a bisa sea “de bes en cuando,” “casi nunca,” of “nunca.” Ta bisto cu mayoria hóben ta haña cu lesa Bijbel ta monótono i laf. Pero no mester ta asina! Pensa un ratu: Pakico algun hóben ta memorisá tur clase di estadística di deporte of ta siña e palabranan di nan cancionnan faborito? Pasobra nan ta interesá den e cosnan ei. Di igual manera, studia Bijbel ta bira interesante si bo ocupá bo mes intensamente cuné. (1 Timoteo 4:15) Apostel Pedro a urgi: “Desaroyá un anhelo p’e lechi puru cu ta pertenecé n’e palabra.” (1 Pedro 2:2) Sí, bo mester desaroyá un interes asina den e Scritura. Kisas esaki lo rekerí esfuerso, pero e recompensanan ta bale la pena.b

Pa cuminsá, lesa i studia e Palabra di Dios i publicacionnan basá riba Bijbel lo revelá “e agradabilidad di Jehova.” (Salmo 27:4) Un hóben cristian cu yama Amber a hacié su meta pa lesa e Bijbel completo. Esaki a tum’é casi un aña. “Mi ta duda cu tin hopi cos den mi bida cu ta rekerí asina tantu tempu i esfuerso pero cu ta trece asina tantu recompensa,” Amber a splica. “Ora mi tabata lesando e, mi tabata sinti como si fuera Jehova tabata poné mi sinta riba su scochi manera un tata i tabata siñando mi. Mi a siña asina tantu tocante Jehova—cosnan cu a poné mi hala mas cerca di dje i a pone cu mi kier tem’é pa e resto di mi bida.”

Ora bo lesa Bijbel, bo ta haña sa di hopi ocasion cu Dios a apoyá su amigunan lealmente. (Salmo 18:25; 27:10) Bo ta haña sa cu su normanan ta semper mihó i ta pa nos bienestar duradero. (Isaías 48:17) Dor di lesa tocante Dios su cualidadnan inigualabel, manera su amor i sabiduria, esei ta inspirá bo pa kier imit’é. (Efesionan 5:1) Pero pa informacion asina conmové bo curason, bo mester meditá tambe. Segun cu bo ta lesa, puntra bo mes: ‘Kico esaki ta contá mi tocante Jehova? Con mi por aplicá esaki den mi manera di pensa i mi accionnan? Con esaki ta mustra cu Dios ta e mihó amigu cu ami hamas lo por tin?’

E conocimentu cu bo ta obtené tocante Dios mediante studio personal i den congregacion lo yudá bo hala mas cerca di dje den un otro manera mas. Un proverbio frances ta bisa: “Berdadero amigunan ta solamente esnan cu ta pensa mescos.” Pero con bo por “pensa mescos” cu Dios? E hóben Denise ta splica: “Mas bo studia i investigá un tópico, mas bo ta haña sa con Jehova su punto di bista riba dje ta. Sabiendo con e ta pensa tocante algu ta yudá bo.”

Conducta Recto Ta Vital

Dios ta scoge como su amigu solamente esnan cu ta respetá su normanan moral. “Su intimidad ta cu esnan recto,” Proverbionan 3:32 ta bisa. Un hóben cu ta haci esfuerso pa ta recto lo “percurá pa cana den e ley di Jehova.” (2 Reynan 10:31) Con cerca di Dios un conducta obediente asina lo trece un hende? Jesucristo a bisa: “Mi Tata lo stim’é, i nos lo bini cerca dje i establecé nos habitacion cerca dje.” (Juan 14:21-24) Esta un cuadro conmovedor! Imaginá bo, e dos personanan di mas importante den universo dunando nan atencion i cuido constante na un humano! Esei ta loke lo sosodé cu bo si bo percurá pa cana den Jehova su ley.

Acaso ser recto ta nificá cu bo mester ta perfecto? Di ningun manera! Si bo cometé un eror pa motibu di debilidad, esei no ta nificá cu bo a bandoná ‘e caminda di Dios su mandamentunan.’ (Salmo 119:35) Considerá loke Bijbel ta conta nos tocante Rey David. Apesar di ser un amigu leal di Dios, el a cometé algun eror serio pa motibu di debilidad. Tog, Jehova a bisa cu el a cana “cu integridad di curason i cu rectitud.” (1 Reynan 9:4) Semper Rey David a mustra repentimentu sincero pa cualkier malecho cu el a cometé i a haci hopi esfuerso pa haci loke tabata agradá Dios.—Salmo 51:1-4.

Aunke David a stima Dios, e tabata sa con duru tin biaha por ta pa haci loke ta corecto. Ta p’esei el a roga Dios: “Hací mi cana den bo berdad.” Sí, el a desaroyá un miedu, of temor, sincero di ofendé Dios. P’esei David por a bisa: “E intimidad cu Jehova ta pertenecé na esnan cu ta tem’é.” (Salmo 25:5, 14) Esaki no ta un miedu insaludabel, sino un sintimentu di reverencia profundo pa e Creador i un miedu saludabel di desagrad’é. E temor piadoso aki ta e fundeshi riba cua conducta recto ta basá. Pa ilustrá, considerá e ehempel di un hóben cristian cu yama Joshua.

Joshua a ricibí un nota di un compañera di scol bisando cu e ta gusta Joshua i cu e tabata kier tin un “relacion” cuné. Aunke Joshua tabata hañ’é atractivo, Joshua a realisá cu asociacion cu un incrédulo lo por hiba na inmoralidad i lo por daña su amistad cu Jehova. Di manera cu el a bis’é cu palabra masha cla cu e no tabata interesá! Ora cu el a conta su mama despues con el a trata cu e situacion, e mama a sclama sin pensa: “O, Joshua, casi sigur bo a hùrt su sintimentunan!” Joshua a contestá: “Pero, Mama. Mi ta preferá di hùrt su sintimentunan cu hùrt Jehova.” Su temor piadoso, su miedu di desagradá su Amigu celestial, a impuls’é pa mantené conducta recto.

Busca Bon Compañeronan

Sin embargo, un hóben cu yama Lynn, a sigui hañ’é den dificultad. E problema? E tabata anda cu e compañeronan robes. (Exodo 23:2; 1 Corintionan 15:33) E solucion? Haña amigunan nobo! “Si bo tin amigunan rond di bo cu ta stima Jehova,” Lynn a concluí, “esei ta yudá bo mantené un concenshi sensitivo i alehá for di dificultad. Ora nan ta expresá disgustu pa malecho, esei ta poné bo sinti mescos.”

Si bo wak bon, bo mal amigunan por ta e obstáculo mas grandi pa tin un amistad cu Dios. Ann di diesocho aña a admití: “Bo compañeronan tin un influencia grandi riba bo. Tardi of trempan lo bo ta mescos cu nan. Nan ta influenciá bo pa pensa manera nan. E combersacionnan por ta mas tantu tocante sex. Esei lo por hací bo curioso. Bo ta puntra bo mes con sex lo ta.” Ann a siña esaki na malu. E ta bisa: “Mi sa cu esaki ta cierto. Mi a hañá mi enbolbí den inmoralidad i a sali na estado cu 15 aña.”

Finalmente Ann a yega na comprendé con berdad e palabranan di Bijbel ta: “P’esei, ken cu ta deseá di ser amigu di mundu ta haci su mes enemigu di Dios.” (Santiago 4:4) Sí, Ann tabata kier ta—i tabata dicididu pa ta—un amigu di mundu. Pero esaki solamente a hiba na un dolor di curason tras otro. Afortunadamente, Ann a bin na su sano huicio. El a sinti remordimentu profundo pa su proceder i a busca yudansa di su mayornan i dje ancianonan den su congregacion. Tambe el a busca un grupo nobo di amigu. (Salmo 111:1) Cu hopi esfuerso di su parti, Ann a logra atrobe di ta un amigu di Dios. Awe, vários aña despues, e ta bisa: “Mi relacion cu Jehova ta hopi mas íntimo.”

Mediante studio personal di Bijbel, meditacion, conducta recto i asociacion saludabel, abo tambe por cultivá un amistad íntimo cu Dios. Sin embargo, mantené e amistad ei ta otro cos. Con bo por haci esei apesar di dificultadnan i debilidadnan personal? Un futuro artículo den e seri aki lo trata cu e asuntu aki.

[Notanan]

[Plachi na página 21]

Mi compañeronan lo yudá mi pa ta Dios su amigu?