“No Tene Miedu, Trupa Chikitu”

“No tene miedu, trupa chikitu, pasobra boso Tata a aprobá pa duna boso e reino.”—LUCAS 12:32.

1. Kico tabata e base p’e palabranan di Jesus: “No tene miedu, trupa chikitu”?

“BUSCA continuamente [Dios] su reino.” (Lucas 12:31) Ora Jesus a bisa e palabranan aki na su disipelnan, el a expresá un principio cu a guia e pensamentu di cristiannan for di su dia te na esun di nos. E Reino di Dios mester haña nada ménos cu e promé lugá den nos bida. (Mateo 6:33) Sin embargo, den e relato di Lucas, Jesus a pasa na papia palabranan cariñoso i trankilisante cu un grupo special di cristian. El a bisa: “No tene miedu, trupa chikitu, pasobra boso Tata a aprobá pa duna boso e reino.” (Lucas 12:32) Como e Wardador Excelente, Jesus tabata sa cu tabatin tempunan turbulento den futuro pa su disipelnan íntimo. Pero no tabatin motibu pa nan tene miedu si nan a sigui busca e Reino di Dios. P’esei, Jesus su exhortacion no tabata un mandamentu severo. Mas bien, e tabata un promesa amoroso cu a sirbi pa inspirá confiansa i curashi.

2. Ken ta forma e trupa chikitu, i pakico nan ta specialmente privilegiá?

² Jesus tabata papiando cu su disipelnan i el a yama nan un “trupa chikitu.” E tabata papiando tambe cu esnan kende Jehova lo a ‘duna e reino.’ Compará cu e multitudnan inmenso cu lo a aceptá Jesus despues di tempu, e grupo aki en berdad tabata poco na cantidad. Tambe nan a ser considerá precioso pasobra nan a ser scogí pa un futuro extraordinario, pa ser usá den sirbishi real. Nan Tata, e Gran Wardador, Jehova, ta yama e trupa chikitu cu bista riba nan ricibimentu di un herencia celestial en coneccion cu Cristo su Reino Mesiánico.

E Trupa Chikitu

3. Ki vision glorioso dje trupa chikitu Juan a mira?

³ Ken anto, ta forma e trupa chikitu aki cu tin un prospecto maraviyoso asina? E siguidornan di Jesucristo cu ta ser ungí cu spiritu santu. (Echo 2:1-4) Mirando nan como cantantenan celestial cu arpa den nan man, apostel Juan a skirbi: “Mi a wak, i mira! e Lamchi pará riba e Ceru di Sion, i cuné cient’i cuarenticuater mil teniendo su nomber i e nomber di su Tata skirbí riba nan frenta. Esakinan ta esnan cu no a contaminá nan mes cu muhernan; en realidad, nan ta bírgen. Esakinan ta esnan cu ta bai siguiendo e Lamchi sin importá unda e bai. Esakinan a ser cumprá for di entre humanidad como promé fruta pa Dios i p’e Lamchi, i ningun falsedad a ser hañá den nan boca; nan ta sin defecto.”—Revelacion 14:1, 4, 5.

4. Ki posicion e trupa chikitu tin riba tera awe?

⁴ Desde Pentecoste di 33 E.C., e personanan ungí cu spiritu aki a sirbi como embahadornan di Cristo riba tera. (2 Corintio 5:20) Awe, a sobra solamente un resto di nan, sirbiendo huntu como e clase di esclabo fiel i discreto. (Mateo 24:45; Revelacion 12:17) Desde aña 1935 en particular, e “otro carnénan,” cristiannan cu un speransa terenal kendenan awor ta miyones na cantidad, a uni cu nan. Esakinan ta yuda den predicá e bon nobo den tur e tera.—Juan 10:16.

5. Kico ta e actitud dje resto di esnan dje trupa chikitu, i pakico nan no tin nodi tene miedu?

⁵ Kico ta e actitud dje restantenan dje trupa chikitu aki cu ainda ta riba tera? Sabiendo cu nan mester ricibí ‘un Reino cu no por ser sagudí,’ nan ta rindi nan sirbishi sagrado cu temor piadoso i reverencia. (Hebreo 12:28) Humildemente nan ta realisá cu un privilegio incalculabel cu ta resultá den goso sin límite ta di nan. Nan a haña esun “perla di hopi balor” na cua Jesus a referí ora el a papia tocante e Reino. (Mateo 13:46) Segun cu e tribulacion grandi ta yega cerca, e ungínan di Dios ta para sin miedu. Apesar di loke mester bini pronto riba e mundu di humanidad durante “e dia grandi i ilustre di Jehova,” nan no tin un miedu insaludabel di futuro. (Echo 2:19-21) Pakico nan lo mester tin?

E Cantidad Ta Mengua

6, 7. (a) Pakico e cantidad dje trupa chikitu cu ainda ta riba tera ta masha chikitu? (b) Con cada individuo mester considerá e speransa cu e tin?

⁶ Den añanan recien e cantidad dje trupa chikitu cu ainda ta riba tera a bira masha chikitu. Esaki tabata bisto for dje informe di Memorial di 1994. Den rond di 75.000 congregacion di Jehova su pueblo mundialmente, solamente 8.617 persona a demostrá dor di tuma dje emblemanan cu nan ta profesá di ta miembro dje resto. (Mateo 26:26-30) Na contraste, e asistencia total tabata di 12.288.917 persona. Cristiannan ungí sa cu esaki ta di spera. Jehova a establecé un cantidad limitá, 144.000, pa forma e trupa chikitu, i el a bin ta recogé nan desde Pentecoste di 33 E.C. Lógicamente, e yamamentu dje trupa chikitu lo a yega na un conclusion ora e cantidad tabata cerca di ser completá, i e evidencia ta cu e recogimentu general di esnan specialmente bendicioná aki a terminá na 1935. Sin embargo, a ser profetisá cu e otro carnénan den e tempu di fin mester a crece pa bira “un multitud grandi, cu ningun hende no por a conta, for di tur nacion i tribu i pueblo i lenga.” Desde 1935 e recogimentu general dor di Jehova tabata di e multitud grandi aki, kende nan speransa ta bida eterno den un paradijs terenal.—Revelacion 7:9; 14:15, 16; Salmo 37:29.

⁷ Mayoria di esnan dje trupa chikitu ainda riba tera awor ta den nan 70, 80 i 90 i picu aña. Algun a pasa nan di 100 aña di bida. Nan tur, sin importá nan edad, sa cu mediante un resureccion celestial, cu tempu nan lo ser uní cu Jesucristo i lo reina cuné den su glorioso Reino. Esnan dje multitud grandi lo ta súbditonan terenal di Cristo e Rey. Laga cada un alegrá riba loke Jehova tin prepará pa esnan cu ta stim’é. No ta na nos pa scoge ki speransa pa tene. Esei ta keda na Jehova pa determiná. Ambos grupo por alegrá den nan speransa pa un futuro felis, sea ta den e Reino celestial of den un paradijs terenal bou dje Reino ei.—Juan 6:44, 65; Efesio 1:17, 18.

8. Con leu e seyamentu dje 144.000 ta, i kico lo sosodé ora e ser completá?

⁸ E trupa chikitu di 144.000 persona ta “e Israel di Dios,” cua a reemplasá Israel natural den Dios su propósitonan. (Galatio 6:16) P’esei, e resto ta formá di esnan cu ta sobra dje nacion spiritual ei cu ainda ta riba tera. E restantenan ei ta ser seyá pa Jehova su aprobacion final. Den un vision, apostel Juan a mira esaki sosodé, i el a informá: “Mi a mira un otro angel subiendo for di salimentu di solo, teniendo un seyo di e Dios bibu; i el a grita cu un bos fuerte n’e cuater angelnan na ken tabata permití di haci daño n’e tera i n’e laman, bisando: ‘No haci daño n’e tera ni n’e laman ni n’e palunan, te despues cu nos a seya e esclabonan di nos Dios den nan frenta.’ I mi a tende e cantidad di esnan cu a ser seyá, cient’i cuarenticuater mil, seyá for di tur tribu dje yunan di Israel [spiritual].” (Revelacion 7:2-4) Siendo cu e trabou aki di seya Israel spiritual ta claramente hopi avansá, e ta un señal di sucesonan excitante cu lo tuma lugá dentro di poco. Entre otro cosnan, “e tribulacion grandi,” ora e cuater bientunan di destruccion ser di los riba e tera, mester ta masha cerca.—Revelacion 7:14.

9. Con e trupa chikitu ta mira e cantidad aumentante dje multitud grandi?

⁹ Esnan dje multitud grandi cu a ser recogé caba ta miyones na cantidad. Cuantu esaki ta conmové e resto! Aunke esnan dje trupa chikitu cu ainda ta riba tera ta sigui mengua na cantidad, nan a entrená i prepará hombernan cualificá dje multitud grandi pa carga responsabilidadnan en coneccion cu Dios su organisacion terenal cu ta expandiendo. (Isaías 61:5) Manera Jesus a indicá, lo tin sobrebibiente dje tribulacion grandi.—Mateo 24:22.

“No Tene Miedu”

10. (a) Ki atake ta cla pa ser lansá riba e pueblo di Dios, i na kico lo e hiba? (b) Ki preguntanan ta ser hací di cada un di nos?

¹⁰ Satanas i su demoñonan a ser degradá den becindario dje tera. E i su compinchinan ta ser maniobrá pa lansa nan atake final riba Jehova su pueblo. E atake aki, profetisá den Bijbel, ta ser describí como e atake di Gog di Magog. Riba ken specialmente e Diabel ta enfocá su atake? No ta riba e último miembronan dje trupa chikitu, e Israel spiritual di Dios, kendenan ta bibando pacíficamente “den e centro dje tera”? (Ezekiel 38:1-12) Sí, pero e resto dje fiel clase ungí, huntu cu nan compañénan leal, e otro carnénan, ta testigo dje manera cu Satanas su atake lo ocasioná di ripiente un ‘obra straño, un trabou extraordinario,’ di parti di Jehova Dios. Lo e intervení na defensa di su pueblo, i esaki lo causa e cuminsamentu di “e dia grandi i inspirador di temor di Jehova.” (Isaías 28:21; Joël 2:31) Awe, e esclabo fiel i discreto ta logrando un sirbishi vital, salbador di bida, spiertando hende dje binidero obra extraordinario aki di parti di Jehova. (Malaquías 4:5; 1 Timoteo 4:16) Bo ta apoyando activamente e sirbishi ei, participando den e predicacion dje bon nobo dje Reino di Jehova? Lo bo sigui haci esei como un proclamador di Reino sin miedu?

11. Pakico un actitud yen di curashi ta vital awe?

¹¹ Den bista dje situacion di mundu actual, ta ki oportuno p’e trupa chikitu tuma na cuenta e palabranan cu Jesus a dirigí na nan: “No tene miedu, trupa chikitu!” Un actitud asina yen di curashi ta esencial den bista di tur loke ta ser lográ awor na armonia cu e propósito di Jehova. Individualmente, cada miembro dje trupa chikitu ta realisá e necesidad pa wanta te n’e fin. (Lucas 21:19) Mescos cu Jesucristo, e Señor i Doño dje trupa chikitu, a wanta i proba su mes fiel te ora el a completá su bida terenal, asina cada miembro dje resto mester wanta i proba su mes fiel.—Hebreo 12:1, 2.

12. Con Pablo, mescos cu Jesus, a exhortá cristiannan ungí pa no tene miedu?

¹² Tur esnan ungí mester tin e mésun perspectiva cu apostel Pablo tabatin. Nota con su palabranan como un proclamador público ungí dje resureccion ta na armonia cu Jesus su exhortacion pa no tene miedu. Pablo a skirbi: “Corda cu Jesucristo a ser lantá for di morto i tabata dje simia di David, segun e bon nobo cu mi ta predicá; en relacion cu cua mi ta sufriendo maldad te n’e punto di cadena di prizon como un malechor. No obstante, e palabra di Dios no ta na cadena. P’e motibu aki mi ta sigui wanta tur cos pa causa dje scogínan, pa nan tambe por obtené e salbacion cu ta den union cu Cristo Jesus huntu cu gloria eterno. Fiel ta e dicho: Siguramente si nos a muri huntu, tambe nos lo biba huntu; si nos sigui wanta, tambe nos lo reina huntu como rey; si nos nenga, e tambe lo nenga nos; si nos ta infiel, e ta permanecé fiel, pasobra e no por nenga su mes.”—2 Timoteo 2:8-13.

13. Ki conviccion profundo e miembronan dje trupa chikitu tin, i kico esaki ta impulsá nan pa haci?

¹³ Mescos cu apostel Pablo, e resto dje miembronan dje trupa chikitu ungí ta dispuesto pa wanta sufrimentu segun cu nan ta declará e mensahe poderoso expresá den e Palabra di Dios. Nan conviccionnan tin rais profundo segun cu nan ta confia continuamente den e promesanan divino di salbacion i den e echo cu nan lo ricibí “e corona di bida” si nan proba nan mes fiel te na morto. (Revelacion 2:10) Dor di experenciá un resureccion i cambio instantáneo, nan lo ser trecí den union cu Cristo, pa goberná huntu cuné como rey. Ki un triunfo pa nan curso di warda integridad como conkistadornan dje mundu!—1 Juan 5:3, 4.

Un Speransa Unico

14, 15. Con e speransa di resureccion dje trupa chikitu ta único?

¹⁴ E speransa di resureccion cu e trupa chikitu ta carga ta único. Den ki manera? Entre otro, e ta tuma lugá promé cu e resureccion general di “e hustunan i e inhustunan.” (Echo 24:15) En realidad, e resureccion dje ungínan ta cai den un cierto órden di importancia, manera e ta ser establecé claramente dor dje palabranan aki hañá na 1 Corintio 15:20, 23: “Cristo a ser lantá for di morto, e promé fruta di esnan cu a bai drumi den morto. Pero cada un den su mes categoria: Cristo e promé fruta, despues esnan cu ta pertenecé na Cristo durante su presencia.” Dor di tin e clase di awante i fe cu Jesus a manifestá, e trupa chikitu sa kico ta warda nan ora nan terminá nan curso terenal, particularmente siendo cu e Señor berdadero a bini na su tempel pa huicio na 1918.—Malaquías 3:1.

¹⁵ Pablo ta duna nos un motibu adicional pa mira e resureccion aki como único. Segun e registro na 1 Corintio 15:51-53, el a skirbi: “Mira! Mi ta conta boso un secreto sagrado: Nos tur lo no bai drumi den morto, pero nos tur lo ser cambiá, den un momento, den un kinipí di wowo, durante e último trompet. . . . Pasobra loke ta coruptibel mester bisti incorupcion, i loke ta mortal mester bisti inmortalidad.” E palabranan aki ta aplicá na esnan dje trupa chikitu cu ta muri durante e presencia di Cristo. Sin tin cu drumi un periodo largu di tempu den morto, nan ta ser bistí cu inmortalidad, “den un momento, den un kinipí di wowo.”

16, 17. Relacioná cu nan speransa dje resureccion, con cristiannan ungí djawe ta specialmente bendicioná?

¹⁶ Den lus dje comprendimentu aki, nos por capta e sentido dje palabranan di apostel Juan hañá na Revelacion 14:12, 13. El a skirbi: “Aki ta caminda ta nificá awante p’e santunan, esnan cu ta warda e mandamentunan di Dios i e fe di Jesus. I mi a tende un bos biniendo for di cielu bisa: ‘Skirbi: Felis ta e mortonan cu ta muri den union cu e Señor desde e tempu aki padilanti. Sí, e spiritu ta bisa, laga nan sosegá di nan trabou, pasobra loke nan a haci ta bai huntu cu nan.’ ”

¹⁷ Ki un recompensa único tin wardá p’e resto dje trupa chikitu! Nan resureccion lo tuma lugá rápidamente, direct despues cu nan drumi den morto. Ki un cambio remarcabel nan lo experenciá segun cu nan ta tuma nan asignacion den e region spiritual! Cu un glorificacion asina dje trupa chikitu tumando lugá i cu e cumplimentu di profecianan bíblico principal asina leu, e último miembronan restante dje trupa chikitu berdaderamente no tin nodi “tene miedu.” I nan actitud sin miedu ta sirbi pa animá esnan dje multitud grandi, kendenan mester cultivá un actitud similar di sin miedu segun cu nan ta anticipá liberacion durante e tempu di mas difícil cu e tera a yega di conocé.

18, 19. (a) Pakico e tempu cu nos ta biba den ta urgente? (b) Pakico tantu e ungínan como e otro carnénan no mester tin miedu?

¹⁸ Haciendo un recuento dje actividadnan dje trupa chikitu ta permití nan i e multitud grandi sigui teme e Dios berdadero. E ora pa huicio dor di dje a yega, i e tempu faborabel cu a resta ta precioso. E tempu pa otronan actua ta berdaderamente limitá. Sin embargo, nos no ta teme cu e propósito di Dios lo faya. Lo e ser realisá siguramente!

¹⁹ Ya caba nos a tende e bosnan celestial fuerte bisa: “E Reino dje mundu a bira e reino di nos Señor i di su Cristo, i lo e goberná como rey pa semper hamas.” (Revelacion 11:15) Siguramente, e Gran Wardador, Jehova, ta guiando tur su carnénan den “e camindanan di husticia pa causa di su nomber.” (Salmo 23:3) E trupa chikitu ta ser guiá sin faya na nan recompensa celestial. I e otro carnénan lo ser rescatá sano i salbo atrabes dje tribulacion grandi pa disfrutá di bida eterno den e dominio terenal dje glorioso Reino di Dios bou di mando di Cristo Jesus. P’esei, aunke e palabranan di Jesus a ser dirigí n’e trupa chikitu, siguramente tur sirbidor di Dios riba tera tin motibu pa scucha na su palabranan: “No tene miedu.”

Bo Por Splica?

◻ Pakico nos mester spera p’e cantidad restante dje trupa chikitu mengua?

◻ Kico ta e situacion dje resto ungí awe?

◻ Pakico cristiannan no mester tin miedu, apesar dje binidero atake di Gog di Magog?

◻ Pakico e speransa di resureccion dje 144.000 ta único, specialmente awe?