Un Karta di Kuerpo Gobernante

Rumannan stimá,

TA UN gran plaser pa skirbi boso! Nos ta elogiá boso pa e amor i sakrifisio propio ku boso ta sigui demostrá. Boso lo mira den e Anuario di e aña aki ku hopi kos bon a ser lográ durante e aña di sirbishi ku a pasa. E biaha aki atrobe nos a dediká mas ku mil mion ora na e trabou di prediká i siña, animando hende direktamente pa hala serka Yehova. No ta un honor pa ta kolaboradornan di nos glorioso Dios i Tata selestial?—1 Kor. 3:9.

Segun ku nos ta mira e trabou ku tin nos dilanti, nos tin konfiansa ku boso lo sigui imitá e selo i fe di Dios su sirbidónan, ku Beibel ta papia di dje. Por ehèmpel, apòstel Pablo tabata ansioso pa ta mas efektivo posibel den promové interesnan di Reino. Aparentemente, ta durante e último aña ku el a keda na Efeso, el a skirbi su promé karta na e kongregashon kristian di Korinto. Relashoná ku e plannan ku e tabatin a korto plaso, el a skirbi: “Lo mi keda na Efeso te Pentekòste; pasobra a habri pa mi un porta hanchu i efikas, i tin hopi atversario.”—1 Kor. 16:8, 9.

Pablo a plania pa bai Masedonia i Korinto. Sin embargo, el a ripará ku tabatin un oportunidat pa hasi trabou útil dor di keda un tempu na Efeso. Pablo tabata fleksibel; el a mira un situashon faborabel den kua lo e por a promové interesnan di Reino kaminda e tabata, p’esei el a ahustá su programa. Un porta hanchu ku ta hiba na aktividat a habri p’e, i Pablo tabata ansioso pa probechá di e oportunidat aki.

Pa hasi esei lo a nifiká hopi trabou, tantu pa prediká e bon notisia komo pa edifiká e kongregashon na Efeso. Mas despues Pablo a bisa e hòmbernan di edat di e kongregashon ei: “Mi no a laga di deklará nada ku tabata di probecho pa boso i tabata siña boso públikamente i di kas pa kas, dunando testimonio, tantu na hudiu komo na griego, di repentimentu pa ku Dios i di fe den nos Señor Hesukristu.”—Echo. 20:20, 21.

Di mes manera, hopi di boso, rumannan stimá, a probechá di oportunidatnan ku a habri pa boso. Durante e último aña di sirbishi, un promedio di 798.938 ruman a logra regla nan asuntunan di tal manera pa nan por a partisipá den un òf otro tipo di sirbishi di pionero. Algun di boso a biaha bai te na e finnan di tera pa sirbi komo misionero. Ku selo boso ta plama e bon notisia i edifiká kongregashonnan. Tin di boso a siña un otro idioma pa boso por yuda stranheronan ku ta biba den bisindario. Anto otro rumannan a regla nan asuntunan pa traha den teritorionan ku no ta asigná òf pa sirbi kaminda tin mas nesesidat. Tin algun ruman asta a deskubrí ku un porta hanchu pa aktividat a habri na skol, na trabou òf den otro situashonnan kaminda nan por a duna un testimonio efikas, por ehèmpel via telefon. Eksperensianan rònt mundu ta duna evidensia ku e pueblo di Dios, tantu hóben komo grandi, ansiosamente ta buska i haña oportunidat pa kompartí konosementu di e bèrdat ku hende tur kaminda.

Boso por tin sigur ku Yehova ta mira i ta apresiá boso esfuerso profundamente. Beibel ta bisa: “Dios no ta inhustu pa lubidá boso trabou i e amor ku boso a mustra pa su nòmber.” (Heb. 6:10) Keda alerta pa oportunidatnan ku ta duna boso chèns pa promové adorashon puru. Algun di boso kisas por logra ekspandé boso sirbishi. Pero nos tur por hasi esfuerso pa bira mas efektivo den sirbishi.

Nos no por kumpli ku nos trabou di prediká, sin haña nos ku oposishon. Kòrda ku despues ku Pablo a papia di un porta hanchu di aktividat ku a habri p’e, el a skirbi: “Tin hopi atversario.” Pa Pablo, e atversarionan ei a inkluí tantu hende hudiu komo paganu, algun tabata atak’é abiertamente i otronan tabata traha kòmplòt di un manera astuto kontra dje.—Echo. 19:24-28; 20:18, 19.

Nos ta enfrentá un situashon paresido awe. Segun ku nos ta aserká e destrukshon di e sistema malbado aki, nos ta ferwagt ku oposishon lo oumentá. Satanas ta yen di “furia” i e furia ei ta spesialmente dirigí kontra esnan ku ta sirbi Dios. (Rev. 12:12) Nunka lubidá ku Satanas ta “e prens di e mundu aki.” Hesus a bisa su disipelnan: “Si boso tabata di mundu, mundu lo a stima loke ta di dje; ma pasobra boso no ta di mundu, ma ami a skohe boso for di den mundu, p’esei mundu ta odia boso.”—Huan 14:30; 15:19.

Nos ta determiná pa no laga ningun hende suak nos fe den Dios òf pone nos baha man den nos trabou di prediká. Nos sa ku lo sigui tin hende ku lo ataká nos i traha kòmplòt kontra nos. Apesar di esei, nos ta sigui prediká e bon notisia di e Reino, ku e konfiansa ku Hesus lo destruí Satanas i su kompinchinan na Yehova su debido tempu. Opositornan no a logra pone apòstel Pablo keda ketu, ni nan no ta logra di hasi esei ku sirbidónan di Yehova awe. Apesar di Satanas su furia i e odio di mundu, e spiritu di Yehova ta traha di un manera poderoso entre Su pueblo. Esta un goso pa sa ku e kantidat di proklamadó di e bon notisia a alkansá un máksimo nobo di 6.304.645!

Nos ta hasi orashon pa boso sigui probechá di oportunidatnan pa promové e interesnan di Yehova su magnífiko Reino. Boso por tin sigur di nos interes amoroso den kada un di boso segun ku nos ta keda “skouder ku skouder” den e sirbishi di e Haltísimo Dios, Yehova.—Sof. 3:9, NW.

Boso rumannan,

Kuerpo Gobernante di Testigunan di Yehova