Referensia pa Material i Tarea pa Reunion Nos Bida i Sirbishi Kristian

4-10 DI MART

TESORONAN DI E PALABRA DI DIOS | ROMANONAN 12-14

“Loke Amor Kristian Ta Enserá”

it-1-S 429

Kariño

Tur miembro di e kongregashon kristian mester tin amor di ruman (na griego: filadelfía; literalmente, “kariño pa un ruman”). (Rom 12:10; Heb 13:1; wak tambe 1Pe 3:8.) Pues, e relashon entre e rumannan den kongregashon mester ta íntimo, fuerte i sinsero meskos ku den un famia literal. Aunke e miembronan di kongregashon ya kaba ta demostrá amor di ruman, nan ta ser animá pa hasi esaki mas plenamente.—1Te 4:9, 10.

E término griego “filóstorgos,” ku ta nifiká tin “tierno kariño,” ta ser usá pa referí na e laso íntimo ku por tin entre dos persona. Un di e palabranan ku a ser usá pa forma e término “filóstorgos” ta stergo. Stergo ta ser menshoná vários biaha pa indiká e kariño ku tin entre e miembronan di famia. Apòstel Pablo a animá e kristiannan pa nan kultivá e kualidat ei. (Rom 12:10) Pablo a mustra tambe ku den e último dianan hende lo ta “sin kariño” (na griego: ástorgoi) i ku hende asina meresé morto.—2Ti 3:3; Rom 1:31, 32.

SEA DILIGENTE DEN SIRBISHI

w11-S 1/9 21-22 §6-11

Belasting i Konsenshi

Ta interesante pa nota ku un parti di e plaka di belasting ku e kristiannan di promé siglo mester a paga a bai pa kubri gastu militar. Esaki tabata hustamente loke despues a pone Gandhi i Thoreau nenga di paga belasting.

Ripará ku e kristiannan a obedesé e mandamentu na Romanonan kapítulo 13 no pa djis skapa kastigu, sino tambe “pa motibu di [nan] konsenshi.” (Romanonan 13:5) Sí, konsenshi di un kristian ta oblig’é paga belasting, asta si e plaka ta ser usá pa sierto aktividat ku e no ta di akuerdo kuné. Aunke esaki por parse kontradiktorio, tin algu ku nos mester komprondé. Nos mester rekonosé un aspekto importante di nos konsenshi, esta, su kapasidat di bisa nos si nos echonan ta bon òf malu.

Manera Thoreau a komentá, nos tur tin un konsenshi. Pero esaki no ta nifiká ku tur ora e ta konfiabel. Pa nos por agradá Dios, nos konsenshi mester ta na armonia ku Dios su normanan moral. Hopi biaha nos mester ahustá nos pensamentu òf punto di bista pa nos por pensa manera Dios pasobra su manera di pensa ta superior na esun di nos. (Salmo 19:7) P’esei, nos tin ku trata na komprondé e punto di bista di Dios tokante gobièrnu humano. Kiko ta su punto di bista?

Tuma nota ku apòstel Pablo a yama e gobièrnunan humano “sirbidó públiko di Dios.” (Romanonan 13:6) Kiko esei ta nifiká? Básikamente e ta nifiká ku nan ta mantené òrdu i ta kumpli ku nan responsabilidat relashoná ku e komunidat. Asta e gobièrnunan di mas korupto ta perkurá pa servisio postal, servisio di brantwer, protekshon polisial i pa hende haña edukashon. Aunke Dios sa di e defektonan di outoridat humano, e ta tolerá nan eksistensia pa un tempu i ta manda nos paga belasting komo muestra di rèspèt pa su areglo, esta, di permití e gobièrnunan akí goberná humanidat.

Sinembargo, Dios ta permití gobièrnu humano goberná temporalmente. Ta su boluntat pa remplasá tur e gobièrnunan ei ku su Reino selestial i pa finalmente eliminá tur e dañonan ku gobièrnu humano a kousa humanidat atraves di siglo. (Daniel 2:44; Mateo 6:10) Pero tanten ku e tempu ei no yega, Dios no a outorisá niun kristian pa djòin un grupo di aktivista ku ta boga pa no paga belasting òf pa partisipá den kualke otro aktividat paresido.

Kiko si tòg bo ta sinti manera Gandhi, esta, ku pagamentu di belasting pa sostené guera ta un piká? Meskos ku nos bista di un área ta bira mas mihó ora nos subi mas haltu, asina tambe nos por ahustá nos pensamentu pa e kuadra ku esun di Dios ora nos meditá riba e echo ku Dios su punto di bista ta muchu mas haltu ku esun di nos. Pa medio di e profeta Isaías, Dios a bisa: “Meskos ku e shelunan ta mas haltu ku tera, asina mi kamindanan ta mas haltu ku boso kamindanan, i mi pensamentunan mas haltu ku boso pensamentunan.”—Isaías 55:8, 9.

11-17 DI MART

TESORONAN DI E PALABRA DI DIOS | ROMANONAN 15-16

Buska Hoyanan Spiritual

w89-S 1/12 24 §3

Sinseridat di Boso Amor Ta Ser Poní na Prueba

No tin duda, e kristiannan no hudiu mester a sinti nan mes motivá pa yuda nan rumannan ku tabata den situashon difísil. Al fin i al kabo, nan tabatin un “debe” serka e rumannan na Herúsalèm. No ta for di Herúsalèm e bon notisia a plama i yega te serka e kristiannan no hudiu? Pablo a rekonosé: “Nan a hasié boluntariamente, ounke en realidat ta nan obligashon. Pasobra meskos ku e no hudiunan a haña un parti di e bendishonnan spiritual di e hudiunan, esnan no hudiu mester kompartí loke nan ta poseé ku esnan hudiu.”—Romanonan 15:27, Beibel na papiamentu koriente.

it-2-S 708 §5

Premirá, Predeterminá

E Mesías, òf Kristu, lo mester tabata e Simia primintí pa medio di ken tur hende hustu di e famia di tera lo mester a ser bendishoná. (Gal 3:8, 14) E promé biaha ku a hasi menshon di e “simia” akí tabata despues di e rebelion den Eden, pero promé ku Abel a nase. (Gén 3:15) Esaki tabata mas o ménos 4.000 aña promé ku e revelashon di “e sekreto sagrado” a tuma lugá ku a identifiká e “simia” Mesiániko. Pues, di bèrdat esaki “a keda wardá den silensio pa hopi tempu.”—Rom 16:25-27; Efe 1:8-10; 3:4-11.

18-24 DI MART

TESORONAN DI E PALABRA DI DIOS | 1 KORINTIONAN 1-3

Buska Hoyanan Spiritual

it-2-S 886 §5

Sabiduria

Pues, mundu den su mes sabiduria a rechasá e areglo ku Dios a hasi pa medio di Kristu komo si fuera esaki ta un bobedat; aunke su gobernantenan tabata atministradó kapas ku bon huisio, nan a bai asina leu di “klaba e glorioso Señor na staka.” (1Ko 1:18; 2:7, 8) Na su turno, Dios kier a mustra ku e sabiduria di mundu ta bobedat i kier a brongosá mundu su hòmbernan sabí. Pa logra esei, el a usa “loke ta parse bobedat di parti di Dios” i e personanan ku nan ta mira komo hende ‘bobo, débil i insignifikante’ pa kumpli ku su propósito invensibel. (1Ko 1:19-28) Pablo a kòrda e kristiannan di Korinto ku “e sabiduria di e mundu akí [i] e sabiduria di e gobernantenan di e mundu akí” lo kaba na nada; p’esei e sabiduria ei no a forma parti di e mensahe spiritual di e apòstel. (1Ko 2:6, 13) El a spièrta e kristiannan di Kolósas pa no kai den e trampa di “filosofia [filosofías; literalmente, amor pa sabiduria] i engaño bano ku ta basá riba tradishon di hende.”—Kol 2:8; kompará ku versíkulo 20-23.

25-31 DI MART

TESORONAN DI E PALABRA DI DIOS | 1 KORINTIONAN 4-6

“Un Tiki Zürdeg Ta Fermentá Henter e Mansa”

it-2-S 212

Zürdeg

Apòstel Pablo a usa e mes ehèmpel di zürdeg ei ora el a manda e kongregashon kristian na Korinto pa saka e hòmber inmoral for di e kongregashon. El a bisa: “Akaso boso no sa ku un tiki zürdeg ta fermentá henter e mansa? Saka e zürdeg bieu afó pa boso por ta un mansa nobo, pasobra de echo boso ta liber di fermentashon, ya ku Kristu, nos lamchi di Pasku, a ser sakrifiká.” Despues el a mustra bon kla kiko e ke men ku “zürdeg”: “P’esei, laga nos tene e fiesta, no ku zürdeg bieu ni ku zürdeg di maldat i loke ta pekaminoso, sino ku pan sin zürdeg ku ta simbolisá sinseridat i bèrdat.” (1Ko 5:6-8) Aki Pablo tabata hala atenshon na e nifikashon di e fiesta hudiu di Pan sin Zürdeg, ku tabata ser selebrá djis despues di Pasku Hudiu. Meskos ku un poko zürdeg ta hasi henter e mansa di pan fermentá, asina tambe henter e kongregashon por a bira impuru den Yehova su bista si nan no a eliminá e influensia korupto di e hòmber inmoral ei. Meskos ku e israelitanan no tabatin mag di tin zürdeg den nan kas durante e fiesta, asina tambe e kristiannan mester a saka e “zürdeg” ei for di meimei di e kongregashon.

it-2-S 972

Satanas

Kiko ta nifiká ‘entregá un persona na Satanas pa destrukshon di e karni’?

Ora apòstel Pablo a duna instrukshon na e kongregashon na Korinto enkuanto loke mester a hasi ku un miembro di e kongregashon ku a kometé e maldat di tene relashon seksual ku e esposa di su tata, el a skirbi: “Entregá e hòmber ei na Satanas pa destrukshon di e karni.” (1Ko 5:5) Esaki tabata un mandato pa ekspulsá e hòmber ei for di e kongregashon i stòp di anda kuné. (1Ko 5:13) E ekspreshon “entregá e hòmber na Satanas” ta enserá ku e hòmber lo tabata pafó di e kongregashon, esta, den mundu, kaminda Satanas ta dios i gobernante. Meskos ku “un tiki zürdeg” den ‘henter un mansa,’ e hòmber akí tabata “e karni,” òf elemento karnal, den e kongregashon; ekspulsando e hòmber ei, e kongregashon, ku tin un inklinashon spiritual, na moda di papia lo a destruí “e karni” ku tabata den dje. (1Ko 5:6, 7) Di manera similar, Pablo a entregá Himeneo i Aleksander na Satanas, pasobra nan a rechasá e fe i un bon konsenshi i p’esei nan fe a noufragá.—1Ti 1:20.

Buska Hoyanan Spiritual

it-2-S 216 §6

Lei

Lei Duná na e Angelnan. Angel, ku ta superior na hende, ta someté nan mes na e lei i e mandamentunan di Dios. (Heb 1:7, 14; Sl 104:4) Yehova a asta duna òrdu na su atversario Satanas i a restringié. (Yòb 1:12; 2:6) Miguel, e arkangel, a rekonosé i a respetá e puesto di Yehova komo e Hues Supremo den un diskushon ku Diabel, ora el a bisa: “Yehova skual bo!” (Hud 9; kompará ku Zak 3:2.) Yehova a pone tur e angelnan bou di outoridat di Hesukristu, esun glorifiká. (Heb 1:6; 1Pe 3:22; Mat 13:41; 25:31; Flp 2:9-11) Pues, riba òrdu di Hesus, un mensahero angelikal a ser mandá serka Huan. (Rev 1:1) Sinembargo, na 1 Korintionan 6:3 apòstel Pablo ta bisa ku e rumannan spiritual di Kristu “lo husga angel,” pasobra evidentemente den un forma òf otro nan lo ehekutá huisio riba e spiritunan malbado.