Demostrá Ku Bo Ta Gradisidu pa e Tesoronan Ku Bo No Ta Mira

 1. Kiko Hesus a bisa tokante e tesoronan selestial?

TIN tesoro ku hende no por mira? Sí; de echo e tesoronan di mas balioso ta invisibel. Den Sermon Riba Seru, Hesus a papia di tesoro selestial ku ta mas superior ku kos material. I el a agregá: “Kaminda bo tesoro ta, einan bo kurason tambe lo ta.” (Mat. 6:19-21) Ora algu ta balioso pa nos, nos kurason lo motivá nos pa traha duru pa opten’é. Nos ta “montoná tesoro den shelu” ora nos ta hasi esfuerso pa krea un bon nòmber, òf reputashon, serka Dios. Manera Hesus a splika, nada ni niun hende no por destruí òf hòrta e tesoronan ei.

 2. (a) Segun 2 Korintionan 4:17 i 18, riba kiko Pablo ta animá nos pa enfoká? (b) Kiko nos lo analisá den e artíkulo akí?

² Apòstel Pablo ta animá nos pa “fiha nos bista . . . riba e kosnan ku hende no ta mira.” (Lesa 2 Korintionan 4:17, 18.) E kosnan òf tesoronan ku hende no ta mira ta inkluí tur bendishon ku Yehova lo duna nos den e mundu nobo. Den e artíkulo akí, nos lo analisá kuater tesoro ku ta invisibel ku nos ta disfrutá di nan for di awor: amistat ku Dios, orashon, yudansa di spiritu santu di Dios i apoyo ku Yehova, Hesus i e angelnan ta duna nos den sirbishi. Nos lo analisá tambe kon nos por demostrá gratitut pa e tesoronan ei ku nos no ta mira.

 3. Kiko ta e tesoro invisibel di mas balioso, i kiko ta hasi posibel ku nos tiné?

³ E tesoro invisibel di mas balioso ku nos por tin ta amistat ku Yehova. (Sant. 2:23) Pero, kon Dios por ta amigu di hende imperfekto i sigui ta kompletamente santu? Pasobra e sakrifisio di Hesus “ta kita piká di mundu.” (Huan 1:29) Asta promé ku Hesus a muri, Yehova tabata sa ku Hesus lo a keda fiel te na morto pa por salba humanidat. Ta p’esei Yehova por tabata amigu di hende ku a biba promé ku e morto di Kristu.—Rom. 3:25.

 4. Menshoná algun hende ku a biba promé ku Kristu a muri i ku a bira amigu di Dios.

⁴ Laga nos papia di algun hende ku a biba promé ku Kristu a muri i ku a bira amigu di Dios. Abraham tabatin un fe ekstraordinario. Mas ku 1.000 aña despues ku el a muri, Yehova a yam’é “mi amigu.” (Isa. 41:8) Esei ta nifiká ku a ni morto no por separá Yehova for di su bon amigunan. Den su memoria, ainda Abraham ta bibu. (Luk. 20:37, 38) Un otro ehèmpel ta Yòb. Na un okashon ora tur e angelnan tabata huntu den shelu, Yehova a ekspresá e konfiansa ku e tabatin den Yòb. Yehova a yam’é “un hende perfekto i rekto, ku ta teme Dios i ku ta apartá su mes for di maldat.” (Yòb 1:6-8) I kiko Yehova a pensa di Daniel, kende pa 80 aña largu a sirbié fielmente den un pais pagano? Ora Daniel ya tabata di edat avansá, tres biaha angel a sigur’é ku e ta “masha stimá” pa Dios. (Dan. 9:23; 10:11, 19) Nos por tin sigur ku Yehova ta anhelá pa e dia ku e resusitá su amigunan stimá ku a muri.—Yòb 14:15.

 5. Kiko nos mester hasi pa nos por tin un amistat será ku Yehova?

⁵ Awe, miónes di hende imperfekto tin un amistat será ku Yehova. Hopi hende hòmber, muhé i mucha rònt mundu ta demostrá pa medio di nan kondukta ku nan ke ta amigu di Dios. Beibel ta splika ku Yehova tin amistat será ku hende rekto. (Pro. 3:32) Nan por tin e amistat ei pasobra nan tin fe den e sakrifisio di Hesus. Danki na e reskate ei, Yehova ta permití nos dediká nos mes na dje i batisá. Ora nos dal e pasonan importante ei, nos ta djòin e miónes di kristian dediká i batisá ku ta disfrutá di un amistat será ku e Persona di mas importante den universo!

 6. Kon nos por demostrá ku nos ta gradisidu pa nos amistat ku Dios?

⁶ Kon nos por demostrá ku nos ta gradisidu pa nos amistat ku Dios? Meskos ku Abraham i Yòb, kendenan a keda fiel na Dios pa mas ku 100 aña, nos tin ku keda fiel sin importá kuantu tempu nos tin ta sirbi Yehova den e mundu malbado akí. Ademas meskos ku Daniel, nos mester balorá nos amistat ku Yehova mas ku nos mes bida. (Dan. 6:7, 10, 16, 22) Ku yudansa di Yehova, nos por soportá kualke prueba i mantené nos amistat será kuné.—Flp. 4:13.

 7. (a) Segun Proverbionan 15:8, kon Yehova ta mira nos orashonnan? (b) Kon Yehova ta kontestá nos orashonnan?

⁷ Un otro tesoro invisibel ta orashon. Bon amigu gusta kòmbersá ku otro tokante nan pensamentu- i sintimentunan. Meskos ta pasa ku nos amistat ku Yehova. E ta papia ku nos mediante su Palabra, i den dje e ta revelá su pensamentu- i sintimentunan. Nos ta papia kuné pa medio di orashon. Ora nos ta hasi orashon, nos por kont’é tur nos pensamentu- i sintimentunan di mas profundo. Yehova gusta skucha nos orashonnan. (Lesa Proverbionan 15:8.) Komo un Amigu ku ta stima nos, e no ta skucha nos orashonnan so; e ta kontestá nan tambe. Tin biaha e kontesta ta bini mesora. Pero otro biaha, nos tin ku sigui hasi orashon tokante un asuntu. Sea kual sea, nos por tin sigur ku lo e kontestá nos na e momento korekto i na e mihó manera. Ta klaru ku kisas su kontesta no ta loke nos a ferwagt. Por ehèmpel, en bes di saka nos for di un prueba, e ta duna nos e sabiduria i forsa pa “want’é.”—1 Kor. 10:13.

 8. Kon nos por demostrá ku nos ta gradisidu pa e regalo di orashon?

⁸ Sin duda, orashon ta un regalo masha balioso. Kon nos por demostrá ku nos ta gradisidu pa e regalo ei? Un manera ta di sigui e konseho ku Yehova ta duna nos: “Hasi orashon konstantemente.” (1 Tes. 5:17) Yehova no ta obligá nos pa hasi orashon. E ta respetá nos libertat di skohe. Pero, e ta animá nos pa “perseverá den orashon.” (Rom. 12:12) Nos por demostrá ku nos ta gradisidu ora nos ta hasi hopi orashon durante henter dia. Ora nos ta hasi orashon, naturalmente nos mester gradisí i alabá Yehova tambe.—Sal. 145:2, 3.

 9. (a) Kon Chris ta mira orashon? (b) Kiko abo ta pensa tokante orashon?

⁹ Mas tantu tempu nos tin ta sirbi Yehova i mira kon e ta kontestá nos orashonnan, mas apresio nos ta haña pa orashon. Wak e ehèmpel di Chris, un ruman ku ta den sirbishi di tempu kompleto pa 47 aña. El a bisa: “Mi gusta lanta mainta trempan pa mi kòmbersá trankil ku Yehova. Ta masha maravioso pa papia kuné segun ku e promé rayonan di solo ta reflehá den e gotanan di serena! Esei ta motivá mi pa gradisié pa tur su regalonan, inkluso e privilegio di orashon. I na final di dia, despues di hasi orashon, mi ta sinti mi bon i mi por drumi ku un konsenshi limpi.”

10. Dikon nos mester balorá spiritu santu?

¹⁰ Un otro tesoro ku nos no por mira ta forsa aktivo di Dios. Hesus a animá nos pa semper pidi pa spiritu santu. (Luk. 11:9, 13) Yehova ta usa su spiritu santu pa duna nos “poder ku ta surpasá esun di hende.” (2 Kor. 4:7; Echo. 1:8) Ku yudansa di spiritu santu, nos por enfrentá kualke problema.

11. Kon spiritu santu ta yuda nos?

¹¹ Spiritu santu por yuda nos kumpli ku asignashon ku nos tin den sirbishi di Dios. E por mehorá e kapasidatnan ku ya nos tin. P’esei ora nos tin bon resultado den nos sirbishi na Dios, nos ta rekonosé ku esei no ta debí na nos mes, pero debí ku nos a haña yudansa di Dios su spiritu santu.

12. Di akuerdo ku Salmo 139:23 i 24, kiko nos por pidi den orashon?

¹² Un otro manera ku nos por demostrá ku nos ta balorá spiritu santu ta di pidi Yehova yuda nos detektá kualke pensamentu òf deseo robes ku tin den nos kurason. (Lesa Salmo 139:23, 24.) I si despues di hasi orashon nos bira konsiente ku nos tin algun pensamentu òf deseo robes, nos mester hasi orashon i pidi pa spiritu santu duna nos forsa pa lucha kontra eseinan. Di e manera ei, nos ta demostrá ku nos no ke hasi kos ku lo stroba nos di haña yudansa di spiritu santu.—Efe. 4:30.

13. Kon nos por haña mas apresio pa spiritu santu?

¹³ Nos por haña mas apresio pa spiritu santu si nos reflekshoná riba loke e ta hasi aktualmente. Promé ku Hesus a bai shelu, el a bisa su disipelnan: “Boso lo risibí poder ora spiritu santu baha riba boso, i boso lo ta mi testigunan . . . te na e parti mas leu di tera.” (Echo. 1:8) Esei ta eksaktamente loke ta pasando awe. Ku yudansa di spiritu santu, mas o ménos 8,6 mion hende rònt mundu a bira sirbidó di Yehova. Ademas, nos ta disfrutá di un paradeis spiritual ya ku spiritu santu ta yuda nos kultivá kualidat bunita, manera amor, pas, pasenshi, amabilidat, bondat, fe, suavedat i dominio propio. (Gal. 5:22, 23) Sin duda, spiritu santu ta un regalo masha balioso!

14. Ki apoyo invisibel nos tin ora nos ta den sirbishi?

¹⁴ Kolaborá ku Yehova, Hesus i e angelnan tambe ta un tesoro invisibel. (2 Kor. 6:1) Nos ta kolaborá ku nan kada bes ku nos ta partisipá den e trabou di hasi hende disipel. Pablo a bisa lo siguiente tokante su mes i otro predikadó di e bon notisia: “Nos ta kompañero di trabou di Dios.” (1 Kor. 3:9) Ademas di esei, ora nos ta partisipá den e sirbishi kristian, nos ta kompañero di trabou di Hesus tambe. Kòrda ku ora Hesus a duna e mandamentu “bai, i hasi hende di tur nashon mi disipel,” el a bisa mesora: “Mi ta ku boso.” (Mat. 28:19, 20) Awor, kiko di e angelnan? Nos ta masha gradisidu ku nan ta guia nos ora nos ta “deklará bon notisia eterno na esnan ku ta biba riba tera.”—Rev. 14:6.

15. Duna un ehèmpel di Beibel ku ta mustra e papel importante ku Yehova tin den nos sirbishi.

¹⁵ Ku e apoyo ku nos ta haña di Yehova, Hesus i e angelnan nos ta hasi e trabou di sembra e mensahe di Reino. Algun di e simianan ei ta kai den kurason sinsero i ta kuminsá krese. (Mat. 13:18, 23) Ken ta pone e simia di bèrdat krese i duna fruta? Hesus a bisa ku niun hende no por bira su siguidó “a ménos ku e Tata . . . hal’é.” (Huan 6:44) Den Beibel nos ta haña un relato ku ta ilustrá esei. Na un okashon, Pablo a prediká na un grupo di hende muhé pafó di e stat Filipo. Tuma nota di loke Beibel ta bisa tokante un di nan, Lidia: “Yehova a habri su kurason kompletamente pa e aseptá e kosnan ku Pablo tabata papia.” (Echo. 16:13-15) Meskos ku Lidia, Yehova ta hala miónes di hende serka dje.

16. Ken mester haña e onor pa e bon resultadonan ku nos tin den sirbishi?

¹⁶ Ken mester haña e onor pa e bon resultadonan ku nos tin den sirbishi? Pablo a kontestá e pregunta ei ora el a skirbi e siguiente palabranan tokante e kongregashon na Korinto: “Ami a planta e simia, Apolo a muh’é, pero ta Dios a pon’é sigui krese. Di manera ku ni esun ku ta planta ni esun ku ta muha no ta nada, sino Dios ku ta pon’é krese.” (1 Kor. 3:6, 7) Meskos ku Pablo, semper ora nos tin éksito den sirbishi, nos mester duna e onor na Yehova.

17. Kon nos por demostrá ku nos ta gradisidu pa e privilegio di kolaborá ku Dios, Kristu i e angelnan?

¹⁷ Kon nos por demostrá ku nos ta gradisidu pa e privilegio di kolaborá ku Dios, Kristu i e angelnan? Nos por hasi esei ora nos ta buska tur oportunidat pa papia tokante e bon notisia ku mas tantu hende posibel. Tin vários manera ku nos por hasi esei, por ehèmpel, predikando “públikamente i di kas pa kas.” (Echo. 20:20) Hopi ruman gusta prediká informalmente tambe. Ora nan topa un hende ku nan no konosé, nan ta kumind’é amablemente i ta purba di kuminsá un kòmbersashon. Si e hende tin gana di papia, ku takto nan ta guia e kòmbersashon na e mensahe di Reino.

18-19. (a) Kiko nos tin ku hasi pa muha simia di e bèrdat? (b) Kon Yehova a yuda un studiante di Beibel?

¹⁸ Komo “kompañero di trabou di Dios,” nos mester hasi mas ku djis planta simia di e bèrdat; nos mester muha nan tambe. Ora un hende mustra interes den e mensahe, nos mester hasi nos máksimo esfuerso pa rebishit’é. Si nos no por bai, nos mester pidi un otro ruman pa tuma kontakto kuné ku e meta pa kuminsá un estudio di Beibel. Segun ku e estudio ta progresá, nos lo ta kontentu pa mira kon Yehova ta yuda kambia mente i kurason di e studiante.

¹⁹ Laga nos wak e ehèmpel di un ruman, kende tabata un kurandero di Suráfrika. El a gusta loke e tabata siña for di su estudio di Beibel. Pero, tabata masha difísil p’e aseptá loke Beibel ta bisa tokante komuniká ku hende morto. (Deu. 18:10-12) Tiki tiki, el a permití Dios moldia su manera di pensa. Anto ku tempu, el a stòp di traha komo kurandero, aunke esei tabata su úniko entrada. Awe e tin 60 aña, i el a bisa: “Mi ta masha gradisidu na Testigunan di Yehova. Nan a yuda mi na hopi manera. Asta nan a yuda mi haña un otro trabou. Pero riba tur kos, mi ta gradisidu na Yehova pa yuda mi hasi e kambionan den mi bida. Awor mi por partisipá den sirbishi komo un Testigu batisá.”

20. Kiko abo ta determiná pa hasi?

²⁰ Den e artíkulo akí, nos a analisá kuater tesoro ku hende no ta mira. Esun di mas balioso di tur ta e privilegio di tin Yehova komo nos mihó Amigu. E amistat ei ta permití nos haña otro tesoro invisibel: papia ku Yehova den orashon, haña yudansa di spiritu santu i haña apoyo di Yehova, Hesus i e angelnan den sirbishi. P’esei, sea determiná pa oumentá bo gratitut pa e tesoronan invisibel ei. Anto semper gradisí Yehova pa ta un Amigu asina maravioso.