E Spiritu Ta Duna Testimonio Huntu ku Nos Spiritu

1-3. (a) Dikon Pentekòste di aña 33 tabata un fecha asina spesial? (b) Kon e susesonan di e dia ei a kumpli ku loke e Skritura a profetisá? (Wak e promé plachi.)

TABATA djadumingu mainta rònt di 9 or, un dia spesial pa e hendenan den Herúsalèm. Komo ku tabata un dia di fiesta, e tabata un sabat tambe. Sin duda, ya e sumo saserdote a ofresé e sakrifisionan di kustumber na e tèmpel. Awor a yega e momento p’e ofresé e dos pannan ku zürdeg, trahá di e promé trigu di e kosecha. E sumo saserdote a “zoya” e pannan di un banda pa otro pa presentá nan na Yehova komo un ofrenda di zoyamentu. Esaki tabata e dia di Pentekòste di aña 33.—Lev. 23:15-20.

² E ofrenda di zoyamentu akí tabata algu ku ya tabata tuma lugá pa sientos di aña den e tèmpel, i e tabata estrechamente ligá ku algu masha importante ku tabata a punto di sosodé na e di dos piso di un kas na Herúsalèm. Einan tabatin un grupo di mas o ménos 120 disipel di Hesus ku tabata “persistí den orashon.” (Echo. 1:13-15) Un 800 aña promé, profeta Yoël tambe a skirbi tokante e susesonan ku a tuma lugá riba e dia ei. (Yoël 2:28-32; Echo. 2:16-21) Di ki suseso históriko nos ta papiando?

³ Lesa Echonan 2:2-4. Riba e dia di Pentekòste ei, Yehova a drama su spiritu santu riba e grupo di kristian ku tabata den e kamber di ariba, i nan a bira ungí. (Echo. 1:8) Nan tur a kuminsá profetisá, òf duna testimonio, di e kosnan maravioso ku nan a mira i tende. No a tarda mashá ku a forma un multitut, i apòstel Pedro a splika e hendenan loke a kaba di sosodé i dikon esei tabata asina importante. Kaba el a bisa nan: “Arepentí, i kada un di boso batisá den nòmber di Hesukristu pa boso por haña pordon di boso pikánan. I boso lo risibí e spiritu santu ku Dios ta duna libremente.” Na tur, rònt di 3.000 hende a aseptá e invitashon e dia ei, nan a ser batisá i a risibí e spiritu santu primintí.—Echo. 2:37, 38, 41.

 4. (a) Dikon nos ta interesá den loke a pasa riba e dia di Pentekòste? (b) Ki otro suseso importante kisas a tuma lugá añanan promé riba e mesun fecha ei? (Wak e nota na final.)

⁴ E susesonan ekstraordinario di e dia di Pentekòste ei ta masha importante pa nos. Riba e dia ei, e sumo saserdote a ofresé Yehova dos pan ku zürdeg. E sumo saserdote a representá Hesus. E dos pannan a representá e disipelnan ku a ser skohé for di entre humanidat pekadó pa bira yu adoptá di Dios.^[1] E disipelnan ei, ku a ser ungí ku spiritu, a bira e proménan di un grupo ku Dios a skohe pa bai shelu pa goberná huntu ku Kristu komo parti di e Reino di Dios ku lo trese bendishon pa humanidat obediente. E grupo ei ta ser yamá “e promé frutanan” di e kosecha. (Sant. 1:18; 1 Ped. 2:9) Sea nos tin e speransa di biba den shelu òf riba tera, loke a pasa e dia ei ta masha importante pa nos tur!

 5. Kon bini nos sa ku tur kristian den e promé siglo no a ser ungí di e mesun manera?

⁵ Si bo tabata un di e 120 disipelnan ei ku a mira loke tabata parse lenga di kandela riba nan kabes, hamas lo bo a lubidá e dia ei. Lo no tabatin niun duda den bo mente ku bo a ser ungí ku spiritu santu, foral si bo tambe den un forma milagroso a kuminsá papia un idioma ku bo no konosé. (Echo. 2:6-12) Pero no ta tur kristian a ser ungí ku spiritu santu na un manera asina espektakular. Por ehèmpel, Beibel no ta bisa ku lenga di kandela a para riba kabes di e míles di hendenan ku mas lat riba e dia ei a batisá na Herúsalèm i risibí spiritu santu. (Echo. 2:38) Ademas, no ta tur kristian ungí a risibí spiritu santu na momento di nan boutismo. Por ehèmpel, e samaritanonan a ser ungí ku spiritu santu algun tempu despues ku nan a batisá. (Echo. 8:14-17) I den e kaso eksepshonal di Kornelio i su hendenan di kas, nan a ser ungí asta promé ku nan a batisá!—Echo. 10:44-48.

 6. Kiko tur ungí ta risibí, i ki efekto esei tin riba nan?

⁶ Pues, kristiannan ta realisá na diferente manera ku nan ta ungí. Tin ta ripará umbes ku Yehova a ungi nan, miéntras ku pa otronan ta dura un poko promé ku nan bin komprondé òf aseptá e echo ku nan ta ungí. Pero sin importá kon nan ser ungí, tur ta haña e garantia ku nan tin un herensia reservá den shelu. Apòstel Pablo a splika esei asin’akí: “Despues ku boso a kere, Dios a seya boso tambe pa medio di [Kristu] ku e spiritu santu ku el a primintí—ku ta un garantia di antemano di nos herensia.” (Efe. 1:13, 14) Pues, Yehova ta usa su spiritu santu pa duna e kristiannan akí e konvikshon ku el a skohe nan pa bai shelu. Den e sentido ei, e spiritu santu ta manera “un garantia di antemano”—un prueba pa nan—ku den futuro nan lo biba den shelu i no riba tera.—Lesa 2 Korintionan 1:21, 22; 5:5.

 7. Kiko kristiannan ungí mester hasi si nan ke risibí nan rekompensa selestial?

⁷ Esaki ke men ku un kristian ungí su futuro den shelu ta garantisá? Nò. E persona ei ta sigur ku el a haña e yamada, òf invitashon, pa bai shelu, pero lo e risibí e rekompensa akí solamente si e keda fiel na Yehova te na final. P’esei Pedro a animá e rumannan: “Hasi tur boso esfuerso pa boso por ta sigur di boso yamamentu i skohementu; pasobra si boso sigui agregá e kualidatnan akí na otro, boso lo no frakasá nunka. De echo, di e manera akí boso lo risibí un entrada glorioso den e Reino eterno di nos Señor i Salbador Hesukristu.” (2 Ped. 1:10, 11) Pues, kada kristian ungí mester hasi esfuerso pa keda fiel na Yehova, sino ta pòrnada el a haña invitashon pa bai shelu.—Heb. 3:1; Rev. 2:10.

8, 9. (a) Dikon pa mayoria di hende ta difísil pa komprondé kiko ta pasa ora Dios ungi un persona? (b) Kon un persona por sa ku el a haña e yamada selestial?

⁸ Mayoria di sirbidó di Dios awe tin problema pa komprondé kiko presis ta pasa ku un hende ora Dios ungié. Esaki ta lógiko, ya ku nan mes no a eksperensiá esei. Yehova a krea hende pa biba pa semper aki riba tera, no den shelu. (Gén. 1:28; Sal. 37:29) Ma el a hasi un eksepshon i a skohe algun hende pa bai shelu pa goberná komo rei i saserdote. P’esei ora e ungi e personanan ei, tantu nan speransa komo nan manera di pensa ta kambia, i nan ta kuminsá anhelá pa bai biba den shelu.—Lesa Efesionan 1:18.

⁹ Pero kon un persona por sa ku el a haña e yamada selestial? Nos ta haña e kontesta den e karta ku Pablo a dirigí na e kristiannan ungí ku tabata biba na Roma, kendenan tabata “yamá pa ta santu.” El a bisa nan: “Boso no a risibí un spiritu di sklabitut ku ta bolbe kousa miedu, ma boso a risibí un spiritu di yu adoptá, i pa medio di e spiritu ei nos ta grita: ‘Aba, Tata!’ E spiritu ei tambe ta duna testimonio huntu ku nos spiritu ku nos ta yu di Dios.” (Rom. 1:7; 8:15, 16) Ku otro palabra, Yehova ta usa su spiritu santu pa laga un persona komprondé bon kla ku el a haña e yamada, òf invitashon, pa goberná den shelu huntu ku Hesus.—1 Tes. 2:12.

10. Kiko 1 Huan 2:27 ke men ora e ta bisa ku un kristian ungí no tin mester di niun hende pa siñ’é?

¹⁰ Niun hende no tin nodi di bisa e kristiannan ku a risibí e invitashon spesial akí serka Yehova ku nan a ser ungí. Yehova mes ta sòru pa nan ta konvensí di esei. Apòstel Huan a bisa e kristiannan ungí ei: “Boso sí a ser skohé [òf “ungí,” nota] pa Esun Santu i boso tur tin konosementu.” I el a sigui bisa: “Pa loke ta boso, Dios a skohe boso pa medio di su spiritu, i e spiritu ei ta keda den boso; pues, boso no tin mester di ningun hende pa siña boso. Pero e skohementu akí pa medio di spiritu ta algu berdadero i no un engaño, i e ta siña boso tur kos. Keda den union kuné manera e spiritu a siña boso.” (1 Huan 2:20, 27) Ta klaru ku kristiannan ungí tambe tin mester di e instrukshon di Yehova meskos ku tur ruman. Loke Huan tabata ke men ta ku nan no tin mester pa niun hende bisa nan ku nan a haña e invitashon pa bai shelu, ya ku e forsa di mas poderoso den universo a duna nan e konfirmashon ei kaba!

11, 12. (a) Kiko asina un ungí kisas ta puntra su mes? (b) Pero kiko lo e no puntra su mes nunka?

¹¹ Un kristian ku ser ungí ku spiritu santu ta eksperensiá un kambio asina profundo ku, segun Hesus, ta komo si fuera e ta “nase di nobo,” òf “nase di ariba.”^[2] (Huan 3:3, 5; nota) Ademas, Hesus a sigui splika un hòmber di su tempu: “No keda asombrá pasobra mi a bisa bo: Boso tin ku nase di nobo. Bientu ta supla unda ku e ke, i bo ta tende su zonido, ma bo no sa di unda e ta bini ni unda e ta bai. Asina ta ku tur hende ku nase di spiritu.” (Huan 3:7, 8) Pues ta kasi imposibel pa splika un persona ku no a pasa den e proseso akí kiko ta nifiká ser ungí pa spiritu.

¹² E personanan ku a haña e yamada akí kisas ta puntra nan mes: ‘Dikon Yehova a skohe ami? Dikon ami i no un otro hende?’ Kisas asta nan ta puntra nan mes si nan ta digno di un responsabilidat asina. Pero nunka nan lo puntra nan mes si di bèrdat Yehova a skohe nan. Nan ta sigur sigur di esei. Ademas, nan ta masha felis i gradisidu p’e privilegio i ta sinti nan meskos ku Pedro ora el a bisa bou di inspirashon: “Alabá sea e Dios i Tata di nos Señor Hesukristu, pasobra di akuerdo ku su gran miserikòrdia, el a laga nos nase di nobo pa un speransa bibu pa medio di e resurekshon di Hesukristu for di morto, pa un herensia ku no por kaba na nada, ku ta sin mancha i ku no ta marchitá. Esei ta reservá pa boso den shelu.” (1 Ped. 1:3, 4) Ora rumannan ungí lesa e palabranan ei, nan sa sin niun duda ku nan Tata selestial ta papiando ku nan personalmente.

13. (a) Ki kambio un persona ungí ta eksperensiá? (b) Kiko ta kousa e kambio akí?

¹³ Promé ku Yehova a invitá e kristiannan akí pa bai shelu, nan tabatin e speransa di biba pa semper riba tera. Nan tabata anhelá e dia ku Yehova lo limpia e tera i kaba ku maldat. Kasi sigur nan a imaginá nan mes ta duna bonbiní na nan sernan kerí ku a muri. Kisas nan a mira nan mes kaba ta biba den e kasnan ku nan lo a traha i ta kome fruta di e hòfi ku nan lo a planta. (Isa. 65:21-23) Dikon nan manera di pensa a kambia, i dikon nan a kuminsá karga un otro speransa? No ta pasobra nan a sinti nan deprimí ni pasobra nan tabata sufri hopi. No ta asina ku diripiente nan a kuminsá pensa ku biba pa semper riba tera lo por bira algu laf, ni ta pasobra nan a sinti e kuriosidat di sa kon bida den shelu lo ta. Mas bien, nan a kambia pasobra ora Yehova a duna nan e yamada, òf invitashon, pa bai shelu, el a usa su spiritu santu pa kambia nan manera di pensa i tambe nan speransa.

14. Kon e ungínan ta mira nan bida aktual riba tera?

¹⁴ Nos mester konkluí anto ku e ungínan ta deseá di muri? Apòstel Pablo a kontestá esaki. Pa splika kon nan ta sinti nan, el a kompará nan kurpa humano ku un “tènt,” i el a bisa: “Nos ku ta den e tènt akí ta keña, kargá ku ansiedat; pasobra no ta kita nos ke kita e tènt akí, sino mas bien, nos ke bisti e kas selestial, pa asina bida eterno por kaba ku loke ta mortal.” (2 Kor. 5:4) E kristiannan akí no a pèrdè gana di biba i ke muri pa kaba. Al kontrario, nan ta disfrutá di bida i ke usa kada dia den e sirbishi di Yehova huntu ku nan famia- i amigunan. Ma sin importá kiko nan ta hasiendo, semper nan ta kòrda riba e maravioso futuro ku ta spera nan.—1 Kor. 15:53; 2 Ped. 1:4; 1 Huan 3:2, 3; Rev. 20:6.

15. Ki faktornan riba nan mes no ta proba ku un persona ta ungí?

¹⁵ Kisas bo ta puntra bo mes si Yehova a invitá bo pa bai shelu. Si bo ta pensa ku sí, pensa riba e preguntanan importante akí: Bo ta sinti ku bo tin mas entusiasmo pa e trabou di prediká ku mayoria di ruman? Bo ta gusta studia e Palabra di Dios i bai den “asta e kosnan profundo di Dios”? (1 Kor. 2:10) Bo a mira kon Yehova a bendishoná bo sirbishi na un manera spesial? Bo ta sinti un deseo ardiente pa hasi e boluntat di Yehova? Bo tin un amor profundo pa otro hende i ta sinti un gran responsabilidat pa yuda nan sirbi Yehova? Bo tin prueba ku Yehova a intervení spesífikamente den bo bida? Kiko si bo a kontestá “sí” riba tur e preguntanan akí? Esei ke men ku bo tambe a haña e yamada selestial? Nò. Pasobra tur sirbidó di Yehova por eksperensiá e kosnan akí. E spiritu santu por aktua ku e mesun forsa riba tur kristian, sea ku nan ta bai biba den shelu òf riba tera. Bon mirá, for di ora bo ta puntra bo mes si bo tin e yamada selestial, esei so kaba ta indiká ku bo no tiné. Esnan skohé pa Yehova no tin nodi di puntra nan mes si nan ta ungí òf nò, nan sa esei kaba!

16. Ta tur hende ku sinti e forsa di spiritu santu ta bai shelu? Splika esei.

¹⁶ Den Beibel tin hopi ehèmpel di hòmbernan fiel ku a sinti e forsa di spiritu santu na un manera masha spesial pero ku tòg no tabatin e speransa di bai shelu. Un di nan tabata Huan Boutista. Hesus a papia masha bon di dje, pero el a bisa ku Huan lo no ta den e Reino di shelu. (Mat. 11:10, 11) David tambe a ser guiá pa spiritu santu. (1 Sam. 16:13) Spiritu santu a yud’é komprondé kosnan profundo tokante Yehova i a inspir’é pa skirbi algun parti di Beibel. (Mar. 12:36) Tòg apòstel Pedro a bisa na Pentekòste ku “David no a bai shelu.” (Echo. 2:34) Yehova a usa su spiritu santu pa duna e hòmbernan ei poder pa hasi kosnan asombroso, pero niun ora so e no a us’é pa duna nan e testimonio spesial ku nan a ser skohé pa bai shelu. Akaso ta pasobra nan no tabata sufisiente fiel òf kualifiká pa goberná den shelu? Nò. Esei simplemente ta indiká ku Yehova lo resusitá nan pa biba riba tera.—Huan 5:28, 29; Echo. 24:15.

17, 18. (a) Na unda mayoria di sirbidó di Dios tin e speransa di biba? (b) Ki preguntanan nos lo analisá den e siguiente artíkulo?

¹⁷ Awe, mayoria di sirbidó di Dios no tin e yamada pa bai shelu. Nan tin e mesun speransa ku David, Huan Boutista i otro hòmber- i muhénan fiel di pasado tabatin. Meskos ku Abraham, nan ta spera di biba riba tera bou di gobernashon di e Reino di Dios. (Heb. 11:10) Ta 144.000 hende so lo reina den shelu huntu ku Kristu, i di nan ta un restu so tin riba tera ainda den e tempu di fin akí. E mayoria a muri kaba i ta den shelu.—Rev. 12:17.

¹⁸ Pues, kon nos ku tin e speransa di biba riba tera mester mira esnan ku ta bisa ku nan ta ungí? Si un hende den bo kongregashon kuminsá tuma di e pan ku e biña na Memorial, kon bo mester reakshoná? Kiko si e kantidat di persona ku ta bisa ku nan ta ungí ta oumentá? Esei mester preokupá bo? Den e siguiente artíkulo nos lo haña kontesta riba e preguntanan akí.