Jehova Ta Hiba Hopi Yu na Gloria
“Tabata apropiado pa [Dios], . . . dor di hiba hopi yu na gloria, haci e Agente Principal di nan salbacion perfecto mediante sufrimentu.”—HEBREONAN 2:10.
1. Pakico nos por ta sigur cu e propósito di Jehova pa humanidad lo ser realisá?
JEHOVA a crea e tera pa ta e hogar eterno di un famia humano perfecto disfrutando di bida sin fin. (Eclesiástes 1:4; Isaías 45:12, 18) Ta cierto cu nos antepasado Adam a peca i asina a pasa picá i morto na su yunan. Pero e propósito di Dios pa humanidad lo ser realisá mediante su Simia Primintí, Jesucristo. (Génesis 3:15; 22:18; Romanonan 5:12-21; Galationan 3:16) Amor p’e mundu di humanidad a impulsá Jehova pa duna “su Yu unigénito, pa tur cu ehercé fe den dje no sea destruí sino haña bida eterno.” (Juan 3:16) I amor a motivá Jesus “pa duna su alma como rescate en cambio pa hopi.” (Mateo 20:28) E “rescate corespondiente” aki ta cumpra bek e derecho i prospectonan cu Adam a perde i ta haci bida eterno posibel.—1 Timoteo 2:5, 6; Juan 17:3.
2. Con Israel su Dia di Expiacion anual a prefigurá e aplicacion di Jesus su sacrificio di rescate?
2 E Dia di Expiacion anual a prefigurá e aplicacion di Jesus su sacrificio di rescate. Riba e dia ei, promé, e sumo sacerdote di Israel a sacrificá un toro como ofrenda pa picá i a presentá su sanger n’e Arca sagrado den e Santísimo dje tabernáculo, i despues den e tempel. E tabata haci esaki na fabor di su mes, su famia di cas i e tribu di Levi. Igualmente, Jesucristo a presentá na Dios e balor di su sanger, promé, pa cubri picá di su “rumannan” spiritual. (Hebreonan 2:12; 10:19-22; Levítico 16:6, 11-14) Riba e Dia di Expiacion, tambe e sumo sacerdote a sacrificá un cabritu como ofrenda pa picá i a presentá su sanger den e Santísimo, haciendo asina expiacion p’e picánan dje 12 tribunan no-sacerdotal di Israel. Di igual manera, e Sumo Sacerdote Jesucristo lo aplicá su sanger di bida na fabor di esnan di humanidad cu ta ehercé fe, cancelando nan picánan.—Levítico 16:15.
Hibá na Gloria
3. Segun Hebreonan 2:9, 10, kico Dios ta haciendo pa 1.900 aña?
3 Pa 1.900 aña, Dios a bin ta haci algu remarcabel en coneccion cu Jesus su “rumannan.” Relacioná cu esaki, apostel Pablo a skirbi: “Nos ta contemplá Jesus, cu a ser hací un poco inferior cu angel, coroná cu gloria i onor pasobra el a sufri morto, p’e pa medio dje bondad inmerecí di Dios por purba morto pa tur hende. Pasobra tabata apropiado pa esun [Jehova Dios] pa causa di ken tur cos ta i mediante ken tur cos ta, dor di hiba hopi yu na gloria, haci e Agente Principal di nan salbacion perfecto mediante sufrimentu.” (Hebreonan 2:9, 10) E Agente Principal di salbacion ta Jesucristo, kende a siña obedencia perfecto mediante e cosnan cu el a sufri ora e tabata biba como hende riba tera. (Hebreonan 5:7-10) Jesus tabata e promé pa ser engendrá como un yu spiritual di Dios.
4. Na ki tempu i con Jesus a ser engendrá como Yu spiritual di Dios?
4 Jehova a usa su spiritu santu, of forsa activo, pa engendrá Jesus como su Yu spiritual, pa hib’é na gloria celestial. Ora Jesus tabata su so cu Juan Bautista, el a bai completamente bou di awa pa simbolisá e presentacion di su mes na Dios. E relato dje Evangelio di Lucas ta bisa: “Ora cu tur hende a ser bautisá, Jesus tambe a ser bautisá i, miéntras e tabata haciendo oracion, shelu a habri i e spiritu santu den forma corporal di un palomba a baha riba dje, i un bos a sali for di shelu: ‘Abo ta mi Yu, esun stimá; mi a aprobá bo.’” (Lucas 3:21, 22) Juan a mira e spiritu santu baha riba Jesus i a tende Jehova aprob’é públicamente como Su Yu stimá. N’e momento ei i pa medio di spiritu santu, Jehova a engendrá Jesus como e promé dje ‘hopi yunan pa ser hibá na gloria.’
5. Ken tabata e proménan pa beneficiá di Jesus su sacrificio i cuantu nan ta?
5 Jesus su “rumannan” tabata e proménan cu a beneficiá di su sacrificio. (Hebreonan 2:12-18) Den vision, apostel Juan a mira nan den gloria caba riba Ceru di Síon celestial cu e Lamchi, Señor Jesucristo resucitá. Tambe Juan a revelá nan cantidad, bisando: “Mi a wak, i mira! e Lamchi pará riba Ceru di Síon, i cuné shenticuarenticuater mil cu tin su nomber i e nomber di su Tata skirbí riba nan frenta. . . . Esakinan a ser cumprá for di entre humanidad como promé fruta pa Dios i p’e Lamchi, i ningun falsedad a ser hañá den nan boca; nan ta sin defecto.” (Revelacion 14:1-5) Asina e ‘hopi yunan hibá na gloria’ den shelu ta totalisá solamente 144.001—Jesus i su rumannan spiritual.
“Nace di Dios”
6, 7. Ken ta “nace di Dios,” i kico esaki ta nificá pa nan?
6 Esnan cu Jehova a engendrá a “nace di Dios.” Dirigiendo su mes na individuonan asina, apostel Juan a skirbi: “Tur cu a nace di Dios no ta ocupá nan cu picá, pasobra [Jehova] Su simia reproductivo ta permanecé den hende asina, i e no por practicá picá, pasobra el a nace di Dios.” (1 Juan 3:9) E “simia reproductivo” aki ta e spiritu santu di Dios. E spiritu santu combiná cu e palabra di Dios a duna cada un dje 144.000 “un nacementu nobo” pa un speransa celestial.—1 Pedro 1:3-5, 23.
7 Jesus tabata Yu di Dios for di su nacementu humano, mescos cu e homber perfecto Adam tabata “yu di Dios.” (Lucas 1:35; 3:38) Sin embargo, despues di Jesus su bautismo, Jehova a declará algu masha significativo: “Abo ta mi Yu, esun stimá; mi a aprobá bo.” (Marco 1:11) Cu e declaracion aki cu a compañá e dramamentu di spiritu santu, tabata bisto cu e ora ei Dios a producí Jesus como Su Yu spiritual. Figurativamente, e ora ei Jesus a haña “un nacementu nobo” cu e derecho pa ricibí bida un biaha mas como Yu spiritual di Dios den shelu. Mescos cuné, su 144.000 rumannan spiritual ta “nace di nobo.” (Juan 3:1-8; mira La Atalaya di 15 di november, 1992, página 3-6.) Tambe, mescos cu Jesus, Dios ta ungi nan i comisioná nan pa proclamá bon nobo.—Isaías 61:1, 2; Lucas 4:16-21; 1 Juan 2:20.
Prueba di A Ser Engendrá
8. Ki prueba tabatin cu (a) Jesus a ser engendrá pa spiritu? (b) su disipelnan di promé a ser engendrá pa spiritu?
8 Tabatin prueba cu Jesus a ser engendrá pa spiritu. Juan Bautista a mira e spiritu santu baha riba Jesus i a tende Dios declará e calidad di yu spiritual dje Mesías recien ungí. Pero con Jesus su disipelnan por a sa cu nan a ser engendrá pa spiritu? Wel, riba e dia cu Jesus a subi na shelu, el a bisa: “Juan, en berdad, a bautisá cu awa, pero boso lo ser bautisá den spiritu santu no hopi dia despues di esaki.” (Echonan 1:5) Jesus su disipelnan a ser “bautisá den spiritu santu” riba e dia di Pentecoste di 33 E.C. E dramamentu ei di spiritu tabata compañá pa ‘un zonido for di shelu mescos cu suplamentu di un bientu fuerte’ i pa “lenganan manera di candela” riba cada un dje disipelnan. Masha remarcabel tabata e abilidad dje disipelnan pa “papia den diferente lenga, manera e spiritu tabata concedé nan pa expresá nan mes.” Pues tabatin evidencia visibel i audibel cu e caminda pa drenta den gloria celestial como yu di Dios a habri pa siguidónan di Cristo.—Echonan 2:1-4, 14-21; Joël 2:28, 29.
9. Ki prueba tabatin cu e samaritanonan, Cornelio i otronan dje promé siglo a ser engendrá pa spiritu?
9 Un poco tempu despues, Felipe e evangelisadó a predicá den Samaria. Aunke e samaritanonan a aceptá su mensahe i a ser bautisá, nan tabata falta evidencia cu Dios a engendrá nan como su yunan. Ora apostel Pedro i Juan a haci oracion i a pone man riba e creyentenan ei, “nan a cuminsá ricibí spiritu santu” den un manera cu tabata evidente pa observadónan. (Echonan 8:4-25) Esaki tabata prueba cu samaritanonan creyente a ser engendrá pa spiritu como yunan di Dios. Di manera similar, na 36 E.C., Cornelio i otro gentilnan a aceptá e berdad di Dios. Pedro i e creyentenan hudiu cu tabata compañ’é “a keda asombrá, pasobra e don grátis di spiritu santu tabata ser dramá tambe riba hende dje nacionnan. Pasobra nan a tende nan papia den lenga i engrandecé Dios.” (Echonan 10:44-48) Hopi cristian di promé siglo a ricibí “donnan di spiritu,” manera esun di papia den lenga. (1 Corintionan 14:12, 32) Asina e individuonan aki a haña evidencia cla cu nan a ser engendrá pa spiritu. Pero con cristiannan mas despues lo a sa cu nan a ser engendrá pa spiritu of no?
E Testimonio dje Spiritu
10, 11. A base di Romanonan 8:15-17, con lo bo splica cu e spiritu ta duna testimonio cu esnan cu ta co-heredero cu Cristo?
10 Tur e 144.000 cristiannan ungí a haña evidencia absoluto cu nan tin e spiritu di Dios. En coneccion cu esaki, Pablo a skirbi: “Boso a ricibí un spiritu di adopcion como yu, mediante cua spiritu nos ta sclama: ‘Abba, Tata!’ E spiritu mes ta duna testimonio cu nos spiritu cu nos ta yu di Dios. Pues anto, si nos ta yu, nos ta heredero tambe: heredero por cierto di Dios, pero co-heredero cu Cristo, con tal cu nos ta sufri huntu pa nos tambe por ser glorificá huntu.” (Romanonan 8:15-17) Cristiannan ungí tin un sintimentu di filia of yu pa cu nan Tata celestial, un sentido dominante di un relacion di tata cu yu. (Galationan 4:6, 7) Nan tin e pleno siguridad cu nan a ser engendrá pa Dios den e calidad di yu spiritual como co-heredero cu Cristo den e Reino celestial. Jehova su spiritu santu ta hunga un papel definitivo den esaki.
11 Bou di influencia dje spiritu santu di Dios, e spiritu, of actitud dominante, di esnan ungí ta impulsá nan pa respondé den un manera positivo na loke e Palabra di Dios ta bisa tocante e speransa celestial. Por ehempel, ora nan lesa loke e Scritura ta bisa tocante Jehova su yunan spiritual, spontáneamente nan ta reconocé cu e palabranan ei ta aplicá na nan. (1 Juan 3:2) Nan sa cu nan a ser “bautisá den Cristo Jesus” i den su morto. (Romanonan 6:3) Nan tin e firme conviccion cu nan ta yu spiritual di Dios, cu lo muri i ser resucitá na gloria celestial, mescos cu Jesus.
12. Kico e spiritu di Dios a lanta den cristiannan ungí?
12 E echo cu un persona a ser engendrá den un relacion spiritual di yu no ta un deseo cu el a cultivá. Esnan engendrá pa spiritu no kier bai shelu pa motibu dje dificultadnan actual riba tera. (Job 14:1) Mas bien, Jehova su spiritu a lanta den personanan berdaderamente ungí un speransa i deseo cu por lo general no ta comun pa hende. Personanan engendrá asina sa cu bida eterno den perfeccion humano den un paradijs riba tera rondoná pa un famia felis i amigunan lo ta maraviyoso. Sin embargo, un bida asina no ta e deseo principal di nan curason. Esnan ungí tin un speransa celestial asina fuerte cu boluntariamente nan ta sacrificá tur prospecto i vínculo terenal.—2 Pedro 1:13, 14.
13. Segun 2 Corintionan 5:1-5, kico tabata Pablo su ‘deseo intenso,’ i kico esaki ta indicá pa cu esnan engendrá pa spiritu?
13 E speransa di bida celestial cu Dios ta duna ta asina fuerte den hende asina cu nan sintimentunan ta mescos cu esnan di Pablo, kende a skirbi: “Nos sa cu si nos cas terenal, e tent aki, tin cu ser disolvé, nos tin cu haña un edificio for di Dios, un cas cu man no a traha, eterno, den shelu. Pasobra den e cas residencial aki nos en berdad ta suspirá, deseando cu anhelo intenso di bisti loke ta pa nos for di shelu, pa, despues di realmente bistié, nos no ser hañá sunú. De facto, nos cu ta den e tent aki ta suspirá, siendo cargá; pasobra nos no kier kit’é sino bisti e otro, pa loke ta mortal por ser tragá pa bida. Awor esun cu a producí nos pa net esaki ta Dios, cu a duna nos e garantia di loke tin cu bini, esta, e spiritu.” (2 Corintionan 5:1-5) Pablo su ‘deseo intenso’ tabata pa ser resucitá na shelu como criatura spiritual inmortal. Refiriendo n’e curpa humano, simbólicamente el a usa un tent cu por desarmá, un morada frágil i temporal na comparacion cu un cas. Aunke nan ta biba riba tera den un curpa carnal i mortal, cristiannan cu tin e spiritu santu como un garantia dje binidero bida celestial ta anhelá pa “un edificio for di Dios,” un curpa spiritual inmortal i incoruptibel. (1 Corintionan 15:50-53) Mescos cu Pablo, nan por bisa cu tur sinceridad: “Nos tin bon ánimo i mas bien nos ta keda contentu di bira ausente dje curpa [humano] i establecé nos hogar [den shelu] cerca Señor.”—2 Corintionan 5:8.
Incluí den Pactonan Special
14. Ora Jesus a instituí e celebracion dje Memorial, ki pacto el a mencioná promé, i ki papel e ta hunga en coneccion cu israelitanan spiritual?
14 Cristiannan engendrá pa spiritu ta sigur cu nan a ser incluí den dos pacto special. Jesus a mencioná un di esakinan ora el a usa pan sin zuurdeeg i biña pa instituí e Memorial di su binidero morto i a bisa dje copa di biña: “E copa aki ta nificá e pacto nobo den birtud di mi sanger, cu lo ser dramá na boso fabor.” (Lucas 22:20; 1 Corintionan 11:25) Ken ta e participantenan den e pacto nobo? Jehova Dios i e miembronan di Israel spiritual—esnan cu segun Jehova su propósito lo ser hibá na gloria celestial. (Jeremías 31:31-34; Galationan 6:15, 16; Hebreonan 12:22-24) E pacto nobo cu a drenta na vigor dor di Jesus su sanger dramá, ta recogé for dje nacionnan un pueblo pa Jehova su nomber i ta haci e cristiannan aki, engendrá pa spiritu, parti di Abraham su “simia.” (Galationan 3:26-29; Echonan 15:14) E pacto nobo ta percurá pa tur israelita spiritual ser hibá na gloria dor di ser resucitá na bida inmortal den shelu. Siendo “un pacto eterno,” su beneficionan lo dura pa semper. Tempu lo revelá si e pacto aki lo hunga un papel tambe den otro maneranan durante e Mil Aña i despues di esei.—Hebreonan 13:20.
15. Na armonia cu Lucas 22:28-30, den cua otro pacto Jesus su siguidónan ungí a cuminsá ser incluí, i na ki tempu?
15 E ‘hopi yunan’ cu segun Jehova su propósito lo ser ‘hibá na gloria’ tambe a ser incluí individualmente den e pacto pa un Reino celestial. Relacioná cu e pacto aki entre e mes i esnan cu a cana den su pasonan, Jesus a bisa: “Boso ta esnan cu a permanecé cu mi henter ora durante mi pruebanan; i mi ta cera un pacto cu boso, mescos cu mi Tata a cera un pacto cu mi, pa un reino, pa boso por come i bebe na mi mesa den mi reino, i sinta riba trononan pa husga e diesdos tribunan di Israel.” (Lucas 22:28-30) E pacto di Reino a ser inaugurá ora Jesus su disipelnan a ser ungí cu spiritu santu na Pentecoste di 33 E.C. E pacto ei ta keda na vigor entre Cristo i su reynan socio pa semper. (Revelacion 22:5) Pues anto, cristiannan engendrá pa spiritu ta sigur cu nan ta den e pacto nobo i den e pacto p’e Reino. P’esei na celebracion dje Cena di Señor, solamente e relativamente poco ungínan cu ainda ta riba tera ta tuma dje pan, cu ta representá Jesus su curpa humano sin picá, i e biña, cu ta nificá su sanger perfecto dramá den morto i validando e pacto nobo.—1 Corintionan 11:23-26; mira La Atalaya di 1 di februari, 1989, página 17-20.
Yamá, Scogí i Fiel
16, 17. (a) Pa ser hibá na gloria, kico mester ta e caso di tur e 144.000 personanan? (b) Ken ta e ‘dies reynan,’ i con nan ta trata e resto di Cristo su “rumannan” cu ta riba tera?
16 E promé aplicacion di Jesus su sacrificio di rescate ta haci posibel pa 144.000 persona ser yamá pa bida celestial i scogí dor di ser engendrá pa spiritu mediante Dios. Naturalmente, pa nan ser hibá na gloria, nan tin cu ‘haci nan sumo posibel pa haci nan yamamentu i scogementu sigur,’ i nan mester proba di ta fiel te na morto. (2 Pedro 1:10; Efesionan 1:3-7; Revelacion 2:10) E resto chikitu di personanan ungí cu ta riba tera ainda ta manteniendo nan integridad aunke nan ta ser oponé dor di “dies rey” cu ta representá tur e podernan político. Un angel a bisa: “Esakinan lo batayá contra e Lamchi, pero, dor cu e ta Señor di señornan i Rey di reynan, e Lamchi lo vence nan. Tambe, esnan yamá i scogí i fiel cu ta cuné lo haci esei.”—Revelacion 17:12-14.
17 Gobernantenan humano no por haci nada contra Jesus, e “Rey di reynan,” pasobra e ta den shelu. Pero nan ta demostrá hostilidad pa cu e resto di su “rumannan” cu ta riba tera ainda. (Revelacion 12:17) Esei lo caba n’e guera di Dios di Armagedon, cu ta garantisá victoria p’e “Rey di reynan” i su “rumannan”—“esnan yamá i scogí i fiel.” (Revelacion 16:14, 16) Miéntras tantu, cristiannan engendrá pa spiritu ta hopi ocupá. Kico nan ta haciendo awor, promé cu nan ser hibá na gloria mediante Jehova?
Kico Ta Bo Contesta?
◻ Ken Dios ta ‘hiba na gloria celestial’?
◻ Kico kier men “nace di Dios”?
◻ Con ‘e spiritu ta duna testimonio’ cu algun cristian?
◻ Den cua pactonan esnan engendrá pa spiritu a ser incluí?
[Plachi na página 15]
Na Pentecoste di 33 E.C., evidencia a ser duná cu e caminda pa drenta den gloria celestial a habri