Pablo Ta Organisá Contribucion di Auxilio pa e Santunan

INTERESNAN spiritual ta di importancia principal pa cristiannan berdadero. Pero esei no ta kita cu e bienestar físico di otro hende, tambe ta importante pa nan. Hopi bes nan a percurá pa esnan cu tabata pasa den tempu difícil. Amor fraternal ta motivá cristiannan pa yuda compañeronan di creencia cu ta den necesidad.—Juan 13:34, 35.

Amor pa su rumannan spiritual a impulsá apostel Pablo pa organisá un colecta entre e congregacionnan na Acaya, Galacia, Macedonia i e distrito di Asia. Kico a haci esaki necesario? Con a organisá e programa di auxilio? Con e reaccion tabata? I pakico nos mester ta interesá den loke a tuma lugá?

Situacion dje Congregacion di Jerusalem

Despues di Pentecoste 33 E.C., hudiu i prosélitonan for di otro parti cu a bira disipel na Pentecoste a keda den Jerusalem pa algun tempu pa siña mas tocante e fe berdadero. Caminda tabata necesario, compañeronan di adoracion gustosamente a yuda carga e peso di un estadia largu asina. (Echonan 2:7-11, 41-44; 4:32-37) Kisas disturbionan civil a causa mas necesidad segun cu nacionalistanan hudiu a fomentá rebelion i violencia di multitudnan desordená. Sin embargo, pa haci sigur cu ningun siguidó di Cristo a sufri di hamber, e congregacion tabata haci distribucionnan diario na biudanan pober. (Echonan 6:1-6) Herodes a persiguí e congregacion severamente, i meimei di añanan 40 di promé siglo E.C., hamber a asotá Hudea. Pa loke tabata trata e siguidónan di Jesus, tur esaki kisas a resultá den loke Pablo a yama “sufrimentu,” “tribulacion” i “plundermentu di [nan] pertenencianan.”—Hebreonan 10:32-34; Echonan 11:27–12:1.

Rond di aña 49 E.C., ainda e situacion tabata serio. Pues, despues di a bai di acuerdo cu Pablo lo concentrá riba e gentilnan (hendenan no-hudiu) den su predicacion, Pedro, Santiago i Juan a urgié pa “corda riba hende pober.” Esaki ta loke Pablo a forsa pa haci.—Galationan 2:7-10.

Organisando e Colecta

Pablo a supervisá un fondo pa cristiannan pober na Hudea. Rond di aña 55 E.C., el a bisa e corintionan: “En cuanto e colecta cu ta p’e santunan, manera mi a duna ordu n’e congregacionnan di Galacia, boso tambe haci mescos. Tur promé dia di siman laga cada un di boso den su mes cas pone algu un banda den reserva segun cu e ta prosperando . . . [Anto] e hombernan cu boso aprobá via carta, eseinan lo mi manda pa hiba boso bondadoso regalo na Jerusalem.” (1 Corintionan 16:1-3) Un aña despues Pablo a bisa cu Macedonia i Acaya tabata participá den e yudansa. E presencia di delegadonan for dje distrito di Asia ora cu nan a manda e fondonan Jerusalem, ta parce di indicá cu congregacionnan den e region ei tambe a contribuí.—Echonan 20:4; 2 Corintionan 8:1-4; 9:1, 2.

No a preshoná niun hende pa duna mas di loke e por a aford. Mas bien, tabata un asuntu di igualacion, di manera cu cualkier exceso por a compensá loke falta entre e santunan na Jerusalem i Hudea. (2 Corintionan 8:13-15) Pablo a bisa: “Laga cada un haci net manera el a determiná den su curason, no di mala gana ni bou di obligacion, pasobra Dios ta stima un dunadó alegre.”—2 Corintionan 9:7.

E apostel a duna e corintionan bon motibu pa ta generoso. Jesus ‘a bira pober pa nan causa, pa nan por a bira ricu’ spiritualmente. (2 Corintionan 8:9) Nan sigur lo tabata kier imitá su spiritu generoso. Ademas, como cu Dios tabata enrikesé nan “pa tur sorto di generosidad,” tabata apropiado pa nan yuda suministrá e necesidadnan dje santunan.—2 Corintionan 9:10-12.

E Actitud dje Participantenan

Nos por siña hopi tocante dunamentu boluntario dor di considerá e actitud di esnan cu a participá den e programa di auxilio pa e santunan den promé siglo. E colecta a desplegá mas cu solamente preocupacion pa co-adoradónan di Jehova cu tabata pober. El a implicá cu tabatin un banchi di hermandad entre cristiannan hudiu i gentil. E echo cu un a ofrecé contribucion i e otro a acept’é, a nificá unidad i amistad entre e gentilnan i hudiunan aki. Nan a compartí cosnan material i tambe spiritual.—Romanonan 15:26, 27.

Por ta cu originalmente Pablo no a invitá e cristiannan macedonio pa participá, pasobra nan tambe tabata den hopi pobresa. Sin embargo, nan ‘a sigui roga p’e privilegio di duna.’ Sí, maske nan tabata pasando dor di “un prueba grandi bou di afliccion,” nan a duna gososamente “mas ayá di loke nan berdaderamente por a haci”! (2 Corintionan 8:1-4) Aparentemente nan prueba grandi a encerá e acusacion cu nan tabata practicá un religion ilegal pa hende romano. Pues ta di comprendé cu nan lo tabatin empatia pa nan rumannan na Hudea, kendenan tabata sufri pruebanan similar.—Echonan 16:20, 21; 17:5-9; 1 Tesalonicensenan 2:14.

Aunke Pablo a usa e celo inicial dje corintionan pa e colecta p’e animá e macedonionan, e entusiasmo na Corinto a fria. Awor e apostel a cita e generosidad dje macedonionan pa motivá e corintionan. El a haña cu tabata necesario pa recordá nan cu tabata tempu pa caba cu loke nan a cuminsá un aña promé. Ta kico a sosodé?—2 Corintionan 8:10, 11; 9:1-5.

Tito a iniciá e colecta na Corinto, pero a surgi problemanan cu probablemente a stroba su intentonan. Despues di consultá cu Pablo na Macedonia, Tito a regresá cu dos otro ruman pa lanta ánimo dje congregacion na Corinto i terminá e colecta. Kisas algun hende a insinuá cu Pablo a purba probechá dje corintionan. Ta p’esei probablemente el a manda tres homber pa completá e colecta i a recomendá cada un di nan. Pablo a bisa: “Nos ta evitá di laga cualkier hende haña falta den nos en coneccion cu e contribucion generoso aki pa ser administrá pa medio di nos. Pasobra nos ‘ta haci percuracion onrado, no solamente den bista di Jehova, sino tambe den bista di hende.’”—2 Corintionan 8:6, 18-23; 12:18.

Entregando e Contribucion

Pa lente di aña 56 E.C., e placa contribuí tabata cla pa ser hibá Jerusalem. Pablo lo a bai huntu cu e delegacion scogé dor dje contribuidónan. Echonan 20:4 ta bisa: “E tabatin compaño di Sópater, yu di Piro di Berea, Aristarco i Segundo dje tesalonicensenan, i Gayo di Derbe, i Timoteo, i di e distrito di Asia, Tíkico i Trófimo.” Evidentemente, Lucas tambe tabata entre nan, i kisas el a representá e cristiannan di Filípos. Pues, por lo ménos nuebe homber a bai riba e mision aki.

Erudito Dieter Georgi ta bisa: “E suma total recogé cu e colecta mester tabata considerabel, sino e esfuerso final, cu a enbolbé Pablo i asina hopi delegado, lo no tabata bal e molester i gastu.” E grupo a sirbi no solamente pa garantisá siguridad, sino tambe pa protehá Pablo di cualkier acusacion di desonestidad. Esnan mandá a representá e congregacionnan gentil dilanti e santunan na Jerusalem.

Nabegando for di Corinto pa Siria, e delegacion lo a yega Jerusalem p’e temporada di Pascu hudiu. Sin embargo, nan a tende di un complot pa mata Pablo i esei a pone nan cambia nan plan. (Echonan 20:3) Kisas Pablo su enemigunan tabatin intencion di deshací di dje riba laman.

Pablo tabatin mas preocupacion. Promé cu nan salida, el a skirbi e cristiannan na Roma pa haci oracion p’e por ‘ser librá for di hende no-creyente den Hudea i cu su ministerio pa Jerusalem por resultá di ser aceptabel p’e santunan.’ (Romanonan 15:30, 31) Aunke sin duda e santunan lo a ricibí e contribucion cu gratitud profundo, kisas Pablo tabata preocupá cu e problema cu su yegada lo por a causa entre e hudiunan en general.

E apostel sigur a tene e pobernan na mente. Aunke e Scritura no ta bisa ki tempu nan a entregá e contribucion, su entrega a promové unidad i a haci posibel pa e cristiannan gentil mustra nan gratitud na compañeronan di creencia di Hudea pa e rikesanan spiritual cu nan a ricibí for di nan. Pablo su aparicion n’e tempel no hopi tempu despues di su yegada na Jerusalem, a provocá un lantamentu i a causa su aresto. Pero na final di cuenta esaki a dun’é oportunidadnan pa duna testimonio na gobernadó i reynan.—Echonan 9:15; 21:17-36; 23:11; 24:1–26:32.

Nos Contribucion Awe

Compará cu promé siglo, hopi cos a cambia, pero no e principionan fundamental. Ta na su lugá pa informá cristiannan di necesidadnan financiero. Cualkier contribucion cu nan haci pa esnan den necesidad mester ta boluntario, motivá dor di amor pa Dios i pa próhimo.—Marco 12:28-31.

E medidanan di auxilio cu nan a tuma na fabor dje santunan den promé siglo, ta mustra cu e administracion dje contribucionnan ei mester ta bon organisá i ser manehá den un manera sumamente onesto. Claro cu Jehova Dios ta conciente dje necesidadnan, i e ta haci percuracion pa su sirbidónan di manera cu nan por sigui compartí e bon nobo di Reino cu otro hende apesar di tempu difícil. (Mateo 6:25-34) Sin embargo, nos tur por haci nos parti, sea cual sea nos posicion económico. Dje manera ei ‘e persona cu tin hopi lo no tin demasiado, i e persona cu poco lo no tin muchu poco.’—2 Corintionan 8:15.