Hóbennan Sa Puntra . . .

Dios Lo Keda Mi Amigu?

REY DAVID tabata un homber cu a gosa di un amistad cu Dios. Pero na un cierto momento el a bisa: “E afliccionnan di mi curason a multiplicá.” David tabata sufriendo no solamente di maltrato causá dor di otro hende, sino tambe pa motibu di su mes erornan. El a cuminsá sinti cu asta Dios a rechas’é, anto el a pidi den oracion: “Bira bo cara pa mi, i mustrá mi fabor; pasobra mi ta solitario i afligí.”—Salmo 25:11, 16-19.

Kisas abo tambe ta sintí bo afligí. Tal bes na cas of na scol bo ta den un situacion masha desagradabel cu ta gewoon aplastante. Por ta tambe cu bo ta sufri di problemanan serio di salú of bo a bira desanimá pa motibu di un of otro debilidad cu bo tin. Sea cual sea e caso, bo no tin cu sufri bo so; Dios ta ofrecé su amistad i apoyo generosamente.a Si ya caba bo a cuminsá desaroyá un relacion cuné, lo ta un consuelo pa bo pa sa cu e no ta bandoná su amigunan ora nan ta pasando den dificultad. Tog, ora bo hañá bo den problema, lo bo por sinti cu Dios ta leu. Asta por parcé bo cu e no ta yudando bo mes. Pero, di berdad esaki ta e caso?

“Un Sumpiña den Carni”

Promé cu tur cos, por fabor, lesa 2 Corintionan 12:7-10. Ei apostel Pablo ta conta con el a sufri di algu cu el a yama “un sumpiña den carni.” Probablemente, e “sumpiña” tabata un of otro enfermedad físico, tal bes cu su bista. Loke sea e tabata, esei a sigui ‘boft’é’ emocionalmente. Apesar di tres peticion ferviente na Dios pa kit’é, e “sumpiña” a keda.

Acaso Jehova tabata ignorando Pablo su oracionnan? Di ningun manera! Dios a bis’é: “Mi bondad inmerecí ta suficiente pa bo; pasobra mi poder ta ser hací perfecto den debilidad.” Maske Jehova a scoge pa no saca e “sumpiña” ei, e no a bandoná Pablo. Mediante Dios su bondad inmerecí, Pablo a gosa di un amistad íntimo cuné. Esei tabata “suficiente” pa yuda Pablo trata cu su enfermedad. Segun cu Pablo a lucha pa haci esei, lo el a experenciá tambe e poder sostenedor di Dios den un manera nobo i personal.

Yudansa pa Trata cu Dificultadnan

Mescos cu Pablo, kisas bo por tin un of otro “sumpiña,” of problema, cu ta hincá bo, poniendo cu bo ta pesimista i desanimá. Mescos cu den e caso di Pablo, por wel ta cu Dios lo permití e problema persistí. Esei no kier men cu e no ta bo Amigu mas. Dios a bisa apostel Pablo: “Mi poder ta ser hací perfecto den debilidad.” Si bo confia riba Dios su poder i no riba esun di bo mes, bo por wanta. Kisas bo ta asta haña cu, cu e yudansa di Dios su spiritu, bo por logra cosnan cu bo nunca a pensa lo ta posibel. Pablo a bisa: “Mi tin placer den debilidad . . . Pasobra ora mi ta débil, e ora ei mi ta poderoso.”

Un mucha muher cu yama Robinb a experenciá cu esaki ta berdad. Na edad di 14 aña el a perde su bista pa motibu di glaucoma. E mésun aña ei su mama a muri repentinamente. “Ta Jehova so mi tabatin awor,” Robin ta bisa tocante con el a cuminsá trata cu e ‘sumpiñanan’ doloroso aki. “Mi tabata sa cu pa mi logra keda riba pia, mi mester a pega na dje.” Esei ta exactamente loke Robin a haci, i cu tempu a bai sirbi como un evangelisadó di tempu completo. E ta bisa: “Mi a pidi Jehova yudá mi cu tur cos. Di berdad el a haci esei.”

Hopi hóben a ripará cu eigenlijk nan ta hala mas cerca di Dios ora nan ta pasa dor di prueba. Tuma por ehempel e hóben Jeff. Su tata a bandoná su famia, lagando Jeff su mama cu shete yu pa cria. “Mi a sinti masha hopi falta di un tata,” Jeff ta admití, kende tabatin solamente 12 aña n’e tempu ei. “Mi a anhelá pa un hende yena e bashí ei cu mi tabata sinti tur dia.” Kico Jeff a haci? “Mi a pidi Jehova pa yudá mi yena e necesidad ei.” Jeff a traha na armonia cu su oracionnan i a enbolbé su mes completamente den actividadnan spiritual. Cu tempu, e por a sinti Jehova su man di apoyo—percurá mediante su spiritu santu fortalecedor i mediante e congregacion cristian. (Compará cu Salmo 27:10.) Awor n’e edad di 27 aña Jeff ta refleccioná: “No tabatin ningun hende cu mi por a acudí na dje pa siguridad, di manera cu mi por a pega mashá na Jehova.” E ta yama e relacion íntimo ei “un bendicion preciosísimo cu a resultá dje prueba aki.”

Con pa Haña Dios Su Yudansa

Bo Amigu celestial lo yudá bo dje mésun manera pa pasa dor di bo dificultadnan. Pero kico abo mester haci? Wel, pa cualkier amistad florecé, mester tin comunicacion. Oracion ta nos manera pa comunicá cu Dios. Mediante oracion nos ta lagu’e sa cu nos tin mester di su yudansa. Pero oracion ta di poco balor si e ta friu i ripititivo. Mescos cu e hóbennan citá ariba, bo mester ‘deshogá bo curason’ na Dios! (Salmo 62:8) Kisas lo bo tin cu asta ofrecé súplicanan. (Filipensenan 4:6) Súplicanan ta oracionnan cu ta hopi intenso i ferviente.

Suponé cu bo tin un problema cu ta dominá bo pensamentunan of bo tin dificultad pa vence un mal custumber. Suplicá Jehova! Rogu’é pa su yudansa den tempu di tentacion. Kisas esaki no ta fácil tur ora. “Ora mi ta sinti hopi gana di haci algu malu, mi ta forsa mi mes pa haci oracion,” Gary a admití. “Tin biaha mi ta pensa, ‘Cu ki cara mi ta acercá Jehova?’ Pero tog mi ta acudí na dje pa yudansa. E ta duná mi e forsa cu mi tin mester pa wanta.” Asta si ta difícil na cuminsamentu, sigui habri bo curason na Dios.

Pero kico si ta parce manera bo oracionnan no ta haña contesta? Lora, por ehempel, tabata lucha pa superá e mal custumber di masturbá. “Mi tabata papia francamente cu Jehova tocante e problema,” e ta splica, “pero gewoon mi no por a stop.” Tin biaha Dios por laga nos mustra con serio nos ta tocante nos peticionnan. (Compará cu Salmo 88:13, 14.) P’esei nos mester persistí den oracion! (Mateo 7:7; Romanonan 12:12) Lora a haci netamente esei. N’e mésun momento, el a cuminsá aplicá sugerencianan cu a aparecé den material tocante e tópico cu a sali den publicacionnan di Sociedad Watch Tower.c Cu tempu, el a cuminsá mira resultado. E ta corda: “Cada biaha cu mi a resistí e tentacion cu éxito, mi tabata gradicí Jehova, pasobra mi tabata sa cu e tabata cu mi.” Ta cierto cu kisas lo bo por haña algun recaida den bo lucha pa dominá bo problema. Pero tanten cu bo ta lucha i no ta entregá deliberadamente na bo debilidadnan, Dios lo keda contentu cu bo ‘esfuersonan sincero’ i lo keda bo Amigu.—2 Pedro 1:5.

Trahando cu Dios

Un otro manera pa bo saca beneficio di Dios su yudansa ta dor di aceptá su invitacion pa ta un di su “colaboradónan.” (1 Corintionan 3:9) Esaki ta incluí participá den yuda otronan siña tocante Dios. (Mateo 28:19, 20) Ora bo ta sintí bo afligí of desanimá, e idea di haci cualkier trabou kisas no ta parce atractivo. Sin embargo, “teniendo hopi di haci den e trabou di e Señor” por ta un berdadero yudansa pa bo. (1 Corintionan 15:58) Lo ménos cu por pasa ta cu bo ta kita bo mente for di bo mes problemanan. (Compará cu Proverbionan 18:1.) Robin, citá anteriormente, ta bisa di su oranan difícil: “Loke a yudá mi sigui padilanti tabata mi trabou pa Jehova!”

Traha huntu cu Dios por yudá bo tambe superá cualkier sintimentu persistente cu Dios a bandoná bo. Ora dos hende ta traha huntu como un tim pa logra un meta comun, no ta asina cu hopi bes nan ta hala mas cerca di otro como amigu? Haciendo e trabou di predicá, lo bo enfrentá desafionan constantemente. Bo ta hañá bo ta acudí na Dios pa yudansa. I segun cu Dios ta bendicioná bo labor, su amistad ta bira mas real. Bo ta cuminsá realisá cuantu Dios ta confia den bo como un colaboradó. Esaki por lanta bo confiansa propio masha hopi mes.

Carol, por ehempel, tabata masha insigur di su mes. Su mama a cometé suicidio, i su tata abusadó tabata humiy’é constantemente. Pero n’e edad di 17 aña Carol a bira un Testigo di Jehova i a cuminsá den e trabou di predicá. Awor despues di dies aña como un evangelisadó di tempu completo, e ta bisa: “E trabou aki a yudá mi tremendamente, pasobra mi a mira Jehova su bendicion riba mi. Mi ta bisa mi mes, ‘Si Dios ta stimá mi, mi no ta sin balor.’ E echo cu Jehova a usá mi pa declará su nomber, a hací mi sinti mas sigur di mi mes.”

“Purba i Mira cu Jehova Ta Bon”

“For di tur mi sustunan [Dios] a librá mi,” Rey David a skirbi despues di a scapa na wowo di angua for di un situacion den cua su bida tabata den peliger. (Salmo 34:4, 6, superscripcion; 1 Samuel 21:10-12) P’esei, David por a bisa di experencia: “Purba i mira cu Jehova ta bon; felis ta e homber físicamente capacitá cu ta busca refugio den dje.”—Salmo 34:8.

Aunke kisas bo bida nunca lo ta den peliger manera esun di David tabata, sigur-sigur lo bo pasa de bes en cuando den algun situacion di stres i tension. Ora ‘afliccionnan den bo curason ta multiplicá,’ suplicá Dios. (Salmo 25:17) No tene miedu cu Dios lo hala atras di ta bo amigu. Segun cu bo ta wanta cu pacenshi i ta experenciá personalmente con Jehova ta apoyá bo i cuidá bo, lo bo “purba i mira” pa bo mes “cu Jehova ta bon.” I lo e keda bo Amigu pa semper.—Santiago 4:8.

[Notanan]

[Plachi na página 29]

Dios ta bandoná su amigunan na momentonan di adversidad?