Loke Bo Ta Bisa Ta “Sí i na Mes Momento Nò”?

At’akí un otro situashon: Un pareha kasá ta invitá un mama soltero di nan kongregashon ku su dos yu muhénan pa bin kome serka nan i pasa un ratu huntu ku nan. E muchanan ta bira masha kontentu ora nan mama bisa nan i ta kuminsá anhelá pa e dia yega. Sinembargo, un dia promé ku e fecha, e pareha ta bisa e mama ku algu inesperá a presentá i ku nan tin ku kanselá e afsprak. Pero despues, e mama ta haña sa e motibu pakiko e pareha a kanselá nan afsprak: Despues ku e pareha a kaba di invitá nan, e pareha a haña un invitashon pa bai serka algun otro ruman e mesun atardi ei i nan a aseptá e invitashon.

Ta klaru ku, komo kristian, nos mester kumpli ku nos palabra. Nunka nos lo ke pa loke nos ta bisa ta “Sí i na mes momento Nò.” (2 Kor. 1:18) No opstante, manera e dos ehèmpelnan ei ta mustra, kada situashon ta diferente. Por sosodé ku nos tin ku kanselá un afsprak. Apòstel Pablo tambe a yega di hañ’é den un situashon asina.

Na aña 55 despues di Kristu, Pablo tabata na Efeso pa su di tres biahe komo misionero. Su intenshon tabata pa krusa Laman Egeo i bai Korinto i for di ei biaha bai Masedonia. I ora e tabata bai bèk Herúsalèm, e tabatin pensá di bishitá e kongregashon di Korinto pa di dos biaha, kisas pa tuma e kontribushon generoso ku e rumannan na Korinto tabatin pa e rumannan na Herúsalèm. (1 Kor. 16:3) Nos ta komprondé esei for di su palabranan na 2 Korintionan 1:15 i 16, ku ta bisa: “Ta ku e konfiansa akí mi tabatin intenshon di bini serka boso mas promé pa di dos biaha, pa asina boso por tabata kontentu atrobe; i despues di un bishita breve serka boso lo mi a bai Masedonia, i di Masedonia bini bèk serka boso, pa boso kompañá mi pida kaminda riba mi biahe pa Hudea.”

Ta parse ku Pablo a skirbi e rumannan di Korinto un karta pa informá nan kiko tabata su plan. (1 Kor. 5:9) Pero djis despues ku el a skirbi nan e karta ei, el a tende di e hendenan di e kas di Kloe ku tabatin desakuerdo serio entre e rumannan den kongregashon na Korinto. (1 Kor. 1:10, 11) E ora ei, Pablo a disidí di kambia su plan i a skirbi nan e karta ku awe nos konosé komo Promé Korintionan. Den e karta ei, Pablo a konsehá i korigí e rumannan na Korinto bondadosamente. Den e karta ei, el a menshoná tambe ku lo e kambia su ruta, esta, ku lo e bai Masedonia promé i despues lo e bai Korinto.—1 Kor. 16:5, 6.a

Ta parse ku ora e rumannan na Korinto a risibí Pablo su karta, algun di e “superapòstelnan” den e kongregashon ei a akusá Pablo di ta inkonfiabel, un hòmber ku no ta kumpli ku su palabra. Pa defendé su mes, Pablo a puntra nan: “Akaso mi no a tuma e asuntu akí na serio ora mi tabatin e intenshon ei? Òf loke mi ta plania pa hasi, mi ta plania nan a base di motibunan egoista, di manera ku mi ta bisa: ‘Sí, klaru ku sí’ i despues: ‘Nò, apsolutamente ku nò?’”—2 Kor. 1:17; 11:5.

Awor, ta bèrdat ku apòstel Pablo “no a tuma e asuntu na serio”? Klaru ku nò! E palabra ku a ser tradusí komo ‘no tuma na serio’ en bèrdat ta duna e idea di ta desformal, refiriendo na un persona inkonfiabel, un persona ku no ta kumpli ku su palabra. Pero Pablo a puntra e kristiannan na Korinto den un forma retóriko: ‘Mi ta plania a base di motibunan egoista?’ E pregunta akí mester a laga nan komprondé bon kla ku e echo ku el a kambia su plannan no tabata pasobra e ta inkonfiabel.

Pablo a refutá e akusashon enfátikamente, bisando: “Meskos ku Dios ta konfiabel, asina tambe loke nos ta bisa boso no ta Sí i na mes momento Nò.” (2 Kor. 1:18) Sin duda, Pablo a kambia su plannan pasobra e tabatin e bienestar di su rumannan na Korinto na pechu. Na 2 Korintionan 1:23 nos ta lesa ku el a kambia su plan di bai Korinto “pa spar” e rumannan di mas tristesa. Sí, el a duna nan chèns di drecha nan asuntunan promé ku e bai personalmente serka nan. I e rumannan a hasi esei pasobra ora Pablo tabata na Masedonia, el a tende di Tito ku su karta en bèrdat a motivá e rumannan na Korinto pa arepentí, i esei a hasi Pablo mashá kontentu.—2 Kor. 6:11; 7:5-7.

Ora e “superapòstelnan” a akusá Pablo di ta un persona ku no ta kumpli ku su palabra, nan lo por tabata ke men tambe ku e mensahe ku e tabata prediká tambe tabata inkonfiabel. Ma Pablo a rekordá e Korintionan ku ta e mensahe enkuanto Hesukristu el a prediká na nan. El a bisa nan: “E Yu di Dios, Kristu Hesus, kende nos, esta, ami, Silvano i Timoteo, a prediká na boso, no a bira Sí i na mes momento Nò, sino ku den su kaso Sí ta Sí.” (2 Kor. 1:19) Akaso Hesukristu, esun ku Pablo a imitá, tabata un hòmber inkonfiabel? Nò! Hesus semper a papia bèrdat, durante henter su bida i su sirbishi na Dios. (Huan 14:6; 18:37) Si loke Hesus a prediká tabata bèrdat apsoluto i fidedigno, apòstel Pablo su predikashon tambe tabata konfiabel pasobra ta e mesun mensahe el a prediká.

No tin ningun duda ku Yehova ta “e Dios di bèrdat.” (Sal. 31:5, NW) Nos por dedusí esei for di loke Pablo a skirbi despues. El a bisa: “Maske kuantu promesa tin di Dios, nan tur a bira Sí pa medio di dje,” esta, pa medio di Kristu. Sí, debí ku Hesus a keda fiel na Dios tempu ku e tabata riba tera, nos por tin sigur ku Yehova su promesanan ta konfiabel. Pablo a sigui bisa: “P’esei ta pa medio di dje [Hesus] tambe nos ta bisa ‘Amèn’ pa nos por duna gloria na Dios.” (2 Kor. 1:20) Pues, Hesus ta e “Amèn,” òf e garantia, ku tur Yehova su promesanan lo kumpli sigur!

Meskos ku Yehova Dios i Hesukristu semper ta papia bèrdat, Pablo tambe su “sí” tabata “sí” di bèrdat. (2 Kor. 1:19) Pues Pablo no tabata un persona inkonfiabel, un persona ku tabata hasi promesa ku “motibunan egoista.” (2 Kor. 1:17) Al kontrario, Pablo tabata un persona ku a laga Dios su spiritu gui’é. (Gal. 5:16) Semper el a trata otro hende bon; semper e tabatin otro hende su bienestar na bista. Semper su “sí” tabata “sí”!

Awendia, ta masha normal pa hende ku no ta biba segun normanan bíbliko primintí algu i despues keda sin kumpli kuné ora kualke kontratempu surgi òf ora nan haña un opshon mas atraktivo. Den e mundu di komèrsio, no ta tur ora hende su “sí” ta “sí,” tin biaha ni sikiera ora nan akuerdonan ta pretu riba blanku. Hopi hende no ta mira matrimonio, un akuerdo palpabel entre dos persona, komo un kompromiso di bida largu mas. Al kontrario, e kantidat di divorsio ku ta oumentando drástikamente ta mustra bon kla ku hopi hende ta konsiderá voto matrimonial komo un promesa di poko importansia ku fásilmente bo por kibra.—2 Tim. 3:1, 2.

Pero kiko di abo? Bo “sí” ta “sí”? Manera e artíkulo akí a mustra na kuminsamentu, tin biaha nos por haña nos ta kanselá un afsprak, no pasobra nos ta hende inkonfiabel ma debí na un situashon fuera di nos kontrol. Pero, komo kristian, nos mester hasi nos bèst pa kumpli ku nos kompromiso- òf promesanan. (Sal. 15:4; Mat. 5:37) Si bo tin kustumber di hasi esei, lo bo bira konosí komo un persona konfiabel, un persona di palabra i ku semper ta papia bèrdat. (Efe. 4:15, 25; Sant. 5:12) Ora hende realisá ku bo ta un persona konfiabel, nan lo ta mas dispuesto pa skucha bo ora bo ta papia ku nan di e bèrdat tokante Dios su Reino. Pues, laga nos hasi sigur pa semper nos “sí” ta “sí”!