Camnando den Sabiduría en Cuanto e Mundo

“Sigi camna den sabiduría pa cu hende djafó.”​—COLOSENSE 4:5.

 1. Kico a confronta hende cristian di promé, i cua conseho Pablo a duna e congregacion den Colosas?

HENDE cristian di promé bibando den stad dje mundo romano tabata confrontá continuamente cu idolatría, buscamento di placer inmoral, i ceremonia i costumber pagano. Esnan cu a biba den Colosas, un stad den west-central di Asia Menor, sin duda tabata confrontá cu e adoracion di dios mama i spiritismo di frigio natural, e filosofía pagano di griego colonial, i hudaísmo dje colonia hudío. Apóstol Pablo a conseha e congregacion cristian pa “sigi camna den sabiduría” pa cu tal hende “djafó.”​—⁠Colosense 4:⁠5.

 2. Pakico Testigo di Jehova djawe tin cu camna den sabiduría en cuanto hende djafó?

² Awendia, Testigo di Jehova ta contra cu mal costumber similar, i asta mas. P’sei, nan també tin cu eherce sabiduría den nan relacion cu hende pafó dje berdadero congregacion cristian. Hopi hende den organizacion religioso i político i també noticiero ta contra Testigo di Jehova. Algun opositor asina ta atacános directamente of, cu mas frecuencia, ta purba di susha e nomber di Testigo di Jehova indirectamente i instiga prehuicio contra nan. Mescos cu cristian di promé tabata considerá inhustamente como fanático i asta un “secta” peligroso, hopi bez den e dia djawe Testigo di Jehova ta e obheto di prehuicio i mal comprendimento.​—⁠Echo 24:14; 1 Pedro 4:⁠4.

Venciendo prehuicio

3, 4. (a) Pakico mundo nunca lo stima cristian berdadero, pero kico nos mester purba di haci? (b) Kico un autora a skirbi tocante Testigo di Jehova detení den concentrasicamp nazista?

³ Cristian berdadero no ta spera pe mundo stímanan, locual, segun apóstol Juan, “ta bao di poder dje malbado.” (1 Juan 5:19) No obstante, e Bijbel ta anima hende cristian pa haci esfuerzo pa gana hende pa Jehova Dios i su adoracion puro. Nos ta haci esei dunando testimonio directo i també cu nos bon conducta. Apóstol Pedro a skirbi: “Mantene boso conducta excelente den e nacionan, afin cu, den loke nan ta papia contra boso como si boso ta malechor, nan, como resultado di boso obra excelente di locual nan ta testigo ocular, por glorifica Dios den e dia di su inspeccion.”​—⁠1 Pedro 2:⁠12.

⁴ Den su buki na inglés Pordoná​—⁠pero no lubida, autora Sylvia Salvesen a bisa di hende muher Testigo di Jehova cu tabata prisionero hunto cuné den concentrasicamp nazista: “E dosnan ei, Käthe i Margarethe, i hopi otronan a yudámi hopi, no solamente pa medio di nan fe sino també di manera práctica. Nan a haya pa nos e promé paña bieu limpi cu nos tabatin pa nos herida . . . En fin, nos a háyanos hunto cu hende cu tabata kier nos bon, i cu a demonstra nan sintimento amistoso cu nan accion.” Ki un testimonio excelente di “hende djafó”!

5, 6. (a) Cua trabao Cristo ta haci ne tempo actual, i kico nos no mag lubida? (b) Nos mester tene cua actitud en cuanto hende di mundo, i pakico?

⁵ Nos por haci hopi pa vence prehuicio den e moda sabí cu nos ta comportános pa cu hende djafó. Ta cierto cu nos ta biba na un tempo ora nos Rey reinante, Cristo Jesús, ta separa hende dje nacionan, “mescos cu wardador ta separa carné for di cabrito.” (Mateo 25:32) Pero, nos no mag lubida nunca cu Cristo ta e Huez; e ta esun cu ta decidi ken ta “carné” i ken ta “cabrito.”​—⁠Juan 5:⁠22.

⁶ Esei mester influenciá nos actitud tocante hende cu no ta parti dje organizacion di Jehova Dios. Nos por pensa di nan como hende di mundo, pero nan ta parti dje mundo di humanidad cu “Dios a stima . . . asina tanto cu el a duna su Yiu unigénito, pa tur hende cu eherce fe den dje no sea destruí sino tene bida eterna.” (Juan 3:16) Ta hopi mas mihor pa considera hende como carné prospectivo en bez di halza i decidi cu nan ta cabrito. Algun hende cu na antes a opone e berdad violentemente, awor ta Testigo di Jehova dedicá. I hopi di nan tabata ganá na principio pa medio di gesto di bondad, promé cu nan a responde na cualkier testimonio directo. Mira, por ehempel, e cuadro na bladji 18.

Celoso, pero no agresivo

 7. E papa a expresa cua crítico, pero nos por haci cua pregunta?

⁷ Papa Juan Pablo II a critica secta en general, i Testigo di Jehova specialmente, ora el a bisa: “E celo casi agresivo cu locual algun ta busca miembro nobo, camnando di cas pa cas, of parando hende na skina di caya, ta un imitacion falso sectaria di ardor apostólico i misional.” Nos por puntra, Si loke nos ta haci ta un “imitacion falso sectaria di ardor apostólico i misional,” unda bo por haya e berdadero celo evangelizador? Siguramente no den hende católico ni tampoco den hende protestante ni den miembro dje religion católico griego.

 8. Con nos mester cumpli cu nos ministerio di cas pa cas, sperando cua resultado?

⁸ No obstante, pa desmenti cualkier acusacion di agresividad den nos dunamento di testimonio, nos semper mester mustra bondad, respet, i cortesía den nos contacto cu hende. Disípel Santiago a skirbi: “Ken ta sabí i entendido den boso? Lagué mustra cu su conducta excelente su obra cu un suavidad cu ta pertenece na sabiduría.” (Santiago 3:13) Apóstol Pablo a consehános pa “no busca gera.” (Tito 3:⁠2) Por ehempel, en bez di condena directamente e kerimento di hende cu ta scucha nos testimonio, pakico no demonstra interés sincero den su opinion? Anto bisa e persona e bon nobo cu e Bijbel ta contene. Cu un demonstracion positivo i mustrando e debido respet pa hende di otro creencia, nos por yúdanan haya un mihor actitud mental i scucha i kizás nan lo mira e balor dje mensahe bíblico. E resultado por ta cu algun hende lo yega di “glorifica Dios.”​—⁠1 Pedro 2:⁠12.

 9. Con nos por aplica e conseho cu Pablo a duna (a) den Colosense 4:5? (b) den Colosense 4:⁠6?

⁹ Apóstol Pablo a conseha: “Sigi camna den sabiduría pa cu hende djafó, cumprando e tempo oportuno pa boso mes.” (Colosense 4:⁠5) Splicando “cumprando e tempo oportuno,” J. B. Lightfoot a skirbi: “No laga ningun oportunidad scapa, di bisa i haci loke por promove e propósito di Dios.” (Nos letter cursivo.) Sí, nos tin cu para cla cu palabra i obra ne tempo oportuno. Tal sabiduría també ta encerrá scogimento di un tempo apropiado durante e dia pa bishitá hende. Si hende ta nenga nos mensahe, ta pa motibo cu nan no ta aprecié, of pa motibo cu nos a bishitánan na un tempo cu probablemente tabata un tempo inoportuno? Pablo a skirbi també: “Laga boso expresion semper sea cu gracia sazoná cu salu, afin di sa con boso mester duna contesta na cada un.” (Colosense 4:⁠6) Esei ta exigi preparacion i berdadero amor pa próhimo. Láganos semper presenta e mensahe di Reino cu gentileza.

Mustra respet i “keda puesto pa tur bon obra”

10. (a) Cua conseho apóstol Pablo a duna hende cristian bibando den Creta? (b) Di ki manera Testigo di Jehova ta ehemplar sigiendo e conseho di Pablo?

¹⁰ Nos no por compromete principio bíblico. En cambio, nos no mag discuti innecesariamente riba cuestion cu no ta toca integridad cristian. Apóstol Pablo a skirbi: “Sigi hácinan [cristian di Creta] corda di keda sumiso i ser obediente na gobierno i autoridad como gobernante, pa keda puesto pa tur bon obra, pa no zundra ningun hende, pa no busca gera, sea razonabel, demonstrando suavidad pa cu tur hende.” (Tito 3:​1, 2) Escolástico bíblico E. F. Scott a skirbi tocante e texto: “Hende cristian no tabatin cu obedece autoridad so, sino tabatin cu keda cla pa cualkier bon obra. Esei . . . kier men cu, ora e ocasion a exigi, hende cristian tabatin cu ser hunto cu e proménan demonstrando un spiritu público. Tin constantemente pegamento di candela, plaga, calamidad di varios sorto, ora tur bon ciudadano ta deseá di yuda nan próhimo.” Den tur e mundo tin hopi ocasion di dalmento di catástrofe, i Testigo di Jehova ta hunto cu e promé hendenan pa haci trabao di alivio. Nan ta yuda no solamente nan rumanan sino també hende djafó.

11, 12. (a) Con hende cristian mester actua en cuanto autoridad? (b) Sumision na autoridad ta inclui kico en cuanto construccion di Salón di Reino?

¹¹ E mesun texto dje carta di Pablo dirigí na Tito ta enfatizá també e importancia di adopta un actitud di respet pa autoridad. Hovenan cristian cu debí na nan posicion di neutralidad ta presenta dilanti huez mester corda specialmente pa camna den sabiduría en cuanto hende djafó. Nan por haci hopi pa mehora of perhudica e nomber dje pueblo di Jehova cu nan aparencia, nan conducta, i e manera cu nan ta papia cu tal autoridad. Nan mester “rindi . . . na ken cu ta exigi onor, tal onor,” i haci nan defensa cu respet profundo.​—⁠Romano 13:​1-7; 1 Pedro 2:17; 3:⁠15.

¹² “Autoridad” ta inclui oficial local di gobierno. Ya cu mas i mas Salón di Reino ta ser construí, tratamento cu autoridad local ta inevitabel. Hopi bez, anciano ta contra cu prehuicio. Pero, nan ta haya cu unda representante dje congregacion ta establece un bon relacion cu autoridad i ta coopera cu bouw commissie, nan por vence tal prehuicio. Hopi bez un bon testimonio ta ser duná na hende cu na antes tabata sa poco of nada tocante Testigo di Jehova i nan mensahe.

‘Si ta posibel, keda na paz cu tur’

13, 14. Cua conseho Pablo a duna hende cristian den Roma, i con nos por apliqué den nos relacion cu hende djafó?

¹³ Pablo a duna e sigiente conseho na hende cristian bibando den Roma pagano: “No paga malu cu malu na ningun hende. Percura cosnan excelente den bista di tur hende. Si ta posibel, tanto como ta depende di boso, keda na paz cu tur hende. No vinga boso, stimánan, sino laga lugar pe rabia; pasobra ta pará skirbí: ‘Vinganza ta di mi; lo mi paga, Jehova ta bisa.’ Pero, ‘si bo enemigo tin hamber, duné cuminda; si e tin sed, duné algo di bebe; pasobra haciendo asina bo por montona piedra di candela riba su cabez.’ No laga malu vencébo, sino sigi vence malu cu bon.”​—⁠Romano 12:​17-21.

¹⁴ Den nos relacion cu hende djafó, nos como cristian berdadero inevitablemente ta contra cu opositor. Den e texto anterior, Pablo a mustra cu e camina di sabiduría ta di haci esfuerzo pa vence oposicion cu accion bondadoso. Tal acto di bondad ta manera piedra di candela cu por liquida enemistad i gana hende opositor pa eherce un actitud mas bondadoso pa cu e pueblo di Jehova Dios, kizás asta lantando nan interés den e bon nobo. Ora esei ta sosode, tal bondad ta vence e maldad.

15. Na ki tempo hende cristian mester tene cuidao specialmente pa nan camna den sabiduría en cuanto hende djafó?

¹⁵ Camnando den sabiduría pa cu hende djafó ta specialmente importante den cas unda cu tin un casá cu no ta den e berdad. Obedencia na principio bíblico ta produci mihor esposo, mihor esposa, mihor tata, mihor mama, i yiu cu ta mas obediente i cu ta studia mas duro na scol. Hende no creyente tin cu mira efecto saludable cu principio bíblico ta tene riba hende creyente. Asina, algun “por ta ganá sin ningun palabra pa medio di conducta” di miembro dedicá dje famía.​—⁠1 Pedro 3:​1, 2.

‘Haciendo loke ta bon pa cu tur’

16, 17. (a) Dios ta keda mashá contentu cu cua sacrificio? (b) Con nos mester ‘haci loke ta bon’ pa nos rumanan i també pa cu hende djafó?

¹⁶ E mihor cos bon cu nos por haci pa nos próhimo ta di hiba e mensahe di bida pe i siñé tocante reconciliacion cu Jehova Dios mediante Jesucristo. (Romano 5:​8-11) P’sei, apóstol Pablo a bísanos: “Mediante [Cristo], láganos semper ofrece na Dios un sacrificio di alabanza, esta, fruta di lip cu ta haci declaracion público di su nomber.” (Hebreo 13:15) Pablo a agrega: “Además, no lubida e hacimento di bon i e compartimento di cosnan cu otro, pasobra tal sacrificio ta agrada Dios mashá.” (Hebreo 13:16) Además di nos dunamento di testimonio na público, nos no mag lubida “hacimento di bon.” Esei ta forma un parti íntegro dje sacrificio cu ta agrada Dios mashá.

¹⁷ Naturalmente, nos ta haci bon pa nos rumanan spiritual, cu por tin necesidad emocional, spiritual, fisical, of material. Pablo a indica esei ora el a skirbi: “Mientras cu nos tin tempo favorable pe, láganos obra loke ta bon pa cu tur, pero specialmente pa cu esnan relacioná cu nos den e fe.” (Galatio 6:10; Santiago 2:​15, 16) Sin embargo, nos no mag lubida e palabra anterior di Pablo: “láganos obra loke ta bon pa cu tur.” Acto di bondad pa cu miembro di famía, cu beciña, of cu colega di trabao por haci hopi pa vence prehuicio contra nos i habri e curazón di hende pe berdad.

18. (a) Nos mester evita cua peliger? (b) Con nos por usa nos bondad cristian como apoyo pa nos trabao di duna testimonio público?

¹⁸ Pa haci esei, nos no tin cu bira amigo íntimo cu hende djafó. Tal asociacion ta potencialmente peligroso. (1 Corintio 15:33) I nos no tin intencion di bira amigo di mundo. (Santiago 4:⁠4) Pero, nos bondad cristian por apoya nos predicacion. Den algun país ta bira cada bez mas dificultoso pa papia cu hende den nan cas. Algun edificio tin warda of aparato di proteccion cu ta prevenínos di haci contacto cu hende den apartamento. Den país desaroyá telefón ta ofrece un oportunidad pa predica. Den casi tur país nos por duna testimonio riba caya. Sin embargo, den tur país, siendo amabel, mustrando cortesía i bondad, i dunamento di yudanza na otro hende ta habri oportunidad pa vence prehuicio i duna un bon testimonio.

Silenciando opositor

19. (a) Siendo cu nos no ta haci esfuerzo pa complace hende, kico nos por spera? (b) Con nos mester haci esfuerzo pa sigi ehempel di Daniel i aplica e conseho di Pedro?

¹⁹ Testigo di Jehova no ta complace hende ni no ta teme hende. (Proverbio 29:25; Efesio 6:⁠6) Nan sa mashá bon cu apesar di tur nan esfuerzo pa ser pagador di belasting ehemplar i bon ciudadano, opositor lo plama mentira malicioso i papia malu di nan. (1 Pedro 3:16) Sabiendo esei, nan ta purba di imita Daniel, di locual enemigo di dje a bisa: “Nos no por haya den e Daniel ei ningun motibo mes [pa acusacion], sino hayé contra dje den e ley di su Dios.” (Daniel 6:⁠5) Nos nunca lo compromete principio bíblico pa complace hende. En cambio, nos no ta busca martirio. Nos ta haci esfuerzo pa biba den paz i obedece e conseho apostólico: “Pasobra asina ta e boluntad di Dios, door di haci bon boso ta silenciá e papiamento ignorante di hende irrazonabel.”​—⁠1 Pedro 2:⁠15.

20. (a) Nos ta keda convencí di kico, i cua animacion Jesús a dúnanos? (b) Con nos por sigi camna den sabiduría en cuanto hende djafó?

²⁰ Nos ta keda convencí di cu nos posicion di separacion for di mundo ta na plena armonía cu e Bijbel. E historia di hende cristian dje promé siglo ta duna apoyo na esei. E palabra di Jesús ta animános: “Den e mundo boso tin tribulacion, pero tene curashi! Mi a vence mundo.” (Juan 16:33) Nos no ta tene miedu. “En berdad, ken ta e homber cu lo hacíbo daño si boso bira celoso pa loke ta bon? Pero aunque boso ta sufri pa causa di husticia, boso ta feliz. Sin embargo, no teme loke pa nan ta un obheto di temor, ni bira molestiá. Mas bien, santifica Cristo como Señor den boso curazón, semper cla pa haci defensa dilanti tur hende cu ta exigi di boso un motibo pe speranza den boso, pero haciendo esei hunto cu un genio suave i respet profundo.” (1 Pedro 3:​13-15) Mientras cu nos ta sigi comportános asina, nos lo sigi camna den sabiduría en cuanto hende djafó.

Pregunta di repaso

◻ Pakico Testigo di Jehova tin cu camna den sabiduría en cuanto hende djafó?

◻ Pakico cristian berdadero nunca por spera pe mundo stímanan, pero nan mester purba di haci kico?

◻ Nos mester tene cua actitud en cuanto hende di mundo, i pakico?

◻ Pakico nos mester ‘haci loke ta bon’ no solamente pa nos rumanan sino també pa hende djafó?

◻ Con nos camnamento den sabiduría en cuanto hende djafó por yúdanos den nos trabao di duna testimonio público?

[Plachi na página 18]

Links: Cristian berdadero den Francia ta yuda nan próhimo despues di un diluvio

[Plachi na página 20]

Acto cristian di bondad por haci hopi pa vence prehuicio

[Plachi na página 23]

Hende cristian mester ta “cla pa tur bon obra”